Le Tusi Paia—Pe Paia Moni?

E TOAFIA tagata i aso nei o manatu i le Tusi Paia faapea e paia, o le Afioga a le Atua? I lenei tupulaga masalosalo ma le lē talitonu, e toatele ua manatu i le Tusi Paia faapea o se tusi ua tuai ma e lē fetaui, ua masalomia lona paia moni. E oo lava i nisi o taʻitaʻi lotu o Kerisinetoma ua aʻoaʻo faapea o le Tusi Paia ua faafilogia i tala o le vavau ma tala faafagogo. Ua latou fesiligia ‘pe o faamatalaga a le Tusi Paia e uiga i le talafaasolopito o ni faamatalaga e mafai e se tagata mafaufau ona maua mai ai se fesoasoani.’—The Interpreter’s Dictionary of the Bible, Tusi 2, itulau 611.

O loo lūlū e tagata popoto lauiloa fatu o masalosaloga faatatau i le alagātatau ona faasino atu i le Tusi Paia e avea o le Afioga a le Atua. Na fai mai se tasi tagata poto faapea “afai e manao se tasi e faaaogā le ituaiga o gagana o loo i le Afioga a le Atua, o le faaupuga saʻo lava la mo le Tusi Paia e faapea o le Upu a Isaraelu, o le upu a nisi o uluai Kerisiano sa taʻimua.” (The Bible in the Modern World, a James Barr) O le ā sou manatu? Pe o le Tusi Paia o le Afioga a le Atua? Pe e paia moni?

O Ai na Tusia le Tusi Paia?

O le tusiaina o le Kenese, le uluai tusi o le Tusi Paia, ua tuuina atu lea ia Mose e tusa ai ma uputuu, o se tagata Eperu o lē na soifua pe tusa ma le 3,500 tausaga ua mavae. E tusa ai ma le faamatalaga a le Tusi Paia lava ia, e tusa ma le 40 tane mai tulaga eseese o le olaga na fai se sao i le tusiaina o tusi uma o le Tusi Paia, ua iʻu i le tuufaatasia ai o ni tusi e 66, po o le vaevaeina ai o le Tusi Paia i ni vaega. Ae peitai, sa leʻi manatu nei tane ia i latou faapea o tusitala moni o le Tusi Paia. Na faapea mai se tasi tusitala: “O le Tusi Paia uma lava ua faagaeeina e le Atua.” (2 Timoteo 3:16, NW) Na tusi se tasi e uiga i tusitala o le Tusi Paia: “Na talatalaina mai e tagata mai le Atua a o osofia i latou e le agaga paia.”—2 Peteru 1:21, NW.

Ua tuu ai e lenei mea tusitala i le tulaga o tagata tusiupu, po o failautusi, na pulea pe sa taʻitaʻia e le Atua. E tusa ai ma le Tusi Paia, sa masani lava ona faatagaina le tusitala e filifilia ana lava upu e faamatalaina ai faamatalaga tauatua ia na latou maua mai. (Sapakuka 2:2) O le mafuaaga lena o le tele o ituaiga o tusitusiga i le Tusi Paia atoa. Ae o le tusiaina sa taʻitaʻia pea e le Atua.

E ioeina faapea, o tala a nei tusitala e uiga i le faagaeeina tauatua ua lē o se faamaoniga lea na o i latou lava faapea o le Tusi Paia, o le feau tauatua a Lē na Foafoaina mea i le fanau a tagata. Ae ui i lea, e tusa lava pe o Lē Silisili ona Maualuga o le Tusitala lea o le Tusi Paia pe leai, ae e ao lava ona iloa manino e ala i se suesuega faaeteete ma le talafeagai o le tusi lava ia. Pe o aumaia i le Tusi Paia se faamaoniga o le tauatua o lona tusitala? Pe mafai moni ona tatou fai atu ma le mautinoa faapea e paia le Tusi Paia?