Fesili mai le Au Faitau

▪ O le ā le fitā e ao i se Kerisiano ona tetee atu ai i se tuigā toto ua faatonuina pe pulea e se faamasinoga?

O tulaga taitasi e tutasi lava, o lea e leai se tulafono e faaaofia ai mea uma i lenei mea. E lauiloa Kerisiano ona o le faaaloalo i le ‘totogi atu o mea a Kaisara ia Kaisara,’ i le usiusitai i tulafono a le malo faaletino. Ae, ua latou iloa lelei faapea o la latou tiute tauave e pulea ai i latou, o le avatu lea o mea “a le Atua i le Atua,” ae lē o le solia o lana tulafono.—Mareko 12:17.

Ua talanoaina e le Roma 13:1-7 le faiā a Kerisiano i “faipule silisili” faalemalo. Ua iai i na faiga malo le pule e faagaoioia ai tulafono po o le tuuina atu o faatonuga, e masani ona siitia ai le lelei lautele o tagata o le atunuu. Ma o faiga malo foi e ‘iai le pelu’ e faamalosia ai la latou tulafono ma ia ‘faaooina atu ai le toasa ia i latou o ē o faia le mea leaga e tusa ai ma a latou tulafono.’ I le gauai atu i faipule silisili, ua faanaunau ai Kerisiano ina ia usiusitai atu i tulafono ma poloaiga a faamasinoga, ae o lenei gauai e tatau ona faatatau. Afai e fesiligia se Kerisiano ina ia gauai atu i se mea o le a solia ai le tulafono e sili atu ona maualuga a le Atua, e muamua le tulafono tauatua; e ave i ai le faamuamua.

O nisi o tulafono faaonaponei na e lelei o latou faavae atonu o le a faatatauina sese ina ia pulea ai le faamalosia o le tuiina o le toto i se Kerisiano. I lenei tulaga, e tatau ai i Kerisiano ona faia le tulaga lava lea e tasi e pei o lea na faia e le aposetolo o Peteru: “E tusa ona sili o lo matou anaana i le Atua [o le pule] i lo matou anaana i tagata.”—Galuega 5:29.

Na poloai Ieova i tagata Isaraelu: “Ia mausalī i le faaiʻuga ina ia aua le ʻaina le toto, auā o le toto o le ola, ma e lē tatau ona e ʻai le ola faatasi ma le tino.” (Teuteronome 12:23, NW) Ua faitauina faapenei se faaliliuga faa-Iutaia o le 1917 o le Tusi Paia: “Tau lava ina ia tumau mausalī i le lē ʻaina o le toto.” Ma ua faapenei ona faauiga e Isaac Leeser le fuaiupu: “Tau lava ina ia tumau mausalī ina ia aua lava neʻi ʻaina le toto.” Pe o le uiga ea la e foliga mai sa faatalalē ma lē sogasogā auauna a le Atua e uiga i le faasilisilia o ana tulafono?

Faatasi ai ma se mafuaaga lelei, na matuā maumauai ai Kerisiano ina ia usiusitai i le Atua, e tusa lava pe faatonuina i latou e se faiga malo ia lē usiusitai i se isi itu. Ua tusi mai Polofesa Robert L. Wilken e faapea: “O Kerisiano sa lē gata ina mumusu e auai i vaegaau [a Roma] ae latou te lē talia lava ni tulaga faaofisa i le lautele pe manatu foi i so o se tiute tauave mo le puleaina o aai.” (The Christians as the Romans Saw Them) O le mumusu sa ono faailogaina ai i latou o ni tagata matuā solitulafono pe tuuina atu ai foi ina ia faaumatia i malae mataaga a Roma.

E tatau foi i Kerisiano i aso nei ona tumau, ia faia se faaiʻuga mausalī ina ia aua lava neʻi solia le tulafono tauatua, e tusa lava pe oo ai ia i latou ni tulaga faigata mai malo faaletino o loo pule. O le tulafono aupito sili ona maualuga i le vateatea—o le tulafono a le Atua—e manaomia ai lo latou aloese mai le faaaogāseseina o le toto, e pei lava ona poloaia Kerisiano ina ia aua le faitaaga (amioga lē mamā faaleituaiga). Ua taʻua e le Tusi Paia nei faasasaaga o “mea e tatau.” (Galuega 15:19-21, 28, 29) E lē tatau ona manatu māmā i na tulafono tauatua, e avea e na o se mea e usiusitaia pe a talafeagai pe afai e lē o aumaia ai ni faafitauli. E tatau lava ona usiusitaia tulafono a le Atua!

O lea, e mafai ona tatou talisapaia le pogai na taʻu atu ai e le Kerisiano talavou na taʻua i le itulau e 17 i se faamasinoga faapea “sa manatu o ia i le tuigā toto o se faaleagaina o lona tino ma faatusatusa ai le tuigā toto i se toso teine.” Pe o le a gauai atu ma le lē leoa so o se fafine Kerisiano, pe matua pe talavou i se toso teine, e tusa lava pe o iai se tulafono faalemalo e faataga ai le faia o le faitaaga e ala i ni feusuaiga i se auala faamalosi?

E faapena foi le talavou 12 tausaga le matua lea na taʻua i le itulau lava lea, ona lē tuua se masalosalo faapea ‘o le a ia tau ma le malosi uma lava na te mafai ona maua i so o se pulega a se faamasinoga e faamalosia ai le tuiina o le toto, faapea o le a ia ēʻē ma tauivi, faapea o le a ia seʻiina le tui mai lona lima ma o le a taumafai e faaleaogā le toto i totonu o le taga lea o loo i luga o lona moega.’ Sa matuā mausalī lana faaiʻuga ina ia usiusitai i le tulafono tauatua.

Sa solomuli Iesu mai le oganuu ina ua mananao se motu o tagata e fai o ia ma tupu. E faapena foi pe afai o le a foliga mai e faapena ona faatonuina i le pule a le faamasinoga se tuigā toto, e mafai e se Kerisiano ona filifili e alofia le faia o lena mea e soli ai le tulafono a le Atua. (Mataio 10:16; Ioane 6:15) I le taimi lava e tasi, e ao i se Kerisiano ona saili ma le atamai nisi togafitiga faafomaʻi, i lea o le a faia ai se taumafaiga faamaoni ina ia tausia pea le ola ma ia toe maua le malosi atoatoa.

Afai sa faia e se Kerisiano ni taumafaiga fitā ina ia alofia ai le solia o le tulafono a le Atua i le toto, atonu o le a manatu ai pule faalemalo ia te ia faapea o se tagata solitulafono pe ua tatau ona sauāina o ia. Pe afai e iʻu ina faasalaina, e ono mafai ona manatu i ai le Kerisiano faapea ua sauāina ona o le amiotonu. (Faatusatusa 1 Peteru 2:18-20.) Ae i le tele lava o itu, ua alofia ai e Kerisiano tuigā toto ma ua mafai ai ona toe malolosi ona o tausiga tomai faafomaʻi, o lea ua lē iʻu ai i ni faafitauli faaumiumi faaletulafono. Ma o le mea e aupito sili ona tāua, ua latou tausisia lo latou faamaoni i lo latou Foai Ola Tauatua ma le Faamasino.