Faitauina le Tau o le Siitia atu i se Atunuu Tamaoaiga

O SE vaaiga masani lava i ofisa o konesula i le lalolagi atoa tau atiaʻe: o se potu faatalitali ua matuā feomaʻi i tagata o loo aloalo atu ma le gatete i le faatalanoaina o i latou. E faavae i lena talanoaga puupuu ae tāua, o le a filifilia ai pe mafai ona latou maua se pemita e malaga atu ai i se atunuu tamaoaiga i le itu i Sisifo. E toatele ua talitonu faapea o le a avea lenei pemita ma pepa faamaonia i lo latou manuia. “Sa ou galue malosi mo tausaga e fa, ae leʻi mafai lava ona ou maua se mea e oo lava i se letiō,” na faitio ai se tasi talavou i Aferika i Sisifo. “Ana faapea sa ou i Egelani po o le Iunaite Setete, atonu i le taimi nei ua maua saʻu taavale ma soʻu lava fale ou te nofo ai.”

E lē faigata ona malamalama i le pogai ua oo ai na manatu i le toatele o tagata i atunuu matitiva, tau atiaʻe. E faigata ona maua ni galuega mo i latou, ma e laitiiti le totogi. O le oso maualuga o le tau o le soifuaga ua faaitiitia ai tupe ua faasaoina. Ua faigata ona maua ni fale ma feomaʻi. E ofu e tagata lavalava ua lafoaʻi e i latou o i atunuu tamaoaiga. E toatele ua lagona le puʻea faamanu i ofaga ona o le tulaga lē manuia o le tamaoaiga.

Ma maeu le tālo mai a atunuu mauoa i Sisifo! Na faapea mai se tasi alii talavou i Sierra Leone: “O nisi o ē na ō atu i na atunuu, ua foi mai ma faamatala mai ia i matou tala ua faalototeleina ai i matou ina ia matou ō atu ma vaai i na atunuu tamaoaiga. Ua latou faapea mai e tatau ona e galue mamafa, ae lelei le totogi, e mafai ona e tausia ai oe lava ma oo ai ina e maua ni mea taugata, e pei o se taavale. Ma a e toe foi mai ma se tupe pe tusa ma le lua afe talā, e mafai ona e faatu se pisinisi ma faaipoipo loa.”

E lē o se mea e ofo ai, ona e faapena manatu o nisi auauna a le Atua. Na faapea mai se tuafafine Aferika: “O i matou le au talavou i le faalapotopotoga a le Atua matou te faalogo i talanoaga e uiga i le sologa lelei o isi na ō atu i inā. O lea, i nisi taimi ou te fesili ifo ai ia te aʻu lava, ‘Ae faapefea aʻu? Aiseā ua ou puapuagatia ai i inei? Pe tatau ona ou alu pe tatau ona ou nofo?’ ”

Afai e te mau i se atunuu mativa, atonu o le a faapena foi ona e tau mānatu pe o le siitia atu o le a faaleleia ai le uiga o lou olaga. Ae peitai, o le siitia atu e nofomau i se atunuu ese o se taumafaiga sili ona tele, o se laasaga taugata ma le matuiā. E mafai ona aafia ai i lea le aʻoaʻoina o se gagana fou, mauaina o ni tomai mo galuega fou, faafetaui atu i se aganuu fou, le onosaia o manatu lē fiafia e faaalia e le toatele agaʻi i tagata ese, ma aʻoaʻoina se auala fou atoatoa o le olaga. Peitai, e toatele Kerisiano ua manuia i le faia faapea ma ua faamaonia le avea o ni aogā moni i faapotopotoga i o latou nuu fou, i le avea o ni tagata talaʻi e fai ma faaaʻoaʻo, paeonia, toeaina, ma auauna o le faiva.

E ui i lea, e lē o tagata uma na lelei o latou olaga. O omiga ma faigata o le siitia atu ua iʻu i le faaleagaina ai faaleagaga mo nisi. O lea, e manino lava, o le faia o se gaoioiga faapena e lē tatau lava ona faia e aunoa ma le manatunatu loloto i ai atoa ma le tatalo. Ua fautua mai le Tusi Paia i le Faataoto 3:5, 6: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” Ioe, e te manao ina ia faamautinoa o loo e gaoioi e ōgatasi ma le finagalo o Ieova. (Iakopo 4:13-15) Ma na tuuina mai e Iesu se fautuaga poto e fesoasoani ai ia te oe e faia lenei mea ina ua ia uunaia lana au faalogologo e ‘faitau le tau.’ (Luka 14:28) O lenei mea e aafia ai e sili atu na i lo le manatunatu i tulaga tau tupe. O lona uiga, o le manatunatu lea i tau faaleagaga e tatau ai o le siitia atu ma le nofomau i se atunuu ese.

Uiga Moni o le Olaga i se Isi Atunuu

A o leʻi siitia atu i so o se mea, e ao ona iai ia te oe se manatu lelei ma moni, o mea o e  faatalitalia pe a e oo atu i inā. Pe afai e mafai, ia e muai asiasi atu lava oe i ai ma vaai pe faapeī tulaga o iai. Auā a lē o lea, o le a e faalagolago la i tala e aumai e isi. Ua lapatai mai le Tusi Paia: “O le ua faigofie, e talia e ia upu uma, a o le ua mafaufau, ua faautauta o ia i lona ala.”—Faataoto 14:15.

Ua maua e nisi a latou faamatalaga uma lava e uiga i le olaga i atunuu i Sisifo mai tifaga ma faaaliga i televise. I lea, ua latou talitonu ai o tagata uma lava i inā e mauoa, e fealuai i se taavale fou, ma nofo i se fale taugata. Ae peitai, o le mea moni lava ia, e matuā ese lava. O le tele o atunuu mauoa e iai a latou tulaga e faailogaina ai tagata matitiva, o ē leai ni fale e nonofo ai, ma ē leai ni galuega. Ma o le toatele o tagatānuu e aupito sili ona matitiva o tagata āumau ia e fou atu. Ua faamatala mai e se konesula i le ofisa o le amepasa Amerika i se tasi o atunuu mativa: “E lē o iloa e tagata pagā le faigata ona tau faatu se aiga i Amerika. O nisi ua latou tusi atu ni tusi i o latou aiga e taʻu atu i ai le lelei o le tulaga ua latou iai—le auala ua faatau ai a latou taavale e lua ma le fale—ae o le upu moni, o loo latou matuā tauivi malosi pea.”

I so o se mea, e faapena le tulaga o loo iai. O Mr. Sahr Sorie o se tagata aʻoga i Aferika i Sisifo o lē na ola ma aʻoga i Lonetona. Na ia faapea mai: “E lē faigofie ona siitia mai Aferika ma faamautu i Egelani. E matuā toatele lava tagata āumau o loo ola i se olaga mativa. E te iloa atu lava i le maanuminumi o o latou mata le faigata. Ua iloa e nisi le faigata ona tau faaputu se 20 pene e vili ai se telefoni. E masani ona latou nonofo faatasi ma le isi toatele i se potu e na o le toatasi le tagata e tatau ona nofo ai, ma le na o le tasi le mea faamafanafana e faamafanafana ai i latou. E na o ni nai galuega laiti e lē manaomia ai se tomai tele e mafai ona latou maua, ae oo lava i na galuega, e lē lava e totogi ai a latou pili. O i latou e tuua Aferika ina ia sola ese ai mai le mativa, e masani lava ona latou iloa ai ua latou i se tulaga sili atu ona leaga i vaega feomaʻi palapalā o Europa.”

O omiga tau tupe e ō mai faatasi ma le taumafai e faamautu le aiga i se nuu fou e faigofie ona mole ai faaleagaga se tasi. (Mataio 13:22) E moni o loo fautuaina i le Tusi Paia le galue mamafa. (Faataoto 10:4; 13:4) Ae o le toatele o ē ō atu i na atunuu, ua faamalosia ina ia faia ni galuega se lua po o se tolu ina ia mafai ai ona ausia o latou sini tau tupe—pe na ona faafetaiaia ai foi o manaoga masani. Ua itiiti pe ua leai ai foi se taimi e tausisia ai le tapuaiga a le Atua. Ua faagaloina sauniga faa-Kerisiano, suesuega faale-Tusi Paia, ma le faia o se sao i le tufaina atu o le upu moni o le Tusi Paia i isi. Ua faamaonia ai le matuā moni o upu a Iesu Keriso: “Tou te le mafaia ona auauna i le Atua atoa ma [Oa].”—Mataio 6:24.

Omiga Tau Amio

E ao foi ona e manatunatu i le tu o amioga a lou nuu fou o le a e mau ai. Ua taʻu mai e le Tusi Paia ia i tatou faapea sa filifili Lota e mau i le Itumalo o le Ioritana. Mai i le tulaga tau i mea faitino, ua foliga mai ai e atamai lana filifiliga, auā “ua lafulemu uma lava . . . , e pei o le faatoaga a Ieova.” (Kenese 13:10) Ae peitai, o tuaoi fou o Lota sa “matua agasala lava i luma o Ieova”—o ē faia amioga faaleituaiga lē faalenatura (tauatane)! (Kenese 13:13) O le iʻuga, “o lea tagata amiotonu, sa tiga lona loto faamaoni a o nofo faatasi ma i latou, i lona vaai atu ma faalogo atu i lea aso ma lea aso, i a latou amio faaletaupulea.”—2 Peteru 2:8.

E faapena foi aso nei, o le siitia atu i le itu i Sisifo atonu o le a faafeiloai atu ai oe ma lou aiga i omiga tau amio ma tofotofoga, na e sili atu ona faigata na i lo i lou lava nuu moni. E faaopoopo atu i ai, atonu o le a lē faaaloalogia tagata matutua, na i lo le mea sa iai i latou i le aiga. Atonu e faamalosia ai le faaaloalo mo mātua. Atonu e itiiti se fiafia o tuaoi o le tasi i le isi. E mafai faapefea ona aafia oe ma lou aiga i na omiga? O se mea lenei e ao ona tuuina atu i ai le manatunatu loloto ma le tatalo.

Le Toesea o Mātua

Ua filifili nisi mātua e tuua o latou aiga ae ō na o i latou. O a latou fuafuaga o le auina mai lea i o latou aiga pe afai e mautu lelei, ia pe atonu e toe foi atu ma latou i aiga, ni tupe se tele. Pe o se fuafuaga atamai lea?

Ua tuu atu e le Tusi Paia le tiute i mātua e saunia mea mo manaoga faaletino o o latou aiga, ma i nisi o tulaga matuiā, atonu ua itiiti ai se filifiliga e faia e se matua ae ia galulue i na atunuu ina ia mafai ai ona maua na sauniuniga. (1 Timoteo 5:8) Ae tumau pea foi ona iai i mātua le tiute o le tausia o manaoga faaleagaga o o latou aiga. Fai mai le Afioga a le  Atua: “O outou tamā foi, aua neʻi tou faaonoono atu i a outou fanau, a ia tausi atu i ai i aoaiga ma apoapoaiga a [Ieova].”—Efeso 6:4.

Faamata e mafai e se tamā ona faia ma le uigā lenei mea pe afai e alu ese mai lona aiga mo ni masina po o ni tausaga i nisi o taimi? E lē faapena. O lea e tatau ona e manatunatu pe fetaui so o se aogā faitino ua e mauaina, ma āuga o le a oo i lau fanau ona o lou toesea. E lē gata i lea, e masani lava ona iloa e tagata āumau faapea e leai lava se auala faigofie e mafai ona maua ai lo latou “manuia” e pei ona latou manatu ai. Afai e lē mafai e lē o aumau ona totogi mo le fai malaga atu o le aiga, o le a faatosotoso ai lava la le teteaga mo ni tausaga. I lea itu, e mafai ona faatupu ai ni tulaga mataʻutia matuiā tau amio. (Faatusatusa le 1 Korinito 7:1-5.) E faanoanoa lava e fai atu, o nisi sa iai i na tulaga faigata, ua oo ina lolo atu e faia amioga lē mamā faaleituaiga.

Faatuatua i Sauniuniga a le Atua

A o agaʻi ina sili ona leaga tulaga o le tamaoaiga i le lalolagi, e lelei ona manatua faapea, e lē tatau i auauna a le Atua ona fefefe faapea o le a tuulafoaiina i latou. Na fetalai Iesu: “Aua neʻi outou popole, ma faapea ane. Ni a mea tatou te aai ai, ni a foi mea tatou te inu ai, ni a foi mea tatou te oofu ai? auā o mea uma ia ua sailia e nuu ese. Auā ua silafia e lo outou Tamā o i le lagi e aoga ia mea uma ia te outou. A ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou.”—Mataio 6:31-33.

O loo auauna Molimau a Ieova i aso nei mo faanaunauga o le Malo o le Atua e ala i le folafolaina atu ma le maelega o le tala lelei. (Mataio 24:14; 28:19, 20) I le tele o atunuu matitiva, o loo iai se manaoga matuā tele mo ni tagata talaʻi o le Malo. Ae maise lava, o loo iai se manaoga mo ni toeaina ma ni auauna o le faiva taʻumatuaina. Na i lo o le alu atu i se atunuu e manuia tau tamaoaiga i le mea e lē o tele ai se manaoga mo ni tagata talaʻi, e toatele ua filifili e nonofo pea i o latou lava atunuu moni. Ua faapefea ona mafaia e nisi lena tulaga?

O Alethia, o se tuafafine i Aferika i Sisifo o lē na auauna i le auaunaga paeonia faataimi atoa mo le 30 tausaga i lona lava atunuu moni, o lana tala lenei na fai mai: “Sa iai se avanoa e mafai ai ona ou ola i se isi atunuu. Ae o le pogai na ala ai ona ou lē faia faapea, ona sa ou manao ou te faatasi ma oʻu lava tagata ma aiga. Ou te olioli e fesoasoani ia i latou e aʻoaʻo le upu moni ina ia mafai ai ona matou auauna faatasi ia Ieova. E leai lava se mea e tasi na ou misia i loʻu nofo ai pea i inei, ou te lē o faanoanoa foi i se mea e tasi.”

E faapena foi Winifred o lē e nofo i se atunuu o Aferika. O le uiga o le tulaga faaletino o le olaga i inā, e faatatauina o se tulaga matuā sili ona maulalo i le lalolagi. Ae ina ua mavae le 42 tausaga i le auaunaga paeonia faataimi atoa, ua faapea mai o ia: “E lē faigofie pea ona faafetaiaia le tulaga tau tamaoaiga. O loo taumafai pea Satani e faafaigata mea, ae e saunia pea e Ieova mea mo aʻu ma tausia oʻu manaoga.”

I taimi anamua o Aperaamo “ua na mautinoa foi, e mafai [e le Atua] ona faia o le mea na folafolaina e ia.” (Roma 4:21) Pe faapena foi lou mautinoa faapea e mafai e Ieova ona faataunuu lana folafolaga ma tausia oe pe afai e te faamuamua faanaunauga o le Malo i lou olaga? Pe e te ioe faatasi ma le faisalamo o lē na tusi: “E sili ona lelei ia te au o le tulafono a lou [le Atua] fofoga i afe o auro ma ario”? (Salamo 119:72) Pe faamata o iai se manaoga mo oe e faatatauina atoatoa atili ai le fautuaga a le aposetolo o Paulo? I le 1 Timoteo 6:8, na ia tusi ai: “Afai ua maua e i tatou o mea e aai ai ma mea e oofu ai, ia gata ai o tatou manao.” Pe faamata o le mea poto e ao ona fai, o le ʻaua le sailia ni siosiomaga fou, ae ia faia le mea aupito sili e te mafaia i mea o loo e nofo ai i le taimi nei?

O tulaga o le tamaoaiga i le tele o atunuu e mafai ona faapogaia ai tulaga faigata mo Kerisiano. I lea, pe afai i le uma ona iloiloina o vala moni uma e aafia ai, ua filifili se aiga e siitia atu i se isi atunuu e mau ai, e leai la se mafuaaga mo isi e faitio ai. (Kalatia 6:5) O i latou o loo nonofo pea, e mafai ona latou fesili atu pea ia Ieova i le feagai ai ma faigata o loo aumaia e lenei faiga o mea, a o latou olioli i faamanuiaga faaleagaga ua aumaia e le Atua ia i latou. Ia manatua, ua toe o se aga ona faasaʻosaʻoina loa lea e le Malo o le Atua faamasinoga lē tonu uma ma mea lē talafeagai o lenei lalolagi. Ona pei loa lea o le mea na tusi ai le faisalamo: “O loo e [Ieova] faamafola lou aao, ma faamaoona le manao o mea ola uma lava.”—Salamo 145:16.