O le Soifuaga o Iesu ma Lana Faiva

I le Itu Taumatau o le Atua

O LE liligiina ifo o le agaga paia i le aso Penetekoso, o le faamaoniga manino lea faapea, ua toe taunuu atu Iesu i le lagi. O le vaaiga sa leʻi pine mulimuli ane ae tuuina atu i le soʻo o Setefano, ua faamaonia ai foi faapea ua taunuu atu o Ia i inā. A o leʻi fetogia i maa ona o lana molimau faamaoni, ua alaga ai Setefano: “Faauta! ua ou iloa le lagi ua avanoa ma le Atalii o le tagata o loo tu i le itu taumatau o le Atua.”

A o iai i le itu taumatau o le Atua, o loo faatali ai Iesu i le poloaiga mai lona Tamā: “Ia pule oe i totonu o ou fili.” Ae i le taimi lena, seia oo atu i le taimi e gaoioi ai o ia faasaga i ona fili, o le ā o faia e Iesu? O loo pule o ia i luga o ona soʻo faauuina, taʻitaʻiina i latou i la latou galuega talaʻi ma sauniunia i latou e ala i le toe faatutūina e avea ma tupu lagolago faatasi ma ia i le Malo o lona Tamā.

Mo se faaaʻoaʻoga, ua filifilia e Iesu Saulo (na mulimuli ane iloa i lona igoa faa-Roma, o Paulo) ina ia taʻimua i le galuega o le faia o soʻo i isi atunuu. E maelega Saulo i le Tulafono a le Atua, ae sa taʻitaʻiseseina o ia e taʻitaʻi lotu Iutaia. O le iʻuga la, e lē gata sa faamaonia e Saulo le fasiotiga o Setefano ae ua alu atu o ia i Tamaseko ma le pule mai le ositaulaga sili o Kaiafa ina ia pupuʻe ma aumai i Ierusalema o saisaitia so o se tane po o fafine na te maua ai i inā o ni soʻo o Iesu. Ae peitai, a o alu atu Saulo i le ala, ua faafuaseʻi lava ona faataaliolio mai se malamalama ia te ia ma ua ia paʻū ai i le eleele.

“Saulo, Saulo e, se ā le mea ua e sauā mai ai ia te aʻu?” ua fesili mai ai se leo mai se mea e lē o iloa atu. “Le Alii e, o ai ea oe ua ou sauā i ai?” ua fesili atu ai Saulo.

“O aʻu o Iesu, o lē o loo e sauā i ai,” ua sau ai le tali.

Ona taʻu atu lea e Iesu ia Saulo o lē na tauaso ona o le malamalama faavavega, ina ia alu atu i Tamaseko ma faatali ai mo faatonuga. Ona faaali mai lea o Iesu i se faaaliga ia Anania, o se tasi o lona au soʻo.  Ona taʻu atu lea e Iesu ia Anania e faatatau ia Saulo: “O lenei tagata o se ipu ua filifilia mo aʻu e ave loʻu igoa i nuu ese atoa ma tupu ma le fanauga a Isaraelu.”

E moni lava, o le lagolagoina e Iesu o Saulo (ua lauiloa nei o Paulo) ma isi faievagelia ua oo ai se taulau ofoofogia i la latou galuega talaʻi ma le aʻoaʻo atu. O le mea moni, pe tusa ma le 25 tausaga ina ua uma ona faaali o Iesu ia te ia i le ala i Tamaseko, ona tusi ai lea o Paulo faapea, “o le tala lelei” ua “talaʻiina atu i mea uma lava na foafoaina i lalo o le lagi.”

Ina ua mavae isi tausaga e tele, ona saunia ai lea e Iesu se faasologa o vaaiga i lona aposetolo pele, o Ioane. E ala i nei vaaiga ua faamatalaina e Ioane i le tusi o le Tusi Paia o Faaaliga faapea, i se uiga, ua ola ai o ia e vaai i le toe afio mai o Iesu i le mana o le Malo. Fai mai Ioane faapea “e ala i le faagaeeina i le agaga” na auina atu ai o ia agaʻi i luma i taimi o le “aso o le Alii.” O le ā lenei “aso”?

O se suesueina ma le faaeteete o valoaga o le Tusi Paia, e aofia ai ma le valoaga a Iesu lava ia faatatau i aso e gata ai, ua faaalia ai faapea “o le aso o le Alii” na amata i le tausaga e 1914 lea ua fai ma tausaga o le talafaasolopito, ioe, i lenei lava tupulaga! O lea, o le 1914 na toe afio lē vaaia mai ai Iesu, e aunoa ma ni faalauiloaga lautele, ma e na o ana lava auauna faamaoni ua iloa lona toe afio mai. I lena tausaga na tuuina atu ai e Ieova le poloaiga ia Iesu ina ia alu atu ma pule i ona fili!

I le usiusitai atu i le poloaiga a lona Tamā, na faamamā ai e Iesu le lagi mai ia Satani ma ana temoni, i le lafoina ifo o i latou i lalo i le lalolagi. Ina ua uma ona vaaia le tupu o lenei mea i le faaaliga, ona faalogoina ai lea e Ioane se leo faalelagi o folafola mai: “O ona po nei ua oo mai ai le olataga ma le mana ma le malo o lo tatou Atua ma le pule a lona Keriso!” Ioe, i le 1914 na amata ai ona pule Keriso e avea o se Tupu!

Maeu se tala lelei lenei mo ē tapuai ia Ieova i le lagi! Ua uunaia i latou: “Ia outou olioli ai le lagi e, atoa ma ē o nonofo ai.” Ae o le ā le tulaga mo i latou o ē o nonofo i le lalolagi? “Oi talofa ia te outou o ē nonofo i le fanua ma le sami,” ua faaauau mai ai le leo mai le lagi, “auā ua alu ifo ia te outou le Tiapolo ua lotoa tele, auā ua na iloa ua saasaa ona po.”

Ua tatou iai nei lava i lena saasaa o ona po. O lea ua vaevaeina nei tagata a lē o le ulu atu i le lalolagi fou a le Atua ia, po o le puapuagatia i le faaumatiaga. O le upu moni, o lea ua filifilia nei lou lava taunuuga e auala i le faapefea ona e tali atu i le tala lelei o le Malo o le Atua ua talaʻia nei i le lalolagi aoao i lalo o le taʻitaʻiga a Keriso.

Pe a uma ona tuueseeseina tagata, ona auauna loa lea o Iesu Keriso e avea o se Sui o le Atua e tafiesea mai le lalolagi le faiga aoao o mea a Satani ma i latou uma o lagolagoina. O le a faaiʻuina e Iesu lenei aveesea o ē amio leaga uma i le taua ua taʻua i le Tusi Paia o Ha-Maketo po o Amaketo. Pe a mavae lea, ona puʻe ai lea e Iesu o le Peresona sili i le vateatea e pito atu ia Ieova le Atua lava ia, Satani ma ana temoni ma saisaia i latou mo le afe o tausaga i le “to e lē gata,” o lona uiga i se tulaga e lē toe gaoioi ai e pei ua oti. Galuega 7:55-60; 8:1-3; 9:1-19; 16:6-10; Salamo 110:1, 2; Eperu 10:12, 13; 1 Peteru 3:22; Luka 22:28-30; Kolose 1:13, 23; Faaaliga 1:1, 10; 12:7-12; 16:14-16; 20:1-3; Mataio 24:14; 25:31-33.

◆ Ina ua mavae le afio atu o Iesu i le lagi, o fea ua iai o ia, ma o le ā o loo ia faatali i ai?

◆ I luga o ai ua pule ai Iesu ina ua afio atu i le lagi, ma ua faapefea ona faaalia lana pule?

◆ O anafea na amata ai le “aso o le Alii,” ma o le ā na tupu i lona amataga?

◆ O le ā le galuega o le tuueseeseina ua faagasolo i aso nei lea ua aafia ai i tatou uma taitoatasi, ma e faavae i le ā ua faia ai le tuueseeseina?

◆ Pe a uma le galuega o le tuueseeseina, o ā mea tutupu o le a mulimuli mai ai?