O le Soifuaga o Iesu ma Lana Faiva

O Isi Faaalia mai o Iesu

O LOO mafatia pea loto o le au soʻo. Latou te lē mafai ona iloa le uiga o le gaogao o le tuugamau, ma latou te lē o talitonu foi i le lipoti a fafine. O lea, mulimuli ane i le Aso Sa, na tuua e Kaleopa ma se isi soʻo Ierusalema e ō atu i Emau, o se mamao e tusa ma le fitu maila (11 kilomita).

I le ala, a o la talatalanoa i mea na tutupu i le aso, ae faatasi atu loa se tagata ese ia i laua. “O ā ea ia upu ua oulua felafolafoai ai, o oulua o savavali?” ua ia fesili atu ai.

Ua tutū le au soʻo, ua mata faanoanoa, ma ua tali atu Kaleopa: “Pe na o oe ea lē āumau i Ierusalema ma le lē iloa o mea ua tutupu ai i ona po nei?”

“O ā mea?” ua ia fesili atu ai.

“O mea ia Iesu le Nasareta,” ua la tali mai ai. “Na tuuina atu o ia e le au faitaulaga sili ma o tatou faipule, ia faasalaina o ia ia oti ma faasatauroina o ia. Sa matou faamoemoe foi o ia lava o le a togiolaina Isaraelu.”

Ona faamatala atu lea e Kaleopa ma lana uo mea ofoofogia na tutupu i lea aso—o se tala e uiga i le vaaiga ofoofogia i ni agelu ma le tuugamau ua gaogao—ae na taʻutino atu lo la lē malamalama i le uiga o nei mea. Ona matuā aʻoaʻi atu lea o le tagata ese: “Tagata vālea, ma loto faigata ona talitonu i mea uma ua fai mai ai le au perofeta. E lē tatau ea ona tiga o le Keriso i mea faapena, i le oo ai o ia i lona mamalu?” Ona ia faamatala atu lea mo i laua fuaitau mai tusitusiga paia e faatatau i le Keriso.

Mulimuli ane ua latou latalata atu i Emau, ma e foliga mai o le a malagaloa le tagata ese. I le manao e fia faalogo i nisi mea e tele, ua pulunaunau atu le au soʻo: “Tatou nonofo ma i maʻua nei, auā ua taugagaifo le la, ua lata i le afiafi.” O lea ua nonofo ai mo se taumafataga. A o ia fai le tatalo ma tofitofi le areto ma tuu atu ia i laua, ona la iloa ai lea o Iesu moni lava lenei ua liua i se tino tagata. A ua mou o ia.

O lea la ua la malamalama nei maeu le tele o mea e silafia e le tagata ese! “E leʻi mu ea o ta loto i totonu ia i taʻua,” ua la fesili ai, “ina ua fetalai o ia ia te i taʻua i le ala, ina ua faamatala mai foi e ia o Tusi ia te i taʻua?” E aunoa ma le toe faatali, ona la tutū lea i luga ma toe foi faanatinati atu i Ierusalema, o inā na la maua ai le au aposetolo ma ē o faapotopoto faatasi ai ma i latou. A o leʻi fai atu e Kaleopa ma lana uo se upu, ae ua lipoti atu ma le fiafia e isi: “E moni, ua toe tu le Alii, ua faaali foi o ia ia Simona.” Ona faamatala atu lea e le toalua lea le auala na faaali atu ai foi Iesu ia te i laua. O lona faafa ai lea ona faaali Iesu i le aso lea i tagata eseese o lona au soʻo.

E ui lava o loo loka faitotoa o le fale o iai le au soʻo ona o lo latou fefefe i tagata Iutaia, ae ua faafuaseʻi ona faaali atu i ai Iesu, o le faalima lea. Ua tu o ia i le lotolotoi o le au soʻo ma fetalai atu: “Ia outou manuia.” Ua matuā fefefe i latou, fa te i latou o le agaga ua latou vaaia. O lea, i le faamatala atu faapea e lē na o se faaaliga o ia, ua fetalai atu Iesu: “ Se ā le mea ua outou atuatuvale ai? se ā foi e tutupu ai masalo i o outou loto? Ia outou vaavaai mai i oʻu lima ma oʻu vae, auā o aʻu lava lenei; ia outou tagotago mai ia te aʻu, ma ia vaavaai mai, auā o le agaga e leai sona aano ma ni ivi, pei o aʻu nei ua outou vaavaai i ai.” Ae ua tumau pea ona latou faaletonu e talitonu ona o lona toe soifua mai o se mea e faigata tele ona talitonuina.

Ina ia fesoasoani ia i latou e puea faapea  o ia moni lava o Iesu, ua ia fesili atu: “O i inā ea ni a outou mea e ʻai?” Ina ua uma ona talia se fasi iʻa tunu ma taumafa ai, ona amata lea ona ia aʻoaʻo i latou, i le faapea atu: “O upu ia na ou fai atu ai ia te outou, ina o oʻu ia te outou [a ou te leʻi maliu]; e tatau ona taunuu o mea uma ua tusia ia te aʻu i le tulafono a Mose, ma le au Perofeta, ma Salamo.”

I le faaauauina o le mea, i lona uiga na faia ai se suesuega faale-Tusi Paia ma i latou, ua aʻoaʻo atu Iesu e faapea: “Ua faapea ona tusia, e faapea foi ona tatau ina tiga o le Keriso, ma toe tu nai ē ua oti i le aso tolu; ina ia talaʻiina foi le salamō ma le faamagaloina o agasala i nuu uma i lona igoa, e amata mai i Ierusalema. O molimau foi outou i nei mea.”

E iai se mafuaaga ua lē auai ai Toma i lenei sauniga matuā tāua i le afiafi o le Aso Sa. O lea, i aso na mulimuli mai ai, ua taʻu atu ai ma le olioli e isi ia te ia: “Ua matou iloa atu le Alii.”

“Afai ou te lē vaai atu i ona lima, i mea na tutuʻi ai fao,” ua tetee atu ai Toma, “ma tuu loʻu tamatamai lima i mea na tutuʻi ai fao, ma tuu loʻu lima i lona itu, ou te lē talia lava.”

Ia, i le valu aso mulimuli ane, ua toe faapotopoto foi le au soʻo i totonu o le fale. O le taimi lea ua faatasi ai Toma ma i latou. E ui lava o loo loka faitotoa, ae sa toe tulai mai foi Iesu i totonu o la latou faapotopotoga ma faapea atu: “Ia outou manuia.” Ona ia faliu atu lea ia Toma, ua ia valaaulia o ia: “Au mai ia lou tamatamai lima i inei, vaai mai foi i oʻu lima; au mai ia foi lou lima ma tuu mai i loʻu itu; aua foi e te masalosalovale, a ia e talitonu.”

“Loʻu Alii e, ma loʻu Atua e,” ua alaga ai Toma.

“Ua e talitonu auā ua e vaai mai ia te aʻu?” ua fesili atu ai Iesu. “Amuia o ē lē vāai mai, ae talitonu mai pea.” Luka 24:11, 13-48; Ioane 20:19-29.

◆ O ā fesili ua faia e le tagata ese i soʻo e toalua i le auala i Emau?

◆ O le ā ua fai atu ai le tagata ese ua faapogaia ai le mu o loto o soʻo?

◆ Ua faapefea ona iloa e le au soʻo faapea o Iesu o le tagata ese lea?

◆ Ina ua foi atu Kaleopa ma lana uo i Ierusalema, o le ā le tala fiafia ua la faalogo i ai?

◆ O le ā le faaaliga lona lima na faia e Iesu i lona au soʻo, ma o le ā le mea na tupu i lea taimi?

◆ O le ā ua tupu i le valu aso mulimuli ane ina ua uma le faaalia mai faalima o Iesu, ma ua faapefea ona faamautinoa ia Toma i le iʻuga faapea ua toe soifua mai Iesu?