Lapatai atu Pea e Uiga i le Galuega Uigaese a Ieova
Lapatai atu Pea e Uiga i le Galuega Uigaese a Ieova
“E tulai atu Ieova e pei ona faia i le mauga o Faresa, e toasa foi o ia e pei ona fai i le vanu o Kipeona.”—ISAIA 28:21.
1, 2. O le ā le galuega uigaese na faatinoina e Ieova mo Ona tagata i ona po o Tavita?
O SE gaoioiga ese! Le galuega e sili ona uigaese! O le mea lena sa faatinoina e Ieova mo ona tagata i aso anamua i tuā i le senituri 11 T.L.M. Ma o lenei gaoioiga ese o se faaaʻoaʻoga lea mo se galuega e sili atu foi ona uigaese ua toeitiiti ona ia faatinoina lea i le lumanai lata mai. O le ā la lena gaoioiga anamua? E leʻi leva a talu ona faatuina Tavita o se tupu i Ierusalema, ae amata ona osofaia e tuaoi Filisitia, ma o le pogai lena na faamaite ai loa se gaoioiga ese a Ieova. Muamua lava, sa amata ona osofai atu Filisitia i le vanu o sa Rafā. Na ole atu Tavita ia Ieova i le mea e ao ona ia faia ma sa faatonuina o ia e ō aʻe e tau. I le usiusitai i afioga a Ieova, na aʻea aʻiaʻi ai e Tavita le autau a Filisitia i Paala-faresa. Sa lē talitonu Filisitia ua latou faiaina. E leʻi mamao ae latou toe foi ane e faatamaʻia ma faataluʻā atili i le vanu o sa Rafā, ma na toe sailia foi e Tavita se taʻitaʻiga mai ia Ieova.
2 O le taimi lea sa faatonuina ai o ia e ui atu ma ana fitafita i tua o Filisitia. Na fetalai atu Ieova: “A e faalogo i le pāūū o le savali mai i tumutumu o laau o peka, ona e faataalise ai lea, auā ua alu atu ai Ieova i ou luma e fasi i le itu taua a Filisitia.” Ma o le mea lena na tupu. Sa faatalitali Tavita seia faailoa mai e Ieova le leo o le savaliga i tumutumu o laau o peka—atonu e ala mai i se matagi malosi. Ona faafuaseʻi lea ona feosofi atu o Tavita ma ana fitafita mai o latou lafitaga ma osofaia loa Filisitia ua fenuminumiai, ma faatoilaloina ai i latou i se fasiga tele. O faatusa faaletapuaiga na paepae ai ma tuua e Filisitia i le tafā o taua sa faaputuina faatasi ma faatamaʻia.—2 Samuelu 5:17-25; 1 Nofoaiga a Tupu 14:8-17.
3. Aiseā na avea ai le gaoioiga ese a Ieova o se mea e naunau i ai tagata Iutaia i ona po o Isaia, ma aiseā e ao ai ona avea o se mea e nofo uta i ai Kerisinetoma i aso nei?
3 O se galuega uigaese lenei, se gaoioiga ese, na faataunuuina e Ieova faasaga ia Filisitia ma mo lana tupu faauuina. O lenei gaoioiga mataʻina o se mea e ao ona naunau patino i ai ona sa lapatai mai le perofeta o Isaia faapea o le a faia foi e Ieova se mea e tutusa pau lona ese ma le malosi faasaga i ē onanā faaleagaga o Iuta. O le mea lea, sa manaomia ai e taʻitaʻi lotu lē faamaoni i ona po o Isaia ona nofo uta. E ao foi ia Kerisinetoma i aso nei ona nofo uta ona o le mea na tupu ia Iuta sa o se faaaʻoaʻoga lea mo le iʻuga faafuaseʻi o Kerisinetoma.
“E Puupuu le Moega”
4, 5. (a) Ua faapefea i le auiliiliga a Isaia ona faataʻitaʻia ai le tulaga lē mautonu o taʻitaʻi lotu i ona aso? (e) O le ā le pogai o le lē mautonu o Kerisinetoma i aso nei?
4 Muamua, sa faaalialia e Isaia le mea moni faapea o feagaiga sa faatuatua i ai na tagata onanā faaleagaga anamua sa o se tau faaʻoleʻole, o se pepelo. Mulimuli ane sa ia faataʻitaʻia auiliili mai le tulaga lē mautonu o i latou ua faamoemoe i lena pepelo. Na ia taʻua: “E puupuu le moega e le mafai e se tasi ona faaloloa ai o ia; e lauitiiti le ie afu e le mafai ona pulupulu ai o ia.” (Isaia 28:20) So o se tasi e faaloloa i luga o se moega e puupuu o le a ia iloa e tautau i fafo ona vae i le malūlū. I le isi itu, afai e faapupuu ona tuli ina ia ofi ai i le puupuu o le moega, o le a lauitiiti ai la le ie afu ma aliali mai ai pea le tele o lona tino. Po o le ā lava le mea na te faia, e taia lava sona vaega i le malūlū.
5 O le tulaga lena sa iai, pe a tautala faafaatusa, ia i latou o ē sa tuu atu lo latou faatuatua i le malu puipuiga a le pepelo i ona po o Isaia. O lena foi le tulaga lē mautonu o i latou i aso nei o loo tuu atu lo latou faatuatua i le malu o Kerisinetoma o se pepelo. O loo iai i latou i le malūlū, e pei ona sa iai. E lē o se taimi lenei e sailia ai se nofolelei i totonu o faatulagaga faalelalolagi mo le filemu ma le saogalemu. A o iai i lalo o gaoioiga faafaamasinoga o loo faamalumalu mai a le Atua, o le a lē mafai e sootaga ma taʻitaʻi faapolotiki ona saunia se faamafanafanaga mafana mo Kerisinetoma.
Le Gaoioiga Ese a Ieova
6. Na faapefea ona tau gaoioi Ieova faasaga ia Iuta, ma o le a faapefea ona ia gaoioi faasaga ia Kerisinetoma?
6 Ina ua maeʻa ona faamatalaina auiliili le tulaga lē mautonu o Ierusalema lē faamaoni o ona aso—atoa ma Kerisinetoma lē faamaoni faaonaponei—sa faaauau ona faapea mai Isaia: “E tulai atu Ieova e pei ona faia i le mauga o Faresa, e toasa foi o ia e pei ona fai i le vanu o Kipeona, ina ia faia lana mea e fai, ua ese lava; ina ia faia foi lana galuega, o lana galuega ese lava.” (Isaia 28:21) Ioe, sa lapataia e Isaia, ua toeitiiti ona tulai mai lea o Ieova e pei ona sa ia faia i Paala-faresa. Ae o le taimi lenei, o le a ia gaoioi faasaga i ona tagata lē faatuatua, ma o le a ia faia faapea e pei o se tafega o vai e lē mataofia ua pa mai i se mama o se tane vai ua pala. O le a faaalia ai le soloia ma le faaleaogāina o le feagaiga a Ierusalema ma le oti. I se auala lava faapena, o le a gaoioi ai Ieova faasaga ia Kerisinetoma i le lumanai lata mai, ma o le a ia iloa ai le lē aogā o ana ioega onanā uma ma lenei lalolagi. O le a talepeina lana faalapotopotoga tele ma faataapeapeina ona tagata auai. O le a susunuina atoatoa ona atua sese.
7. Aiseā na taʻua ai fuafuaga a Ieova e faatatau ia Iuta e “ese” ma “uigaese”?
7 Aiseā ua taʻua ai e Isaia le gaoioiga a Ieova faasaga ia Ierusalema o se galuega ese ma uigaese? Sa avea Ierusalema ma nofoaga o le tapuaiga ia Ieova ma o le aai lea a le tupu faauuina a Ieova. (Salamo 132:11-18) Ona o lea tulaga, sa lē taitai ona oo i ai se faaumatiaga. E aunoa ma se taimi na susunuina ai lona malumalu. Sa leʻi faatoilaloina lava le aiga tautupu o Tavita, lea na faavaeina i Ierusalema. E faigata ona manatunatu i na mea. Sa matuā lē masani ai ona faapea sa finagalo Ieova e faatagaina ni mea faapena e tutupu.
8. O le ā le lapataiga ua aumaia e Ieova o lana galuega uigaese o loo sau?
8 Peitai na avatu e Ieova se lapataiga talafeagai e ala i ana perofeta faapea o le a oo mai ni mea tutupu e gatete ai. (Mika 3:9-12) Mo se faaaʻoaʻoga, na faapea mai le perofeta o Sapakuka, o lē sa ola i le senituri lona fitu T.L.M.: “Ia outou vaai atu i nuu ese, ma ia outou iloa, ma ia matuā taufaiofo lava; auā ou te faia se galuega i ona aso o outou, e ui lava ina talaina atu, tou te le talitonu ai lava. Auā faauta, ou te lagaina Kaletaia, o le nuu saua ma le tele vavave, o loo latou o atu i le lautele o le lalolagi, e fai mo latou o mea e nonofo ai, a e le ni o latou nuu. O i latou e matautia ma le fefefe i ai o tagata.”—Sapakuka 1:5-7.
9. I le ā le auala na faataunuu ai e Ieova lana lapataiga faasaga ia Ierusalema?
9 Sa faataunuuina e Ieova lana lapataiga i le 607 T.L.M. I le faatagaina o autau a Papelonia e osofai faasaga ia Ierusalema, na ia tuu atu ai ia te i latou e faaumatia le aai, atoa foi ma le malumalu. (Auega 2:7-9) E lē gata i lena, na ia faatagaina Ierusalema ia faaumatiaina faalua. Aiseā? Ina ua mavae tausaga e 70 o le tafeaga, sa toe foi atu Iutaia salamō i lo latou nuu moni, ma toe fausiaina ai se isi malumalu i Ierusalema. E ui i lea, na toe see ese foi tagata Iutaia mai ia Ieova. I le uluai senituri T.A., na otooto mai ai e Paulo upu a Sapakuka i tagata Iutaia o ona aso, e lapataia ai faapea o le a iai foi se faatatauga o le valoaga i le lumanai. (Galuega 13:40, 41) Sa faapitoa ona lapataia e Iesu lava ia faapea o le a faaumatiaina Ierusalema ma lona malumalu ona o le leai o se faatuatua o tagata Iutaia. (Mataio 23:37–24:2) Pe sa utagia ea e na tagata Iutaia o le uluai senituri? Leai. E pei a o o latou augatamā, sa latou teena atoatoa le lapataiga a Ieova. O lea, na toe faaluaina ai e Ieova lana galuega ese. Na faaumatiaina Ierusalema ma lona malumalu i le 70 T.A. e ala i le mano o autau a Roma.
10. O le a faapefea ona gaoioi Ieova faasaga ia Kerisinetoma i le lumanai lata mai?
10 Aiseā la, e lē tatau ai i se tasi ona manatu faapea o le a lē faia e Ieova se mea faapena i o tatou aso? O le mea moni, o le a ia faataunuuina lana fuafuaga e ui lava ina foliga mai e ese ma uigaese i ē masalosalo. O le taulaʻiga o lana gaoioiga i le taimi nei o Kerisinetoma, lea e pei o Iuta anamua, ua faapea mai o loo tapuai i le Atua ae ua matuā leaga lava e aunoa ma se faamoemoe e suia. E ala i lana Tavita Sili, o Keriso Iesu, o le a afio atu ai Ieova i luga o “Filisitia” o Kerisinetoma i se itula latou te leʻi faatalitalia. O le a ia faatinoina lana galuega uigaese seia oo ina tafiesea le toe matāua o le faiga o mea faaletapuaiga a Kerisinetoma.—Mataio 13:36-43; 2 Tesalonia 1:6-10.
Lapataiga o le Gaoioiga a Ieova
11, 12. Ua faapefea ona lapatai atu Molimau a Ieova i faamasinoga o loo sau a Ieova?
11 Mo le tele o tausaga ua lapatai atu ai Molimau a Ieova i le oo mai o lenei gaoioiga faafaamasinoga a Ieova. Ua latou faasino atu faapea o le faaumatiaga o Ierusalema ma lona malumalu i le 607 T.L.M. ma le 70 T.A. sa o ni lapataiga faavaloaga o le mea e tupu ia Kerisinetoma. E lē gata i lena, ua latou faaalia ai faapea o Kerisinetoma, ona o lana faaaposetasi, ua avea ai o ia ma vaega o le emepaea o tapuaiga sese i le lalolagi, o Papelonia Tele. Ona o lenei tulaga, o le a faapitoa ai la ona oo atu ia Kerisinetoma faamasinoga a le Atua i luga o Papelonia Tele, ona o ia o se vaega e sili ona nofosala o lena faalapotopotoga tuufaatasi faasatani.—Faaaliga 19:1-3.
12 Ua faasino atu e Molimau a Ieova i le lapataiga faavaloaga a le Tusi Paia e faapea i le taimi atofaina a Ieova, o le a toe liliu ane ai ia Papelonia Tele ana uo mamae faapolotiki. Ua lapatai mai le Faaaliga, i le faatusaina o i latou ia i nifo e sefulu o le manu feai mūmū: “O nifo foi e sefulu na e iloa i le manu feai, latou te ʻinoʻino i le fafine talitane [Papelonia Tele], ma faasaunoa ia te ia, ma to ese ona ofu, latou te aai foi i lona tino, ma susunu ia te ia i le afi.” (Faaaliga 17:16) O le a susunuina ma faaumatiaina Kerisinetoma mapolotu faatasi ai ma isi tapuaiga sese uma lava. O lenei mea o se gaoioiga ese a Ieova, lana galuega uigaese mo o tatou aso.
13. Ua faapefea ona tutusa le tali mai i lapataiga a Ieova i aso nei ma le mea na fetaiai ma Isaia?
13 A faailoa atu e Molimau a Ieova le lapataiga o lenei malaia faafuaseʻi o loo sau, e masani a ona latou fetaiai ai ma tauemuga faaʻamuʻamu. E tau mānatu tagata faapea po o ai i latou e latou te taʻu atu ai na mea. E foliga mai o loo tū mausalī Kerisinetoma, ua matuā lelei ona faavae. Ioe, ua manatu nisi faapea ua faaleleia atili lona tulaga. Talu ai nei sa faataga ai e faigāmalo ua masani ona faapologaina o ia se saʻolotoga sili mo ana gaoioiga. E ui i lea, o le mea moni, e ao ia Kerisinetoma ona utagiaina le fautuaga a Isaia: “Aua tou te faatauemu, ina neʻi atili ai ona faamauina o outou noanoaga; auā o le faaumatia ua pulea, ua ou faalogo ai mai le Alii o Ieova o ʻau, e oo i le lalolagi uma lava.”—Isaia 28:22; 2 Peteru 3:3, 4.
14. O le a faapefea ona atili malosi ma mamau noanoataga o Kerisinetoma?
14 Ae o le vaega aupito sili, o le a faaauau pea ona matuā faatautee Kerisinetoma agaʻi i le Tupu ma le Malo. (2 Tesalonia 2:3, 4, 8) Peitai, i le taimi lava e tasi, o le a atili ai ona malosi ma mamau ona noanoataga. I nisi faaupuga, o le a saga faamautinoa atili ai lona faaumatiaga. O le a lē mafai ona fulitua Ieova mai lana faaiʻuga ina ia faaumatiaina Kerisinetoma e pei ona sa ia lē fulitua mai lana faaiʻuga e faaoo atu le faaumatiaga o Ierusalema ma lona malumalu i le 607 T.L.M.
“Ia Outou O Ese ia te Ia”
15. O le ā le auala e sola ai ua tatala atu i tagata e saʻo o latou loto?
15 E mafai faapefea e se tasi ona sola ese mai le iʻuga o Kerisinetoma? I tuā i ona po o Isaraelu, sa aauina atu ai e Ieova ana perofeta faamaoni e faamanatu atu le tapuaiga mamā i ē saʻo o latou loto. I aso nei, ua ia faatuina ai foi ana Molimau, ia ua faitau miliona lona aofai, mo se fuafuaga faapena. Ua latou faaalialia ma le lē fefefe le tulaga oti faaleagaga o Kerisinetoma. I le faia faapea, ua latou faamanatu atu ai ma le faamaoni faasilasilaga e pei o ni mala o iligā pu a le au agelu o le Faaaliga mataupu e 8 ma le 9. E lē gata i lena, ua latou faalauiloaina ma le maelega le timaʻiga ua faamauina i le Faaaliga 18:4: “Lou nuu e, ia outou o ese ia te ia, . . . ina neʻi tofusia foi outou i ona mala.” O le “ia” i inei o loo faatatauina ia Papelonia Tele, le emepaea o tapuaiga sese i le lalolagi, lea o loo avea ai Kerisinetoma ma ona sui e sili ona taulamua.
16. I le ā le auala ua sosola ese ai le faitau miliona mai tapuaiga sese?
16 Talu mai le 1919, ae maise lava le faasolo mai i le 1922, e anoanoai se motu o tagata o ē agamalu, ua tali atu i lena timaʻiga, ua lafoaia Papelonia Tele. Muamua e faitau afe, sosoo lea ma le faitau selau afe, ma i le taimi nei e faitau miliona ē ua vavae ese mai i latou lava mai tapuaiga sese, ae maise lava mai ia Kerisinetoma, ma ua sosola atu i le tapuaiga mamā. (Isaia 2:2-4) Ua latou iloa faapea e na o le tuua lava o Papelonia Tele e mafai ai ona latou alofia le mafatia ai i ona mala, ia o le a taualuga i lona faaumatiaga pe a oo mai le taimi e faataunuuina ai le galuega uigaese a Ieova.
17, 18. Ua avea faapefea Ieova o se palealii e matagofie ma o se pale lalelei i ona tagata?
17 Ua faamatalaina e le perofeta o Isaia le tulaga fiafia o i latou o ē ua taofi mau i le tapuaiga mamā. E faapea lana tala: “O lea aso e avea ai Ieova o ʻau ma palealii e matagofie, ma pale lalelei i e ua totoe o lona nuu; e avea foi ma atamai e faamasino ai i lē nofo e fai le faamasinoga, e avea foi ma malosi, i e o faafoisia le taua i le faitotoa.”—Isaia 28:5, 6.
18 Ona o lo latou faamaoni i le upu moni, ua avea ai Ieova o se palealii o le mamalu e lē mavae mo sui o le vasega o le auauna faamaoni ma le mafaufau. Ua faapitoa ona moni o lenei mea talu mai le 1926. O le tausaga lena na faamamafa ai e le lomiga o Le Olomatamata o Ianuari 1 se manaoga matuā tāua ina ia viia le suafa o Ieova i se mataupu faagaeetia sa faaulutalaina “O Ai o le a Faapaiaina Ieova?” Talu mai lena taimi, ua folafolaina ai e Kerisiano faauuina lena suafa i le lalolagi aoao i se tulaga e leʻi faapea ona iai muamua. I le 1931 na atili ai ona matuā mataulia vavalalata i latou ma Ieova i le taliaina o le igoa Molimau a Ieova. E lē gata i lena, ua ō ese foi se motu o tagata e toatele o isi mamoe mai ia Kerisinetoma ma le isi vaega o Papelonia Tele. Ua sapasapaia foi e i latou ia le suafa o le Atua. O le iʻuga? Ua avea ai Ieova lava ia—na i lo o se malo tutoatasi e lē tumau—o se palealii e matagofie ma o se pale lalelei mo le silia i le fa miliona tagata i atunuu ma atumotu o le sami e 212. Maeu se faaeaga ua ia i latou ia e tauaveina ai le suafa o le Atua moni e toatasi o loo soifua!—Faaaliga 7:3, 4, 9, 10; 15:4.
“E Afio Mau ia te Ia le Agaga o Ieova”
19. O ai lē nofo e fai le faamasinoga, ma ua faapefea ona avea Ieova o se atamai e faamasino ai o ia?
19 I a Iesu, o “lē nofo e fai le faamasinoga,” ua avea Ieova ma “atamai e faamasino” ai. A o iai Iesu i le lalolagi, sa musu o ia e faatoilaloina i le agaga faaonāina o sootaga faalelalolagi. I aso nei, i le avea ma faanofo Tupu a Ieova, ua faatumuina ai o ia i le agaga paia, lea e taʻitaʻia ai o ia i le faia o faaiʻuga paleni, ma uta mamao. Ua faataunuuina ia Iesu le valoaga e faapea: “E afio mau ia te ia le Agaga o Ieova; o le Agaga o le poto ma le mafaufau; o le agaga o le faatonuga ma le malosi; o le Agaga o le malamalama ma le mataʻu ia Ieova.” (Isaia 11:2) E moni, e ala ia Iesu, o le a faia ai e Ieova “le faamasinoga ia faatatauina i le fua faataoto, [ma] faia foi le amiotonu ia faatatauina i le fua faatautau.” (Isaia 28:17) E ui ina o le a matuā faateʻia fili onanā faaleagaga i le faaumatiaga, ae o le a faatinoina lava le faamasinoga tonu i le suafa paia ma le silisiliese aoao o Ieova.
20, 21. I le ā le auala ua aafia ai oe i upu o le Isaia 28:1-22?
20 O lea, maeu se uiga mataʻina o lenei valoaga a Isaia mataupu e 28 ua iai mo i tatou i aso nei! Afai tatou te vavae mamao ese mai ē onanā faaleagaga o Kerisinetoma ae piiama i le tapuaiga mamā, o le a puipuia la i tatou pe a faatinoina e Ieova lana gaoioiga ese ma lana galuega uigaese. Maeu lo tatou olioli i le iloaina o lenei mea! Ma maeu lo tatou fiafia e manatunatu faapea pe a mavae atu ia mea, o le a faamalosia tagata uma ina ia iloa ua gaoioi Ieova o ʻau mo ona tagata faamaoni ma mo le taʻumamāina o ia lava e ala ia Iesu Keriso!—Salamo 83:17, 18.
21 O lea tau ina faaauau pea ma le lē matataʻu e Kerisiano faamaoni uma ona lapatai atu e uiga i le galuega ese a Ieova. Seʻi o latou finafinau pea e taʻutaʻu atu lana galuega uigaese. A o latou faia faapea, seʻi o latou folafola atu ia i tagata uma lo tatou faamoemoe e lē maluelue i le Malo o le Atua i aao o lana faanofo Tupu. Talosia ia saosaolaumea lo latou maelega, maumauai, ma le faamaoni i le viiga e faavavau o lo tatou Atua e ona le malosi uma lava, o Ieova.—Salamo 146:1, 2, 10.
Pe Mafai ona E Manatua?
□ Aiseā ua oo ai ia Kerisinetoma se tulaga lē mautonu?
□ O le ā na fuafuaina e Ieova mo Ierusalema, ma aiseā na “ese” ai ma “uigaese”?
□ O le ā le lapataiga ua faailoa atu e Molimau a Ieova e faatatau ia Kerisinetoma, ma o le ā le tali ua latou fetaiai?
□ E mafai faapefea e tagata ona sosola ese mai le iʻuga o Kerisinetoma?
[Fesili mo le Suʻesuʻega]
[Ata i le itulau 24]
O le a toe faia e Ieova lana galuega ese, faasaga ia Kerisinetoma i le taimi nei