Mai se Tinā Faalelalolagi e Oo i Atua Fafine o le Fanautama

E TE iloa le atua fafine e ona le ata lea e i le faavaa o lenei mekasini? O Isis, le atua fafine o tinā anamua o Aikupito. Afai sa e asiasi atu i se fale mataaga pe na e vaavaai foi i se tusi o talafaasolopito anamua, atonu la ua uma ona e vaai ai i lenei faatagata, po o se tasi foi e pei o lena. Peitai, seʻi manatu i lenei mea: Pe o le a e ifo ma tapuai atu i le atua fafine o Isis?

Afai o e auai atu i se tasi o lotu a Kerisinetoma, e ono foliga mai la o se fesili uigaese lena. Atonu o le a faapena ona e tausisi mai faapea o loo e tapuai i Lē na Foafoaina mea, o Lē ua taʻua o “Lo matou Tamā e, o i le lagi.” (Mataio 6:9, King James Version) O le manatu e ifo i se atua fafine o tinā, e foliga mai o se mea ese, o se faatigā loto. Ae peitai, o na ituaiga o tapuaiga sa salalau atu i le faagasologa o le talafaasolopito, ma atonu o le a avea o se mea e faateʻia ai oe i le iloa po o ai tonu o loo tapuai i le atua fafine sili o tinā i aso nei.

Ae peitai, a o leʻi talanoaina lena mea, seʻi tatou aumaia nisi o talaaga, e ala i lo tatou talanoa i le tulaga lautele na oo atu i ai le tapuaiga i le atua fafine o tinā i taimi anamua. O lenei ituaiga o tapuaiga e aliali mai o se ituaiga lea faaanamua a lotu sese. O faatagata o fafine ma faatusa o atua fafine o tinā lē lavalavā, sa eliina aʻe e tagata suesue i le eleele i laufanua anamua i Europa atoa ma laueleele o le Metitirani e oo atu i Initia.

O le Tinā Faalelalolagi, sa vaavaai atu i ai o le puna e maua ai pea lava pea ituaiga uma o ola, i le aumaia o le ola ma toe faafoi atu ia te ia lava i le taimi o lo latou oti. I le avea o se atua faapena, sa tapuaia ai o ia ma sa matataʻu foi i ai. I le amataga, sa talitonuina faapea, o lona malosi faafanautama sa leai se fesootaiga ma le faia o ni feusuaiga. Ae i tala faafagogo sa uiga i ai, na ia fanauina le atua tamaloa o le Tamā o le Lagi ma avea ai loa le atua fafine lea ma ana avā. Ona aumaia ai lea e lenei ulugalii le aofai e lē mafaitaulia o isi atua ma atua fafine.

Le Uluai Atua Papelonia na Tupu Uma mai ai Isi Atua

I atua uma lava o Papelonia, o Ishtar lava le atua fafine sili, sa tutusa pau ma le atua fafine o le fanautama a Sumeria o Innanna. Ae peitai, i le taimi lava e tasi, o ia o le atua fafine o taua ma o le atua fafine foi o le alofa ma le faamalieina o faalogona tau feusuaiga. I lana tusi Les Religions de Babylonie et d’Assyrie (Lotu a Papelonia ma Asuria), na faapea mai le tagata poto Falani o Édouard Dhorme e faatatau ia Ishtar: “O ia o le atua fafine, o le tamaitai, o le tinā alofa mutimutivale o lē e faafofoga i tatalo ma faalaa ane ina ia laveai i latou mai luma o atua feita. . . . Sa faaeaina o ia i luga o atua uma lava, sa avea o ia ma atua fafine o atua fafine uma lava, o le tupu fafine o atua uma lava, o le silisiliese o atua i le lagi ma le lalolagi.”

O tagata tapuai ia Ishtar sa latou taʻua o ia “o le Taupou,” “Taupou Paia,” ma le “Tinā Taupou.” Ua taʻua e le “Tatalo o Auega ia Ishtar” a Semeria-Akaia anamua e faapea: “Ou te tatalo atu ia te oe, Le Tamaitai e, o tamaitai uma, le atua fafine o atua fafine uma. Ishtar, le tupu tamaitai o tagata uma lava. . . . O lē e ou le malosi tauatua uma lava, o lē ua faapaleina i le pule. . . . O falesa, o nofoaga paia, o nofoaga  lilo, ma malumalu e faalogo atu ia te oe. . . . E iai ea se tasi o na mea e tutusa ma oe? . . . Ia e silasila mai ia te aʻu Le Tamaitai e; ia e talia mai aʻu tatalo.” *

Salalau atu le Tapuaiga i le Atua Fafine o Tinā

Ua tautala le tagata mai Sasae o Édouard Dhorme e uiga i le “faalauteleina o le tapuaiga ia Ishtar.” Ua salalau atu i Mesopotamia atoa, ma po o Ishtar lava ia po o atua fafine e eseese o latou igoa ae tutusa uiga sa tapuaia foi i Aikupito, Foinie, ma Kanana, faapea foi ma Anatolia (Asia Itiiti), Eleni ma Italia.

O le atua fafine o tinā sili na tapuaia i Aikupito, o Isis. Na tusi ai le tusitala o talafaasolopito o H. G. Wells faapea: “Sa faatosina e Isis le toatele o tagata tuutoina, o ē na tuutoina o latou olaga ia te ia. O ona faatusa sa faatutū i totonu o le malumalu, sa faapaleina e pei o le Atua Fafine o le Lagi ma o loo umia e ona lima le faatusa o le pepe o Horus. O loo musaesae ai ma tafe ifo molīgaʻo i ona luma, ma sa tautau solo ai molīgaʻo ua uma ona mū i totonu o le malumalu.” (The Outline of History) Sa matuā lauiloa lava le tapuaiga ia Isis i Aikupito. Sa salalau atu foi i laufanua atoa o le Metitirani, ae maise lava i Eleni ma Roma, ma faapea ai ona oo atu i Europa i sisifo ma matu.

I Foinie ma Kanana, o tapuaiga i atua fafine o tinā sa taulai atu ia Ashtoreth, po o Astarte, na faapea mai o le avā a Paala. I le pei o lana paʻaga faa-Papelonia, o Ishtar, sa avea o ia o le atua fafine o le fanautama atoa ma taua. I Aikupito anamua sa maua ai ni upu na vane na sa taʻua ai Astarte o le tamaitai o le lagi ma le tupu tamaitai o le lagi. Sa tatau i tagata Isaraelu ona faia pea lava se taua faasaga i taaʻiga paʻū maulalo o tapuaiga i lenei atua fafine o le fanautama.

I le itu i matu i sisifo o Anatolia, o lē sa tutusa ma Ishtar o Cybele, sa lauiloa o le Tinā Sili o atua. Sa taʻua foi o ia o Lē na Fanauina tagata uma lava, o Lē Foai o mea uma lava, o le Tinā o Tagata uma lava ua faamanuiaina. Mai i Anatolia na salalau muamua atu ai le lotu mavae a Cybele i Eleni ona sosoo ai lea ma Roma, lea na faaolaolaina lelei ai e oo mai i o tatou aso, T.A. O le tapuaiga i lenei atua fafine o le fanautama sa aofia ai ni siva aasa faavalemalosi, e saei ai o latou lava tino e faitaulaga, ma le aveesea e sui lava latou o o latou totogasā ona o le tofi faitaulaga, ma faia se solo e matuā faamamaluina ai le faatusa o le atua fafine. *

O tagata Eleni faanuupo sa tapuai i se atua fafine o se Tinā o le Lalolagi na taʻua o Gaea. Ae o o latou atua na aofia ai atua fafine e pei o Ishtar, e pei o Aphrodite, le atua fafine o le fanautama ma le alofa; o Athena, le atua fafine o taua; ma Demeter, le atua fafine o faatoaga.

I Roma, sa avea ai Venus o le atua fafine o le alofa ma, ona o se atua faapena, ua tutusa ai ma le atua fafine Eleni o Aphrodite ma le atua fafine o Papelonia o Ishtar. Ae peitai, sa tapuaia foi e tagata Roma atua fafine o Isis, Cybele, ma Minerva (le Athena o Eleni), o na atua fafine uma lava ua faaatagia ai i le tasi auala po o le isi foi le atua fafine sili o Papelonia anamua o Ishtar.

Mo le faitauafe o tausaga, e manino lava, o le tapuaiga i atua fafine o tinā sa o se feteenaiga malosi i le tapuaiga mamā i Lē sili na Foafoaina mea, o Ieova. Pe na mate le tapuaiga i le atua fafine o tinā sili? Pe o le mea o faaauau mai pea e oo mai i aso nei? Faamolemole ia faaauau pea ona faitau.

[Faaopoopoga i lalo]

[Ata i le itulau 3]

O ISHTAR a Papelonia lena ua faatinoina i se fetu

[Ē Ana le Ata]

Courtesy of The British Museum

[Ata i le itulau 4]

O ISIS o Aikupito faatasi ma le atua pepe o Horus

[Ē Ana le Ata]

Musée du Louvre, i Pale