Savavali e Pei ona Aʻoaʻo mai e Ieova

“Ieova e, ia e [aʻoaʻo] mai ia te au lou ala, ou te savali i le mea moni mai ia te oe; ia e faia ina ia tasi loʻu loto e mataʻu i lou suafa.”—SALAMO 86:11.

1, 2. O le ā ua uunaia ai Molimau a Ieova e teena le taliaina o tuigā toto?

“MASALO e saʻo Molimau a Ieova i le teena o le faaaogāina o ni vaega o le toto, auā o le mea moni e mafai ona feaveaia i tuigā toto se aofaiga tele o siama ninii e mafua ai faamaʻi.”—Nusipepa faafomaʻi a Falani Le Quotidien du Médecin, Tesema 15, 1987.

² Atonu e manatu nisi o ē na faitau i lena faamatalaga faapea o se tala soona lafo, auā ua loa lava ona teena e Molimau a Ieova tuigā toto a o leʻi oo ina iloa e le lautele lona mataʻutia, ma le taugā, e mafai ona iʻu i ai. Peitai o le tulaga ua tausisia e Molimau a Ieova e uiga i le toto e leʻi faafuaseʻi ona tupu, po o se tulafono foi na amata e nisi ituaiga ese, se tulaga e mafua mai i le mataʻu faapea e lē saogalemu le toto. Na i lo lea, ua teena e  Molimau le toto ona o lo latou maumauai e savavali ma le usiusitai i luma o lo latou Aʻoaʻo Sili—le Atua.

3. (a) Sa faapefea le lagona o Tavita e uiga i le faalagolago ia Ieova? (e) O le ā le taunuuga sa tepa taulaʻi i ai Tavita ona o le faatuatua i le Atua?

³ Sa maumauai le Tupu o Tavita, o lē na lagona lona faalagolago i le Atua, ina ia aʻoaʻoina o ia e ia ma ia ‘savali i lana upu moni.’ (Salamo 86:11) Na fautuaina Tavita i se taimi faapea afai na te alofia le nofosala i le toto i luma o fofoga o le Atua, o le a mafai la ona ‘fusifusia ai lona ola i le taʻui o le ola e Ieova.’ (1 Samuelu 25:21, 22, 25, 29) E pei a ona fusifusia e tagata a latou mea totino tāua ina ia puipuia ma faasaoina ai, sa mafai foi ona puipuia ma faasaoina e le Atua le ola o Tavita. I le taliaina o le fautuaga atamai, sa leʻi saili ai Tavita e faasaoina ia lava i ni taumafaiga totino ae sa ia faatuatua i Lē na ia nofo aitalafu ai i lona ola: “E te faailoa mai ia te au le ala o le ola; o i ou luma le fiafia e mālie ai; o i lou itu taumatau le olioli e faavavau.”—Salamo 16:11.

4. Aiseā na manao ai Tavita e aʻoaʻoina o ia e Ieova?

⁴ Faatasi ma lena uiga, sa leai se lagona o Tavita faapea e mafai ona ia filifilia totino po o lē fea tulafono tauatua sa tāua pe manaomia ona usiusitai i ai. Sa faapea lona uiga: “Ieova e, ia e aʻoaʻo mai ia te au i lou ala, ma taʻitaʻi ia te au i le ala laulelei.” “Ieova e, ia e [aʻoaʻo] mai ia te au lou ala, ou te savali i le mea moni mai ia te oe; ia e faia ina ia tasi loʻu loto e mataʻu i lou suafa. Le Alii e, loʻu Atua, ou te vivii atu ia te oe i loʻu loto atoa.” (Salamo 27:11; 86:11, 12) I nisi taimi e foliga mai ai e faafaigata pe atonu e manaomia ona matuā faataulaga ina ia savavali ai i le upu moni i luma o le Atua, peitai sa manao Tavita ina ia aʻoaʻoina o ia i le ala saʻo ma savali ai.

Aʻoaʻoina e Uiga i le Toto

5. O le ā atonu na iloa e Tavita e faatatau i le finagalo o le Atua e uiga i le toto?

⁵ E aogā ona tatou matauina faapea, mai lava i lona tamaitiiti, sa aʻoaʻoina Tavita i le finagalo o le Atua e uiga i le toto, o lea finagalo sa lē o se mealilo faaletapuaiga. Ina ua faitauina le Tulafono i tagata, atonu na faalogo Tavita o faapea: “O i le toto le ola o le tino; ua ou tuuina atu ai foi ia te outou e fai aʻi le togiola mo outou i luga o le fata faitaulaga; auā o le toto o le mea lava lea e fai aʻi le togiola mo le tagata. O le mea lava lea na ou fai atu ai i le fanauga a Isaraelu, Aua le ʻaina ni toto e so outou, aua le ʻaina foi le toto e se tagata ese e aumau ia te outou.”—Levitiko 17:11, 12; Teuteronome 4:10; 31:11.

6. Sa faapefea ona iai se manaoga faifai pea mo auauna a le Atua ina ia aʻoaʻoina e uiga i le toto?

⁶ E pei a ona faaaogā e le Atua Isaraelu o ni ona tagata faapotopotoina, o i latou foi la e mananao e faafiafia o ia e ao ona aʻoaʻoina e uiga i le toto. Sa faapea ona aʻoaʻoina ai lea tupulaga ma lea tupulaga o tama ma teine Isaraelu. Ae pe sa faaauau pea sea aʻoaʻoga ina ua maeʻa ona talia e le Atua le faapotopotoga o Kerisiano, ua faia aʻe ai ia i latou “le Isaraelu o le Atua”? (Kalatia 6:16) Ioe, e moni lava. Sa leʻi suia le finagalo o le Atua e uiga i le toto. (Malaki 3:6) Na muai iai lona finagalo tusitusia e uiga i le faaaogāseseina o le toto a o leʻi faagaoioia le feagaiga o le Tulafono, ma sa faaauau pea ina ua mavae le faamutaina o le Tulafono.—Kenese 9:3, 4; Galuega 15:28, 29.

7. Aiseā e tāua ai ia i tatou le aʻoaʻoina e le Atua e uiga i le toto?

⁷ O le faaaloalo mo le toto e ogatotonu i le Faa-Kerisiano. Ae atonu e fesili mai nisi, ‘po ua lē soona faamamafa nauā ea lena tulaga?’ E ui i lea, o le ā la le ogatotonu o le Faa-Kerisiano pe afai e lē o le taulaga a Iesu? Ma na tusia e le aposetolo o Paulo: “O ia [Iesu] foi ua tatou maua ai le togiola i lona toto, o le faamagaloina o agasala, e tusa ma le oloa faulai o lona alofa tunoa.” (Efeso 1:7) Ua faaupuina lena fuaiupu e The Inspired Letters, na faaliliuina e Frank C. Laubach: “Na totogia i tatou i le toto o Keriso ma ua avea ai nei i tatou mo Ia.”

8. Ua faapefea ona faalagolago le “motu o tagata e toatele” i le toto mo le ola?

⁸ O i latou uma lava ua faamoemoe e faasaoina i le “puapuaga tele” o loo faamalumalu mai ma olioli i faamanuiaga a le Atua i se lalolagi parataiso e faalagolago i le toto masaa o Iesu. Ua faamatalaina i latou ma taʻutaʻu mai pea i le Faaaliga 7:9-14: “O i latou ia o e o mai nai  le puapuaga tele, ua ta foi o latou ofu, ma ua faasinasinaina o latou ofu i le toto o le Tamai mamoe.” Ia matau le gagana ua faaaogā i inei. E lē o faapea mai o i latou ia ua faasaoina nai le puapuaga tele sa ‘taliaina Iesu’ pe ‘faatuatua ia te ia,’ e ui ina e mautinoa o nisi na o vala e matuā tāua. Ua laa teisi atu i luma ma faapea mai ua latou “ta foi o latou ofu, ma ua faasinasinaina i le toto o [Iesu].” O le mafuaaga ona ua iai i lona toto se aogā faatogiola.

9. Aiseā e matuā matuiā ai le usiusitai ia Ieova e faatatau i le toto?

⁹ O le sapaitalia o lenei aogā ua fesoasoani ai i Molimau a Ieova ina ia lotomau e aua neʻi faaaogāseseina le toto, e tusa lava pe finau mai ma le faamaoni se fomaʻi e matuā tāua se tuigā toto. Atonu e talitonu o ia e sili atu ai aogā mulimuli ane o se tuigā toto i lo o toʻatugā e aumaia e le toto lava ia. Peitai e lē mafai e se Kerisiano ona faagaloina le toʻatugā mataʻutia e sili atu, le toʻatugā o le melea o le faamaoniga a le Atua e ala i le ioe e faaaogāsese le toto. Sa taʻua e Paulo i se taimi i latou o ē na “agasala ma le loto i ai [ina ua] uma ona talia o le malamalama o le upu moni.” Aiseā sa matuiā ai so o se agasala o lena ituaiga? Auā “ua soli [e sea tagata] le Alo o le Atua, ma ua taʻulepaiaina e ia le toto o le feagaiga na faapaiaina ai o ia.”—Eperu 9:16-24; 10:26-29.

Fesoasoani i Isi ina Ia Aʻoaʻoina

10. O le ā o loo i tua o lo tatou maumauai e taumamao mai le toto?

¹⁰ E ao ia i tatou o ē sapaitalia le taulaga togiola a Iesu ona faaeteete ia aua le faia le agasala, ma teena ai le aogā faasaoola o lona toto. I le tilofaia o le mataupu atoa, ua tatou iloatino ai e ao i sina faafetai faigofie i le Atua mo le ola ona uunaia ai i tatou e teena so o se faalotolotolua i ana tulafono amiotonu, ia ua tatou mautinoa sa aumaia mo lo tatou lelei e sili atu—lo tatou lelei e sili atu e faavavau. (Teuteronome 6:24; Faataoto 14:27; Failauga 8:12) E ui i lea, ae faapefea a tatou fanau?

11-13. O le ā le manatu sese o loo iai i nisi mātua Kerisiano e uiga i a latou fanau ma le toto, ma aiseā?

¹¹ A o pepe pea a tatou fanau pe laiti tele e faigata ona malamalama, e mafai ona silasila Ieova le Atua ia i latou e mamā ma talileleia e faavae i lo tatou tuutoina atu. (1 Korinito 7:14) E moni lava la atonu e leʻi malamalama ma faia e tamameamea i se aiga Kerisiano se filifiliga e faatatau i le usiusitai i le tulafono a le Atua e uiga i le toto. Peitai ane, pe o tatou faia ea le mea sili tatou te mafai e aʻoaʻo ai i latou i lenei mataupu matuā tāua? E ao i mātua Kerisiano ona iloilo totoʻa lena itu, auā o nisi mātua e foliga mai o loo iai se uiga sese e faatatau i a latou fanau ma le toto. O nisi e aliali mai latou te manatu e faalētele sa latou pule i mea faapena, pe tatau ona tui le toto i a latou fanau iti. Aiseā ua mafua ai lenei manatu sese?

¹² E tele atunuu e iai a latou tulafono po o sui faalemalo e puipui ai fanau ua tuulafoaiina pe faataumaoia. A o fanau a Molimau a Ieova, e lē faapea ua tuulafoaiina pe faataumaoia ona ua filifili mātua e teena le faatagaina o so la atalii po o se afafine pele e tui i ai le toto, ae talosaga i le taimi lava lea e tasi e faaaogā togafitiga e sui ai, lea ua mafai ona saunia e vailaau faaonaponei. E faapena foi mai se vaaiga faafomaʻi, e lē o se tuulafoai po o se faataumaoi lenei mea, pe a manatu atu i le mataʻutia o togafitiga o tuigā toto ua faaalia tino mai. O se faatinoga lea o le aiā e fuafua ai toʻatugā e aafia ai ma filifilia ai se togafitiga. * E ui i lea, ua sailia e nisi fomaʻi sauniuniga faaletulafono ina ia maua ai le pule e faamalosia ai se tuigā toto e lē manaomia.

¹³ E iai le lagona o nisi mātua, faapea atonu e faigofie i fomaʻi ona maua le lagolagosua a le faamasinoga mo se tuigā toto i se tamaitiiti, pe manatu foi e lē mafai ona latou tāea le mataupu, faapea e leai se mea e mafai ona fai pe manaomia ona fai e mātua. Pagā le sese o lena manatu!—Faataoto 22:3.

14. Sa faapefea ona aʻoaʻoina Tavita ma Timoteo a o la talavou?

¹⁴ Ua uma ona tatou matauina faapea sa aʻoaʻoina Tavita i le ala o le Atua mai lava i lona talavou. Na faaauupegaina ai o ia ina ia manatu i le ola o se meaalofa mai le Atua ma  ia iloa o le toto o le sui lea o le ola. (Faatusatusa 2 Samuelu 23:14-17.) Sa aʻoaʻoina foi Timoteo i le finagalo o le Atua “ina o . . . tama itiiti.” (2 Timoteo 3:14, 15) E te lē ioe ea la faapea e ui ina sa i lalo ifo Tavita ma Timoteo i le mea ua taʻua i aso nei o tausaga faatulafonoina o le tagata matua, ae atonu sa mafai lava e i laua ona faaaleoina atu i laʻua lava i finauga ua aafia ai le finagalo o le Atua? I se tulaga tutusa, a o leʻi taitai ona avea ma tagata matutua, e ao i tamaiti Kerisiano ona aʻoaʻoina i ala o le Atua.

15, 16. (a) O le ā le manatu ua tuputupu aʻe i nisi nofoaga e uiga i aiā a tamaiti laiti? (e) O le ā na taʻitaʻia i le tuiina o le toto i se tasi tamaitiiti?

¹⁵ I nisi nofoaga ua foaiina atu ai i se ua taʻua o se tamaitiiti matua aiā e tali tutusa ma i latou o ē matutua. E faavae i tausaga po o mafaufauga faatagata matua, po o itu uma e lua, e mafai ai ona manatu i se talavou faapea ua lava lona taʻumatuaina e fai ai ana lava faaiʻuga i togafitiga faafomaʻi. E tusa lava po o nofoaga e lē faapenei sona tulafono, atonu o le a amanaia tele e faamasino ma ofisa manaoga o se talavou o lē e mafai ona ia faaalia atu ma le manino lana faaiʻuga mausalī e uiga i le toto. I le tuufaafeagai, afai e lē mafai e se talavou ona faamatalaina ma le manino ma faatagata matua ona talitonuga, e ono manatu la le faamasinoga e tatau ona filifili le mea e foliga mai e sili ona lelei, e pei ona ono ma tatau ai mo se pepe.

¹⁶ Sa iai se tasi taulealea talavou na fai ma tuu lana suesuega o le Tusi Paia mo le tele o tausaga ae leʻi papatisoina lava. E ui ina toe fitu lava vaiaso oo i tausaga e maua ai lona “aiā e teena ai togafitiga faafomaʻi e ia lava,” ae na sailia e se falemaʻi sa togafitia ai o ia mo le kanesa, le lagolagosua a le faamasinoga ina ia tui le toto ia te ia e faasagatau i ona manaoga atoa ma manaoga o ona mātua. Na fesilisili le faamasino loto faamaoni i le taulealea e uiga i ona talitonuga i le toto ma siligia ai fesili faigofie, e pei o igoa o uluai tusi e lima o le Tusi Paia. Sa leʻi mafai e le taulealea ona faaigoa atu na tusi pe avatu foi se faamaoniga maumaututū faapea o loo ia malamalama i le pogai ua ia teena ai le toto. E faanoanoa lava, sa faatonu e le faamasino  ia tui i ai le toto, e faapea: “O (L)ona musu e ioe i tuigā toto e lē faavaeina i luga o se malamalamaga faatagata matua o ona lava talitonuga faaletapuaiga.”

17. O le ā le tulaga na tausisia e se teineitiiti e 14 tausaga e uiga i le tui o le toto ia te ia, ma o le ā le iʻuga?

¹⁷ Atonu e eseese taunuuga o mataupu mo se tamaitiiti faaletulafono sa lelei ona aʻoaʻoina i ala o le Atua ma sogasogā e savali i Lana upu moni. Na iai se Kerisiano e itiiti ifo sa maua i le ituaiga o kanesa lava lea e tasi. Sa malamalama ma taliaina e le teineitiiti ma ona mātua ni nai togafitiga e faaitiitia ai le maʻi mai se fomaʻi faapitoa i se falemaʻi lauiloa. Peitai, na ave lava le mataupu i le faamasinoga. Na tusi mai le faamasino: “Ua faamaonia e D.P. faapea na te teena se tuigā toto i so o se auala na te mafai ai. O lona manatu i se tuigā toto o se osofaiga lea o lona tino ma sa faatusaina i se toso teine. Na ia talosagaina le Faamasinoga ia faaaloalo i lana faaiʻuga ma ia faataga o ia e taoto ai pea i [le falemaʻi] ae aua le faatonuina e le Faamasinoga ni tuigā toto.” Sa fesoasoani ia te ia aʻoaʻoga faa-Kerisiano na ia maua i lenei taimi faigata.—Vaai le pusa.

18. (a) O le ā le tulaga mausalī na uia e se teineitiiti na pagatia e uiga i le taliaina o le toto? (e) O le ā le faaiʻuga a le faamasino e uiga i lona togafitiga?

¹⁸ Sa togafitia se teineitiiti e 12 tausaga mo le leukemia. Ina ia mafai ona faamalosia le toto ia te ia, na ave ai e se sui o tausiga o tamaiti le mataupu i le faamasinoga. Fai mai le faaiʻuga a le faamasino: “Na taʻua ma le manino ma i se auala moni e L. i le faamasinoga e faapea, afai e faia se taumafaiga e tui le toto ia te ia, o le a ia tau faasaga la i lena tuigā toto i le malosi uma e mafai ona ia maua. O lana faamatalaga lea, ma ou te talitonu ia te ia, o le a ia ʻeʻē ma tauivi ma o le a ia seʻiesea le faagaʻau e tui atu ai le toto mai lona lima ma taumafai e faaleaga le toto o loo i le taga i luga o lona moega. Ou te musu e faia so o se faatonuga o le a faapea ona uia ai e lenei teineitiiti lena puapuaga . . . I le maʻi lenei, o le togafitiga sa fuafuaina e le falemaʻi e na ona aveesea ai le faamaʻi i se uiga faaletino. Ua lē taulau ona aveesea ai ona manaoga tau faalogona ootia ma ona talitonuga faaletapuaiga.”

Mātua—Ia Aʻoaʻo Lelei

19. O le ā le matafaioi faapitoa e ao i mātua ona avatu i a latou fanau?

¹⁹ O na mea tutupu ua aumai ai se feau e sili ona malosi mo mātua o ē faanaunau ia ola tagata ua i lo latou aiga e tusa ma le tulafono a le Atua e uiga i le toto. O se tasi o mafuaaga na avea ai Aperaamo ma uo a le Atua ona sa Ia silafia faapea o le a ia “poloai atu i ana fanau ma lona aiga pe a mavae atu o ia; latou te tausia le ala o Ieova, i lo latou [faia o le] amiotonu.” (Kenese 18:19) Pe lē ao ea ona moni lenei i mātua Kerisiano i aso nei? Afai o oe o se matua, pe o e aʻoaʻoina ea lau fanau pele  ia savavali i le ala o Ieova ina ia mafai ai ona “saunia pea [i latou] e tali atu . . . ia i latou uma o e fesili mai . . . i le uiga o le faamoemoe o loo ia [i latou, ae ia faia faapea faatasi ma le agamalu ma le faaaloalo loloto]”?—1 Peteru 3:15.

20. O le ā le mea muamua e ao ona tatou mananao i a tatou fanau e iloa ma ia talitonu i ai e uiga i le toto? (Tanielu 1:3-14)

²⁰ E ui ina e lelei ona taʻu i a tatou fanau e uiga i tulaga mataʻutia o faamaʻi ma isi toʻatugā o tuigā toto, ae o le aʻoaʻoina o a tatou fanau i le tulafono lelei atoatoa a le Atua e uiga i le toto ua lē faapea ai o loo e taumafai e totō ia i latou le fefe i le toto. Afai mo se faaaʻoaʻoga, e fesiligia e se faamasino se teineitiiti pe aiseā ua ia lē manao ai e tui le toto ia te ia ae faapea atu lana tali, ona o lona manatu e toʻatugā tele pe tau faafefe le toto, o le ā e mafai ona iʻu i ai? Atonu o le a iʻu i le faamasino faapea ua na o ia o se tamaitiiti ma ua soona fefevale tele, e pei a ona ia fefe i se taotoga o le pitogaʻau ua mafua ai ona ia tagi ma teena lenei taotoga, lea foi e lagona e mātua ua sili ona lelei mo ia. E sili atu i lena, ua tatou uluai matauina faapea o le mafuaaga faavae e tetee ai Kerisiano i tuigā toto, e lē faapea ona e leaga le toto peitai ona e tautele i lo tatou Atua ma lo tatou Foai Ola. E ao i a tatou fanau ona iloa lena mea, atoa ma le mafai e lamatiaga faafomaʻi o le toto ona aumaia ai se avega faaopoopo i lo tatou tulaga faaletapuaiga.

21. (a) O le ā e ao i mātua ona iloa e uiga i a latou fanau ma le manatu o le Tusi Paia e uiga i le toto? (e) E mafai faapefea ona fesoasoani mātua i a latou fanau i le sootaga ma le toto?

²¹ Afai e iai sau fanau, po ua e mautinoa ea latou te ioe ma mafai ona faamatalaina le tulaga ua faavae i le Tusi Paia e uiga i tuigā toto? Faamata latou te talitonu moni i lenei tulaga faapea o le finagalo lea o le Atua? Pe ua latou talitonu ea faapea o le solia o le tulafono a le Atua, e matuā matuiā nauā e mafai ona lamatia ai le faamoemoe o se Kerisiano mo le ola e faavavau? O le a autaluina e mātua atamamai ia mataupu ma a latou fanau, e tusa lava pe latou te laiti pe ua toeitiiti avea ma tagata matutua. Atonu e faia e mātua ni vaega faataʻitaʻi ia o le a fetaiai ai talavou taitasi ma fesili e ono lagā e se faamasino po o se ofisa o le falemaʻi. O le sini e lē ina ia toe taʻu faatauloto mai e se talavou mea moni ua filifilia po o tali. E sili atu ona tāua lo latou iloa o le mea ua latou talitonu i ai, ma le pogai. O le mea moni, i le fofogaina o se faamasinoga, e mafai e mātua po o isi ona tuuina atu faamatalaga e uiga i toʻatugā o le toto ma le avanoa o togafitiga e sui ai. Peitai o le mea o loo sailia e se faamasino po o se ofisa e fia iloa mai talanoaga ma a tatou fanau, pe ua latou malamalama ea faatagata matua i lo latou tulaga ma filifiliga ma pe ua iai foi ia i latou lava ni mea aogā ma talitonuga mausalī.—Faatusatusa 2 Tupu 5:1-4.

22. O le ā e mafai ona avea ma iʻuga tumau o lo tatou aʻoaʻoina mai le Atua e uiga i le toto?

²² O i tatou uma lava e manaomia ona sapaitalia ma ia tausisi aʻiaʻi i le finagalo o le Atua e uiga i le toto. Ua faamatalaina i le Faaaliga 1:5 Keriso o lē ua ‘alofa mai ia i tatou ma o lē na faasaolotoina i tatou mai a tatou agasala e ala i lona lava toto.’ Na o le taliaina lava o le aogā o le toto o Iesu e mafai ai ona tatou maua le faamagaloga atoatoa ma faavavau o a tatou agasala. Ua faapea mai ma le manino le Roma 5:9: “O lenei, ua taʻuamiotonuina nei i tatou i lona toto, e le faaolaina ea i tatou e ia ai le toasa i se a.” Maeu la le atamai, mo i tatou ma a tatou fanau ina ia aʻoaʻoina e Ieova i lenei mataupu ma ia maumauai e savavali ai i lana auala e faavavau!

[Faaopoopoga i lalo]

Manatu Autū o Aʻoaʻoga

□ O le ā le manatu e ao ona ia i tatou e uiga i le aʻoaʻoina e Ieova?

□ Aiseā e matuā tāua ai le usiusitai i le tulafono a le Atua e uiga i le toto?

□ Aiseā e tāua ai le mafai e talavou ona faamatala manino ma ia maumaututū o latou talitonuga e uiga i le toto?

□ E mafai faapefea ona fesoasoani mātua Kerisiano i a latou fanau ina ia aʻoaʻoina lelei i le tulafono a Ieova e uiga i le toto?

[Fesili mo le Suʻesuʻega]

[Pusa i le itulau 17]

NA MAOFA LE FAAMASINOGA

O le ā na fai mai ai le faaiʻuga a le faamasinoga e uiga ia D.P., ua taʻua i le palakalafa e 17?

“Sa matuā maofa le Faamasinoga i le atamai, toʻa, faaaloalo, ma le faatauanau malosi o lenei talavou e 14-1/2 tausaga. Atonu sa ia faanoanoa ina ua iloa sa maua o ia i se ituaiga o kanesa e sili ona leaga . . . E ui i lea, na oo atu lenei tagata talavou taʻumatuaina i le Faamasinoga ina ia faamaonia. Na foliga mai sa manino ona ia taulaʻi atu i le galuega fitā ua la fesagaʻi. Sa ia auai i vaega uma e faufautuaina ai, na ioe i se fuafuaga o togafitiga, atiina aʻe se filosofia poto i le auala o le a ia fesagaʻi ai o se tagata ola ma lenei luʻi faafomaʻi, ma na ia oo mai i le Faamasinoga ma se talosaga tuusaʻo: ia faaaloalogia laʻu faaiʻuga . . .

“E faaopoopo i lona tulaga taʻumatuaina, ua lava ma totoe mafuaaga ua faaalia e D.P. mo lana faaiʻuga ia faaaloalogia ai e le Faamasinoga. O le a faaleagaina o ia faaleagaga, faalemafaufau, tau amio, ma faalogona ootia, i se togafitiga e fuafuaina ua aofia ai tuigā toto. O le a faaaloalogia e le Faamasinoga lana filifiliga i se togafitiga e fuafuaina.”

[Ata i le itulau 16]

Atonu e manao se faamasino po o se pule o le falemaʻi e fia iloa le mea e talitonu moni i ai se talavou Kerisiano, ma le pogai