Talavou e—Pe o le a Outou Sao mai le Tofotofoga o le Faamaoni Faa-Kerisiano?

“E TE lē manatu faapea o amioga lē mamā o se lē faamaoni. Ua na ona faafiafiaina ai o oe. O le mea moni, ua e iloa afai e iloa ane e ou mātua po o le au toeaina, o le a faapogaia ai le loto momomo ma le anoanoai o faafitauli. Ae afai ua na o se mea e faafiafiaina ai oe, e na ona e teena lava la o na mafaufauga uma.”

O le tama talavou na seʻi faatoʻā taʻua sa ia faaauau pea ona faia faalilolilo se faitaaga. Sa ia ola i se olaga uigalua, i le faaseseina o ona mātua ma le faapotopotoga Kerisiano. Sa aunoa lava ma sona iloa i lena taimi faapea ua ia lē taulau mai se tofotofoga o le faamaoni faa-Kerisiano.

E faitauafe talavou Kerisiano ua lē taulau i tofotofoga faapena o le faamaoni. Ma e lē o se mea e matuā ofo ai! Ioe, ua ‘sii taua’ atu Satani le Tiapolo i tagata o le Atua, i le faia o mea uma lava na te mafaia ina ia gausia ai lo latou faamaoni. (Faaaliga 12:17) Ae maise lava o talavou, ua ia fai ma taulaʻiga o ana “gaoioiga faaʻoleʻole.” (Efeso 6:11, Kingdom Interlinear) E manaomia ai la ni taumafaiga moni ma le maumauai ina ia tumau i le faamaoni.

Ae po o le ā le faamaoni? I le Tusi Paia Eperu, o le upu anamua mo le “faamaoni” (loyalty) ua faaalia ai se piitaga alofa i se tagata faatasi ai ma se fuafuaga o loo vaai atu i ai. (Salamo 18:25) E lē o faamatalaina ai ni noataga vaivai e faigofie ona motusia, ae o se piitaga e tumau ona atoatoa seia faataunuuina lona fuafuaga e tusa ai ma lena tagata. I le Tusi Paia Eleni, o le upu anamua mo le “faamaoni” (loyalty) ua aumaia ai le manatu e paia, amiotonu, po o le migao.

I lea, o le faamaoni (loyalty) ua aofia ai se faiā saʻo ma le Atua. Ua taʻu mai e le Efeso 4:24 ia i tatou ina ia “oofu . . . i le tagata fou ua faia . . . [i le amiotonu moni ma le faamaoni (loyalty)].” E te fia faamaoni ea ia Ieova? E tatau la ona e atiina aʻe se piitaga faamaoni ia te ia, se noataga lē mamotusia, se filifiliga maumaututū e faafiafia o ia i ou ala uma. E tatau ona e pipii atu i tapulaa amiotonu a Ieova—e tusa lava po o le ā le tofotofoina e oo i ai!

O Omiga ina ia Lē Faamaoni

E faamalō atu, ona e toatele tagata talavou i totonu o Molimau a Ieova o loo tauivi ina ia tumau i le faamaoni, ma ua iʻu ai i lo latou olioli i se loto fuatiaifo mamā. E ui lava i lea, na valoia e le aposetolo o Paulo faapea “o aso e gata ai,” o le a avea le lē faamaoni ma uiga o tagata lautele. (2 Timoteo 3:1, 2) I le avea o se mala, ua faatagaina e nisi talavou Kerisiano lenei lalolagi lē faamaoni e ‘oomi ai i latou ia faafoliga i le lalolagi lava ia.’ (Roma 12:2, Phillips) Ua faataunuuina faapefea e Satani lenei mea?

O omiga mai tupulaga, o se tasi lea meafaigaluega malosi a Satani. O le toatele o tagata e mananao ia lelei ona manatu mai isi ia i latou, ma ua iloa lelei la e Satani le auala e gaoioi ai i lenei tuʻinanauga masani. O le manaoga ia lē faaesea i manatu o tagata, ua pogai ai ona auai nisi talavou Kerisiano i talanoaga lē mamā, amioga lē mamā, ulaula, onanā,—e oo lava i le faaaogāseseina o vailaau oona—ua faia nei mea uma ona o le naunau ia talia e a latou tupulaga.

 O loo manao Satani ia i tatou ina ia ‘tatou amio e tusa ma tuʻinanau o o tatou tino, i le faia o mea ua manao i ai le tino.’ (Efeso 2:3) Ua ia iloa lelei lava le malosi e oo i ai le faatosinaga o tuʻinanauga faaleituaiga i le taimi o le “malaulau o le talavou.” (1 Korinito 7:36, NW) Ma e manao o ia ina ia e lolo atu i na tuʻinanauga. O nisi talavou Kerisiano, ua latou faaaogā ma le lē fuafuaina le avanoa e ala i le matamata i tusi o faiga lē mamā, tifaga, ma videos pe ala foi i le taaloalo i totogasa. I le iʻuga, o nei mea e masani ona taʻitaʻiina atu i gaoioiga matuiā o le lē faamaoni. Pe ‘ua oomi ea oe’ e le lalolagi a Satani ‘ina ia foliga ia te ia’ i nisi o nei vala?

Ola i se Olaga Uigalua

A o faia se mea sese matuiā e pei o le faitaaga lea ua avea o se mataupu matuā matuiā, ua faateleina ai e nisi talavou o latou faafitauli. Ua pei i latou o “tagata o le lē faamaoni,” o loo tautalagia i le Salamo 26:4, (NW), “o ē natia o latou uiga moni.” O talavou faapena o loo ola i ni olaga uigalua, e ese le gaoioiga e fai pe a iai faatasi ma o latou mātua po o isi Kerisiano taʻumatuaina, ae ese foi le auala e ui ai pe a faatasitasi ma a latou tupulaga.

Ae peitai, o le ola i se olaga uigalua, o se toʻilalo popo o le tagata lava ia ma e mataʻutia. O gaoioiga sese e lē tilofaʻia, e masani lava toetoe ina taʻitaʻia atu ai i le faia o isi gaoioiga sese. Ma i le taimi muamua e faalavelavea ai le loto fuatiaifo o se tasi, ae o le umi o le tausisi atu pea o lea tagata i le faia o le mea sese, o le itiiti foi lea o le gaoioi o lona loto fuatiaifo e tali atu faasaga i le mea sese ua faia. I le uiga moni atonu o le a ‘lē toe lagona e se tasi le tigā’ ona o le faia o le mea sese.—Efeso 4:19, Kingdom Interlinear.

I lenei tulaga ua oo ai ina matuā sili atu ona faigata ona taʻutino e se tasi le mea sese ua faia ma maua ai se fesoasoani. O le tulaga moni lena ae maise lava pe a aafia ai isi talavou Kerisiano i le mea sese. E masani ona manumalo ai le lagona piopio tau i le faamaoni. Na faamatala mai e le talavou na taʻua i le amataga o le mataupu e faapea: “E te iloa lelei lava le mea o loo e faia, ma ua e iloa e sese. Ae ina ia lē afaina isi tagata o loo aafia ai, ua e lotomalie ai e aua neʻi taʻuina i se tasi.”

A o ono mafai e se tagata ona ‘natia lona tagata moni’ mai ona mātua po o le faapotopotoga, ae lē mafai ona ia natia mai ia Ieova. “E le lilo foi se tasi mea na faia i ona luma, a ua taatia fua ma ua aliali mai o mea uma lava i lana silafaga, tatou te taʻu atu ia te ia a tatou amio.” (Eperu 4:13) Ua faamautinoa mai i tatou e le Tusi Paia: “O le ua ufiufi lana solitulafono, e le manuia o ia.” (Faataoto 28:13) E sau se taimi o le a faaalialia ai le mea sese. E lē mafai ona faafiapoto se tasi ia Ieova. Fai mai le Faataoto 3:7: “Aua e te faafiapoto; ia e mataʻu ia Ieova, ia ʻalo ese i le leaga.” Ia manatua foi, “o loo i mea uma lava fofoga o Ieova; o loo matuā silasila i e amio leaga ma e amio lelei.”—Faataoto 15:3.

O le talavou na muai taʻua, faatasi ma nisi na aafia i le mea sese faalilolilo, na maua mulimuli ane, ona faateʻaeseina lea o ia ma ana aumea mai le faapotopotoga Kerisiano. Mulimuli ane na latou toe malolosi faaleagaga ma toe faaeaina mai. Ae pagā pea se auala faigata na latou aʻoaʻoina ai le uiga o le faamaoni!

‘Faasaʻo Mea’ ma le Atua

Ae faapefea pe afai ua uma ona faamaonia le lē faamaoni o se tasi i nisi o auala, atonu pe i le faia o se gaoioiga sese? E faigofie ona faavaleaina lea tagata ma faafitia ai le manaoga ina ia faasaʻo mea. Na faapea mai se tasi talavou o lē na auai faalilolilo i le faia o le faitaaga: “Sa ou faateleina laʻu faiva i le fanua, i le manatu faapea atonu o le a ufiufi ai le mea sese.” Sa faapena foi ona taumafai le nuu liliu ese o Isaraelu ina ia faamalie le finagalo o Ieova i taulaga. Ae na teena e Ieova lena tuutoina faafiaamiotonu. Sa ia uunaia i latou: “Ina fafano ia outou, ina faamamā ia outou; faateʻa ese ia a outou galuega leaga i oʻu luma, soia tou te fai mea leaga.” Na talia e Ieova a latou taulaga i le na o le taimi lava na uma ai ona latou ‘faasaʻo mea ma ia.’ E faapena foi ona moni lena i aso nei mo so o  se tasi o lē atonu e aafia i le faia o le mea sese.—Isaia 1:11, 15-18.

E lē mafai e se tasi ona faasaʻo mea ma Ieova e ala i le na o le faalagolago i se aumea. I se tasi o mafuaaga, e lē ofoina mai e aumea i taimi uma lava le fesoasoani sili, auā o le tele o taimi, e faapena foi ia i latou ona lē lava le poto masani i le olaga. A o le mafuaaga e sili ona tāua, ona latou te lē mafaia ona faamagalo lau agasala. E na o le Atua e mafai ona faia lena mea. O lea, “ia outou momoli atu o outou loto” ia te ia i le taʻutino atu o au agasala. (Salamo 62:8) E ui atonu o le a e matuā lagona le masiasi ona o lau amio, ae ia mautinoa o Ieova na te ‘matuā faamagalo mai i se auala sili.’—Isaia 55:7.

O le a e manaomia se fesoasoani faaopoopo. “Ia faailoa atu i ou mātua, ia vave lava ona faailoa atu i le au toeaina—i le amataga lava,” ua apoapoai mai ai se tasi talavou Kerisiano o lē na maua aogā mai lena fesoasoani. Ioe, atonu o loo iai ou mātua i se tulaga lelei e fesoasoani atu ai ia te oe. ‘Tuu atu ia lou loto’ ia i laua, i le faailoa uma atu ia i laua o ou faafitauli. (Faataoto 23:26) E mafai ona la fuafua mo oe ina ia e maua atili ni fesoasoani mai toeaina o le faapotopotoga pe afai ua alagātatau.—Iakopo 5:14, 15.

Faaalia o le Faamaoni Moni—Faapefea?

E moni, o le a sili ona lelei le aua lava neʻi paʻū atu i le faia o amioga lē faamaoni i le amataga. Ua taʻu mai e le Salamo 18:25 (NW) ia i tatou: “E te faamaoni oe [Ieova] i lē ua amio faamaoni; e te amio saʻo oe i lē ua amio saʻo.” E faatamaoaiga e Ieova i faamanuiaga i latou o ē tausisia tulaga maualuluga tau amio.

E ui i lea, e iai foi isi auala atonu o le a tofotofoina ai lou faamaoni. Mo se faaaʻoaʻoga, seʻi faapea ua lolo atu se tasi o au uo i le auala liliu ese. Pe o le a faatagaina lou faamaoni sese i lena uo e faaʻauaoa lou faamaoni ia Ieova? O le auala alofa e faia o lou faalatalata atu lea i lena uo ma uunaia o ia e lipoti atu le mataupu i ona mātua po o le au toeaina. Ia taʻu i lau uo faapea afai na te lē faia faapea mo sina taimi e tusa ai, o le a e faia loa faapea. Ua faapea mai le Faataoto 27:5: “E sili ona lelei o le aoaiga ua aliali mai, i le alofa ua lilo.” O le fesoasoani atu i lau uo i lenei auala, ua e faaalia ai e lē gata i le faamaoni i la lua faauoga, ae faapea foi ma le loloto o lou faamaoni ia Ieova.

Po o le ā lava le tofotofoga, ae o le malosi e faaalia ai le faamaoni e sau mai le iai o se faiā totino malosi ma Ieova. E alagātatau tatalo uigā ma suesuega totino filigā pe afai tatou te fia olioli i se faiā faapena. E fiafia lava, ona o talavou uma lava na taʻua muamua o ē na faia mea sese na ioe mai faapea, o a latou tatalo ma le masani o le faia o suesuega totino, sa avea o se auala masani—ma i le taimi lea sa lē toe faia ai. Sa taofia e Ieova le avea o ia ma moni ia i latou, ma sa leʻi pine ae faia loa amioga lē mamā. Pe o e faamalosia la lua faiā ma Ieova e ala i le tatalo ma le faia o suesuega totino, ina ia tumau ai i le faamaoni?

E moni, i nisi taimi atonu e te tau mānatu pe o e misia le maua o se taimi fiafia. “I nisi taimi e foliga mai e pei o loo maua ai e tagata o le lalolagi se taimi mālie,” na fai mai ai se tasi teine talavou. “Ae afai e teʻi ua maua ai oe i lea tulaga, ona e iloa lea e matuā leai lava se mālie.” Na ia taʻua mai le mea na oo ia te ia, i le auai i le faia o feusuaiga lē mamā, ma iʻu ai ina maua i le maʻitaga ma toe faapaʻū. “O le iai i totonu o le upu moni, o se puipuiga,” ua ia faapea mai ai nei—o se lesona na ia aʻoaʻoina i se auala faigata. Ua faamanatu mai e le Salamo 119:165 ia i tatou faapea “ua tele le filemu o e naunau i lau [le Atua] tulafono.”

O le mea lea, ia faia le mea sili e te mafaia ina ia tumau ai i le faamaoni. Ia galue i le fausia o se faiā tumau ma Ieova. Ia inoino i le leaga ae pipii i le lelei. (Roma 12:9) Ua taʻu mai e le Salamo 97:10 ia i tatou: “Outou e alolofa atu ia Ieova, ia outou ʻinoʻino i mea leaga; o loo tausi e ia i agaga o ona tagata amio Atua; na te laveaiina i latou ai lima o e amio leaga.” Ioe, i le avea o se talavou Kerisiano, o le a e maua aogā mai le puipuiga a Ieova ma olioli i le ola e faavavau pe a e sao mai i le tofotofoga o le faamaoni faa-Kerisiano.