O Nei le Taimi e Saili ai ia Ieova

“O loo silasila mai Ieova mai le lagi i le fanau a tagata, ina ia silafia pe ai se tasi ua poto, se ua saili [ia Ieova, “NW”].”—SALAMO 14:2.

1, 2. (a) Ua faapefea ona manatu le toatele i le Atua moni, o Ieova? (e) E faapefea ona tatou iloa o loo silafia e Ieova le faaleogalua o le fanau a tagata?

I ASO nei, ua teena ai le Atua moni, o Ieova, e i latou e lē talitonu e iai se Atua, i latou e lē iloa le Atua, o ē tapuai i atua sese, ma le faitau miliona o ē faapea mai e talitonu i le Atua ae faafitia o ia i a latou galuega. (Tito 1:16) E toatele e talitonu e pei o le faifilosofia Siamani o lona 19 o senituri o Nietzsche faapea “ua maliu le Atua.” Pe o lona uiga e lē o silafia e Ieova lenei faaleogalua faavalevalea? Leai, auā na ia faagaeeina Tavita e tusia: “Ua fai ifo le tagata valea i lona loto, E leai se [Ieova, NW]. Ua leaga lava i latou; ua inosia a latou amioga; e leai se tasi ua amio lelei.”—Salamo 14:1.

² Na faaauau ona faapea mai Tavita: “O loo silasila mai Ieova mai le lagi i le fanau a tagata, ina ia silafia pe ai se tasi ua poto, se ua saili [ia Ieova, NW].” Ioe, o loo silafia e le Alii Silisiliese i latou o ē saili atu ia iloa ma auauna ia te ia. O lea, o lo tatou sailia nei o ia ma le loto naunau e matuā tāua. O lona  iʻuga a lē o le ola e faavavau, o le soloiesea e faavavau.—Salamo 14:2; Mataio 25:41, 46; Eperu 11:6.

3. O le ā le faamoemoe ua iai mo le lumanai?

³ O lea la, ua mafai ona tatou iloa le pogai e matuā tāua ai ona tatou fesoasoani i isi ia saili nei ia Ieova. O loo iai pea le faitau miliona o tagata e leʻi feiloai lava ma se tasi o Molimau a Ieova pe faalogo i le “tala lelei o le malo.” Ma tatou te lē iloa po o le ā le telē o le aofaiga o le “motu o tagata e toatele” o le a iai a o leʻi oo mai le “puapuaga tele.” Ae mautinoa o loo iai le faamoemoe e toatele nisi o le a saili ma mauaina Ieova le Atua i le lumanai lata mai a o leʻi tuai tele. O le fesili nei la, O le ā e mafai ona tatou faia e fesoasoani ai i lena mano e toatele ia maua le Atua?—Mataio 24:14; Faaaliga 7:9, 14.

4, 5. I la latou sailiga mo se atua, o le ā ua sili atu i le toatele?

⁴ I aso nei e toatele tagata i le lalolagi o loo saili, ae saili mo le ā? E toaitiiti a o loo matuā sailiili i le Atua moni, o Ieova. O le anoanoai o tagata e sili atu ia i latou se atua e fetaui ma o latou lava faanaunauga totino ma manatu e lē faavaea. E pei ona taʻua e se tagata faifaatatauga i le Iunaite Setete o George Gallup, Jr. e faapea: “E matuā faigata lava ona e maua se eseesega tele i le va o ē lolotu ma ē lē lolotu i tulaga e pei o le faaʻoleʻole, faatumu pepelo o lafoga, ma nai gaoi laiti, ae maise ona o le tele o faiga faavafealoai a lotu.” Ua ia faaopoopo mai “o le toatele ua na ona latou tuu faatasia o se lotu e logoleleia mo i latou ma faagaee ai i latou . . . Ua taʻua e se tasi o le lotu tuufaitalia.”

⁵ O isi o le a faapea mai, “Ua lava ma totoe ia te aʻu laʻu lotu.” Saʻo, ae o le fesili e ao ona faapea, “Pe ua lava ma totoe laʻu lotu i le Atua?” E moni, o le toatele o tagata i Kerisinetoma ma Faa-Hinitu ua latou ioe e ifo i a latou faatusa ma tupua. Ua iloa e le anoanoai o ē ua taʻua o Kerisiano faapea ua lava a se atua Tolutasi e leai se igoa mo i latou. Ma e sili atu i le 900 miliona tagata Musalimi e talitonu ia Alā. I le isi itu, e faitau miliona i latou e lē talitonu i le Atua ua faapea mai e leai se Atua.

I Latou e Manaomia le Fesoasoani

6. O le ā ua maua e le toatele o le au faitau o Le Olomatamata?

⁶ Ae faapefea i latou o i tatou o ē faitauina pea lenei mekasini? Ua tatou sailiili mo le Atua moni ma ua mauaina o ia. Ua tatou faamaonia le moni o upu a Iakopo 4:8: “Faalatalata atu i le Atua, ona faalatalata mai lea o ia ia te outou.” I le toʻaaga e auaumea ma le faapotopotoga Kerisiano, tatou te tosina vavalalata ai i le Atua, ma ua tatou iloa lava e i tatou le tosina vavalalata mai o Ieova ia i tatou.—Ioane 6:44, 65.

7. E faapefea ona tatou iloa o loo toatele pea tagata o ē ua naunau e avea ma ē toʻaaga i le upu moni?

⁷ Peitai, ua tatou iloa o loo toatele pea ē ua fiafia e auaumea faatasi ma tagata o Ieova mai lea taimi i lea taimi ae e leʻi faia lava se gaoioiga maumauai e tosina vavalalata ai ia Ieova e ala i le tuuina atu ma papatisoina. E faapefea ona tatou iloa lenei mea? I le 1990, toeitiiti lava atoa le sefulu miliona o tagata na auai i le Faamanatuga o le maliu o Iesu. Ae e toafia o loo toʻaaga e faasalalauina le tala lelei o le Malo? E na o le silia i le fa miliona. O lona uiga e pe ā ma le ono miliona ē o loo fiafia i le upu moni ma i nisi taimi latou te olioli ai e auaumea ma i tatou ae latou te leʻi amataina lava ona tala atu le gagana mamā o le upu moni e ala i le talaʻia o le tala lelei o le Malo. E aunoa ma le masalosalo, i nisi o tulaga lē maalofia, e toatele latou te tautatala e fai ma sui o Ieova ma le pulega a lona Malo. Peitai, latou te leʻi faailoaina lava ma le manino i latou o ni Molimau a Ieova. Tatou te mananao foi e fesoasoani ia i latou ia.—Sefanaia 3:9; Mareko 13:10.

8, 9. (a) O le ā ua faalaeiauina i tatou e Ieova ia faia? (e) Aiseā ua lē atamai ai ona faatalalē i fautuaga a Ieova?

⁸ Tatou te mananao e faalaeiau i latou na ia fiafia, o ni Molimau toʻaaga a Ieova i le vaega faaiʻu o le galuega tele ua faataunuuina nei i le lalolagi aoao. Faamolemole matau le valaaulia alofa a Ieova i le Faataoto 1:23: “Liliu mai ia i laʻu aoaiga; faauta, ou te liligi atu loʻu Agaga ia te outou; ou te faailoa atu aʻu upu ia te outou.” (Faatusatusa Ioane 4:14.) Maeu le faamalosiau i le iloa faapea o  le a tali mai Ieova i lo tatou uia o ni laasaga maumauai e faailoaina ai i tatou lava faatasi ma lona suafa ma lana tapuaiga! E mautinoa, tatou te lē mananao e aofia ai ia i latou na ua faamatalaina i le Faataoto 1:24, 25: “Na ou valaau, a e lei mafafai outou; na ou faaloaloa loʻu lima, a e leai se na faalogo mai; na outou teena laʻu pule uma lava, ma outou le mafafai i laʻu aoaiga.”

⁹ O i latou o ē lafoaia le fautuaga a Ieova e saili mo ia manū o maua o ia, ma o ē ua faatuutuu i a latou faaiʻuga seia latou vaai moni lava ua amata le puapuaga tele, o le a latou iloa ua tuai tele ona latou faatali. O sea auala e faaalia ai le leai o se faatuatua ma se atamai ma o le a misia ai le alofa tunoa o Ieova.—2 Korinito 6:1, 2.

10. Aiseā e mataʻutia ai le lē manatu mamafa, ma le faaleogalua?

¹⁰ Ina ia faataʻitaʻia le manaoga mo se gaoioiga faanatinati, pe seʻiloga ea ua maua faalua oe i le niumonia ona faatoʻā e mulimuli loa lea i le fautuaga aogā a le fomaʻi? Pe na i lo lena, i le taimi lava na e matauina ai uluai āuga o le maʻi? Aiseā la e faatuatuai umi ai ona e vavaeese mai le lalolagi faamaʻia a Satani ma auai faatasi ma Ieova ma ana Molimau? Ua faamanino mai i le Faataoto 1:26-29 iʻuga o le lē manatu mamafa, le faaleogalua, ma le faatalalē e faapea: “O le mea lea, ou te ʻata ai aʻu i lo outou malaia; ou te tauemu pe a oo mai lo outou fefe . . . Ona latou valaau mai ai lea ia te au, a o aʻu, ou te le tali atu ai; latou te sailiili mai ia te au, a e latou te le maua aʻu. Na latou ʻinoʻino i le poto; ua latou le manao foi i le mataʻu ia Ieova.” Talosia ia aua neʻi maua mai i tatou o ‘saili mo Ieova’ ae ua fai si tuai!

11. O le ā le fesoasoani o loo avanoa mo i latou o loo saili e auauna i le Atua?

¹¹ O nisi o ē faitau i lenei mekasini atonu o loo faia pea a latou sailiiliga mo le Atua moni. Matou te fiafia ona o loo faaauau pea a outou sailiga. Matou te tatalo o le a faapea ona uunaia outou e lo outou iloa o le Tusi Paia e uia atili ai se gaoioiga maumauai ia tutū mausalī i le upu moni. Ia outou mautinoa ua nofo sauni faapotopotoga taitasi a Molimau a Ieova e fesoasoani atu ia te outou i a outou sailiga.—Filipi 2:1-4.

Le Taimi mo le Maelega ma Gaoioiga

12, 13. Aiseā e manaomia ai ona tatou faia se gaoioiga e faatatau i le tapuaiga moni?

¹² Aiseā e matuā manaomia ai e i tatou uma lava ona faia se gaoioiga e faailoaina ai i tatou lava ma Ieova le Atua ma lana tapuaiga moni? Auā ua agaʻi atu mea tutupu o le lalolagi mo lona taualuga. Ua saoasaoa atu le suia o le talafaasolopito na i lo o le mea e mafai ona faitauina e tagata. E lē o se taimi lenei e tietie ai i luga o le pa pe faaleogalua. Sa matuā manino ona taʻua e Iesu: “O se le ʻau ia te au, e ʻau ese lea ia te au; o se le faaputu faatasi ma aʻu, e faataapeape lea.” Na ia faapea mai foi: “Ai se mā ia te au ma aʻu upu, e mā foi ia te ia le Atalii o le tagata, pe a sau o ia i lona mamalu, ma lo le tamā,  ma le au agelu paia.”—Mataio 12:30; Luka 9:26.

¹³ O nei la le taimi mo le maelega ma gaoioiga! Ua tatou iloa le itulagi o loo agaʻi atu i ai mea tutupu o le lalolagi, ma o loo faapena ona faamalumalu mai Amaketo i le tafatafailagi. O le valaau la, ia saili nei ia Ieova manū o maua o ia, a o leʻi oo mai le ʻaso o lona toasā.’ O le a matuā tuai lava, pe a oo mai le puapuaga tele.—Sefanaia 2:2, 3; Roma 13:11, 12; Faaaliga 16:14, 16.

14. O ā mafuaaga ua ia i tatou mo le sailia o le Atua?

¹⁴ O le mea moni, e ao i le fanau uma a tagata ona sailia nei le finagalo malie o le Atua. Sa faaupuina ma le talafeagai e le aposetolo o Paulo i le Galuega 17:26-28: “Ua faia foi e [le Atua] nuu uma o tagata i le toto e tasi, ia nonofo i le fogaeleele uma lava, ua na tuu foi tausaga na tofia anamua, ma tuaoi o mea latou te nonofo ai; ina ia latou saili i le [Atua], pe mafai ona latou tautāgotago ma latou iloa o ia; a e peitai e le mamao o ia ma i tatou taitoatasi. Auā o ia o loo ola ai i tatou, ma gaoioi ai, o loo i ai foi i tatou talu o ia.” O le faaupuga lena e mulimuli, “auā o ia o loo ola ai i tatou, ma gaoioi ai, o loo i ai foi i tatou talu o ia,” ua na aumaia ia i tatou se mafuaaga e lava ma totoe mo le sailia o le Atua. Faafetai i le alofa tunoa o Ieova, ua tatou iai i le pumoomoo ae o se siomaga matuā tāua o lenei lalolagi lamoʻimoʻī. Pe lē tatau ea ona tatou loto faafetai i le Alii Silisiliese o le vateatea aoao? Ma pe lē tatau ea ona tatou faaalia lo tatou loto faafetai i ni auala faatino?—Galuega 4:24.

15. (a) O le ā na manatu i ai le tusitala faasolopito o Arnold Toynbee faapea o le fuafuaga lea o se tapuaiga maualuga? (e) O le ā e tatau ona tatou faia ina ia mafai ai ona tatou vivii i le Atua?

¹⁵ Na tusia i se tasi taimi e le Tusitala faasolopito o Arnold Toynbee e faapea: “O le fuafuaga moni o se tapuaiga maualuga o le faasusulu atu lea o fautuaga faaleagaga ma upu moni o ana aʻoaʻoga i le tele o solu e mafai ona ia ausia, ina ia gafatia ai e ia solu taitoatasi ona faataunuu le iʻuga moni o le Tagata. O le iʻuga moni o le tagata o le vivii lea i le Atua ma olioli faatasi ma Ia e faavavau.” (An Historian’s Approach to Religion, itulau 268-269) Ina ia vivii i le Atua, muamua e tatau ona tatou saili ia te ia ma mauaina le poto saʻo e faatatau ia te ia ma ana fuafuaga. O lea, ua matuā talafeagai ai le alaga a Isaia: “Ia outou saili ia Ieova manū o mafai ona maua o ia; ia outou valaau ia te ia manū o latalata mai o ia; ia lafoai e le ua amio leaga lona ala, ma le tagata agasala ia lafoai e ia ona manatu; a ia foi mai ia Ieova, ona alofa mai lea o ia ia te ia; ia foi mai i lo tatou Atua, auā na te matuā faamagaloina.”—Isaia 55:6, 7.

O ā ni Fesoasoani Aogā e Mafai ona Tatou Ofoina Atu?

16. (a) O le ā le luʻi ua fesagaʻi ma le faapotopotoga Kerisiano? (e) O le ā se auala aogā e mafai ai ona tatou fesoasoani i isi ia auauna ia Ieova?

¹⁶ Ua aumaia e le faitau miliona o tagata naunau o ē e leʻi avea ma tagata talaʻi toʻaaga se luʻitau ia i tatou uma lava. O le ā se auala aogā o loo tatou faia o ni toeaina, auauna o le faiva, paeonia, ma o ni tagata talaʻi e fesoasoani ai ia i latou o ē faauo mai i le upu moni, ina ia avea ai ma ni ē auai ma le toʻaaga i le tapuaiga moni ma i tatou? O se tasi o auala e ofo atu ai se fesoasoani aogā e manaomia, o le asiasi atu lea i o latou aiga ma ave i latou i sauniga i le Maota o le Malo ina ia mafai ai foi e i latou ona olioli i aogā o le agaga o Ieova i se faavae faifai pea. O le fautuaga a Paulo i le Eperu, mataupu e 10, fuaiupu e 24 ma le 25, e pei lava lona faanatinati i aso nei o aso na: “Ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou, pei o le masani o isi, a ia fefaamafanafanai; ia atili ai foi ona faapea ina ua outou iloa o le aso o loo tāulata mai.” Matou te faalaeiauina tagata uma o ē fia tofo i le finagalo malie o Ieova e auaumea faatasi e lē aunoa ma Molimau a Ieova i lo latou Maota o le Malo i lo latou vaipanoa.

17. Afai o le a tatou fesoasoani i tagata aʻoga o le Tusi Paia e agaʻigaʻi i luma i la latou sailiga mo Ieova, o ā fesili e manaomia ona taliina?

¹⁷ Afai tatou te suesueina le Tusi Paia ma se tasi e auai pea i sauniga, pe mafai ona tatou fesoasoani ia te ia lena ia agavaa e avea  ma tagata talaʻi o le tala lelei? (Vaai le tusi Organized to Accomplish Our Ministry, itulau 97-99.) Ma a avea loa o ia ma tagata talaʻi e leʻi papatisoina, pe faalautele atu ea i ai le valaaulia ia tatou ō faatasi ma ia e lē aunoa i le galuega talaʻi i le lautele ma i nisi o a tatou suesuega ma toe asiga? (Vaai le lomiga o Le Olomatamata o Aperila 1, 1990, itulau 20.) I nisi faaupuga, a agavaa loa i latou ia, pe tatou te faalaeiauina i latou e ala i lo latou matauina muamua o nisi o iʻuga mautinoa o la tatou galuega talaʻi?—Mataio 28:19, 20.

Alagātatau ona Saili ia Ieova

18. Ua faapefea ona faaalia e Ieova lona alofa mutimutivale i le fanau a tagata?

¹⁸ Ona o le taulaga togiola a Iesu Keriso, ua lē teulotoina ai e Ieova a tatou agasala ua mavae ma tuulafoaiina i tatou pe afai tatou te salamō ma faaalia le faatuatua. Matau upu a Tavita: “E lei faia e ia ia i tatou e tusa ma a tatou agasala; e lei taui mai foi o ia ia i tatou e tusa ma a tatou amio leaga. Auā e pei ona maualuga o le lagi i le lalolagi, e faapea ona tele o lona alofa i e matatau ia te ia. E pei ona vava mamao o sasae ma sisifo, e faapea lava ona faamamao e ia ia i tatou o a tatou solitulafono. E faapei ona alofa mutimuti vale o le tamā i lana fanau, e faapea lava ona alofa mutimuti vale o Ieova i e matatau ia te ia. Auā ua silafia lava e ia le mea na fai aʻi i tatou; ua manatu ia o le efuefu lava i tatou.”—Salamo 103:10-14; Eperu 10:10, 12-14.

19. O le ā le faalaeiauga ua iai mo i latou o ē atonu o tafetafea ese mai le upu moni?

¹⁹ O Ieova o ia moni lava o se Atua agalelei ma le alofa mutimutivale. Afai tatou te faalatalata atu ia te ia i le agaga faamaulalo ma le salamō, o le a ia faamagalo ma faagalo. E lē tumau ona ia toatamaʻi ma faapuapuagatia ai e faavavau i se afi i hele o se taunuuga. Leai, e pei lava ona fetalai Ieova: “O aʻu, o aʻu  lava lē sōloiesea au solitulafono, ona o aʻu lava; o au agasala foi ou te le manatua ia.” Maeu se faalaeiauga o lena mea mo so o se tasi ua tafetafeaese mai le upu moni ma ua faagaloina la latou faiā ma Ieova! Ua faalaeiauina foi i latou na e saili nei mo Ieova ma toe foi mai e auaumea toʻaaga ma tagata e ou lona suafa.—Isaia 43:25.

20, 21. (a) O le ā le faaaʻoaʻoga faamalosiau ua tatou maua ia Iuta anamua? (e) O le ā le mea sa tatau ona faia e tagatānuu o Iuta ina ia maua ai le faamanuiaga a Ieova?

²⁰ Ua tatou maua se faaaʻoaʻoga faalaeiau i lenei itu i le Tupu o Asa o Iuta anamua. Sa ia tafiesea tapuaiga sese mai lona malo, ae na totoe ai pea toegāmea o tapuaiga faapaupau. Ua taʻu mai e le tala i le 2 Nofoaiga a Tupu 15 fuaiupu e 2 e oo i le 4, le mea na faapea atu ai le perofeta o Asaraia ia Asa o se faamanatu: “E ia te outou Ieova, pe a outou i ai ia te ia; afai foi tou te sailiili ia te ia, tou te maua o ia; a e afai e tuua o ia e outou, e tuua outou e ia. Ua tele lava aso ua aunoa ai Isaraelu ma le Atua moni . . . A ua latou liliu mai ia Ieova le Atua o Isaraelu ina ua puapuagatia i latou, ma ua sailiili ia te ia ona maua ai lea o ia e i latou.”

²¹ Sa leʻi faia e Ieova se tuligasiʻa ma le Tupu o Asa peitai na ia ‘faatagaina o ia ia maua.’ Na faapefea ona gaoioi le tupu i lenei feau? Ua tali mai le mataupu lava lea e tasi, fuaiupu e 8 ma le 12: “Ua faalogo Asa i na upu . . . , ona faamalosi ai lea o ia, ma na aveeseina o mea leaga i le nuu uma . . . ma ua toe teuteu le fata faitaulaga o Ieova sa i luma o le faapaologa o le fale o Ieova. Ua latou [Iuta] faia foi le feagaiga ia saili ia Ieova le Atua o latou tamā ma le loto atoa ma le [solu, NW] atoa.” Ioe, sa latou saili ma le faamaoni ia Ieova ‘ma o latou loto atoa ma o latou solu atoa.’ O le ā le taunuuga sa oo i ai le nuu? Ua taʻu mai ia i tatou e le fuaiupu e 15: “Ua fiafia Iuta uma i le [mea na tautō ai]; auā ua latou [tautō] ai ma le loto atoa, ma ua latou sailiili atu ia te ia ma o latou manao uma; ua latou maua foi o ia. Ua foaiina mai e Ieova le filemu ia te i latou i itu uma.”

22. O le ā ua faalaeiauina i tatou ia toʻaaga nei i le auaunaga a Ieova?

²² Ia, e lē o se faalaeiauga ea lena mo i tatou uma lava ia faia se gaoioiga maumauai e faatatau i le tapuaiga mamā a Ieova? Ua tatou iloa e faitau miliona atili isi ua faamoemoe e vivii ia Ieova. E aunoa ma se masalosalo ua faia e le toatele o i latou ia ni suiga i o latou olaga ina ia faafetaui ai ma mea manaomia faale-Tusi Paia mo le auaunaga a Ieova. Ua tutupu aʻe isi i le malamalama ma le faatuatua, o loo saili ia Ieova, ma ua toeitiiti ona uunaia lea e fetufaʻi le gagana mamā ma isi i le faaooina atu ia i latou o le malamalamaga loloto o le upu moni e uiga ia Ieova ma lona Malo. Ma aiseā e matuā tāua nauā ai mo i tatou uma lava ona saili nei ia Ieova semanū o mafai ona maua o ia? Auā ua i faitotoa le lalolagi fou na ia folafolaina mai!—Isaia 65:17-25; Luka 21:29-33; Roma 10:13-15.

O E Manatua?

□ O ai o loo faaalia le faaleogalua i le Atua moni, o Ieova?

□ O le ā le telē ua masani ona afaina ai amio ona o lotu?

□ O le ā le faamoemoe ua iai mo le faatelega o Molimau toʻaaga?

□ Aiseā ua avea ai le taimi nei o se taimi mo le maelega ma gaoioiga?

□ Aiseā ua alagātatau ai ona saili ia Ieova?

[Fesili mo le Suʻesuʻega]

[Ata i le itulau 10]

O le toatele o uo a Molimau a Ieova ua auai i le Faamanatuga ua faamoemoe o ni auauna a le Atua i le lumanai

Aofaiga o le Faamanatuga 1990: 9,950,058

Tumutumuga o tagata talaʻi 1990: 4,017,213

[Ata i le itulau 12]

Sa toe foi le nuu ia Ieova i aso o le Tupu o Asa