O le ā ua Faapogaia Puapuaga i le Aiga?

‘E ESE le paiē!’ na alaga atu ai Bob. ‘O ia o se tausifale leaga!’

‘E lē moni lena tala!’ na tali atu ai Jean. ‘Na te lē talisapaia lava se mea ou te taumafai e fai. O ia o se tamaloa aupito sili ona faitio ua ou fetaui i ai.’

O le ā le mea na sese i le olaga o Bob ma Jean? * O la la faaipoipoga fou sa na o le fa masina le umi, ae o lea ua toetoe lava oo i se mala. Ae peitai, o le mea ua tupu ia i laua, o se mea lava e masani ai, auā ua faaalia i faamaumauga o fuainumera faapea ua taatele naua feeseeseaiga tau faaipoipoga. Ua faapea mai nei tagata popoto, o le ʻafa o faaipoipoga fou uma i le Iunaite Setete o le a iʻu ina tatalaina. E faapena foi le lē mautinoa o fuainumera faamaumauina mai le tele o isi atunuu. Ae, o le tatalaina o faaipoipoga ua na o se vaega lea o le vaaiga. I ni fuainumera sa leʻi iai muamua ma mo le tele o mafuaaga eseese, ua puapuagatia ai aiga.

Nisi o Mafuaaga mo Puapuaga i Aiga

E matuā sili lava ona aafia tamaiti pe a tutupu mai tulaga pagatia i totonu o se aiga. Ua lipotia mai ai e le mekasini o le Newsweek e faapea: “O le tasi vae tolu o tamaiti uma lava na fananau i le sefulu tausaga ua mavae [i le Iunaite Setete] atonu o le a ola i totonu o se aiga fai a o leʻi aulia lo latou taʻi 18 tausaga. E toatasi mai tamaiti uma e toafa o loo tausia aʻe e se matua e toatasi. E tusa o le 22 pasene o tamaiti i aso nei sa fananau a o leʻi faaipoipo mātua; mai ia i latou na, pe tusa o le tasi vae tolu na fananau mai i se tinā faatoʻā sefulu ma ona tupu tausaga.”

I le toe taʻua o se mafuaaga o puapuaga i le aiga, ua faapea mai se tagata poto i suesuega tau i le faaleagaina o tamaiti, o J. Patrick Gannon e faapea: “Ua faaalia i sailiiliga i aso nei faapea e faitau sefulu miliona tagata o loo tutupu aʻe i aiga e lē o lelei ona pulea [ese le puleaina] ua faapogaia ai faiga sauā, mataifale, po o le faaleagaina ai o faalogona ootia ona o le ʻava malosi, ua avea o se mea moni e aliali mai  pea i aso uma.” E lē o se mea e ofo ai ona o le toatele o tamaiti ua iloa na mea atonu latou te lē o iloa pe faapefea ona aloese mai puapuaga i le aiga i le avea o tagata matutua.

O nisi o tagata o loo matauina nei mea atonu ua latou tuuaʻia puapuaga i le aiga i suiga tau tamaoaiga, le va fealoaloai, ma suiga tau amio na ua tafia ai nuu tamaoaiga. Mo se faaaʻoaʻoga, o le fua aupito sili ona telē o le ulu atu o fafine i au faigaluega ua masani pea ona faaletonu ai le toe faia o ni fuafuaga i vaega ma tiutefai faaleaiga. Ua taumafai ma le popole tinā ina ia faaleleia o latou tomai i galuega ina ia ō atu e faigaluega, ae o tamā o loo tauivi ma le musuā ma galuega i le aiga, ma o tamaiti o loo taumafai ma loimata e faafetaui atu i le olaga i nofoaga e tausi ai tamaiti i aso taitasi.

E tele lava aiga i atunuu uma o le kelope o loo i lalo o omiga matuā faigata. Ua faatusatusa e se tasi o matua faigaluega lenei mea i le “ola i se tulaga e matuā faanatinati i aso uma.” E lē o se mea e ofo ai faapea toetoe lava o le ʻafa o i latou na palota i se suesuega na faaalia ai manatu o tagata lautele talu ai nei, na faapea mai ‘ua sili atu ona leaga le aiga faa-Amerika i aso nei na i lo le mea sa iai i le 10 tausaga ua mavae,’ ma e toaitiiti ua talitonu faapea o le a faaleleia lea tulaga.

O lea la, o puapuaga i le aiga, ua avea ma mataupu e talanoaina pea lava pea i televise ma faaaliga o talanoaga i leitio. Ua lotulotu le lautele e faitau i tusi e fesoasoani ai ia i latou lava e uiga i le aiga, ua ofo atu e nisi fautuaga poto ma le aogā. E ui lava ina apoapoaia faapea e mafai ona fesoasoani le ‘matuā tatala o fesootaiga’ pe ia ‘fetufai faalogona o se tasi,’ ae ua lē taulau ona maua le pogai tonu o faafitauli i le aiga. O le a faia faapea e le mataupu o sosoo mai, ma o le a faaalia ai pe o le a faapefea ona feagai ai ma puapuaga i le aiga.

[Faaopoopoga i lalo]