Feagai ai ma le Solitulafono i se Lalolagi Fenuminumiai

E TE fefe ea e alu i fafo i le po? E te manaomia ea ni loka se lua po o se tolu i ou faitotoa ma ou faamalama? Ua gaoia ea sau taavale po o sau uila? Pe sa faoa le leitio mai lau taavale? Po o ia te oe se lagona mataʻu i nisi o tuaoi?

Afai e te tali mai ioe i nisi o nei fesili, o lona uiga o loo e taumafai e faafeagai ma le solitulafono i lenei lalolagi fenuminumiai. O le ā e mafai ona e faia i ai? Pe mafai ona fesoasoani ia te oe le Tusi Paia e faafeagai ai?

Mafaufau o le Tagata Solitulafono ma le Faamasinoga

I le lalolagi o soligatulafono, o loo iai elemeni autū e tolu: o tagata solitulafono, o leoleo, ma tagata e aafia ai. O le ā e mafai e oe, lē e faaono aafia ai fua, ona fai ina ia mafai ai ona faafeagai ma le solitulafono? Pe mafai ona e taaʻina nisi o nei elemeni e tolu? Mo se faaaʻoaʻoga, pe mafai ona e suia tagata solitulafono?

Ia, e toatele tagata solitulafono ua fai le soligatulafono ma a latou galuega e ola ai. Ua latou filifilia lenei mea e avea o se auala faigofie o le olaga. O le ‘aiseā e galue ai pe afai e mafai ona e ola i mea ua maua e isi?’ e foliga mai o la latou lea filosofia. Ua iloa lelei e tagata faomea faapea e masani lava ona tuuina atu e le tagata o latou gaoia, ana tupe e aunoa ma le faia o se tauiviga. Ma talu ai ona o le a lē maua i latou pe tuuina i le falepuipui, o le solitulafono la o se auala sili lea ona aogā mo i latou.

E lē gata i lea, o taualumaga o faamasinoga e matuā lavelave ma faamaumau ai le taimi.  I le tele o atunuu, e lē lava fale faamasino, alii faamasino, ma falepuipui. O le anoanoai o faamasinoga e tatau ona faia ona o le solitulafono, ua lofituina ai le faiga o mea. Ona o le faatuatuai o le faagasologa o faamasinoga ua oo ai i le tulaga e pei ona faamatalaina mai i le Tusi Paia ua sili atu i le tolu afe tausaga ua mavae: “Auā ua le vave faaootia le sala i le amio leaga, o le mea lea ua matuā naunau ai loto o tagata e fai mea leaga.” E pei ona faaalia i lenei mataupu silisili faale-Tusi Paia, e itiiti lava se faamoemoe i le maua o se vaifofo e ala i le faaitiitia o le aofai o tagata solitulafono po o le toe faaleleia o i latou.—Failauga 8:11.

Ae faapefea e uiga i le elemeni lona lua, o leoleo? Pe o iai se faamoemoe faapea o le a mafai e leoleo ona pulea lea tulaga? O le a tali mai i latou lava: Ona e masani lava ona fuafua tulafono e tusa ai ma aiā a le tagata solitulafono, o loo iai loia lē faamaoni o ē o taulimaina i se auala atamai le tulafono ina ia mafai ai ona sao le tagata agasala, atoa ma tagata o le atunuu o ē lē o iai se naunau e fesoasoani i le tauaveina o le tele o tupe faaalu mo nisi falepuipui faapea ma ni falepuipui sili ona tetele, atoa foi ma le lē lava o vasega o leoleo, ua itiiti ai se mea e mafai ona latou faia faasaga i le malosi o le solitulafono.

I na mea, ua toe ai la o le elemeni lona tolu, o tagata e ono aafia fua: o i tatou, le lautele. Pe o iai se mea e mafai ona tatou faia e fesoasoani ai ia i tatou lava ia faafeagai lelei ai ma lenei tulaga toetoe lava lē mafai ona pulea?

Atamai Aogā ma le Mafaufau Lelei

Ua taʻua i le tusi o le Tusi Paia o Faataoto e faapea: “Ia e taofi mau i le [atamai] ma le mafaufau; e fai ia mea ma ola o lou agaga, ma mea matagofie i lou ua. Ona e savali ai lea ma le saogalemu i lou ala; e le tuʻia foi lou vae.” O lenei fautuaga e mafai ona faatatau i tulaga e foliga mai o le a aafia ai fua se tasi i le solitulafono. O ā nisi o auala e mafai ai e le atamai aogā ona fesoasoani ia i tatou i lenei itu?—Faataoto 3:21-23.

O tagata solitulafono ua tauāu ina pei o manu feai ʻai tagata. Latou te vaavaai mo se vete e sili ona faigofie e maua. Latou te lē mananao e oo i se tulaga lamatia i se tauiviga ma se mea e mafai ona maua pe afai e mafai ona latou maua mai lea lava mea mai se tagata faigofie. O lea latou te tulituliloa ai tagata matutua, tagata mamaʻi, tagata fememeai, ma i latou o ē e lē o iloa e uiga i se tulaga lamatia. E filifili e tagata solitulafono le nofoaga ma le taimi e sili ona lelei ma fetaui mo i latou e osofaʻi ai. O i inei la e mafai ai i se tagata o lē e faaono aafia ona faaaogā le atamai aogā.

E pei ona faamatalaina ia tagata e le Tusi Paia, o ē fiafia e fai le amioleaga e masani ona fai a latou gaoioiga i le pogisa o le po. (Roma 13:12; Efeso 5:11, 12) E moni lea i aso nei, faapea o le tele o faiga solitulafono faasaga i tagata ma mea totino, e fai lava i le po. (Faatusatusa le Iopu 24:14; 1 Tesalonia 5:2.) O le mea lea, pe afai e mafai, o le tagata atamai e aloese mai le alu atu i vaipanoa mataʻutia i le po. I le aai ua pulea e solitulafono, o Niu Ioka, ua faaalia ai i le lipoti a leoleo i aso taitasi le toatele o tagata e fasi ma faoa a latou mea pe a goto le la, ma ae maise lava pe a teʻa le sefulu, o le taimi lea e masani ai ona latou foi atu i o latou fale. O tagata ʻai tagata o loo i auala valevalenoa e vaavaai mo ni tagata ina ia faoa a latou mea. I lea, afai o e filifili e faatali sau pasi po o se taavale laitiiti pe savali i se vaipanoa lamatia, ia onosai ma faatali. Auā a lē o lena, e ono tiga le mea o le a e oo i ai.

O se tasi Kerisiano na matuā fasi faamoʻamoʻaina ma faoa ana mea ona sa ia savali i se mea e lē mamao e lē pogisa tele i le ta o le sefulu i le po, na i lo le faatali mo se pasi. Sa iai isi tagata i le auala, ae sa fafau e tagata faomea e toatolu se mailei mo lea tagata na te lē o iloaina. Na faailo atu le toatasi i le isi vaega ina ua alu aʻe le tagata i le auala. I le aunoa ma le fai atu o se upu, ona latou osofaʻia loa lea o le tagata ma faoa ai ana mea. E vave lava ona uma, auā e oo lava i se tuaoi e leai se taimi e faasalavei ane ai. Na ioe mulimuli ane le tagata na aafia: “O le isi taimi o le a ou faatali mo le pasi.”

O le Faitogafiti Poto, o se talavou e seʻi mea mai taga o ofu i le tala i le tusi a Dickens o le Oliver Twist, sa na o se faaaʻoaʻoga faigofie o  talavou solitulafono i auala i aso nei. I le lē pei o le Faitogafiti Poto, o tagata gaoi, ma faomea fasi tagata i aso nei, e tusa lava po o le ā le matua, ua faapena ona tauaveina se naifi po o se fana, ma latou te faaaogāina lava. O tagata tafafao latou te lē iloa ma lē malamalama i ai, o tagata asiasi, ma tagata matamata solo i se aai fegasoloai latou te lē o amanaia, ua avea ma taulaʻiga autū a na tagata faasauā lē alolofa. E matuā vave lava na i lo o le emo o lou mata lo latou gaoia o so o se mea o iai! O le ā e ono faagaee vave ai faalogona o se gaoi? O se filifili auro po o se isi lava maatāua taugata o faaaliali mai i lou ulaina. Po o se mea puʻeata e tautau i le ua o se turisi. Ua tutusa lea ma le ulaina o se faailoga e faapea mai, “Sau e avatu aʻu!” I lea, e manaomia ai le faautauta. Ia nanā so o se maatāua, ma ia ave le mea puʻeata i se auala e lē o iloa ai, atonu pe o le nanā i totonu o se ato e ave ai faatau. O le atamai aogā lena.

O le mataala o le tasi auala lena e faafeagai ai ma le solitulafono. Ua taʻua e le Tusi Paia: “O le tagata poto [atamai], o i lona ulu ona mata, a o le valea, e savali o ia i le pouliuli.” (Failauga 2:14) O le faatatauina o lenei lapataiga i le faafitauli o le solitulafono, o le a taʻitaʻiina ai se tasi e matauina tagata o loo feofeoaʻi solo ma le masalosalo e aunoa ma ni fuafuaga iloga. Ia mataala mo tagata gaoi o ē e mulimuli mai i ou tua ma seʻi lau ato a o e savali i autafa o le auala. Talu ai ona o nisi e tietie pasika ma taseʻi atu ato a isi tagata a o latou alamū vave ese atu, o lea, ʻaua lava neʻi e sōsō tele i le pito i totonu o le auala e savavali ai tagata, ae maise lava pe afai o e aveina se ato taʻitaʻi po o se ato. Aloese mai taavale a lalo na e toaitiiti ni tagata o iai. E sili atu ona e saogalemu i le mea e toatele ai tagata ma tele ai foi molī. O tagata gaoi e lē mananao e iloa pe matauina foi i latou.

O le talepe fale o le isi foi lena solitulafono taatele e masani lava ona ono alofia pe afai e matuā faaeteete lelei tagata i tagata solitulafono. Ua faaaogā ai ma le tonu e le Tusi Paia le faatusatusaga: “Latou te ulufale atu i faamalama e pei o se gaoi.” (Ioelu 2:9) Ua faatonu mai e le atamai aogā ina ia aua neʻi tuua ou faitotoa ma ou faamalama e lē lokaina. E moni pea lava faapea e sili ona aogā le puipuia i lo o le togafitia. O le faaalu o nisi tupe faasili e puipuia ai lou aiga o le mea moni o le faamautinoaga lena o le saogalemu faasaga i le gaoi ma le faaoolima.

Ae Faapefea pe a Fasia Oe ma Faoa Au Mea?

Ioe, ae faapefea pe afai e taofia oe e se tagata faomea, e ui lava i le faia o nei faaeteetega uma? Taumafai e aua le soona popole pe faia vave ni gaoioiga. Ia manatua atonu o loo fefe foi le tagata gaoi ma atonu ua faauiga sese au gaoioiga. Taumafai e faatalanoa ma feutagai ma le tagata pe afai na te faatagaina. (Ioe, atonu o lē o osofaia oe o se tamaitai.) I nisi taimi e mafai ai ona faatoafilemu le tagata faomea i le iloa o loo latou osofaia se Kerisiano moni ma le faamaoni. E ui lava i uiga faaalia, aua e te taumafai e tetee pe afai e na o au tupe po ni mea totino na e mananao ai. Tuu atu i ai po o le ā lava le mea o manao mai ai. Ua aʻoaʻo e le Tusi Paia faapea e sili ona tāua le ola o le tagata na i lo so o se mea o ia te ia.—Faatusatusa Mareko 8:36.

Ia aua le faia e pei e foliga o le a matuā faia se iloiloga totoʻa, taumafai e matau ni uiga e ese mai o le tagata faomea, pe i lavalava po o ona foliga mai. O le ā le ituaiga faaiʻuga o ana upu pe a tautala? O nei auiliiliga uma e mafai ona aogā pe a e lipoti atu le solitulafono i leoleo, ona talu ai o le tele o tagata solitulafono e masani ona iloa lelei i a latou auala po o fuafuaga taitoatasi ma i lea ua sili atu ai ona faigofie ona iloa lelei i latou.

Ae faapefea le tauaveina o se auupega mo le puipuia o oe lava? E mautinoa lava e lē o se mea poto mo se Kerisiano ona tauave ni auupega. Afai e manatu se tagata faomea faapea  o le a e tago i se auupega, e lē faaluafesasi lona mafaufau i le faamanuʻaina po o le fasiotia o oe. E lē gata i lea, e mafai faapefea ona e mulimuli i le mataupu silisili a le Tusi Paia ina ia “nonofo fifilemu ma tagata uma lava” pe afai o ia te oe se auupega e faafetaiai ai se osofaiga?—Roma 12:18, NW.

E ui lava i faaeteetega ua e faia, e leai se faamaoniga faapea o le a lē osofaia oe i se taimi. I aai e taatele ai le solitulafono, e pau lava le mea e te manaomia o lou iai i le nofoaga sese i le taimi sese. E leʻi mamao tele atu i Niu Ioka, na tuua ai e se loia lona ofisa ina ia alu atu e faatau mai sana ipu kofe. A o ia ulu atu i le faleoloa, ae tietie mai loa ni tagata talavou ma tafana atu i le faleoloa. Na fasiotia ai le loia i se pulu na lavea ai lona ulu. Ona o ‘taimi ma mea e lē ma iloa e tutupu ai,’ ua leiloa ai lona ola. Pagā se mea mataʻutia! Pe o iai so o se faamoemoe mo se vaifofo tumau i le malosi o le solitulafono o iai nei lea ua tafia ai le lalolagi?—Failauga 9:11.

Pe a Taofia le Solitulafono

I le toetoe lava luaafe tausaga ua mavae, na valoia ai e Iesu faapea o le a oo mai se tupulaga o le a vaai i mea tutupu e sili atu ona matataʻu ai na i lo se isi lava tupulaga na muamua atu. Ona o televise ma isi fesootaiga vave, e faitau miliona, e leai, e faitau afemiliona ua molimau i tala fou i a latou lava leitio ma televise i faiga sauā matuā sili ona leaga, a o faia moni lava. Ua avea le lalolagi o se nuu, ma ua vave lava ona avea tala mai le lalolagi o tala o vaifanua. O le iʻuga, ua tutupu ai mea moni i le aiga i aso fai soo, ma e pei ona valoia e Iesu, e toatele tagata o le a “matapogia i le matatau ma le faatalitali i mea e oo mai i le lalolagi.”—Luka 21:26, LF.

Sa muai silafia e Iesu mea na sa tutupu talu mai le 1914, o na mea tutupu o le a faaāva ai le ala i “le faaiʻuga o le faiga o mea.” (Mataio 24:3-14, NW) Ae na ia fetalai foi: “Pe a iloa e outou ia mea ua faia, ia outou iloa ua latalata le malo o le Atua.” (Luka 21:31) O le uiga o lena mea, ua lē o toe umi ae faaaafia loa i se auala mataʻina e le pulega amiotonu a le Atua le lalolagi.—Mataio 6:9, 10; Faaaliga 21:1-4.

I lalo o lena pulega, e na o ē agamalu, filemu, ma i latou o ē usiusitai i le Atua o le a maua se vaega i tulaga faa-Parataiso o le lalolagi. O le ā o le a tupu i tagata solitulafono ma ē amioleaga? “E le pine ona seleeseina i latou e pei o le mutia; e mamae i latou e pei o le vao muʻa lauolaola. Auā e faaumatia o e fai amio leaga; a o e [faamoemoe] ia Ieova, o i latou lava ia e fai mo latou le nuu [laueleele].” I lalo o lena pulega amiotonu faalelagi, o le a leai ni faalavelave po o se solitulafono.—Salamo 37:2, 9.

Afai e te fia iloa atili e uiga i lenei faamoemoe faavae i le Tusi Paia e uiga i se pulega filemu ma tumau e faavavau i le lalolagi, ia faafesootai atu Molimau a Ieova i lou tuaoi po o lo latou Maota o le Malo. O le a latou fesoasoani ma le fiafia ia te oe ia malamalama i le Tusi Paia e aunoa ma se totogi.

[Faamatalaga faaopoopo i le itulau 6]

“E faaumatia o e fai amio leaga, a o e [faamoemoe] ia Ieova, o i latou lava ia e fai mo latou le nuu [laueleele]”

[Ata i le itulau 7]

O le tusi a Charles Dickens i le tagata e seʻi mea mai taga o ofu, le Faitogafiti Poto, sa o se tagata faigofie pe a faatusatusa i tagata faomea o aso nei

[Ē Ana le Ata]

Graphic Works a GEORGE CRUIKSHANK, maa ia Richard A. Vogler, Dover Publications, Inc.