O le Soifuaga o Iesu ma Lana Faiva

O LE mataupu “Ua Faamaeʻa e Iesu Mea Uma e Finagalo ai le Atua,” i itulau o loo mulimuli mai, o le vaega mulimuli lea o la tatou faasologa umi “O le Soifuaga o Iesu ma Lana Faiva.” O lenei faatomuaga ua aumaia i Le Olomatamata mo le sili atu i le ono tausaga, i lomiga faasolo e 149, e amata mai i le lomiga o Aperila 1, 1985 (faa-Peretania).

E iai lo matou faamoemoe faapea ua fesoasoani lenei faasologa o mataupu i Le Olomatamata ia te outou e mulimuli ai i apoapoaiga a le aposetolo o Paulo ina ‘ia vaavaai ma le naunau atu ia Iesu’ ma ia utagia le poloaiga a le Atua ina ia “faalogo ia te ia.” (Eperu 12:2, 3; Mataio 17:5) I le gasologa o tausaga, e toatele na tusi mai e faapea mai ai na mafai ona fesoasoania ai i latou e faia lenei mea. “E pei lava sa ou iai i inā o loo faalogologo atu ia te ia ma matamata i mea o ia faia,” na tusi mai ai se tasi tagata faitau. “Ua oo ai ina sili atu ona ou alofa ia te ia ona o nei mataupu.”

Na tusi mai se tasi tagata faitau: “O lomiga uma lava e foliga mai o loo iai se manatu autū na ou misia pe a faitauina le faamatalaga a le Tusi Paia. Sa ou matuā olioli e manatua mea eseese na tutupu i le soifuaga o Iesu i se faasologa maopoopo lelei e ala i le faitauina o mataupu taitasi.” E toatele ua faaalia foi se talisapaia faapena ona o le aʻoaʻoina po o anafea ma i fea na aʻoaʻo atu ai ma faia ai e Iesu mea i le taimi o lana faiva.

Na faapea mai se fafine i Sepania: “O loo ou teuina uma lava mataupu mai lava i le amataga. E matuā aogā tele mo tagata matutua faapea foi ma tamaiti. Ua 44 nei oʻu tausaga, ma e matuā faafiafiaina lava aʻu pe a ou faitauina nei faamatalaga. E pei lava sa ou iai i mea taitasi na tutupu o le talafaasolopito.”

Na tusi mai se tinā i le Iunaite Setete: “Ona o le pupuu o mataupu ma le faigofie o lo latou faamatalaina, ua auai laʻu tane i la matou suesuega faaleaiga. Na fai mai laʻu tama tama e valu tausaga ou te tusi atu e faafetai atu ona ua suesue nei e lona tamā le Tusi Paia. Ua ia talosaga mai faapea i se aso pe a maeʻa lenei faasologa, ae ā pe a lomia mataupu i se tusi ina ia mafai ai ona latou fetufaʻi ma ana uo i le aʻoga.”

Pe atonu foi o le a oo ia te oe faalogona o lē faitau o lē na faatoʻā mavae atu nei ona auē mai: “Ua iai lava si oʻu lagona faanoanoa ona ua lē o toe umi nei ae uma le faasologa o mataupu auā o lea ua talanoaina nei aso faaiʻu o le soifuaga o Iesu. O le a ou matuā misia moni lava lo latou tulaga i totonu o Le Olomatamata.” Matou te faamoemoe o le a outou olioli i lenei vaega faaiʻu o la tatou faasologa “O le Soifuaga o Iesu ma Lana Faiva.”