Ia Onosai i Tagata Uma Lava

“Matou te aioi atu foi ia te outou, le au uso e, ia outou apoapoai atu i e amio faapiopio, ia faamafanafana i e loto iti, ia fesoasoani i e o vaivai, ia outou onosai i tagata uma lava.”—1 TESALONIA 5:14.

1. I fea ma i lalo o ā tulaga ua faaalia ai e Molimau a Ieova le onosai?

MAEU se faaaʻoaʻoga ua saunia e Molimau faaonaponei a Ieova i lo latou onosai! Ua latou tutumau i le tele o faigata ma puapuaga i nuu sa faia ai faiga faa-Nasi ma faiga faa-Tautalatasi anamua ma i atunuu e pei o Malaui seia oo mai lava i le taimi nei. Ua onosai foi i latou o loo ola i aiga e eseese a latou tapuaiga.

2. O ā mea moni e lua ua mafua ai se parataiso faaleagaga o loo olioli ai tagata o Ieova?

² E ui ā i ni puapuaga ma faigata ua oo ia i latou, ae o loo olioli pea tagata tuuina atu o Ieova i faamanuiaga o se parataiso faaleagaga. Ioe, ua faaalia e mea moni faapea sa amata ona olioli ai Kerisiano faauuina i le tausaga e 1919. O le ā ua mafua ai ona iai lenei parataiso faaleagaga? E muamua lava, o le mafuaaga ua iai ai nei tulaga faaparataiso i tagata o Ieova ona ua toe faafoisia e le Atua ana auauna faauuina i lo latou “nuu,” po o aiaiga, o le tapuaiga mamā. (Isaia 66:7, 8) Ua lauolaola foi le parataiso faaleagaga ona o tagata uma lava o loo iai, ua latou faaalia fua o le agaga o le Atua. O se tasi o ia fua o le onosai. (Kalatia 5:22, 23) O le tāua o lenei uiga e tusa ai ma lo tatou parataiso faaleagaga e mafai ona matauina mai le faamatalaga lenei a le tagata poto faapitoa o William Barclay: “E lē mafai ona iai se mafutaga faa-Kerisiano e aunoa ma le makrothumia [onosai]. . . . Ma o le mafuaaga mo lena mea ua na o lenei—o le makrothumia o se uiga sili lea o le Atua (Roma 2.4; 9.22).” (A New Testament Wordbook, itulau 84) Ioe, o le tāua lena o le onosai!

Ia Onosai i o Tatou Uso

3. O le ā le lesona e uiga i le onosai na avatu e Iesu ia Peteru?

³ E foliga mai sa faafaigata i le aposetolo o Peteru ona faaalia le onosai, auā na ia fesiligia Iesu i se taimi: “Le Alii e, e agaleaga mai faafia ea loʻu uso ia te au, ma ou faamagalo ia te ia? seia atu fitu ea?” Sa fautuaina o ia e Iesu: “Ou te le fai atu ia te oe, seia atu fitu, a ia fitugafulu ni fitu.” (Mataio 18:21, 22) I nisi faaupuga, e lē faatapulaaina le faitau aofai o taimi tatou te lava papale ai le tasi i le isi ma faamagaloina se tasi ua agasala faasaga ia i tatou. E lē gata i lena, ailoga e iai se tasi e mafai ona ia faitauina pea seia oo i le 77 taimi! E ui i lea, o le iai o se loto faamagalo faapena e mautinoa e manaomia ai le onosai.

4. Aiseā ua manaomia faapitoa ai lava e toeaina ona onosai?

⁴ E faatatau i le faaalia o le onosai e uso faaleagaga, e lē tau fesiligia le manaomia e toeaina o le faapotopotoga ona fai ma faaaʻoaʻoga. E ono tofotofoina lo latou onosai ona e iai nisi o uso talitonu atonu e faatalalē pe faaleogalua. O isi atonu e manatu māmā pe a oo ina faasaʻoina i ni uiga leaga. E tatau i toeaina ona faaeteete ia lē faigofie ona faalavelavea pe faatausuai ona o vaivaiga o o latou uso ma tuafafine Kerisiano. Na i lo  lena, e manaomia ona manatua e nei leoleo mamoe faaleagaga le fautuaga: “O i tatou o e malolosi ia tatou fesoasoani i le vaivai o e ua le lavā e tatau ai; a e aua neʻi faafiafia i o tatou lava loto.”—Roma 15:1.

5. O le ā le mea e mafai ona tatou lavatia tatali pe afai tatou onosai?

⁵ Ae e mafai foi, ona mapuna aʻe ni feeseeseaiga i uiga ona o vaivaiga faaletagata ma nai masei laiti. Ona o ni sese po o ni uiga masani o se tagata, tatou te soona faia ai o tatou uso i se auala sese, ma atonu latou te faia ai foi faapena ia i tatou. O le mea lea, maeu le fetaui o le fautuaga: “Ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai [Ieova] ia te outou, ia faapea foi outou.” (Kolose 3:13) O le “fefaapalepaleai” o lona uiga ia onosai, e ui ina atonu o loo ia i tatou ni mafuaaga tatau e faitio ai faasaga i se tasi. E lē tatau ona tatou taui ma sui pe faasalaina so tatou uso, e oo foi i le faafaupuʻe atu i ai o ni mafatiaga.—Iakopo 5:9.

6. Aiseā ua avea ai le onosai o se ala atamai?

⁶ O le mea lava e tasi ua faatatau i ai le fautuaga o loo maua i le Roma 12:19: “Le au pele e, aua le taui atu ma sui, a ia outou tuu atu i le toasa; auā ua tusia, Ua faapea mai [Ieova], O ia te au le taui ma sui, ou te taui atu.” O le ‘tuu atu i le toasa’ o lona uiga ia faagesegese ona ita, po o le onosai. O se ala atamai le faaalia o lenei uiga, auā e aogā lea ia i tatou atoa ma isi. Afai e mapuna aʻe se faafitauli, tatou te lagona e i tatou lava le fiafia ona e ala i le onosai, tatou te lē o faagaepu atiliina ai ni faafitauli. Ma o le a lagona foi le fiafia e lē ua tatou faaalia i ai le onosai ona tatou te lē o faasalaina o ia pe taui ma sui atu ia te ia i nisi auala. E lē tioa la ona aioi atu Paulo i uso Kerisiano ina ia “faamafanafana i e loto iti, ia fesoasoani i e o vaivai, ia outou onosai i tagata uma lava”!—1 Tesalonia 5:14.

I Totonu o le Liʻo o le Aiga

7. Aiseā e manaomia ai e tagata faaipoipo ona onosai?

⁷ Ua loa ona feaveai tala e faapea o se faaipoipoga fiafia o se tuufaatasiga lea o ni tagata e toalua e lelei i le fefaamagaloai. O le ā le uiga o lena mea? E faapea o ni tagata faaipoipo e fiafia e onosai i feutagaiga i le tasi ma le isi. Ua masani ona fetosinaai tagata i isi ona o o latou faalogona po o uiga eseese. Atonu e manaia na eseesega, ae ui i lea e mafai foi ona avea ma pogai o se ʻavauga e faapea ona faaopoopo atu ai i omiga ma popolega ua mafua ai ona iai i Kerisiano faaipoipo “puapuaga i le tino.”  (1 Korinito 7:28) Mo se faataʻitaʻiga, seʻi faapea e faaleogalua le tane i nai mea iti pe mafuli atu ina faatalalē pe faapalapala. Atonu o le a avea lenei mea o se matuā faaonoono i lana avā. Ma afai e lē maua ni faufautuaga ua saunia ma le agalelei, atonu la na pau le auala na te lavatia ai vaivaiga o lana tane, o le onosai.

8. Aiseā atonu e manaomia ai e tane ona onosai?

⁸ I le isi itu, atonu e popolevale le avā i nai mea iti ma oso loa ʻiēina lana tane. Ua tatou manatua lelei ai i lenei mea le mau: “E lelei ona nofo i luga o apa o le fale na i lo le nonofo i totonu o le fale ma se avā ote soo.” (Faataoto 25:24, Today’s English Version) I se tulaga faapena, ua manaomia ai le onosai i le ōgatasi ma le fautuaga a Paulo: “O outou tane, ia outou alolofa atu i a outou avā, aua foi neʻi faaonoono ia te i latou.” (Kolose 3:19) E manaomia ai foi i tane ona onosai ina ia utagia le fautuaga a le aposetolo o Peteru: “Ia faapea outou tane, ia nonofo faatasi ma [a outou avā] ma le poto, ia ava i le avā, auā o le ipu ia ua sili ona vaivai ia te oe, mona ua tofia faatasi i le ola e foaifuaina mai, neʻi faalavelaveina a outou tatalo.” (1 Peteru 3:7) Atonu e avea vaivaiga o lana avā i nisi taimi o se faaonoono i le tane, ae o le a fesoasoani le onosai ia te ia na te lavatia ai tatali.

9. Aiseā ua manaomia ai le onosai i le vaega a mātua?

⁹ E manaomia foi i mātua ona onosai ina ia latou taulau ai i le tausia aʻe o a latou fanau. Atonu e faia e tamaiti laiti se mea sese lava e tasi i taimi uma. E ono aliali mai foi lo latou lotomaʻaa pe tuai ona aʻoaʻoina se mea ma atonu e faaauau ai pea ona faaonoono i o latou mātua. I lalo o na tulaga, e manaomia ai e mātua Kerisiano ona faagesegese ona ita, ia aua neʻi faamatuu atu i lo latou toʻatamaʻi po o le toʻafilemu ae ia faifai malie pea a o mausalī mo mataupu silisili amiotonu. E ao i tamā ona manatua faapea sa latou laiti foi i latou ma faia ni mea sese. E manaomia ona latou faatatauina le fautuaga a Paulo: “O outou tamā, aua neʻi faaita i a outou fanau, ina neʻi faapalapala i latou.”—Kolose 3:21.

Ia i Latou o i Fafo

10. E ao faapefea ona tatou gaoioi i nofoaga o a tatou galuega, e pei ona matauina i le ā le mea na tupu?

¹⁰ Ona o le lē lelei atoatoa faaletagata ma le manatu faapito, atonu e aliaʻe ai ni tulaga faalemanuia i le nofoaga o le galuega a se Kerisiano. O se auala atamai ona uta mamao ma lavatia tatali mea sese mo le tausia o le filemu. Ua faaalia le atamai o lenei tulaga, i le mea na tupu i se Kerisiano o lē sa afaina fua ona o le tele o feteenaiga na faapogaia e sana aumea faigaluega lotovale. Ona sa leʻi manatu tele i ai le uso i lenei mea ae sa onosai, na ia amataina ai se suesuega faale-Tusi Paia i se taimi ma le tagata faigaluega o lē sa faatupu vevesi.

11. O afea tatou te manaomia faapitoa ai lava le onosai, ma aiseā?

¹¹ E faapitoa lava ona manaomia e tagata o Ieova le onosai pe a molimau atu ia i latou e i fafo o le faapotopotoga Kerisiano. Ua fesagaʻi pea Kerisiano mai lea taimi i lea taimi ma tali faalemigao ma le inainā. Pe o se mea tatau ea ma atamai le toe tali atu i se auala faapena? Leai, auā o le a lē faaalia ai i lena le onosai. O se ala atamai o le manatua lea ma mulimuli i le faataoto atamai: “O le tali filemu e liliueseina ai le ita; a o le upu faatiga e tupu ai le ita.”—Faataoto 15:1.

Fesoasoani le Faatuatua ma le Faamoemoe i le Faaalia o le Onosai

12, 13. O ā uiga o le a fesoasoani ia i tatou ina ia onosai?

¹² O le ā e mafai ona fesoasoani ia i tatou e faaalia le onosai, ma lavatia ai tatali tulaga faamomoi loto. O se tasi o mea o le faatuatua lea i folafolaga a le Atua. E tatau ona tatou faalagolago i le Atua ma lana afioga. Ua faapea mai le Tusi Paia: “Ua le maua outou e se tofotofoga e ese i lo tagata; a ua faamaoni le Atua, o le na te le tuuina atu outou i le tofotofoga e sili i se mea ua  outou lavatia, a e sauni foi faatasi ma le tofotofoga se mea e sao ai, ina ia outou lavā oono.” (1 Korinito 10:13) I nisi faaupuga, e pei ona taʻua ai e se tasi ua loa i le auaunaga: “Afai e faatagaina e le Atua, e mafai ona ou lavatia.” Ioe e mafai ona tatou lavatia e ala i le onosai.

¹³ E fesootai vavalalata i le faatuatua le faamoemoe i le Malo o le Atua. A oo ina ia puleaina le lalolagi, o le a aveesea uma ai tulaga faatiapolo o loo mafua ai ona tatou mafatia. E faatatau i lenei mea, na faapea mai le faisalamo o Tavita: “Ina soia e te ita, ma ia tuu lou tiga; aua e te faameo, neʻi e faia se mea leaga. Auā e faaumatia o e fai amio leaga; a o e faatalitali ia Ieova, o i latou lava ia e fai mo latou le nuu.” (Salamo 37:8, 9) O le faamoemoe mautinoa faapea ua toeitiiti ona soloiesea lea e le Atua o ia tulaga faigata uma, ua fesoasoani ai ia i tatou e onosai.

14. O le ā se mea na tupu ua faaalia ai le pogai e ao ai ona tatou onosai i se paaga lē talitonu?

¹⁴ E ao faapefea ona tatou tali atu pe afai e faapogaia e se paaga lē talitonu ia i tatou ni puapuaga? Ia tagai atu pea i le Atua mo se fesoasoani, ma ia faamoemoe pea o le a avea lē e tetee mai ma tagata tapuai o Ieova. Sa teena e le avā a se tasi o Kerisiano i nisi taimi le saunia o ana meaʻai ma le faamamāina o ona lavalava. Na faaaogā e le avā le gagana masoā, e lē talanoa ma lana tane mo le tele o aso, ma na oo lava ina taumafai e fetuu ia te ia e ala i se fafine faataulaitu. “Ae,” na taʻua e le tane, “sa ou liliu atu ia Ieova i taimi uma i le tatalo, ma sa ou faatuatua lava ia te Ia e fesoasoani mai ia te aʻu e atiina aʻe le uiga lelei o le onosai ina ia aua neʻi mou atu ai loʻu paleni faa-Kerisiano. Sa ou faamoemoe foi e faapea i se aso o le a suia le maʻaa o lona loto.” Ina ua mavae tausaga e 20 o faia faapena, sa amata ona suia lana avā, ma na faapea mai le tane: “Maeu loʻu loto faafetai ia Ieova ona o lona fesoasoani mai ia te aʻu e atiina aʻe le fua o le agaga, o le onosai, auā ua mafai nei ona ou vaai i lona taunuuga: Ua amata ona savali laʻu avā i le ala o le ola!”

O le a Fesoasoani le Tatalo, Loto Maulalo, ma le Alofa

15. Aiseā e mafai ai e le tatalo ona fesoasoani ia i tatou ina ia onosai?

¹⁵ O le tatalo o se isi lea o fesoasoani sili i le faaalia o le onosai. Na timaʻi mai Paulo: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le [filemu] foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.” (Filipi 4:6, 7) Aua foi neʻi galo ona utagia le apoapoaiga: “Ia e tuuina atu ia Ieova o mea e te popole vale ai; o ia lava na te tausia oe; na te le tuuna e faavavau le amiotonu ia faagaeetia.”—Salamo 55:22.

16. E mafai faapefea ona fesoasoani le loto maulalo ia i tatou, ina ia onosai?

¹⁶ O le loto maulalo o se isi foi lea fesoasoani sili i le atiina aʻe o le fua o le agaga o le onosai. O se tagata e faamaualuga e lē onosai. E faigofie ona ia tausuai, e vave ona ita, ma o le a lē lavā tatali so o se faiga e lē taugalemu. O nei mea uma o le tuufaafeagai lea o le onosai. Ae o le tagata e loto maulalo e lē soona manatu tele ia te ia lava. E faatalitali o ia ia Ieova, e pei ona sa faia e Tavita ina ua tuliloaina o ia e le Tupu o Saulo ma upuvaleina e le sa Peniaminā o Semi. (1 Samuelu 24:4-6; 2 Samuelu 16:5-13) O lea, e ao ai ona tatou faanaunau e savavali “ma le loto maulalo lava ma le agamalu, ma le onosai, ia outou faapalepale le tasi i le tasi ma le alofa.” (Efeso 4:2) E lē gata i lena, e ao ona tatou ‘faamaulaloina i tatou lava i luma o fofoga o Ieova.’—Iakopo 4:10.

17. Aiseā o le a fesoasoani ai le alofa ia i tatou ina ia onosai?

¹⁷ E faapitoa lava ona fesoasoani ia i tatou le alofa lē manatu faapito ina ia onosai ai. O le mea moni, “e onosai le alofa,” ona na te faapogaia ai i tatou e teuina i o tatou loto  mea e sili ona lelei mo isi. (1 Korinito 13:4) O le alofa e mafai ai ona tatou malamalama, ma tuu ai i tatou i le tulaga o isi, e pei ona iai. E lē gata i lena, ua fesoasoani le alofa ia i tatou ina ia onosai ai auā “e ufiufi i mea uma, e talitonu i mea uma, e faamoemoe i mea uma, e onosai i mea uma. E le uma le alofa.” (1 Korinito 13:7, 8) Ioe, e pei ona faaupuina ai e le pese numera 108 o le Malo i le tusi “Pepese atu Faatasi ma Musika i o Outou Loto”:

“Alofa e fai mata iloa ai mea lelei.

Ati aʻe ai le ʻau uso uma nei.

Alofa i ē sese o le agalelei lena,

Saili latou itu lelei ia maua.”

Ia Onosai ae Olioli?

18. E mafai faapefea ona tatou onosai ae olioli?

¹⁸ Sa tatalo Paulo ina ia faatutumuina ona uso talitonu i Kolose i le poto saʻo i le finagalo o le Atua ina ia latou savavali ai e tusa ma Ieova, ia faafiafiaina o ia, ma fua mai ai i galuega lelei uma lava. O le a latou maua le “malosi uma lava, e tusa ma lona malosi ua silisili, e iu i le onosai uma lava ma le faatoatoa atoa ma le fiafia.” (Kolose 1:9-11) Ae e mafai faapefea la e se tasi ona ‘onosai ae olioli’? Ua lē fetōaʻi lena mea, auā o loo taʻua le olioli i le Tusi Paia e lē na o se mataupu o le loto fiafia po o le mata ʻataʻata. O le fua o le agaga o le olioli e aofia ai se faalogona o le matuā faamalieina ona o le faia o le mea saʻo i luma o le Atua. O se faailoaga foi lea o le faamoemoe i le mauaina o le taui ua folafolaina mai o se iʻuga o le faaalia o le onosai. O le pogai lena o le fetalaiga a Iesu: “Amuia outou pe a latou upu leaga, ma faasaua ia te outou, ma latou tuuaiina pepelo outou i mea leaga uma ona o aʻu. Ia outou olioli ma fiafia lava; auā o i le lagi lo outou taui e tele; auā na faapea ona latou faasaua i perofeta e na muamua ia te outou.”—Mataio 5:11, 12.

19. O ā faaaʻoaʻoga e faaalia ai e mafai ona e onosai ae toe olioli?

¹⁹ Sa ia Iesu lena olioli. O le mea moni, sa ia “onosai i le satauro, na faatauvaa ia te ia le mā, ona o le olioli sa tuu i ona luma.” (Eperu 12:2) O le olioli lena na mafai ai e Iesu ona onosai. I se tulaga tutusa, ia manatu i le mea na tupu ina ua sasaina ma faatonuina le au aposetolo e “soia le tautala i le igoa o Iesu.” Ona “ō lea o i latou nai luma o le fono, ua olioli ina ua taʻuaogaina i latou ia faaleagaina ona o lona suafa. Ua le mapu foi i latou i aso uma ona aʻoaʻo atu, ma talaʻi atu i le malumalu, ma lea fale ma lea fale le tala lelei ia Iesu Keriso.” (Galuega 5:40-42) Maeu se faaaʻoaʻoga lelei ua faamaonia ai e mafai e soʻo o Keriso ona onosai ae olioli!

20. Afai tatou te faaalia le onosai, e mafai faapefea e lenei mea ona aafia ai la tatou faiā ma isi?

²⁰ E mautinoa lava ua aumaia e le Afioga a le Atua ni fautuaga atamai ina ua ia apoapoai mai ia i tatou e aua le taui ma sui, ia faagesegese ona ita a o faamoemoe mo le mea e sili ona lelei—ioe, ia onosai! Tatou te manaomia ona tatalo e lē aunoa faatasi ma lenei fua o le agaga o le Atua ina ia tatou feoeoeaʻi ai ma o tatou uso ma tuafafine i le faapotopotoga, i latou e i le liʻo o o tatou aiga, tagata i le nofoaga o a tatou galuega, ma i latou tatou te feiloai i le faiva faa-Kerisiano. Ma o le ā e mafai ona fesoasoani ia i tatou e faaalia le onosai? O le faatuatua, faamoemoe, loto maulalo, olioli, ma le alofa. O le mea moni, e faatasi ma na uiga o le a mafai ai ona tatou faaalia le onosai i tagata uma lava.

O E Manatua?

□ Aiseā e matuā manaomia ai le onosai i lo tatou saosaolaumea ai i se parataiso faaleagaga?

□ Aiseā ua manaomia faapitoa ai lava e toeaina ona onosai?

□ Aiseā e ao ai i tane ma avā ona atiina aʻe le onosai?

□ O ā isi uiga o le a fesoasoani ia i tatou ina ia onosai?

[Fesili mo le Suʻesuʻega]

[Ata i le itulau 17]

O le ā le fautuaga mai ia Iesu sa fesoasoani ia Peteru e onosai ai?