O le Soifuaga o Iesu ma Lana Faiva

Ua Toe Soifua mai Iesu!

INA ua iloa e fafine ua gaogao le tuugamau o Iesu, ona momoʻe ai lea o Maria le Makatala e taʻu atu ia Peteru ma Ioane. Ae peitai e foliga mai sa faatali ai pea isi fafine i le tuugamau. E leʻi pine, ae faaali mai le agelu ma valaaulia i latou i totonu o le tuugamau.

O i inei na vaaia ai foi e fafine le isi agelu, ma ua faapea atu le tasi o agelu ia i laua: “Aua lua te matataʻu; auā ua ou iloa ua oulua sailia mai Iesu na faasatauroina. E lē o i inei o ia, auā ua toe tu mai o ia, e pei ona fetalai atu ai o ia. Ō mai, inā matamata i le mea na taoto ai o ia. Inā ō atu ia ia vave, ia lua taʻu atu i ona soʻo, ua toe tu mai o ia nai ē ua oti.” O lea i le mataʻu ma le olioli tele, na taufetuli ese ai foi ma nei fafine.

Ua maua atu e Maria Peteru ma Ioane i le taimi lea, ma ua ia lipoti atu ia i laua: “Ua latou aveeseina le Alii i le tuugamau; matou te lē iloa foi le mea ua latou tuuina ai o ia.” Ua taufetuli atu loa aposetolo e toalua. Ua tamoʻe saoasaoa atu Ioane—e mautinoa ona e laitiiti—ma ua muamua ona taunuu o ia i le tuugamau. O le taimi foi lea ua ō ese ai fafine, o lea ua leai se isi o iai. Ua punou ifo Ioane ma autilo atu i totonu o le tuugamau, o loo tu pea i fafo, ma ua iloa atu ai fusi.

Ina ua taunuu atu Peteru, e leʻi faatalatū o ia ae ua ulu atu i totonu. Ua ia iloa atu fusi sa fusifusia ai o ia o taatitia ai i inā atoa ma le ie sa ʻaui ai le ao o Iesu. O loo taʻaiʻai i le mea lava e tasi. Ua ulu atu nei foi ma Ioane i le tuugamau, ma ua ia talitonu ai i le lipoti a Maria. Ae e leʻi talitonu se isi o Peteru po o Ioane faapea ua toe faatuina Iesu, e ui lava sa masani ona Ia taʻu atu ia i latou faapea o le a toe tu mai o Ia. I le lē mautonu, ua toe foi atu ai le  toalua lenei i o la aiga, ae o Maria, o lē na toe foi mai i le tuugamau, ua nofo ai pea.

O le taimi lea, ua faanatinati atu ai isi fafine e taʻu atu i le au soʻo faapea ua toe tu mai Iesu, e pei lava ona poloai ai agelu ia i latou ia faia. A o la taufetuli atu i le saoasaoa na la mafaia, ae faafetaui loa i laua e Iesu ma fetalai atu: “Si oʻu alofa.” Ona faapaʻūū ai lea i ona aao, ua la ifo atu ia te ia. Ona fetalai atu lea o Iesu, “Aua lua te matataʻu; inā ō atu ia, ia lua taʻu atu i oʻu uso, ina ia latou ō atu i Kalilaia, latou te iloa mai ai aʻu.”

E muamua i lena, ina ua lūlū le mafuie ma faaali mai agelu, sa meia fitafita na leoleo ai ma ua pei i latou o ni tagata oti. Ina ua toe malamalama, ona latou ō atu lea i le aai ma taʻu atu i faitaulaga sili le mea na tupu. Ina ua uma ona filifili faatasi ma “toeaina” o tagata Iutaia, ona faia ai lea o se faaiʻuga ina ia taumafai e faia i se auala faalilolilo le mataupu e ala i le faatogafalea o fitafita. Ua faatonuina i latou: “Ia outou taʻutaʻu atu, ‘Na ō mai ona soʻo i le po ua gaoi ia te ia, a o matou momoe.’”

Talu ai ona e ono faasalaina fitafita Roma i le oti pe a momoe a o faia o latou tiute, ua folafola atu ai e faitaulaga: “Afai e oo atu lenei [lipoti e uiga i lo outou momoe] i taliga o le kovana, o le a matou faaoleole ia te ia ma o le a saoloto ai oulua mai le popole.” Talu ai ona e matuā tele ma lava le tau o le faatogafalea, ua faia ai e fitafita e pei ona faatonuina i laua. O le iʻuga, ua salalau atu ai i tagata Iutaia le lipoti sese e uiga i le gaoia o le tino o Iesu.

O Maria le Makatala, o lē na nofo ai pea i le tuugamau, ua atufia i le faanoanoa. Pe o fea o iai Iesu? I le punou atu e autilo i totonu o le tuugamau, ua ia vaaia ai agelu e toalua ia foi ua toe faaali mai e oofu i ofu sisina! O le tasi o loo nofo i ulu ma le isi i vae o le mea sa taatia ai le tino o Iesu. “Funa e, se ā le mea e te tagi ai?” ua la fesili ai.

“Ua latou aveese i loʻu Alii,” o le tali lea a Maria, “ma ou te lē iloa po o fea ua latou tuuina ai o ia.” Ona ia liliu lea ma iloa ai se tasi foi ua ia toe fesili mai: “Funa e, se ā le mea e te tagi ai?” Ma ua fesili atu foi o ia lenei: “O ai ea e te sailia?”

I le manatu faapea ai o le leoleo fanua lenei i le faatoaga o iai le tuugamau, ua fai atu o ia i le tagata: “Le Alii e, afai ua e aveese ia te ia, taʻu mai ia te aʻu po o fea le mea ua e tuuina ai o ia; ona ou aveeseina lea o ia.”

“Maria e,” ua fai atu ai le tagata. Ma ua vave lava ona iloa e Maria, e ala i le auala e masani ona fetalai soo ai Iesu ia te ia, o Iesu lea. “Raponi e!” (o lona uiga le “Aʻoaʻo e!”) ua alaga ai o ia. Ma faatasi ma le olioli tele, na ia tago atu ai ia te ia. Ae ua fetalai atu Iesu: “Aua e te tago mai ia te aʻu, auā ou te leʻi alu aʻe lava i loʻu Tamā; a ia e alu i oʻu uso, ma fai atu ia te i latou, ‘Ou te alu aʻe i loʻu Tamā ma lo outou Tamā, o loʻu Atua ma lo outou Atua.’”

Ua tamoe atu nei Maria i le mea o faapotopoto ai le au aposetolo ma le au soʻo. Ua ia faaopoopo atu ai lana faamatalaga i le lipoti ua uma ona taʻu atu e isi fafine e uiga i lo latou vaaia o Iesu toe faatuina. Peitai, o nei tagata, o ē sa leʻi talitonu i fafine muamua, e foliga mai latou te lē o talitonu foi ia Maria. Mataio 28:3-15; Mareko 16:5-8; Luka 24:4-12; Ioane 20:2-18.

◆ Ina ua iloa le tuugamau ua gaogao, o le ā ua faia e Maria le Makatala, ma o le ā le mea ua tupu i isi fafine?

◆ O ā uiga faaalia o Peteru ma Ioane i le iloa ua gaogao le tuugamau?

◆ O le ā ua fetaiaʻi ma isi fafine i le ala i lo latou ō atu e lipoti le toetu o Iesu i le au soʻo?

◆ O le ā ua tupu i fitafita o loo leoleo, ma o le ā le tali mai a ositaulaga i la latou lipoti?

◆ O le ā ua tupu a o iai na o Maria le Makatala i le tuugamau, ma o le ā le tali mai a le au soʻo i le lipoti a fafine?