Ia Autasia e Ala i le Gagana Mamā
Ia Autasia e Ala i le Gagana Mamā
“Auā o ona po ia ou te liliu atu ai i nuu le gagana mamā, ina ia latou valaau uma lava i le suafa o Ieova, ina ia auauna ia te ia ma le loto gatasi.”—SEFANAIA 3:9, NW.
1. Pe ua faalogo ea tagata o fetalai mai Ieova le Atua?
E MAMĀ le gagana a Ieova le Atua. Peitai po ua faalogo ea tagata a o ia fetalai? Ioe! Sa tupu lena mea a o iai lona Alo, o Iesu Keriso, i le lalolagi i le 19 senituri ua mavae. Mo se faataʻitaʻiga, ina ua papatisoina Iesu, sa faalogoina o fetalai le Atua faapea: “O loʻu atalii pele lenā, ua ou fiafia lava ia te ia.” (Mataio 3:13-17) Sa o se faalauiloaga lena o le upu moni mamā, na faalogoina e Iesu ma Ioane le Papatiso i se gagana faaletagata.
2. O le ā ua faaalia mai i le faamaumauga a le aposetolo o Paulo i “gagana a . . . agelu”?
2 I ni tausaga mulimuli ane na tautala ai le aposetolo Kerisiano o Paulo e uiga i “gagana a tagata atoa ma agelu.” (1 Korinito 13:1) O le ā ua faaalia i lenei mea? Ioe, e faaalia ai faapea e lē gata ina tautatala ma iai gagana a tagata ae faapena foi i peresona agaga! O le mea moni, e lē mafai ona fesootai le Atua ma agelu e ala i le faaaogāina o leo ma gagana tatou te lagonaina ma malamalama ai. Aiseā e lē mafai ai? Auā o le ʻea lea e pei ona siosiomia ai le lalolagi e manaomia ona ati ai galuleo ina ia mafai ona lagona ma malamalama ai tagata.
3. Na faapefea ona amata le gagana faaletagata?
3 Na faapefea la ona amataina le gagana faaletagata? Ua faapea mai nisi sa tauivi o tatou tupuaga ina ia fesootai le tasi ma le isi i le taumafai e ʻuaʻua ma oioi. Fai mai le tusi Evolution (Life Nature Library): “Atonu sa mafai ona aʻoaʻoina e se tagata e pei o se kolila ni leo e tautala ai . . . pe tusa o le tasi le miliona tausaga ua mavae.” Ae na taʻua e se failomifefiloi o Ludwig Koehler: “O le tautala faaletagata o se mealilo; o se meaalofa tauatua, o se vavega.” Ioe, o le tautala faaletagata o se meaalofa tauatua, auā na avatu e le Atua i le uluai tagata, o Atamu se gagana. Ua mautinoa sa mulimuli ane taʻua lena o le gagana Eperu. Sa tautalagia lena gagana e tagata Isaraelu o ē na tupuga mai ia “Aperaamo le Eperu,” o se augatamā faatuatua o lē na soifua mai ia Semu le atalii o le tufuga na fausia le vaa o Noa. (Kenese 11:10-26; 14:13; 17:3-6) I le manatu atu i le faamanuiaga faavaloaga a le Atua ia Semu, ua alagātatau ai ona faaiʻua faapea sa leʻi afaina lana gagana i le mea lea na faia faavavega e Ieova le Atua i le 43 senituri ua mavae.—Kenese 9:26.
4. O ai Nimarota, ma sa faapefea ona faaaogāina o ia e Satani le Tiapolo?
4 I lena taimi “sa tasi lava le gagana e tasi foi le tautala a le lalolagi uma.” (Kenese 11:1) Ae sa ola ai i inā le tamaloa o Nimarota, “o sē e malosi e tuli manu e faasagatau ia Ieova.” (Kenese 10:8, 9, NW) Na faapitoa lava ona faaaogāina Nimarota e le fili sili lē vaaia o le fanau a tagata, o Satani, e faatuina le vaega faalelalolagi o le faalapotopotoga a le Tiapolo. Sa manao Nimarota ina ia taʻutaʻua ia lava, ma faapea ona salalau atu ai lena uiga faasausili i ona tagata, o ē na amataina se fausaga faapitoa i le laufanua o Senara. E tusa ai ma le Kenese mataupu e 11, fuaiupu e 4 na latou faapea ane: “O mai ia, ina tatou fai ia o se aai, ma se ʻolo, ia oo lona tumutumu i le lagi, ia tatou faia foi se mea e taʻua ai tatou, neʻi faataapeapeina i tatou i le fogāeleele uma.” Sa faamutaina lena taumafaiga faasagatau i le poloaiga a le Atua ia “tumu le lalolagi” ina ua faafenumiaia e Ieova le gagana a le ʻau fouvale. E ‘tusa,’ ma le tala a le Tusi Paia, “ona faataapeape lea e Ieova ia te i latou ai lea mea i le lalolagi uma; ona tuua lea e i latou ona faia o le aai.” (Kenese 9:1; 11:2-9) Sa faaigoaina lena aai o Papelu, po o Papelonia (o lona uiga, “Fenuminumiai”), “auā o i inā na faafefiloi ai e Ieova le tautala a le lalolagi uma.”—Byington.
5. (a) O le ā na taofia ina ua faafenumiaia e le Atua le gagana a le fanau a tagata? (e) O le ā e mafai ona tatou faaiʻua e uiga i le gagana a Noa ma Semu?
5 O lena vavega—le faafenumiaia o le gagana e tasi faaletagata—na taʻitaʻia ai i le faatumuina o le lalolagi e pei ona sa poloaiina ai Noa e le Atua, ma na taofia ai so o se fuafuaga a Satani atonu sa fai e faavaeina ai sana tapuaiga autasi e lē mamā, i tagata o ē sa fouvale faasaga i le Alii Silisiliese o le lagi ma le lalolagi. E moni lava, na malolo atu tagata i le Tiapolo, e ala i le faatinoina o so o se ituaiga o tapuaiga sese, ma latou auauna ai i temoni ina ua latou faia atua ma atua fafine, ma faaigoaina i latou i a latou gagana eseese, ma tapuai atu ia i latou. (1 Korinito 10:20) Ae o le gaoioiga na faia e le Atua moni e toatasi i Papelu sa taofia ai le faatuina o se tapuaiga sese autasi e avatu ai i le Tiapolo le tapuaiga e foliga mai sa ia matuā faanaunau i ai. O le mea moni, sa lē taitai femiomiōai Noa amiotonu ma lona atalii o Semu ma lena tulaga masesei i le laufanua o Senara. O lea e mafai ai ona faaiʻua ma le talafeagai faapea sa tumau pea la laua gagana lea sa tautalagia e Aperamo faatuatua (po o Aperaamo)—le gagana lena na fetalai atu ai le Atua i le tamaloa o Atamu i le faatoaga i Etena.
6. I le aso o le Penetekoso 33 T.A., sa faaalia faapefea e Ieova e mafai ona ia tuuina mai le tomai e tautala ai i gagana eseese?
6 E mafai foi e Ieova, o lē na faafenumiaia le uluai gagana a le fanau a tagata, ona tuuina mai le tomai e tautala ai i gagana eseese. Ioe, na ia faia lena lava mea i le aso o le Penetekoso i le tausaga e 33 T.A.! E tusa ai ma le Galuega 2:1-11, pe ā ma le 120 soʻo o Iesu Keriso na faapotopoto ai i se afeafe aluga i Ierusalema. (Galuega 1:13, 15) Ona faafuaseʻi ai lea o se taalili mai le lagi e “peiseai o le matagi ua agi tele mai.” Ua iloa foi “laulaufaiva peiseai o le afi” ma ua vaevaeina. O lena na ‘faatutumuina ai le au soʻo i le agaga paia ma afua ai ona tautatala i gagana eseese, e pei ona foaiina atu e le agaga ia te i latou ia tautatala ai.’ O na gagana tauatua sa tuuina ane, na latou talatala atu ai “e uiga i mea matagofie a le Atua.” Ma maeu se vavega ina ua mafai ona malamalama ai tagata Iutaia ma ē talitonu e eseese gagana, mai nofoaga mamao e pei o Mesopotamia, Aikupito, Lipiā, ma Roma, i le feau faasao ola!
Se Gagana Foaiina mai le Atua i Aso Nei!
7. O ā faamoemoega semanū e maua pe ana faapea sa na o le tasi le gagana na tautalagia ma malamalama ai le lalolagi aoao?
7 Talu ai la e mafai e le Atua ona aumaia faavavega ni gagana eseese, pe lē o se mea matagofie ea pe afai na te faia ia tasi le gagana e tautalagia ma malamalama ai le lalolagi aoao? O le a siitia ai e lena mea se malamalamaga tele i totonu o le aiga faaletagata. E pei ona faaupuina e le The World Book Encyclopedia: “Ana fai e tautatala tagata uma i le gagana e tasi, semanū o le a sili atu ona vavalalata sootaga tau aganuu ma tamaoaiga, ma o le a faateleina le lelei i le va o atunuu.” Auā, a itiiti mai e 600 gagana aoao ua fuafuaina i le gasologa o tausaga. Mai na gagana, sa sili atu ai ona taulau le gagana Esperanto ona e tusa ma le 10,000,000 tagata ua latou aʻoaʻoina talu mai lona foafoaina i le tausaga e 1887. E ui i lea, e augapiu ma ni taumafaiga faaletagata ua taulau i le autasia o le fanau a tagata e ala i se gagana aoao. O le mea moni, ua oo ina faateteleina atili faafitauli ua mafua ai fevaevaeaiga i lenei lalolagi a o ‘agaʻi atu tagata amioleaga mai le leaga i le sili ona leaga.’—2 Timoteo 3:13.
8. E tusa foi pe faaaogāina se gagana aoao i le lalolagi i aso nei, o le ā o le a iai pea, ma aiseā?
8 A tuu atu i le itu tau tapuaiga, e telē se fenuminumiai o loo iai. Peitai pe lē tatau ea ona tatou faatalitalia lenei mea, ona o loo taʻua e le tusi o le Tusi Paia o Faaaliga le emepaea o lotu sese a le lalolagi o “Papelonia le aai tele”? (Faaaliga 18:2) Ioe, auā o le uiga o “Papelonia” o le “Fenuminumiai.” E tusa foi pe faaaogāina se gagana ese po o nisi gagana masani e pei o le faa-Peretania, Falani, Siamani po o le faa-Rusia o se gagana a le lalolagi aoao i aso nei, o le a tumau pea ona iai o le fevaevaeai faaletapuaiga atoa ma isi. Aiseā? Ona o “le lalolagi uma o loo nofo toilalo i loo leaga,” o Satani le Tiapolo. (1 Ioane 5:19) O ia o le faaaʻoaʻoga tutasi o le manatu faapito, ma ua ia moomoo ma le matapeapea ina ia tapuaia o ia e le fanau uma a tagata, e pei lava ona ia faia i aso o Nimarota ma le Olo o Papelu. Ioe, e oo foi i se gagana aoao ua tautalagia e tagata agasala e ono mafai ona avatu ai ia Satani le avanoa e faatuina ai se tapuaiga autasi faa-Tiapolo! Peitai o le a lē taitai ona faatagaina lena mea e Ieova; o le mea moni, e lē o toe mamao ona ia aumaia lea o se iʻuga i tapuaiga sese uma, ua faagaeeina e le Tiapolo.
9. Ua faapefea ona autasia nei tagata o atunuu uma ma ituaiga?
9 E ui i lea, o se mea e ofo ai ona ua autasia nei tagata lelei mai atunuu uma atoa ma gagana. Ua mafua lenei mea ona o aiaiga a le Atua ma mo le lelei o lana tapuaiga. I aso nei, ua fuafuaina e le Atua ina ia mafai e tagata ona aʻoaʻoina ma tautalagia le gagana mamā e tasi i le lalolagi. Ma o se gagana matuā aoao moni lava. Ioe, o loo aʻoaʻoina e Ieova le Atua lenei gagana mamā i le toatele o tagata mai atunuu uma o le lalolagi i aso nei. O le faataunuuga lenei o le folafolaga faavaloaga a le Atua e ala mai i lana perofeta ma le molimau o Sefanaia: “Auā o ona po ia ou te liliu atu ai i nuu le gagana mamā [o lona uiga moni, “o se laufofoga mamā”], ina ia latou valaau uma lava i le suafa o Ieova, ma auauna ia te ia ma le loto gatasi.” (Sefanaia 3:9, NW) O le ā la lenei gagana mamā?
Faauigaina le Gagana Mamā
10. O le ā le gagana mamā?
10 O le gagana mamā o le upu moni lea a le Atua o loo maua i lana lava Afioga, le Tusi Paia. Ae maise lava o le upu moni e faatatau i le Malo o le Atua, lea o le a aumaia le filemu ma isi faamanuiaga mo le fanau a tagata. O le a aveesea e le gagana mamā mea sese a lotu ma tapuaiga sese. Ua ia autasia i latou uma e tautatala ai i le tapuaiga mamā, e lē ponā a le Atua soifua moni, o Ieova. I aso nei, pe tusa o le 3,000 gagana ua avea ma pa pupuni i le malamalamaga, ma e faitau selau tapuaiga sese ua fenuminumiai ai le fanau a tagata. O lea, maeu lo tatou olioli ona ua tuuina mai e le Atua le suiga i lenei gagana mamā, matagofie i tagata!
11. O le ā ua saunia e le gagana mamā mo tagata o atunuu uma ma ituaiga?
11 Ioe, ua aʻoaʻoina le gagana mamā e tagata o atunuu uma ma ituaiga. Ona ua na o lea le gagana mamā faaleagaga i le lalolagi, ua ia galue ai la o se uunaiga malosi e autasia ai. Ua mafai ai e i latou uma o loo tautalagia ona “valaau uma lava i le suafa o Ieova, ma auauna ia te ia ma le loto gatasi,” pe i le uiga moni, ‘ma le loto e tasi.’ O lea ua latou auauna ai i le Atua “i le maliliega e tasi,” “ma le taofi aʻiaʻi e tasi ma le loto autasi e tasi.” (The New English Bible; The Amplified Bible) E faitauina faapea le faaliliuga a Steven T. Byington: “Ona Ou [Ieova le Atua] suia ai lea o laufofoga o tagata uma ia mamā, ina ia latou valaau uma lava i le suafa o Ieova ma felagolagomai i lana auaunaga.” O sea felagolagomai o gagana eseese i le lalolagi aoao i le auaunaga a le Atua ua na o le lio lava o Molimau a Ieova o loo maua ai. I le 212 atunuu i aso nei, e silia i le fa miliona i latou o loo folafolaina le Malo o loo talaʻia le tala lelei i le tele o gagana faaletagata. E ui i lea, e “tasi le gagana” a Molimau ma e “maopoopo lava i le loto e tasi ma le manatu e tasi.” (1 Korinito 1:10) Ua mafua lenei tulaga, ona po o fea lava latou te iai i le lalolagi, e tautatala uma lava Molimau a Ieova i le gagana mamā e tasi, ina ia viia ai ma faamamaluina ai lo latou Tamā faalelagi.
Aʻoaʻo Nei le Gagana Mamā!
12, 13. (a) Aiseā e ao ai ona e manatu mamafa e uiga i le tautala i le gagana mamā? (e) Aiseā ua matuā faitaulia ai upu i le Sefanaia 3:8, 9 i aso nei?
12 Aiseā e ao ai ona e manatu mamafa e uiga i le tautala i le gagana mamā? O se tasi o mafuaaga, ona e faalagolago lou ola i lona aʻoaʻoina ma tautala ai. A o leʻi mamao ona folafolaina e le Atua e “liliu atu ai i nuu le gagana mamā,” na ia lapatai mai: “Ia outou faatalitali ia te au, o loo fetalai mai ai Ieova, ia oo i le aso ou te tulai atu ai i le vete; auā ua tonu ia te au e faapotopotoina nuu ese, e aofia lava malo; ina ia sasaa atu i luga ia i latou loʻu ita, o loʻu ita tele uma lava; auā e faaumatia le lalolagi uma i le afi o loʻu fuā.”—Sefanaia 3:8.
13 O na afioga a le Alii Silisiliese o Ieova sa uluai fofogaina atu i le 26 senituri anamua ia Iuta, lea sa avea ai Ierusalema ma ona laumua. Ae na faia faapitoa foi lena faamatalaga mo o tatou aso, ona sa pei Ierusalema o Kerisinetoma. Ma talu mai ona faatuina le Malo faalelagi o le Atua i le 1914, o o tatou aso, o le aso lea o Ieova mo le aoaoina o nuu ma le faapotopotoina o malo. Ua ia aumaia faatasi i latou uma i lalo o lana vaavaaiga e ala i se galuega tele o le molimau atu. O le iʻuga, ua saveʻuina ai i latou e lenei mea e tetee faasaga i lana fuafuaga. Peitai, ua faatagaina ma le alofa mutimutivale e Ieova le Atua ni tagata mai nei atunuu uma ina ia autasi e ala i le tautatala i le gagana mamā. Faatasi ma lea, o i latou uma lava o loo saili e ola i lana lalolagi fou ua folafola mai, e mafai ona auauna autasi ia te ia i luma o atunuu uma a o leʻi faatamaʻia i le faatinoga aasa o le toasa tauatua i “le taua i le aso tele o le Atua e ona le malosi uma lava,” lea ua masani ona taʻua o Amaketo. (Faaaliga 16:14, 16; 2 Peteru 3:13) I se uiga fiafia, o i latou o ē tautatala i le gagana mamā ma valaau i le suafa o Ieova i le faatuatua o ni tagata tapuai moni autasi, o le a olioli i le puipuiga tauatua i le aasa o lena puapuaga i le lalolagi. O le a saogalemu ona aumaia i latou e le Atua i totonu o le lalolagi fou, lea e na o le gagana mamā lava o le a mulimuli ane iai i laufofoga o le fanau uma a tagata.
14. Sa faaalia faapefea e le Atua, e ala ia Sefanaia faapea e manaomia se gaoioiga faanatinati ina ia faasaoina ai i le iʻuga o lenei faiga o mea?
14 E ala i lana perofeta o Sefanaia, ua faamanino mai ai e Ieova faapea o i latou e faamoemoe e faasaoina atu i le iʻuga o le faiga o mea amioleaga o loo iai, e tatau ona gaoioi faanatinati loa. E tusa ai ma le Sefanaia 2:1-3, ua fetalai mai le Atua: “Ia outou faapotopoto outou, ina faapotopotoina ia outou, le nuu e le manaomia; manū o lei fanau mai le pule; o loo mavae atu le aso pei o aputi o saito; manū o lei oo mai le toasa tele o Ieova ia te outou; manū o lei oo mai ia te outou le aso o le toasa o Ieova. Ia outou saili ia Ieova, outou uma ua agamalu i le nuu, o e ua faia lana faamasinoga; ia outou saili le amiotonu, ia outou saili le agamalu, atonu e lilo ai outou i le aso o le toasa o Ieova.”
15. (a) O le ā le uluai faataunuuga o le Sefanaia 2:1-3? (e) O ai na faasaoina ina ua faaoo atu le sala faafaamasinoga a le Atua i luga o Iuta, ma o le ā o le a tutusa ma lena faasaoina i o tatou aso?
15 Na iai se uluai faataunuuga o na upu i luga o Iuta ma Ierusalema anamua. Sa leʻi talileleia e tagata agasala o Iuta le augani atu a le Atua, e pei ona faaalia i lona faaooina atu o le sala faafaamasinoga i o latou luga ai lima o Papelonia i le tausaga e 607 T.L.M. E pei lava ona avea Iuta o se ‘nuu e leʻi manaomia’ i luma o le Atua, ua faapena foi ona avea Kerisinetoma ma “nuu” ua faalumaina i luma o Ieova. Peitai, ona o le utagiaina o le afioga a le Atua, na faasaoina ai nisi tagata Iutaia ma isi, e aofia ai le perofeta faamaoni a Ieova o Ieremia. O isi o ē na faasaoina o se tagata Aitiope e igoa ia Epetemeleka ma ē e tupuga mai ia Ionatapa. (Ieremia 35:18, 19; 39:11, 12, 16-18) E faapena foi i aso nei, o le a faasaoina ia Amaketo “se motu o tagata e toatele” o “isi mamoe” a Iesu ua aoaoina mai i atunuu uma lava, i totonu o le lalolagi fou a le Atua. (Faaaliga 7:9; Ioane 10:14-16) Na o i latou lava e aʻoaʻoina ma tautatala i le gagana mamā o le a avea o ni ē e faasaoina ma le olioli.
16. O le ā e tatau ona faia e se tasi ina ia lilo ai “i le aso o le toasa o Ieova”?
16 E pei lava o le aiaiga a Ieova e ao ona tafiesea Iuta ma Ierusalema, o lea e tatau ai foi ona fano Kerisinetoma. Ioe, ua lalata mai le faaumatiaga o lotu sese uma, ma o i latou e mananao e fia faasaoina ua tatau nei ona vave gaoioi. E tatau ona latou faia faapea a o leʻi “mavae atu le aso e pei o aputi o saito,” e vave ona lelea ese i le matagi, e pei ona faasalalauina o fatu i le ʻea i se fola e tuueseeseina ai. Ina ia faasaoina mai i le maʻemaʻeā o le Atua, e tatau ona tatou tautatala i le gagana mamā ma tali atu i le lapataiga a le Atua a o leʻi oo mai le aso o le toasa mumū o Ieova i o tatou luga. I ona po o Sefanaia atoa ma aso nei, ua saili ai ē agamalū ia Ieova le Atua, faatasi ma le amiotonu ma le agamalu. O lo tatou saili ia Ieova o lona uiga o le alofa lea ia te ia ma lo tatou loto, solu, manatu, ma le malosi atoa. (Mareko 12:29, 30) “[O i latou e faia faapena] atonu e lilo ai . . . i le aso o le toasa o Ieova.” Ae aiseā ua faapea mai ai le valoaga “atonu”? Auā e faalagolago le faaolataga i le faamaoni ma le tumau. (Mataio 24:13) O i latou o ē gauai i tapulaa amiotonu a le Atua ma tautalatala pea i le gagana mamā o le a lilo i le aso o le toasa o Ieova.
17. O ā fesili o loo totoe mo la tatou iloiloga?
17 Talu ai ua i le va i vaa le aso o le toasa o Ieova ma e faalagolago le faaolataga i le aʻoaʻoina ma le faaaogāina o le gagana mamā, o nei la le taimi e faaaafia loloto ai i lona suesueina ma tautalatala ai. Peitai e mafai faapefea e se tagata ona aʻoaʻoina le gagana mamā? Ma e mafai faapefea ona aogā ia te oe le tautala ai?
O le a Faapefea ona E Tali?
□ Na amata faapefea le gagana faaletagata?
□ O le ā le gagana mamā?
□ Aiseā ua matuā faitaulia ai upu i le Sefanaia 3:8, 9 i aso nei?
□ O le ā e tatau ona tatou faia ina ia lilo ai “i le aso o le toasa o Ieova”?
[Fesili mo le Suʻesuʻega]
[Ata i le itulau 14]
Sa faataapeape e le Atua le fanau a tagata i Papelu e ala i le faafenumiaia o la latou gagana