Solitulafono i se Lalolagi Fenuminumiai

O LE solitulafono, e lē o ni mea ua tutupu faaonaponei. Sa faia le uluai fasioti tagata i le faitauafe o tausaga ua mavae ina ua fasiotia e Kaino lona uso o Apelu. O loo taʻua foi le toso teine ma faiga faasotoma i Tusitusiga Eperu anamua. (Kenese 4:8; 19:4, 5; 34:1-4) Sa fasia tagata ma faoa a latou mea i le uluai senituri T.A., e pei ona faaalia i le faataoto i le Samaria agalelei. (Luka 10:29-37) Ae e iai se eseesega ma aso nei.

O le lagona o tagata i le tele o aai autū o le lalolagi, e tusa lava po o Niu Ioka, Lonetona, Kalakata, po o Pokota, e faapea ua matuā sili atu ona salalau le solitulafono ma ua sili atu ona faamataʻu. I le lipoti mai i le nusipepa India Today i lalo o le ulutala “Vaega a le Au Lē Pulea” ua taʻua ai e faapea: “O se faiga o mea e faateʻia ai, ua faamataʻu mai lona matuā vaevaeina o le mataupu maʻaleʻale tau amio ma le autasi lautele lea ua na faamaopoopoina faatasi atunuu, o le faateleina lea o faiga sauā, le tetee i le pule, ma le amio lē taupulea i se vaega.” I la latou taua faasaga i le solitulafono, e oo lava i leoleo, e tofotofoina i nisi taimi ina ia sopo tapulaa i tala atu o tuaoi e faagata mai ai le malosi o le tulafono, ma faaaogā ai e i latou lava faiga solitulafono. Ua taʻua i se lipoti talu ai nei mai Initia e faapea: “O maliu i faletaofia o leoleo o loo aumaia ai pea ni tala.” Ma ua faapena foi ona moni o lea mea i isi atunuu.

O avanoa faasaga i le aafia fua o se tagata i solitulafono, e foliga mai ua agaʻi atu ina silisili ona leaga. Fai mai se lipoti mai le Iunaite Setete e faapea “e tasi mai le fa aiga i Amerika na oo atu i ai se solitulafono o faiga sauā po o le gaoi i le 1988.” E lē gata i lea, o tagata o faia solitulafono sauā, o tamaiti e laiti lava i o latou tausaga. Ua taʻua e le mekasini a Amerika Latina o le Visión e faapea “e iva mai fasioti tagata totogi [sicarios] uma e sefulu, o tamaiti laiti o loo i lalo o le puipuiga a le tulafono. [O i latou na] o ‘tamaiti’ faatoʻā tau amata ona avea o ni tagata talavou ma o loo i lalo o puipuiga faaletulafono.” Ua toe taʻua ai foi faapea, o le faia o solitulafono sauā e tamaiti o loo i lalo o le tulafono o se gaoioiga ua faia i le lalolagi aoao.

Na valoia e le Tusi Paia toetoe lava 2,000 tausaga ua mavae: “A e ia e iloa e oe lenei mea, o ona aso e gata ai e oo mai ai aso faigata; auā e avea tagata ma e alolofa i latou ia i latou, o e mananao i tupe, . . . o e amio leaga, o e le  lotoaiga, . . . o e le taofi manao o le tino, o e faasaua, o e le alolofa i tagata amio lelei, o e faalata, o e soona fai, o e ua faafefeteina, . . . A o tagata amio leaga ma e taupelopelo, e alualu pea lava lo latou leaga, o loo faasese atu, ua faaseseina foi i latou.”—2 Timoteo 3:1-4, 13.

Talu mai le 1914 ua tele ma anoanoai faamaoniga faapea ua tatou ola i na aso faigata e gata ai. O le lalolagi, i le puapuagatia i taua e lua a le lalolagi ma isi feteenaiga sili, ua oo ina lē pulea ma ua fenuminumiai i le tele o auala. Ua salalau atu le solitulafono. I le tele o vaifanua o aai, ua pule ai tagata solitulafono sauā, ma ua suia ai auala o olaga o le toatele o tagata usiusitai i le tulafono. E pei ona taʻua ai e se faipule taʻutaʻua i le senate i le Iunaite Setete e faapea: “Ua iai nei le tele naʻuā o mea e ao ona popole ai, o mea sa lē taitai ona masani ona tatou fefefe ai. I nisi taimi ua tatou matuā fefefe lava, o lea, ua oo ai ina avea i tatou o ni pagota, ae o i latou sa tatau ona lokaina ua ō saoloto.”

O le iʻuga, ua faia ai e tagata i aso nei ni faiga e puipuia ai na sa lē manaomia i le 20 po o le 30 tausaga ua mavae. Ua tailua po ua taitolu loka o faitotoa ma ua faamalosia i uamea. O tagata i le tele o nofoaga latou te aveina ia lava na o le tupe ina ia faamalie ai se tagata gaoi ona o le faamoemoe ia alofia ai le sasaina pe a leai se mea e avatua i tagata gaoi. O le tele o auala ua toetoe lava leai ni tagata e feoai ai pe a goto le la, e masani lava e na o tagata faigofie, vālea, e lē malamalama, ma i latou o ē e faamalosia ona ō i inā ona o ni tulaga—e fai ma maunu faigofie mo tagata ʻai tagata o ē e feoai solo i le lavelave o le aai.

O le ā e mafai ona tatou faia ina ia alofia ai le lavea fua i solitulafono i lenei lalolagi fenuminumiai ma le lē taupulea? E mafai faapefea ona tatou feagai ai?