Pe ua i Tafatafaʻilagi le Filemu o le Lalolagi?

I LE faagasologa o le talafaasolopito, sa faia ai lea ituaiga ma lea ituaiga o fuafuaga ma taʻutinoga o le filemu. Ae i se tulaga lē manuia, ua foliga mai faapea sa iai pea le tele o taua ua faaleaogāina ai ia fuafuaga ma taʻutinoga. E tusa ai ma le sainia o ia feagaiga ma iʻugafono o le filemu, e toatele tagata ua latou aʻoaʻoina le aua le soona tuu i ai le faamoemoe i na mea.

Ae peitai, i ni nai tausaga ua mavae, na amata ai ona lagona e le toatele o tagata suesue ma i latou e iloiloina tala fou faapea e iai se mea ese o loo tupu. Ua latou lagā le ono mafai i le taimi nei, e ui lava i faafitauli o tulaʻi mai, ona faataatia le tulaga mo le filemu o le lalolagi. “O le faamoemoe mo se feagaiga e faafilemu ai feteenaʻiga, o loo sili ona lelei lona faavae talu mai le iʻuga o le Taua Lona Lua a le Lalolagi na i lo se isi lava tausaga,” na fai mai ai le Faalapotopotoga Faavaomalo o le Filemu i Stockholm. Ua faalauiloa mai e se tagata lauiloa i le lipotia o tala fou, o lē sa taʻitaʻiina ona o le matuā televave o le tutupu o mea i Europa i Sasae e faapea: “O le Filemu i le Lalolagi e foliga mai ua sili atu ona mafaia ona oo mai nei na i lo se isi lava taimi talu mai le Taua Lona Lua a le Lalolagi.” E oo lava i le mekasini The Bulletin of the Atomic Scientists na atagia mai ai lenei uiga. I le 1988 na ia ki ai lana uati taʻutaʻua o le aso pogisa mai le toe tolu minute i le tulua o po ma ao i le toe ono minute i le tulua o po ma ao, ma ina ua oo ia Aperila 1990, ona toe ki mamao atu ai lea i tua i le toe sefulu minute i le tulua o po ma ao.

O nei mea uma lava, na faapogaia ai le tele o faanaunauga e vaai i le itu lelei o mea ma le fiafia tele a o leʻi gapā le taua i Sasae Tutotonu. Ae oo lava i le talu mai ai o lena taimi, o loo talanoa ai pea nisi tagata e uiga i le Taua Malūlū ma tauvaga i auupega i le va o malo malolosi faapea ua iʻu. Sa manatunatu loloto nisi e uiga i le po o le ā le mea o le a fai i tupe uma lava o loo faamoemoe malo e faasaoina mai le faaitiitia o le tupe faaalu i vaegaau. Pe e mafai ea ona faapea ua oo moni mai le taimi mo le filemu tumau? Pe ua aʻoaʻo moni ea e atunuu e ‘tuʻi a latou pelu e fai ma uamea o suotosina, o latou tao foi e fai ma polo e teu aʻi vine’? (Isaia 2:4) O le ā ua faaalia e mea moni?

O Taua ua Faagaloina

“O le faaiʻuina o le taua malūlū ma le malōlōga fou i le va o Sasae ma Sisifo, ua faaosoosoina ai nisi e talitonu faapea o le filemu o le faasologa lea o le aso,” ua matauina ai e le The Economist a Lonetona. “E leai lava. Pe a aveesea se mafuaaga tele e tasi o feteenaiga, ae o loo tumau pea ona iai nai mafuaaga laiti e tele i le lalolagi.” O ā nei fefaloaiga po o feteenaiga “laiti”?

Ua lipotia mai e le Fale Suesue o le Filemu a Lentz, o se faalapotopotoga e tutoatasi i le Iunaite Setete e faapea, ia Setema 1990, pe tusa ma le 15 taua sa pepesi atu i le lalolagi aoao. O lenei faitauga sa lē aofia ai le osofaʻia e Iraki o Kueiti, talu ai ona sa faitauina e le lipoti e na o  taua na sa fasiotia ai a itiiti mai e toʻaafe tagata i le tausaga e tasi seia oo mai i lena taimi. O nisi o na taua sa faaauau pea mo le 20 po o le sili atu o tausaga. O na taua uma ua leiloa ai le 2,900,000 ola, ma o le toatele o i latou nei, o tagata sivili. E lē o aofia ai i lenei fuainumera i latou na fasiotia i nisi o taua sili ona faamasaatoto na seʻi faatoʻā uma i le tausaga na seʻi mavae atu, e pei o taua na faia i Uganda, Afakanisitana, ma Irani–Iraki.

Na toetoe lava tolu miliona tagata na fasiotia ai ae semanū ua tatau ona filemu le lalolagi! O lena mea o se mala ia te ia lava. Ae peitai, o le mala aupito sili, e faapea, o le tele o nei taua o le mea moni o loo faia pea ma le leiloa—ma le lē alofa—e isi tagata o le lalolagi. O taua na atonu o loo taʻua o taua ua faagaloina, talu ai o le tele o nei taua—o le faoa o pulega faalemalo, taua sivili, o fouvalega,—o loo tauina i lea atunuu ma lea atunuu o atunuu matitiva. Mo le toatele o tagata i atunuu mauʻoa, o le fasiotia ai o le afa miliona o tagata i Sudan, po o le tasi vaetolu o le miliona na fasiotia i Anekola, ua foliga mai e lē o iai se naunau tele i ai. O le mea moni, o loo iai i latou o finau mai faapea ua iai le lalolagi i se vaitaimi sa leʻi faapea ona iai muamua o le filemu talu mai le iʻuga o le Taua Lona Lua a le Lalolagi, talu ai sa leai se taua na faia i atunuu tamaoaiga ma, e ui lava i fefalōaʻiga mataʻutia ma le faateleina o le fausia o auupega, ae leʻi oo lava malo malolosi i le faia o se taua i le va o le tasi ma le isi.

O Iai se Faamoemoe mo le Filemu?

Afai o le filemu e na ona uiga i le leai o se taua faaniukelea i le kelope, o lea atonu la o le a finau mai se tasi faapea, ua uma ona taulau malo o le lalolagi i a latou taumafaiga mo le filemu. O le aiaiga o le tau fai Faaputu e Malo Malolosi o le lava o meatau faaniukelea e faaumatia ai e le tasi le isi, ua taofiofia ai malo malolosi mai le oo atu i lena mamao. Ae pe o le filemu moni ea lena? E mafai faapefea ona oo mai, ae o loo ola tagata i le matuā fefefe i le faatamaʻia atoatoa i le taimi nei? E mafai faapefea ona tatou talanoa i le filemu ae, i le lalolagi atoa, o loo matuā mafatia ai olaga o le toatele o tagata, ua faaleagaina mea latou te nonofo ai, ma o lo latou faamoemoe mo se olaga uigā ma le faataunuuina, ua tafiesea e taua, i le tulaga tele ma le itiiti foi?

Na tusi i se tasi taimi lē sa manumalo i le faailoga o le Nobel o Elie Wiesel e faapea: “Mai taimi lava la e lē o manatua, sa talanoa ai tagata e uiga i le filemu, e aunoa ma le ausia. Pe ona o le lē lava o lo tatou poto masani? E ui lava ua tatou talanoa i le filemu, ae o loo tatou sii le taua. I nisi taimi e oo ai lava ina tatou sii le taua i le igoa o le filemu. . . . Atonu ua faigata naua ona avea le taua o se vaega o le talafaasolopito e ao ona faaiʻuina—e faavavau.”

Ma talu ai nei lava na toe nutililiiina ai foi e le taua i Sasae Tutotonu le faamoemoe mo le filemu. Pe faamata ona ua na ona vaavaai atu le fanau a tagata i le puna sese mo le filemu?

[Ata i le itulau 3]

“E ono mafai ona molimauina e lenei tupulaga o tagata o loo iai i le lalolagi le oo mai o se vaitaimi e lē mafai ona toe faafoi mai o le filemu i le talafaasolopito o tupulaga o le malamalama.”—Le peresitene o Rusia o Mikhail Gorbachev, i se fonotaga a ulu o malo i Uosigitone, D.C., Iunaite Setete, Me 1990

[Ē Ana le Ata]

UPI/Bettmann Newsphotos

[Ata i le itulau 4]

“Ua taatia mai i o tatou luma se lalolagi fou o le saolotoga . . . , se lalolagi e manumalo ai le filemu, e pulea ai le tamaoaiga, ma mafai ai ona faia mea uma lava e foliga mai e mafai ona faia.”—Le peresitene o le Iunaite Setete o George Bush, i se fonotaga a ulu o malo o le lalolagi tau tamaoaiga na faia i Houston, Texas, Iunaite Setete, Iulai 1990

[Ē Ana le Ata]

UPI/Bettmann Newsphotos

“O pa i aso ua mavae sa taofiofia ai tagata ma manatu ua masofa i lalo. Ua filifili e tagata Europa lo latou lava iʻuga. Ua latou filifilia le saolotoga. Ua latou filifilia le saolotoga tau tamaoaiga. Ua latou filifilia le filemu.”— Se faalauiloaga na faia e le NATO i se fonotaga a ulu o malo i Lonetona, Egelani, Iulai 1990

 [Ē Ana le Ata i le itulau 2]

Cover photos U.S. Naval Observatory photo (stars); NASA photo (earth)