O le Soifuaga o Iesu ma Lana Faiva

I le Sami o Kalilaia

UA TOE foi atu nei le au aposetolo i Kalilaia, e pei ona uluai faatonuina ai i latou e Iesu ina ia faia. Ae ua latou lē mautonu po o le ā e ao ona latou faia i inā. Ina ua mavae sina taimi, ona fai atu lea o Peteru ia Toma, Natanielu, Iakopo ma lona uso o Ioane, ma isi aposetolo e toalua: “Ou te alu, ou te fagota.”

“Matou te ō foi ma oe,” ua tali atu ai le toʻaono.

I le po atoa, sa lē taulau ona latou maua se mea e tasi. Ae peitai, ina o le a ao, ae fotuaʻi mai Iesu i le matafaga, ae e lē o iloa e le au aposetolo o Iesu lea. Ua ia alaga atu: “Le fanau e, pe iai ea ni a outou mea e ʻai?”

“E leai!” ua latou alalaga atu ai i le tasi itu o le vai.

“Inā lafo ia le upega i le itu taumatau o le vaa ona outou maua ai lea,” ua ia fetalai ai. Ma ina ua latou faia faapea, ua lē mafai ona latou toso mai lo latou upega auā ua tumu i iʻa. “O le Alii!” ua alaga atu ai Ioane. Ona fusi aʻe lea e Peteru lona ofutino, ma oso i le sami, ma aau atu pe tusa ma le selau iata [90 mita] i le matafaga. Ua mulimuli atu isi aposetolo i le vaa laitiiti, o loo toso atu le upega ua tumu i iʻa.

Ina ua latou taunuu atu i le matafaga, o loo tafu ai se afi malala, o loo taatitia ai ni iʻa, o loo iai foi ma areto. “Aumaia ni iʻa na seʻi faatoʻā outou maua,” ua fetalai atu ai Iesu. Ona alu atu lea o Peteru ma toso mai le upega i le matafaga. E 153 iʻa lapopoa o loo iai!

“Inā ō maia inā aai i le mālū taeao,” ua valaaulia ai i latou e Iesu.

E leai se tasi o i latou na iai le lototele e fesili atu ai, “O ai ea oe?” auā ua latou iloa lava o Iesu lea. O lona faafitu lea ona ia faaali mai talu ona mavae lona toetu mai, ma o lona faatolu lea ona ia faaali i se faapotopotoga o le au aposetolo. Ua ia laulau atu nei le mālū o le taeao, i le avatua lea ia i latou taitoatasi o le areto ma le iʻa.

Ina ua uma ona latou aai, ai pe na geno atu Iesu agaʻi i na iʻa e tele na maua ma fesili atu ia Peteru: “Simona e, le atalii o Iona, e te alofa mai ea ia te aʻu e sili i nei mea?” Ai o le uiga o lana tala e faapea, Pe sili atu ea lou pipii atu i le galuega o le fai faiva na i lo le galuega ua ou saunia ai oe e te faia?

“Ua e silafia ou te alofa ia te oe,” ua tali atu ai Peteru.

“Ia e fafaga i aʻu tamai mamoe,” ua tali atu ai Iesu.

Ua ia toe fesili atu foi, o lona faalua lea: “Simona e, le atalii o Iona, e te alofa mai ea ia te aʻu?”

“Ioe le Alii e, ua e silafia ou te alofa ia te oe,” ua tali atu ai Peteru.

“Ia leoleo i aʻu tamai mamoe,” ua toe poloai atu ai Iesu.

Peitai, i lea, ua ia toe fesili atu faatolu: “Simona e, le atalii o Iona, pe e te alofa mai ea ia te aʻu?”

I le taimi lea ua tiga Peteru. Atonu o loo ia tau mānatu ai ua masalomia e Iesu lona faamaoni. E moni lava, ina ua faamasinoina talu ai Iesu mo lona ola, e faatolu lava ona faafiti Peteru faapea na te lē iloa o ia. O lea ua faapea atu Peteru: “Le Alii e, ua e silafia mea uma lava; ua e silafia ou te alofa ia te oe.”

“Ia e fafaga i aʻu tamai mamoe,” ua poloai faatolu atu ai Iesu.

I lea, ua faaaogā ai e Iesu Peteru e avea o se auala e ta mau ai i mafaufau o isi atoa foi ma le galuega ua ia finagalo ia latou faia. Ua toeitiiti ona ia tuua lea o le lalolagi, ma ua ia manao ina ia latou taʻimua i le auauna atu lea ia i latou o ē o le a aoaoina mai i le lotoā mamoe a le Atua.

E pei lava ona fusifusia ma faaooina le sala ia Iesu ona o lona faia o le galuega na tofia ai o ia e le Atua e faia, o lea, ua ia faailoa atu nei faapea o le a tigaina Peteru  ona o se mea faapena o le a oo i ai. “A o e itiiti lava,” ua taʻu atu ai e Iesu ia te ia, “sa masani ona fusi lou sulugatiti ma e alu i le mea sa e manao e te alu i ai. Ae a oo ina e toeaina, o le a e faaloaloa atu ou lima ma o le a fusi aʻe oe e se tasi tagata ma taʻitaʻiina atu oe i le mea e te lē o manao i ai.” E ui lava i le oti faamaturo o loo faatali mai mo Peteru, ae ua uunai atu Iesu ia te ia: “Ia e mulimuli mai pea ia te aʻu.”

I le faliu atu, ua iloa ai e Peteru Ioane ma fesili atu: “Le Alii e, o le ā o le a faia e lenei tagata?”

“Afai ou te loto ina ia faatali pea o ia seia ou sau,” ua tali atu ai Iesu, “o le ā la le mea e te popole ai fua i lena mea? Ia e mulimuli mai pea oe ia te aʻu.”

O nei fetalaiga a Iesu sa oo ina malamalama i ai le toatele o le au soʻo, faapea o lona uiga o le a lē oti lava le aposetolo o Ioane. Ae peitai e pei ona faamatalaina mulimuli ane e le aposetolo o Ioane, e leʻi fetalai mai Iesu o le a lē oti o ia, ae sa na ona faapea mai Iesu: “Afai ou te loto ina ia faatali pea o ia seia ou sau, o le ā la le mea e te popole ai fua?” Ioane 21:1-25; Mataio 26:32; 28:7, 10.

◆ O le ā ua faaalia ai le lē mautonu o le au aposetolo i le mea e ao ona latou faia i Kalilaia?

◆ Ua faapefea ona iloa lelei e le au aposetolo Iesu i le Sami o Kalilaia?

◆ Ua faafia ai nei ona faaali mai Iesu talu lona toetu mai?

◆ Ua faapefea ona faamamafa atu e Iesu le mea o ia manao ai ia faia e le au aposetolo?

◆ Ua faapefea ona faaalia e Iesu le uiga o le a maliu ai Peteru?

◆ O ā faamatalaga a Iesu e uiga ia Ioane sa lē malamalama i ai le toatele o le au soʻo?