Manatunatu i Faaaʻoaʻoga o le Onosai

“Ua onosai le Atua, ma ua matuā faapalepale i ipu o le toasa ua faatatauina i le malaia.”—ROMA 9:22.

1. (a) Ua faapefea ona galue le Afioga faagaeeina a le Atua mo lo tatou lelei? (e) I lenei fesootaiga, aiseā ua iloiloina ai le uiga o le onosai i inei?

SA TUUINA mai ia i tatou e Ieova le Atua, Lē na Foafoaina i tatou, lana Afioga faagaeeina, le Tusi Paia. O le a galue lea ‘o se sulu i o tatou vae ma se malamalama i o tatou ala.’ (Salamo 119:105) Ua fesoasoani foi le Afioga a le Atua ia i tatou ina ia “atoatoa ona faaauupegaina ai mo galuega lelei uma lava.” (2 Timoteo 3:16, 17, NW) O se tasi o auala ua ia faaauupegaina ai i tatou o le aumaia lea ia i tatou o ni faaaʻoaʻoga lelei o le onosai. O lenei uiga o se tasi lea o fua o le agaga o le Atua ma e matuā manaomia lava ina ia tatou maua ai lana faamaoniga ma feauga faatasi ai ma uso a tagata.—Kalatia 5:22, 23.

2. O le ā le uiga o le upu Eleni ua faaliliuina “onosai,” ma o ai ua taulamua i le faaalia o lenei uiga?

² O le uiga moni o le upu Eleni ua faaliliuina “onosai” o le “umi ona oono.” Ua faamatalaina le onosai faapea o se “uiga lena o le lavā oono i lalo o osofaiga e lē vave tauia pe faasalaina faanatinati.” (Vine’s Expository Dictionary of Old and New  Testament Words, a W. E. Vine, Tusi 3, itualu 12) Ina ia onosai o lona uiga ia pulea le tagata lava ia ma ia faagesegese ona ita. Ma o ai lē e taulamua ia i latou o ē faagesegese ona ita, ae faaalia le onosai? E leai lava se tasi na i lo o Ieova le Atua. O lea, i le Esoto 34:6, ua tatou faitau ai faapea o Ieova o “le Atua alofa mutimutivale ma le alofa fua, e telegese lona toasa, a e tele le alofa ma le faamaoni.” O le mea moni, e sili atu i le faavalu taimi ua taʻua ai i le Tusi Paia, o Ieova e “telegese lona toasa.”—Numera 14:18; Neemia 9:17; Salamo 86:15; 103:8; 145:8; Ioelu 2:13; Iona 4:2; Nauma 1:3.

3. O ā uiga ua faamatalaina le onosai o Ieova?

³ O le onosai, po o le faagesegese ona ita, o le mea tonu lena o loo tatou faatalitalia mai ia Ieova le Atua, auā e leai se mea e gata mai ai lona malosi ma le atamai, e atoatoa ona lelei i le faamasinotonu, ma e matuā faatumuina i le alofa. (Teuteronome 32:4; Iopu 12:13; Isaia 40:26; 1 Ioane 4:8) Na te pulea ona uiga, ma tausia i latou ia paleni atoatoa i taimi uma. O le ā ua folasia e lana Afioga e uiga i le pogai ma le auala ua ia faaalia ai le onosai agaʻi i tagata lē lelei atoatoa?

Onosai ona o Lona Suafa

4. Mo ā mafuaaga lelei ua faaalia ai le onosai o le Atua i ē agasala?

⁴ Aiseā ua onosai ai Ieova? Aiseā na te lē vave faaumatia ai loa ē agasala? E lē ona o se faaleogalua po o le leai o se maelega mo le amiotonu. Leai, ae mo mafuaaga lelei ua faagesegese ai le toasa o Ieova ma ua lē vave faasalaina ai tagata. O se tasi o mafuaaga ina ia faalauiloaina ai lona suafa. O le isi mafuaaga e faapea sa manaomia le taimi e faaleleia ai finauga i le silisiliese o le Atua ma le faamaoni o le fanau a tagata, na lagā i le fouvalega i Etena. Ae o le isi foi mafuaaga mo le onosai o le Atua ina ia avatu ai i ē fai mea sese le avanoa e toe timata ai o latou ala.

5, 6. Aiseā na faaalia ai e Ieova le onosai i le sootaga ma le fouvale a le tagata?

⁵ Sa onosai Ieova i le feutagaiga ma le uluai ulugalii faaletagata i le faatoaga i Etena. Ina ua la solia lana poloaiga e faasaga i le ʻaina o le fua o le laau e iloa ai le lelei ma le leaga, sa ono mafai loa ona ia faasalaina i laʻua faatasi ai ma le agelu na paʻū ese lea sa faaseseina Eva. E lē tau fesiligia sa faalumaina le tulaga amiotonu ma le faamasinotonu o Ieova, na faapea ai ona ia toasa i le au fouvale e toatolu. Sa mafai ona iai pea o ia i ana aiā pe ana fai na te faasalaina loa i latou. Na lapataia e le Atua le uluai tagata, o Atamu: “A o le laau e iloa ai le lelei ma le leaga, aua e te ʻai ai; auā o le aso e te ʻai ai e te oti ai lava.” (Kenese 2:17) O le aso lava na agasala ai Atamu, na taloina ai e le Atua le au solitulafono i le faamasinoga ma fofogaina atu i ai le faasalaga o le oti. I le tulaga faaletulafono, na feoti ai lava Atamu ma Eva i lena aso. E ui i lea, ona o le onosai o Lē na Foafoaina i tatou na ia faatagaina ai Atamu e ola mo le 930 tausaga.—Kenese 5:5.

⁶ I lenei tulaga, sa iai mafuaaga lelei a le Atua mo lona onosai, pe faagesegese ona toasa. Ana fai na te faasalaina loa lena vaega fouvale, semanū la e lē taliina ai e lenei mea le taufaifai ma le loto i ai a le Tiapolo e faapea e lē tatau ona tapuaia Ieova le Atua ma e lē mafai foi ona ia maua ni auauna faaletagata e tausisi i lo latou faamaoni ia te ia e tusa lava po o ā tulaga e oo i ai. E lē gata i lena, semanū e taatitia ai pea e lē taliina fesili e pei o ia: O le faaletonu o ai na agasala ai Atamu ma Eva? Pe sa uluai foafoaina ea i laʻua e Ieova e matuā vaivai tau amio ua lē mafai ai ona la teena le faaosoosoga ma mulimuli ane ai faasalaina i laʻua ona ua lē taulau ona la faia faapea? O loo manino le tali o nei mea uma i le tala o loo maua i le tusi o Iopu, mataupu 1 ma le 2. I le faatagaina o le aiga  faaletagata ia faatoateleina, na avatu ai e Ieova ni avanoa i tagata e faamaonia ai le sese o tuuaʻiga a Satani.

7. Aiseā na lē vave faaumatia ai loa e Ieova Farao?

⁷ A o tulata ina faasaoina e Ieova ona tagata, o Isaraelu, mai le nofo pologa i Aikupito, na ia toe faamaonia ai foi lona onosai. Sa ono mafai e Ieova ona faaumatia loa Farao ma ana malosi faavaegaʻau i lena lava taimi. Peitai, na i lo le faia faapea, sa faapalepale le Atua ia i latou mo se taimi. Mo ā mafuaaga lelei? A o mavae atu le taimi, sa oo ina loto maʻaa Farao i lona faatalatū e tuu atu tagata Isaraelu e ō ese mai Aikupito o ni tagata saoloto o Ieova. Na ia faaalia ai o ia o se ‘ipu o le toasa’ ua tatau i ai le faaumatiaga ona o le luʻitau ia Ieova. (Roma 9:14-24) E ui i lea, sa iai se mafuaaga e sili atu na onosai ai le Atua i lenei tulaga. E ala ia Mose, na ia fetalai atu ai ia Farao: “Auā o le a aʻu faaloaloa nei loʻu lima, ou te taia oe ma lou nuu i le faamaʻi, ina ia fano ai oe i le nuu. E moni lava, o le mea lava lea ua ou faatuina ai oe, ina ia ou faaali ai loʻu mana ia te oe, ma ia taʻua loʻu igoa i le lalolagi uma lava.”—Esoto 9:15, 16.

8. Mo le ā le mafuaaga na lē faasalaina ai e le Atua tagata Isaraelu fouvale i le vaomatua?

⁸ Na faaalia foi le onosai o Ieova mo ni mafuaaga lelei a o iai tagata Isaraelu i le vaomatua. Pagā lo latou faaonoono i le onosai o le Atua e ala i le tapuai atu i se tamaʻi povi auro ma i le lē taulau ona faaalia o le faatuatua ina ua toe foi mai sipai e toʻasefulu ma se lipoti leaga! Ona o ni ona tagata, sa leʻi lafoaia ai loa i latou e le Atua, ona sa aafia ai lona suafa ma lona taʻuleleia. Ioe, sa folasia e Ieova le onosai ona o lona suafa.—Esoto 32:10-14; Numera 14:11-20.

Onosai mo le Lelei o Tagata

9. Aiseā na faaalia ai e Ieova le onosai i ona po o Noa?

⁹ Ua onosai pea Ieova ona o le fanau a tagata talu mai ona faaseseina e Atamu lana fanau uma, i le tuufaasolo atu ia i latou o le matuā lē faamasinotonu i lana agasala. O le onosai o le Atua na mafai ai ona faasaʻoina lena sese, ona sa ia faatagaina le taimi mo tagata salamō ina ia toe faalelei ai ma ia. (Roma 5:8-10) Na folasia foi le onosai o Ieova le Atua agaʻi i tagata i ona po o Noa. O le taimi lena, na “silafia [ai] e Ieova ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava.” (Kenese 6:5) E ui ina sa mafai ona tafiesea loa e le Atua le aiga faaletagata i le taimi na ia silasila atu ai i lenei faiga, ae na ia tulei faapea o le a ia aumaia se iʻuga i lenei tulaga i le isi 120 tausaga. (Kenese 6:3) O lenei faailoaga o le onosai na maua ai e Noa le taimi e aumaia ai ni atalii e toatolu, ia latou tutupu aʻe ma faaipoipo, ma ina ia fausia e lena aiga se vaa mo le faasaoina o o latou solu ma mo le faasaoina o manu o le foafoaga. O le auala lenei sa mafai ai ona taulau le uluai fuafuaga a le Atua mo le lalolagi.

10, 11. Aiseā na matuā onosai ai Ieova i le nuu o Isaraelu?

¹⁰ O se isi faauigaina o le onosai e faatatau faapitoa lava i feutagaiga a le Atua ma ona tagata. “O le tumau mausalī lea i lalo o mea sese po o faaosoosoga, e fuifuilua ma le musuā e faamaamulu le faamoemoe mo se faaleleiga i se faiā fesouaiina.” (Insight on the Scriptures, Tusi 2, itulau 262; na lomia e le Watchtower Bible and Tract Society of New York, Inc.) O loo faasino atu lenei mea i se mafuaaga faaopoopo na onosai ai le Atua agaʻi i tagata Isaraelu. Sa faalausosoo ona latou liliu ese mai ia Ieova ma oo ai ina noanoatia i atunuu o Nuu Ese. E ui i lea, na ia faaalia le onosai e ala i le laveaʻia o tagata Isaraelu ma le tuuina atu ia i latou o le avanoa e salamō ai.—Faamasino 2:16-20.

¹¹ Na taʻitaʻia e le toatele o tupu o Isaraelu o latou tagata i tapuaiga sese. Ae pe sa lafoaia ai loa e le Atua le nuu? E leai, na te  leʻi vave faamaamulu le faamoemoe mo se faaleleiga i lena faiā fesouaiina. Na i lo lea, sa faagesegese le toasa o Ieova. I le faaalia o le onosai, sa faifai pea ona avatu e le Atua ia i latou le avanoa e salamō ai. Tatou te faitau ai i le 2 Nofoaiga a Tupu 36:15, 16: “Ua aauina mai ia te i latou e Ieova le Atua o latou tamā o e ave ana feau, ua ala aauina lava i latou; auā ua na alofa i lona nuu ma lona afioaga; a ua latou faatauemu i e na aauina mai e le Atua, ma ua ʻinoʻino i ana afioga, ma ua ula i ana perofeta, ua oo ina tupu le toasa o Ieova i lona nuu, ua oo ina leai se fofo.”

12. O ā faamaoniga ua aumaia e Tusitusiga Kerisiano Eleni e uiga i le pogai ua onosai ai Ieova?

¹² Ua saunia foi e Tusitusiga Kerisiano Eleni ni faamaoniga faapea ua faaalia e Ieova le onosai e fesoasoani ai i ona tagata e aga masesei. Mo se faataʻitaʻiga, na fesili le aposetolo o Paulo i Kerisiano solitulafono: “Po ua faatauvaa ea ia te oe le faulai o lona agamalu, ma lona faapalepale, ma lona onosai, o loo e le iloa e taʻitaʻiina oe e le agamalu o le Atua i le salamo?” (Roma 2:4) O le iʻuga lava e tasi o loo faatatau i ai upu a Peteru: “E le faatuai mai [Ieova] i le mea na folafolaina mai, faapei o le manatu a isi tagata i le faatuai; a e peitai ua onosai mai lava o ia ia i tatou, ona ua le finagalo ia fano se tasi, a ia oo uma lava i le salamo.” (2 Peteru 3:9) Ua matuā talafeagai ai la, ona faatonuina i tatou e “manatu o le onosai o lo tatou Alii o le olataga lea.” (2 Peteru 3:15) O lea, ua tatou iloa ai faapea ua onosai Ieova, e lē faapea ona o se lagona mafatia pe ona ua fiu, ae ona ua aafia ai lona suafa ma ana fuafuaga ma e alofa mutimutivale ma le alofa mai o ia.

Le Faaaʻoaʻoga a Iesu o le Onosai

13. O ā faamaoniga faale-Tusi Paia o loo iai e faapea sa onosai Iesu Keriso?

¹³ Na pau le faaaʻoaʻoga lona lua o le onosai na faataatia e le Atua o le onosai lea o lona Alo, le Mesia o Iesu Keriso. O ia o se faaaʻoaʻoga olaola o le faapologaina e aunoa ma le faataalise e toe taui atu e ui i faaosoosoga. * Sa valoia e le perofeta o Isaia faapea  o le a onosai le Mesia i upu ia: “Na faasauaina o ia, sa tigaina foi o ia, a e le tautala mai o ia; e pei o le tamai mamoe ua taʻitaʻiina ia fasia, e pei o le mamoe foi i luma o e sele lona fulufulu, ua faalologo ia, o ia foi ua le tautala mai.” (Isaia 53:7) O loo molimau i le upu moni lava lena e tasi le faamatalaga a Peteru: “O le sa agateleina, a e lei toe agatele atu, na faatigaina o ia, a e lei faamatau atu, a ua tuuina atu o ia e ia i le na te faamasino tonu.” (1 Peteru 2:23) Pagā se faaonoono sa iai le au soʻo o Iesu ia te ia faatasi ma lo latou fefinauai soo po o ai lē sili ia i latou! E ui i lea, maeu lona onosai ma le faapalepale sa ia faaalia ia i latou!—Mareko 9:34; Luka 9:46; 22:24.

14. O le ā e ao ona uunaia i tatou e fai ona o le faaaʻoaʻoga a Iesu o le onosai?

¹⁴ E ao ona tatou mulimuli i le faaaʻoaʻoga ua faataatia e Iesu o le onosai. Na tusia e Paulo: “Ia tatou taufetuli ma le onosai i le ala tanu o i o tatou luma, ma ia vaavaai atu ia Iesu o le na te taʻitaʻiina ma le na te faaatoatoaina le faatuatua; o le na onosai i le satauro, na faatauvaa ia te ia le mā, ona o le olioli sa tuu i ona luma, ua nofo foi o ia i le itu taumatau o le nofoālii o le Atua. Auā, ia outou mafaufau i le na onosai i le faatuʻi ese faapena ia te ia o e agasala, neʻi faavaivai o outou loto ma outou le lavatia.”—Eperu 12:1-3.

15. E faapefea ona tatou iloa sa lotomalie Iesu e onosai ma tumau i lalo o tofotofoga?

¹⁵ E mafai ona matauina faapea sa lotomalie Iesu e onosai ma tumau i lalo o tofotofoga, i le uiga sa ia faaalia i le taimi o lona puʻe faapagotaina. Ina ua uma ona ia aʻoaʻia Peteru i le faaaogāina o lana pelu e puipuia ai lona Matai, na fetalai atu Iesu: “Fa te oe ea ou te le mafaia ona aioi atu nei i loʻu Tamā, ona aauina mai ai lea e ia ia te au o agelu e sili ona toatele i lekeona e sefulu ma le lua? Ona faapefea lea ona taunuu o Tusi, e tatau ona oo ia mea?”—Mataio 26:51-54; Ioane 18:10, 11.

Isi Faaaʻoaʻoga o le Onosai

16. Ua faapefea ona faaalia e le Tusi Paia faapea sa onosai le atalii o Iakopo o Iosefa?

¹⁶ E oo foi i tagata agasala lē lelei atoatoa, e mafai ona faaalia le onosai. O loo maua i Tusitusiga Eperu ni faaaʻoaʻoga o le onosai ma le tumau o tagata lē lelei atoatoa i lalo o tuuaʻiga sese. Mo se faataʻitaʻiga, o Iosefa, le atalii o le augatamā Eperu o Iakopo. Maeu le onosai na ia tumau ai i faiga lē tonu na faia ia te ia e ona ʻafa uso ma le avā a Potifara! (Kenese 37:18-28; 39:1-20) Sa lē faatagaina e Iosefa ia tofotofoga e tigā ai o ia. Na faamaonia lenei mea ina ua ia faapea atu i ona uso: “Aua neʻi tiga outou, pe fai ma mea leaga i o outou manatu ina ua outou faatau mai ia te au i le mea nei; auā na auina mai aʻu e le Atua e muamua ia te outou e fai ma faaola.” (Kenese 45:4, 5) Maeu se faaaʻoaʻoga lelei o le onosai na faataatia e Iosefa!

17, 18. O ā faamaoniga o le onosai ua tatou maua i le mea na tupu ia Tavita?

¹⁷ O se isi faaaʻoaʻoga o se auauna faamaoni a Ieova na tumau mausalī i lalo o tuuaʻiga sese, i le faaalia o le onosai, o Tavita. I le tuliloaina e pei o se ulī e le Tupu fuā o Saulo, e lua mea na semanū e taui ma sui ai e Tavita i le fasiotia o ia. (1 Samuelu 24:1-22; 26:1-25) Ae na faatalitali Tavita ia Ieova, e pei ona sa faaalia i ana upu ia Apisai: “E faasia lava o ia [Saulo] e Ieova,  pe oo i ona aso e oti ai, pe alu ifo i se taua e fano ai. Ia faamamao e Ieova ia te au, ina neʻi faaoo loʻu lima i le ua faauuina e Ieova.” (1 Samuelu 26:10, 11) Ioe, sa iai ia Tavita le malosi e faamuta ai le faasoesa o Saulo ia te ia. Ae na i lo lea, sa filifili Tavita e onosai.

¹⁸ Manatunatu foi, i le mea na tupu ina ua sola ese le Tupu o Tavita mai lona atalii taufaalata o Apisaloma. Na tauʻai i maa e se tagata sa Peniaminā o le aiga o Saulo, o Semi, Tavita ma fetuu ia te ia i lona valaau atu: “Alu atu, ina alu atu ia oe le tagata ua totolima, le tagata ulavale.” Sa manao Apisai e fasioti ia Semi, ae na musu Tavita e taui ma sui atu. Na i lo le faia o lena mea, na ia toe faaalia foi le uiga o le onosai.—2 Samuelu 16:5-13.

Manatunatu i le Faaaʻoaʻoga a Paulo

19, 20. Sa faapefea ona faaalia e le aposetolo o Paulo lona lava onosai?

¹⁹ I Tusitusiga Kerisiano Eleni, ua tatou maua ai foi se isi faaaʻoaʻoga lelei o le onosai i le vaega a se tagata lē lelei atoatoa—le aposetolo o Paulo. Na ia faaalia le tumau mausalī, onosai, i le fesootaiga ma ona fili faalelotu ma tagata e tautino mai o i latou o ni Kerisiano. Ioe, sa faaalia e Paulo le onosai e ui lava ina faapea mai nisi o le faapotopotoga i Korinito: “O ana tusi e mamafa ma malolosi ia, a o lona tino pe a nofo mai e vaivai lea, ma lana upu e faatauvaa lea.”—2 Korinito 10:10; 11:5, 6, 22-33.

²⁰ O lea, e faatasi ai ma se mafuaaga lelei, na taʻu atu ai e Paulo i tagata Korinito: “A o mea uma lava ua faailoa ai i matou o auauna a le Atua i matou, i le onosai tele, i puapuaga, i malaia, i atuatuvale, i sasaina, i tuuina i fale puipui, i faaletaupulea, i galuega, i mataala, i anapopogi, i le amio mamā, i le poto, i le faapalepale, i le agamalu, i le Agaga Paia, i le alofa moni.” (2 Korinito 6:4-6) I se tulaga tutusa, na mafai ai foi ona tusi atu le aposetolo i lana aumea faigaluega o Timoteo: “Ua e iloa lelei o laʻu mataupu, o laʻu amio, o le loto mau, o le faamaoni, o le faapalepale; o le alofa, ma le onosai, o sauaga ma mea tiga, . . . a o le Alii na ia laveai mai ia te au i na mea uma lava.” (2 Timoteo 3:10, 11) Maeu se faaaʻoaʻoga lelei ua faataatia e le aposetolo o Paulo mo i tatou ina ia onosai ai!

21. E ono fesoasoani faapefea le mataupu o loo mulimuli mai ia i tatou?

²¹ Ua manino nei la, o loo fau ma soloi faaaʻoaʻoga lelei o le onosai i le Tusi Paia. Ae o Ieova ma lona Alo pele o ni faaaʻoaʻoga autū. Peitai maeu le faalaeiau e matauina ua faaalia foi lenei uiga e tagata lē lelei atoatoa, e pei o Iosefa, Tavita, ma le aposetolo o Paulo! Ua fuafuaina le mataupu o loo mulimuli mai e fesoasoani ai ia i tatou e faaaʻoaʻo i na faaaʻoaʻoga lelei.

[Faaopoopoga i lalo]

O le a Faapefea ona E Tali?

□ O le ā lona uiga ia onosai?

□ O ā mafuaaga autū ua onosai ai Ieova?

□ I ā auala na faaalia ai e Iesu lona lava onosai?

□ O ā faamaoniga faale-Tusi Paia o loo iai faapea e mafai ona faaalia e tagata lē lelei atoatoa le onosai?

[Fesili mo le Suʻesuʻega]

[Ata i le itulau 10]

O Iosefa, Iesu, Tavita, Paulo, ma Iopu o ni faaaʻoaʻoga o le onosai

[Ata i le itulau 13]

Sa faaalia e Iesu le onosai i ona soʻo