MATAUPU 22

Le Faamaoni [Honesty]—Pe Tauia?

1-4. O ā faamaoniga o le lē faamaoni ua e matauina i tagata talavou? Aiseā e lē faateʻia moni ai i le faia e le toatele o tagata talavou o nei mea? (Isaia 9:16)

O LE toatele o tagata i aso nei e lē manatu e alagātatau le taʻuina o le mea moni i taimi uma. Ua e matauina ea lena mea? Ua fai mai le toatele o tagata fai pisinisi faapea latou te lē mafafai ona faatavā ma le manuia e aunoa ma se lē faamaoni. Tatou te vaaia ni faasalalauga talavale pe taufaasese i aso taitasi. E ui ina tatau i taʻitaʻi faapolotiki ona tausia le lelei o tagata lautele, ae ua manatu le toatele o tagata ia i latou faapea e lē maufaatuatuaina.

² Ua masani ona talia e tagata talavou lea lava auala e tasi ona o le vaaia o le tele o le lē faamaoni o tagata matutua. O le toatele e autilotilo i taimi o suega i aʻoga pe “faamisia vasega” e ala i faamolemolega pepelo. Atonu latou te gugutu i a latou uo i le faia o ni faamatalaga sese e uiga ia i latou po o mea ua latou faia. Atonu e oo lava ina latou olegiaina o latou mātua i totonu o aiga—e lē taʻua uma le saʻo pe a tali atu i a latou fesili e faatatau i a latou amio, e nanā mea moni e ala i le faaupuina o a latou tali ina ia avatu ai manatu sese i le mea atoa. Afai e taumafai o latou mātua ma isi e suesue pe faapeī o latou faalogona e uiga i amioga lē mamā, vailaau faasaina ma mea tali tutusa faapena, atonu latou te nanā ma le lē tautoʻai le mea moni, i le taʻuaina o mea latou te manatu e fia faalogo i ai i latou o loo fesiligiaina i latou, ae lē o o latou faalogona moni. Atonu latou te matuā faaalia atu i se matua le alofa mafana e lē moni po o le faaviiviia foi ina ia maua mai ai ni tupe po o le faatagaga e faia ai se mea.

³ Ae pe o se mea e lē masani ai lea mea? O le mea moni, ua lagona e le toatele o tagata talavou faapea ua taʻusaʻoina i latou i le faia o lenei mea. Aiseā? Ia, e moni atonu e aʻoaʻoina i latou e o latou mātua faapea e sese le talapepelo. Ae peitai, atonu latou iloaina o loo faatatauseseina e o latou mātua mea moni ina ia sao mai ai i se tulaga lē manuia po o le alofia ai o le totogiina o se pili, aitalafu po o lafoga. Ua e matauina ea o nisi mātua ua oo lava ina latou faaaogāina a latou fanau ina ia talapepelo mo i latou i le faia o faamolemolega?

⁴ I nofoaga o loo maua ai ia tulaga, o le ā se faalaeiauga o loo iai mo tagata talavou—po o so o se isi o i tatou—ina ia tauivi e faamaoni i mea uma? I se lalolagi o loo taatele ai le talapepelo, taufaaʻoleʻole ma le gaoi, faapefea ona aogā ma taʻuaogāina mo oe le pipii mau i le mea ua moni? Pe o le a aumaia moni ai ia te oe le aogā e silisili i lo le mea e aumaia e le lē faamaoni, ma afai o lea, o ā ituaiga o aogā?

AOGĀ E LĒ TUMAU FAATUSATUSA I AOGĀ E TUMAU

5-7. Aiseā e lē tumau ai so o se aogā e maua mai i le lē faamaoni?

⁵ Fesili ifo ia te oe lava ia: O le ā le mea ou te manao i ai—o se mea e maua faavavevave, se aogā ua iloatino, po o lea e aumaia ai aogā e tumau? Pe a e mafaufau i ai, e lē moni ea faapea o so o se aogā ua iloatino mai ona o le talapepelo ma le taufaaʻoleʻole e lē tumau ona  lelei? Ioe, ua matuā moni lava le Afioga a le Atua ina ua faapea mai: “O laugutu faamaoni, e faatumauina ia e faavavau; a o le laulaufaiva pepelo, ua se emo o le mata lea.”—Faataoto 12:19.

⁶ Aumai e fai ma faaaʻoaʻoga se tamaloa faipisinisi o lē na avevaleina nisi o oloa. Atonu na te faatau atu ni mea ae i le gasologa o le faatauga e mafai ona leiloa ai mai ia te ia se tagata faatau ina ua iloa ane e le tagata sa ia taufaaʻoleʻole. Pe faapea foi sa e autilotilo i le aʻoga. Afai e lē maua oe, atonu e te mauaina ai ni togi sili ona maualuga. Ae o le ā le lelei o le mauaina uma o ni “A i le tusipasi” pe afai e uma au aʻoga ae matuā itiiti lava le poto o loo ia te oe, atonu e oo lava i le lē mafai ona faitau pe faaopoopo lelei?

⁷ I le iʻuga la, o le tagata o lē taufaaʻoleʻole e sili atu ai ona ia ʻoleʻoleina ia lava. Seʻi tau ina faatusatusa le tagata faamaoni ma le tagata lē faamaoni. Ma manatunatu i nisi o mea e ono leiloa mai le tagata lē faamaoni ma tagai i ai pe e te lē ioe faapea, so o se tasi lava e manatu e fesoasoani le lē faamaoni agaʻi i se olaga lelei ma le fiafia, e puupuu moni lava la le vaaiga faatatau i le olaga.

8-10. E aogā faapefea le faamaoni (a) i le galuega a se tasi? (e) i faiā faaleaiga? (i) i le fesootai ai ma uo?

⁸ Afai e lauiloa oe i le tautala saʻo ma le faamaoni i ni au faifaiga ma isi, e te mauaina la le faaaloalo ma le faatuatuaina mai isi. E sili atu ona foliga mai o uo e te mauaina o ni uo moni auā latou te iloaina e te faamaoni ma talisapaia lenei mea. A o moni faapea e masani ona lē faamaoni le lalolagi faapisinisi i ona po nei, ae o loo moni foi faapea e masani lava ona lava ma totoe le mafaufau saʻo o loo iai i tagata e ana galuega e faatāuaina ai tagata faigaluega o ē e faamaoni. O se taʻuleleia la ona o le faamaoni, e mafai ona maua ai se galuega pe a tau leai ni galuega pe fesoasoani foi i le umiaina pea o se galuega pe a leiloa galuega a isi.

⁹ E saosaolaumea le faamaoni i le aiga i se siomaga solosolo lelei ma le fiafia, i le aveesea ai o ni faaletonu po o masalosaloga i le va o paaga faaipoipo ma le va o mātua ma fanau. E maua e fanau le talitonuga atoa mai o latou mātua pe a latou faamaoni, e masani lava ona faasolosolo mālie ai le naunau o mātua e tuuina atu i a latou fanau iti le saolotoga e sili atu. Pe afai ua tuuina atu i ai lea saolotoga, o le taʻuina la o le mea moni e uiga i se mea sese po o se gaoioiga sese e mafai ona aumaia ai le aʻoaʻiga. Ae o lena aʻoaʻiga atonu e sili ona māmā ona sa e faamaoni. Afai la e te faafitia ma le faamaoni le faia o se mea sese i le lumanai, e sili atu ona foliga mai o le a talitonuina lau faamatalaga.

¹⁰ Ia faaeseese la lenei mea ma le tagata o lē lolo atu i le lē faamaoni ina ia “solaese mai ai i se faafitauli” pe ina ia maua ai se mea lelei. O loo ia lamatiaina le leiloa ai o nei aogā lelei uma. Auā o le feagai ma se tagata lē faamaoni e pei o le tietie i se taavale e leaga le foeuli—e te lē taitai ona iloaina le mea atonu na te faia. O lea, ia iloatino faapea, a e talapepelo i se tagata pe taufaaʻoleʻole ia te ia, e tele tausaga e alu ina ia soloiesea ai le lē maufaatuatuaina ua e faia. I mea e aafia ai se matua po o se uo, atonu e toe faaleleia le manua na faapogaia, ae mafai ona tuua ai ni mafaufauga leaga e manatuaina pea e pei o se māʻila tumau. Afai e te faia ma masani le lē faamaoni, atonu e oo mai le taimi e te matuā manao ai lava ma manaomia isi ina ia talitonu ma maufaatuatuaina oe ae latou te lē mafaia. E iai ea se lelei lē tumau e aumaia e le lē faamaoni e aogā ai le faia faapea?

11-13. (a) E masani faapefea ona amata le masani lea o le talapepelo? (e) Aiseā e avea ai le talapepelo o se palaai na i lo le lototele?

 ¹¹ O le mea moni, o le talapepelo e pei o le tauasa atu i totonu o le palapala mimiti. O le mea masani lava, e manaomia isi pepelo ina ia lagolagoina ai pepelo taitasi, ma e lē pine ae lavelavea ai se tasi i se taamilosaga malosi faapea. E moni lava, e lē mafai ea ona tatou vaaia le atamai o le fautuaga tuusaʻo a le Tusi Paia: “Aua le fetaupelopeloai”?—Kolose 3:9.

¹² E masani lava ia i latou e talapepelo ona amata i tala e lē saʻo atoatoa ma “pepelo laiti,” ona faasolosolo mālie atu ai lava lea i pepelo e sili ona leaga. E faapea ona masani i le talapepelo ona amata e pei o le pelē tupe. E amata i le tagata o loo pelē tupe ona petipeti i ni aofaiga laiti, ae—o le mea masani ina ia toe totogia ai ni mea ua gau—e faasolosolo mālie ona ia tosina atu i le faia o petipetiga ua sili atu ona tetele.

¹³ I le taimi muamua lava, o le taʻuina o se talapepelo ma le lē emo o ou mata atonu e foliga mai o se mea toa ma le lototele. Atonu foi e te iloaina ni tagata o ē toleniina i latou lava ina ia pulatoʻa atu i le isi a o talapepelo. E lē o le lototele ea lena? E leai, o le mea moni lava, o le talapepelo o le palaʻai lena ae lē o le lototele. O le mea e manaomia ai le lototele o le taʻuina atu lea o le mea moni ma fesagaʻi ma taunuuga e iʻu i ai e tusa lava po o le ā le mea e oo i ai. Na i lo le manatu faapea e malosi, o le talapepelo o se mea e vaivai, e lē mafai ona tu na o ia lava, e manaomia isi pepelo ina ia lagolagoina ai, e lē taitai ona loto e fetaiaʻi ma le upu moni i le faafesagaʻi o mata. Aiseā la e fia pei ai o se tagata o lē faaaluina lona olaga i le faia o se foliga talapepelo, o loo lafi, fealofaʻi ma fai faamolemolega? Aiseā e fia pei ai o Iuta le Sekara, o lē na avea ma taufaaʻoleʻole, na taumafai e ola i se olaga uiga lua ma iʻu ai i se lē taulau ma le pule i le ola? Aiseā e lē pei ai o se tama tane po o se tamaitai e faamaoni? E na o le pau lea o le auala e tausia ai le faaaloalogia o oe lava faapea ma se loto fuatiaifo lelei.

TAUSI I LAU UPU

14-16. Aiseā e tāua ai le tausia o lau upu?

¹⁴ O le tausi i lau upu ua aafia ai foi i lenei mataupu o le faamaoni. Ai lava ua e lagonaina le matuā loto tiga pe afai na folafolaina atu e ou mātua ia te oe se mea ae teʻi ane ua lē taulau ona faataunuuina la la upu. Ae pe faapena le malosi o lou lagona e faatatau i le tausiaina o lau upu i ou mātua? E faapeī oe e tusa ai ma lenei mea? Afai e te taʻuina atu i se tasi o le a e fesoasoani ia te ia i le faia o se mea po o le ofoina atu e faia se galuega, pe masani ona e taumafai ina ia faataunuu lau upu? Afai e te tuutala e feiloai ma se tasi i se taimi patino, e te alu atu ea i ai i le taimi tonu? E faapeī le tele o le taʻuaogāina o lau upu?

¹⁵ O le talavou o le taimi tonu lea e amata atiina aʻe ai le masani o le avea ma se tagata e tausi i au upu. O le tausia po o le lē tausia o lau upu e taʻuina mai ai mea e tele e faatatau i le ituaiga o tagata e te iai i totonu i le taimi nei; e iai foi se aafiaga e ono suia ai i lou mafaufau ma lou loto. E fausia aʻe ai se uiga, se auala e vaai ai i ni mea e mafai ona maua mai ai uiga faaletagata e tumau.

¹⁶ Afai e maufaatuatuaina oe i le taimi nei, atonu o le a e faapena foi i tausaga o loo mulimuli mai. Ma e faapena ona moni pe a liliu i le isi itu. Mo se faaaʻoaʻoga, afai e te lē tausia lau upu i le taimi nei, i tausaga mulimuli mai atonu e te faia ai se maliega mausalī ina ia taliaina se galuega po o se tofiga—e lē umi ae e toe musu ai. E faia e le toatele o tagata lena mea, ae ua lē o manatu i ai ma le faaaloalo isi tagata ia i latou.

17-19. (a) Aiseā e solia ai e tagata a latou upu? (e) O le ā e mafai ona fesoasoani ia te oe ina ia alofia ai tulaga atonu e te lagona e mafuli atu e solia lau upu?

¹⁷ Aiseā e solia ai e isi la latou upu? Ia, o se tasi o mea, o le tausiaina o upu a se tasi e tuuina atu ai ni tapulaa i se tagata, e avatu ai ia te ia tiute tauave. Pe a oo mai la le taimi mo le tausiaina o se tuugatala po o se isi lava folafolaga, ae ua iai se isi mea ua sili atu ona manaia mai. Atonu foi la, e iloa e le tagata i le tele o taimi faapea o le tausia lelei o lana upu, o lona uiga, o se galuega ua sili atu ona mamafa i lo le mea na ia mafaufauina o le a oo i ai.

 ¹⁸ O le ā le mea o le a e faia i tulaga faapena? O le a e tumau ea i lau upu e ui lava o le a oo ai i ni faigata pe e te gau ai foi? Atonu e faapea mai se tasi, “Ae ou te leʻi iloa le mea o le a ou oo i ai!” O le fesili moni lava i inei e faapea: O le sese o ai? Sa pelogia ea pe taufaasese le isi tagata? Afai e leai, afai la e te tumau ai e tusa lava po o le ā le faigata e manaomia i le faataunuuina o lau upu, ae ua e aʻoaʻoina ai se lesona tāua. O lena lesona o le: Mafaufau muamua ae e te leʻi tautala, ae e te leʻi avatuina lau upu. A e tautala la, ia moni mea e te fai atu ai.

¹⁹ O le “Ioe” i se mea ona e te mafaufau o le a faafiafiaina ai se tasi—peitai, e aunoa ma le mafaufauina muamua o taunuuga e iʻu i ai—e mafai ona e oo ai i ni faigata. I le faaeseesega, afai e te faaeteete i le faia o ni folafolaga, afai e te mafaufau totoʻa i mataupu ma iloilo pe o le a faapefea ona afāina ai lou olaga i le lumanai, o le a sili atu ai la ona faigofie ona tausia lau upu i le taimi lava e te tauaveina ai e oe lava tiute tauave. O le a tatau ona saunia lou loto ma lou mafaufau ina ia faamaoni i lau upu. Na fetalai Iesu: “A ia faapea la outou upu, Ioe, ioe.”—Mataio 5:37.

LE POGAI AUTŪ E TAUIA AI LE FAAMAONI

20-22. (a) O le ā le mafuaaga autū i le pogai e tāua ai ona faamaoni i taimi uma? (Salamo 15:1-4) (e) O le ā le faaaʻoaʻoga lelei ua faataatia e le Atua e faatatau i le tausiaina o lana upu? O le ā e mafai ona fesoasoani ia i tatou ina ia mulimuli ai i Lana faaaʻoaʻoga?

²⁰ O le pogai autū lava e tauia ai le faamaoni ma le tautala i le mea moni, ona e faitaulia e Ieova le Atua na o tagata o ē faapena e avea ma ana uo. Aiseā e faapena ai? Auā o ia lava foi e faamaoni pea lava pea i lana upu. O le pogai lena sa mafai ai e Iosua ona fai atu i le nuu o Isaraelu: “Ua outou iloa ma o outou loto atoa, ma o outou agaga atoa, e lei iuvale se upu e tasi i upu lelei uma na fetalai mai ai Ieova lo outou Atua ia te outou; ua taunuu uma ia te outou, ua le iuvale se upu e tasi.” (Iosua 23:14) O le Tusi Paia e tele lava o se faamaumauga o folafolaga ua tausia e Ieova. O lona faamaoni i aso ua mavae o le mea lena ua aumaia ai ia i tatou sea mautinoa e faatatau i faamanuiaga i le lumanai i le faataunuuga o ana folafolaga.

²¹ Pe e te manao i le faamaoniga a le Atua? Ia manatua la, e na o i latou o ē tapuai ia te ia “i le agaga ma le faamaoni [upu moni, NW]” na te tuuina atu i ai. (Ioane 4:23) Ma ia manatua foi e inoino o ia i so o se ituaiga o talapepelo—taufaaʻoleʻole, gugutu, taufaaleaga, autilotilo—ona e mapuna mai le manatu faapito, matapeapea ma le leai o se faalogona e popole alofa i manaoga o isi. Na te silafia na amata pogai faafitauli uma lava o le fanau a tagata faapea ma mafatiaga mai le talapepelo—ona o le “tamā o le pepelo,” o Satani, le fili sili o le Atua.—Ioane 8:44.

²² Pe e te manao moni lava ina ia tausisi ma le faamaoni i se ala o le faamaoni? E tatau la ona e iloaina e na o le alofa moni lava i Lē na Foafoaina oe faapea ma le alofa i lou tuaoi e mafai ona avatu ai ia te oe le uunaiga e te manaomia. E ao ona iai se alofa e mapuna mai le loto i le upu moni mo le lelei na te faia ma se inoino lotulotu faapena i le talapepelo mo le leaga na te faia. E ao foi ona uigā tele ia te oe le faamaoniga a le Atua i lo le faamaoniga a so o se isi lava tagata. Manatua, ona e alofa foi ia lava i le upu moni ae inoino i le talapepelo, na o le pau lava lea o le mea tatou te mafaia ona maua ai se faamoemoe mauaa mo le lumanai, ua faavae i ana folafolaga e lē mafai ona lē taulau faapea ma le maufaatuatuaina ua faamaonia o lana Afioga. O lea, ia tauivi ina ia pei o ia. Ia manatua faapea, “O laugutu faamaoni, e faatumauina ia e faavavau; a o le laulaufaiva pepelo, ua se emo o le mata lea.”—Faataoto 12:19.

[Fesili mo le Suʻesuʻega]

[Faamatalaga faaopoopo]

O le vaega faaiʻu lenei o la tatou faasologa. Ua auiliili mai ai mataupu e uiga i le faamaoni [honesty], le mea moni e te manao ai mai le olaga, ma le lumanai matagofie o loo teuina mo oe.

[Ata i le itulau 23]

Pe e te mauaina moni ni aogā pe afai e te gaoi?