Pe Mafai ona E Fiafia i le Tele o Mea e Fai?

O LE toatele o i tatou e ola i ni olaga pisi tele, e masani lava ona tumu i mea e fesouaiina ai. O le lē mataofiofia o omiga o le olaga i aso nei e manaomia ai lo tatou faia o ni taumafaiga maumauaʻi ina ia tatou ōgatasi ai pea ma ia tulaga. E tatau i tane ma tamā ona faafetaiaia le omia i tiute tauave i o latou aiga, tagata faigaluega ma isi. O avā ma tinā e tatau ona vaai i manaoga o o latou aiga, ma e masani foi ona latou galulue i ni galuega totogi. O tagata talavou foi latou ua i lalo o omiga ina ia tausisi atu i nisi o tiutefai i le aiga a o ō atu i aʻoga e saunia ai i latou mo le faia o se vaega taulau i le sosaiete.

Ae faapefea i latou o i tatou o ē ua tuuina atu o tatou ola ia Ieova le Atua ma ua avea o ana Molimau papatisoina? I le faaopoopo atu i isi mea uma e manaomia ona tatou faia, ua ia i tatou lenei apoapoaiga a le aposetolo o Paulo: “Oʻu uso pele e, ia outou tumau, ma le le faagaeetia, ia alualu lo outou faamalosi i le galuega a le Alii ma le le aunoa ina ua outou iloa e le se mea faaleaoga lo outou tautiga i le Alii.” (1 Korinito 15:58) Ioe, o le tele o tiutefai faaopoopo o se vaega o mea manaomia mo le tapuaiga moni. E mafai faapefea ona tatou faataunuuina nei tiute tauave uma lava ma maua le filemu o le mafaufau ma se vaaiga fiafia?

Faataunuuga e Aumaia ai le Fiafia

O le fiafia—o se faalogona o le malōlōina lelei po o le lotomalie—e fesootai vavalalata lea ma le taulau i le taulimaina o tiute tauave o le olaga. Afai e mafai ona tatou faafetaiaia o tatou tiute tauave i aso fai soo i se auala uigā, e ala i le faia o mea i le taimi tonu ma i se auala maopoopo, ona ia i tatou lea o le lagona ua faaatoatoaina ma le lotomalie. O le auala lena e ao ona iai, ma o le iʻuga, ua saosaolaumea lea i lo tatou fiafiaga.

Sa lē taitai lava ona finagalo Ieova le Atua faapea o lo tatou taulimaina o tiute tauave e ao ona avea o ni avega mamafa. Na i lo lea, e faanaunau pea o ia ina ia tatou ʻolioli ma vaai i mea lelei o a tatou galuega mamafa uma lava.’ (Failauga 3:12, 13) Afai tatou te fiafia i a tatou galuega, e masani lava ona tatou fuatele mai. Tatou te nofo sauni pea e talia faatonuga ma ōgatasi ai ma le filemu ma isi. I le isi itu, afai tatou te lē fiafia, o le a tauāu ina avea la tatou galuega o se mea e lē fiafia i ai—o se mea e tau ina fai, ua fiu ai, pe ua oo foi ina iai se lagona faifai mālie. O lenei mea e taʻitaʻiina atu ai i le masani o le faia o galuega e lē fua mai ma se manatu lē mautinoa. O le a avea le olaga ma tauiviga i aso fai soo a o tatou taumafai e faafetaiaia mea uma lava o loo manaomia mai ia i tatou. Ae peitai, afai e mafai ona tatou maua se auala e tumau ai pea i le fiafia i mea o tatou faia, o le a faapena ona sili atu foi ona tatou tofo i se auala tauia ma le faataunuuina o le olaga.

Ia Paleni

Afai tatou te mananao ia fiafia e ui lava i le tele o a tatou mea e fai, e manaomia ona tatou paleni. Ma o le ā le paleni? O le “toʻa o le mafaufau ma faalogona.” O se tagata paleni, e tauivi ina ia maopoopo i ana gaoioiga. E fuafua o ia agaʻi i luma, e aloese mai le tolopo soo o fuafuaga, ma e taofiofi i ona uiga masani. Na te faaalia le pulea o ia lava i meaʻai, meainu, faamalositino, i mea e fai ma ona mausa, ma faafiafiaga. Na te faatinoina moni lava le “pulea o ia i mea uma lava”!—1 Korinito 9:24-27, NW; faatusatusa Tito 2:2.

Ua faia e le tatalo se vaega matuā tāua i le tausia o le paleni faa-Kerisiano. E mafai e se auauna a Ieova ona tatalo mo le agaga paia o le Atua ma mo le fesoasoani a lona Tamā faalelagi i le atiina aʻe o ona fua, e aofia ai ma le [pulea o oe lava]. (Luka 11:13; Kalatia 5:22, 23) E ao i se Kerisiano ona vaavaai atu i le Atua e ala i le tatalo ae maise lava pe a osofaia e tofotofoga na e faamataʻu ai le faalavelavea  o lona tulaga paleni. “Ia e tuuina atu lou ala ia Ieova, ma faatuatua ia te ia, ona faia lava lea e ia,” na fai mai ai le faisalamo o Tavita. (Salamo 37:5) I nisi taimi, e manaomia ai ona tatou tatalo e pei ona faia e Tavita ina o ia ole atu: “Le Atua e, ia e vave mai ia te aʻu. O oe lava o loʻu fesoasoani ma Lē na te saunia se mea ou te sao ai. Ieova e, aua lava e te faatuai mai.” (Salamo 70:5, NW) Aua lava neʻi galo faapea e ala i le tatalo e mafai ai ona tausia le paleni ma olioli ai ‘i le filemu o le Atua lena e silisili i mea uma lava e manatu i ai ma e leoleoina ai foi o tatou loto ma malosi o le mafaufau.’—Filipi 4:6, 7.

Ona o lona faalagolago ia Ieova ma olioli i le filemu mai le Atua, e faautauta ai se Kerisiano paleni. (Tito 2:11, 12) O lenei mea e sau mai le manatua lelei o mataupu silisili o le Tusi Paia ma le faatatauina o ia mea i lona olaga. O se tagata faapena e lē faafiaamiotonu, e lē natinati foi i le faia o se faamasinoga. O le magafagafa e taofia ai o ia mai le faualuga i ona manatu pe faauamalō foi. Na te tausia se manatu loto maulalo ia te ia lava ma ona tomai, ma ona o lenei mea o le a mafai ai ona ia felagolagomai ma isi. (Mika 6:8) Ma le fiafia lava, ona o uiga e mafai ona fesoasoani i se tagata ina ia paleni, ua iai foi faatasi ma uiga manaomia mai ia i latou ua tofia e auauna e avea o ni ovasia i le faapotopotoga Kerisiano.—1 Timoteo 3:2, 3.

E ono matuā telē se mea e mafai ona tatou faaopoopo i lo tatou fiafiaga e ala i le tauivi ina ia sili atu ona paleni i a tatou gaoioiga i aso fai soo. E ala i le faaalia o uiga e ō faatasi ma le paleni lelei, e mafai ai ona tatou faia mea tatau e aunoa ma le pagatia ai i le itu faaletino po o faalogona. O uiga o o tatou olaga o le a faaatagia atu ai le matuā sili ona paleni, ma o le a sili atu ai mea tatou te faataunuuina. O le a iloa e isi le faateleina o le fiafia i a tatou auaufaatasiga, ma o le a tatou tofo ai i le sili ona faamalieina ai o le loto ma le olioli. Ae o ā nisi auala aogā e tausia ai le paleni?

Auala Aogā e Tausia ai le Paleni

Ina ia tausia pea le paleni, e ao ona tatou taumafai ina ia vave ma ia maopoopo i le taulimaina o o tatou faafitauli totino. E manaomia ona tatou fuafua agaʻi i luma, i le tausia o mataupu i se auala maopoopo ma faasolosolo lelei. O i latou e leai se maopoopoga lelei ma mafuli i le tolopo soo o le faia o se mea, ua faalavelavea o latou olaga i le faateleina o tulaga o omiga ma popolega. O le manuia i lenei vala o le olaga o le a fesoasoani ia i tatou e lagona faapea o loo pulea lelei i tatou na i lo le lagona faapea o i tatou o ni tagata ua lē mafesoasoania i nei tulaga.

E lē tatau ona tatou taumafai e faia mea uma lava na o i tatou. O i latou e lē mananao e talia fesoasoani mai i isi, e masani lava ona latou totogia se tau mamafa o mafatiaga ma le leai o se faamoemoe. E iai galuega eseese e ono mafai ona tausia e isi. O le mea lea, o se mea atamai le faaaogā o tomai o i latou o ē mananao e tuuina mai le fesoasoani. E ese ai mai le faamāmā o la tatou lava avega, e ono avea lenei o se faalaeiauga ia i latou o mananao e tosina vavalalata mai ia i tatou.

E lē atamai le faatusatusa o i tatou ma i latou o ē atonu e mafai ona latou faia mea e sili atu. O le taumafai e pei o i latou na e foliga mai o loo faia mea e sili atu na i lo mea e mafai ona tatou faia, o se faalotovaivai lena, e oo ai ia i tatou se lagona e faatauvaa ma lē aogā. O manatu faapena e faaumatia ai, e ōia ai lo tatou maumauaʻi ma le mautinoa o i tatou lava. “A ia taitoatasi ma faamasino i lana lava galuega,” na tusi ai Paulo, “ona ia te ia lea o se mea e mitamita ai  ia te ia lava, a e le [i le faatusatusa atu i] se tasi.” (Kalatia 6:4) Ia manatua o le tagata faigaluega e sili ona tautele, o le tagata lea e mulimuli i faatonuga, e toʻa ma maufaatuatuaina, ma e faia galuega e sili ona aogā. Afai o le auala lena o tatou faia, o le a talisapaia la la tatou auaunaga ma o le a manaomia foi.—Faataoto 22:29.

E manaomia ona tatou tausia lelei lo tatou soifua malōlōina. O se tasi lea o mea aupito sili ona tautele o mea ua ia i tatou, auā a aunoa ma lea, o le a itiiti lava se mea e mafai ona tatou faia. I lea, e ao ona tatou taumafai e tausisia se ʻaiga malōlōina lelei e ala i le taumafaina o meaʻai paleni. E ao ona tatou maua le malōlōga tatou te manaomia, i le moe lea i se itula talafeagai i le po. Pe afai tatou te matuā vaivai pe lagona le oo mai o le maʻi, e lē ao ona tatou faamalosia i tatou lava; ina neʻi tatou maua se taui sili ona tiga.

E tāua foi le leoleo faasaga i le faatupuina o se agaga faitio. Afai tatou te avatu se avanoa i mafaufauga lē mautinoa, o le a mafai ona tatou maua se mea sese e toetoe lava i mea uma ma tagata uma lava. O lenei mea, o se auala mautinoa lea e fāoa ai le olioli mai ia i tatou lava faapea foi ma isi. Na i lo le faitatala pe faitio e uiga i mea o tatou lagona e lē saʻo, e ao ona tatou faailoa atu ia i latou e gafa ma le taulimaina o le mataupu, ma tuu ia i latou e faasaʻoina mea. (Faatusatusa 1 Korinito 1:10-12.) O se mea atamai mo i tatou ona tausia se manatu mautinoa, i le saili pea ma faatalitali e maua ni mea lelei i isi ma i mea na o loo faatulagaina lo tatou olaga.—Faatuasatusa Iuta 3, 4, 16.

I le fuafuaina o a tatou gaoioiga, e ao ona tatou manatua faapea o le faia o se gaoioiga faavale malosi e faaono faia ai ni talaaga, ae e seāseā lava tausisia mo se taimi umi. O le faaauau pea ona soona faavale malosi o le a lē gata i le taʻitaʻiina atu ina vaivai ae aumaia ai foi le lotovaivai lena e mafai ona ōia ai lo tatou maumauai e faaauau pea. I lea, seʻi o tatou faataatia se laasaga e mafai ona tatou tausia maʻoti. Mo se faaaʻoaʻoga, o se mea lelei ona faataatia se faasologa aogā mo le auai e lē aunoa i le galuega talaʻi i lea fale ma lea fale ma isi vala o le faiva faa-Kerisiano. Tatou te manaomia ona faatagaina se taimi e malōlō ai ma faia ai ni faamalositino e atiina aʻe ai. Ma o le a tatou maua ai foi aogā i le talanoa ma isi tagata matutua o ē ua faitau sefulu tausaga o le poto masani, ona atonu ua latou aʻoaʻoina pe faapefea ona faia mea tatau e aunoa ma le faatiga ai o i latou lava i le tulaga faaletino ma tau i faalogona.

Ia Faaaogā le Faamasinoga Lelei

O se mea saʻo le lagona o le iai o se tiute tauave ma se faanaunauga ia faataunuuina o tatou tiutefai uma lava ua tofia mai, e aofia ai tiute i totonu o le faapotopotoga o tagata o Ieova. E fiafia le Atua i tagata faigaluega filigā ma le maufaatuatuaina. (Faatusatusa Mataio 25:21; Tito 2:11-14.) Ae ua uunai mai le Tusi Paia: “Ia e taofi mau i le poto ma le mafaufau.” (Faataoto 3:21) O le faatatauina o le atamai o le Tusi Paia o le a aogā mo i tatou, ma e manaomia ona faaaogā o tatou mafaufau ma le faamasinoga lelei, i le faia o fuafuaga faaeteete ma ia faia i le mea e gata mai ai lo tatou malosi.

O le apoapoaiga ina ia tele mea e fai i le galuega a le Alii e tatau ona paleni lelei ma le lapataiga o loo fautuaina mai i le Failauga 9:4. I inā ua tatou faitau ai: “E sili ona lelei o le ulī ua ola i le leona ua mate.” Ioe, o se ulī ola, e ui lava e inosia e nisi, ae sili na i lo o se leona ua mate, o se manu e manatu i ai le toatele faapea o le tupu o manu. Afai tatou te faatinoina le paleni ma tausia lelei lo tatou soifua malōlōina, o le a tatou ola pea ma faaauau ona faia o mea. O tagata oti e lē toe mafai ona faia so o se galuega. O le faia o le faamasinoga lelei e mafai ona fesoasoani ia i tatou e maua le paleni uigā e faataga ai i tatou e faataunuuina mea tatau e aunoa ma le leiloa o lo tatou olioli.

O lea la, o le tele o mea e fai e lē o le uiga faapea o le a lē mafai ai ona tatou maua le fiafia. O tagata aupito sili ona pisi e mafai ona iai faatasi ma tagata aupito sili ona fiafia pe afai e magafagafa, tausia se vaaiga paleni lelei, ma faaaogā le faamasinoga lelei ina ia tausia ai pea le paleni lelei. E mafai ona tatou tofo i le fiafiaga aupito sili e mafai ona maua pe afai tatou te faaalia le atamai, faia galuega lelei, ma tuu atu lo tatou faamoemoe ia Ieova le Atua.—1 Timoteo 6:17-19.