Lipoti a Ē Faalauiloa le Malo

Amioga e Viia ai la Tatou Faiva Faa-Kerisiano

UA APOAPOAIA e le aposetolo o Peteru Kerisiano: “Ia lelei a outou amio i luma o nuu ese.” (1 Peteru 2:12) Ua faaalia e le aposetolo o Paulo faapea, e ala i a tatou amio lelei, ua tatou “viia ai i mea uma lava . . . le mataupu a le Atua lo tatou Faaola.” (Tito 2:10) E iai se talaaga o Molimau a Ieova i le lalolagi aoao ona o amio lelei. Ia matau nisi o faaaʻoaʻoga.

Aafiaga o se Faiaʻoga ona o Amioga Lelei

□ Ua lipotia mai e le ofisa o le lala o le Sosaiete o le Olo Matamata i Costa Rica faapea, o se aofaiga e toatele o talavou i lena atunuu ua latou faataatia se faaaʻoaʻoga lelei. Ua taʻu mai e se tasi uso le mea na tosina ai o ia i le upu moni. Ua ia faamatala mai e faapea: “O le mea sa sili ona faatosina ai aʻu, o amioga lelei uma a tagata talavou ma tagata matutua ae maise lava i talavou. A o oʻu galue o se faiaʻoga, sa ou maua ai le avanoa e matauina ai ma le totoʻa Molimau i laʻu aʻoga. Ma talu ai ona sa matou nonofo faatasi i se fale mautotogi ma se aiga Molimau a Ieova, sa ou matauina ai foi i inā amioga a tamaiti.

“Sa lē mafai ona ou alofia ae matauina le eseesega i le va o tamaiti aʻoga o ni Molimau ma isi tamaiti aʻoga i laʻu vasega. E masani pea ona vave mai Molimau ma e amio lelei, e lē mafai lava ona talapepelo, ma e faia pea lava a latou galuega e tofia atu e fai. Sa ou matauina foi lo latou faamaoni pe a oo ina faia suega, e ui lava o isi tamaiti e masani ona kopi. Ae lē gata i lea, sa o i latou o ni tamaiti e matuā faaaloalo ia te aʻu o lo latou faiaʻoga. I le matuā aafia i amioga a Molimau talavou i le aʻoga ma i le fale sa ou mau totogi ai, na amata ai loa ona ou suesueina lenei lotu ma mulimuli ane ai loa talia le upu moni.”

Iʻuga Lelei mai Amioga Faa-Kerisiano i se Tauaofiaga

□ O se tasi o Molimau a Ieova i se faapotopotoga i le vaega i sisifo o El Salvador sa faanaunau e tufa atu le tala lelei o le Malo i ona uso faaletino e toalua. E toatasi na faalogo ma amata loa ona suesue le Tusi Paia ma Molimau a Ieova. O le isi uso e alu i le lotu Evagelia e taʻua o le Prince of Peace (Aloalii o le Filemu), ma na ia fai atu i lona uso: “Aua e te talanoa mai ia te aʻu; o lena e te auauna e fai le loto o le Tiapolo.”

Ina ua oo mai le taimi mo le tauaofiaga itumalo, ona valaaulia loa lea e lē o loo suesue lona uso ina ia la ō atu i le tauaofiaga. Sa faapea atu le uso: “Ua lelei, o le a ou alu; e ala ona ou alu ona seʻi tau lava ina ia ou iloa ai se mea e maua ai Molimau.” Sa auai faatasi le auso e toalua i le tauaofiaga. O le toatele o le aofia na auai ma le maopoopo lelei i le faagasologa o le tauaofiaga, na maofa ai le tagata lotu Evagelia, o lē na faapea mai e leʻi vaai muamua lava o ia i se mea faapea. Ina ua taunuu o ia i le aiga, ona ia fai atu lea i lona uso: “Tuu mai lou lima.” “O le ā le uiga o lenei mea?” na fesili atu ai lona uso. “ Se tau lava ina tuu mai lou lima,” na sau ai le tali. Sa la lūlū lima, ona taʻua lea e le uso e i le lotu Evagelia: “E amata atu nei ma agaʻi atu ai i luma o le a ou suesue ai ma Molimau a Ieova. O le mea moni, ou te leʻi iloa le mea lea na ou misia.” I le taimi nei ua avea ai foi o ia ma folafola maelega ma le tiotio o le tala lelei o le Malo o le Atua.