Matafaioi a le Fafine i le Tusi Paia

“E taʻua o ia o le fafine, auā na toina atu o ia ai le tane.”—KENESE 2:23.

1, 2. (a) Ua manatu faapefea nisi tagata i le silafaga a le Tusi Paia i fafine? (e) Ina ia tonu manatu, o le ā le faatusatusaga e ao ona fai, ma o le ā ua taʻua e se tasi o tusi faamaumau?

O FAAPEFEA ona silasila le Tusi Paia i fafine? E eseese manatu i lenei itu. Ua faapea mai se tusi talu ai nei e uiga i le mataupu: “O le manatu ua muai iai e faapea, e taʻu faatauvaaina e le Tusi Paia fafine.” Ua faitio mai nisi tagata faapea i ona vaega uma i le faa-Eperu ma le faa-Eleni, ua soona sauā tele le Tusi Paia i fafine. Pe moni ea lenei?

² Ina ia tonu manatu, muamua e talafeagai ona iloiloina le auala na taulima ai fafine i ona po o le Tusi Paia i le lotolotoi o tagata o ē sa lē tapuai ia Ieova. I nisi o tupulaga anamua sa faatinoina le tapuaiga i atua fafine o tinā, na aloaia ai fafine o ni faatusa o le fanau tama. E aliali mai sa matuā faatāuaina i latou i Papelonia ma Aikupito. Ae i isi mea sa itiiti lo latou tāua. I Asuria anamua sa mafai e se tamaloa ona tiaʻi lana avā pe a loto i ai ma oo foi ina fasiotia o ia pe afai e lē faamaoni. Sa manaomia ona ia laeiina se ufimata, i fafo atu o le aiga. I Eleni ma Roma, e na o fafine mauoloa lava, e toatele sa tosolalau, po o le au talitane silisili, sa faataga i aʻoaʻoga ma olioli ai i sina saolotoga. O lea, o se mea e faafouina ai le faitau atu i le The New International Dictionary of New Testament Theology: * “I le eseesega ma le isi vaega uma o (tapuaiga) i le itu i sasae o le lalolagi,  ua amanaia o ia [le fafine i Tusitusiga Eperu] o se tagata ma o se paaga a le tamaloa.” Ua matuā lelei ona faaupuina lenei mea i le tusi faaiʻu o Tusitusiga Eperu, lea o loo faamatala ai e le perofeta a Ieova le avā a le tamaloa o sana ‘paaga,’ ma faaopoopo mai: ‘O lau avā na fai a o e taulealea, aua neʻi faaʻoleʻole i ai se tasi.’—Malaki 2:14, 15.

Foafoaina o se Paaga a le Tamaloa

3 ma le faamatalaga pito i lalo. (a) Ina ua maeʻa ona foafoaina Atamu, o ā tofiga o galuega na avatu e Ieova ia te ia? (e) E ui ina leai sana avā i lena taimi, o le ā le tulaga moni sa iai Atamu a o leʻi foafoaina Eva, ma o le ā foi le tulaga moni i “le Atamu mulimuli,” o Iesu?

³ E tusa ma le Tusi Paia, sa foafoaina e Ieova Atamu “i le efuefu o le eleele” ma faanofoia o ia i le faatoaga o Etena, e galueaiina. Na aumaia e le Atua manu feai o le fanua ma manu felelei ia Atamu ina ia mafai ona ia vaavaaia i latou ma avatu ia i latou ni igoa. I se taimi e lē mailoa na faia ai e Atamu lenei galuega, sa na o ia lava. Ae po o ā lava tofiga na ia maua mai ia Ieova, sa lelei atoatoa o ia, faimea maeʻa, e leai se mea na mativa ai. * Sa ia “lei maua se fesoasoani e tatau ma ia.”—Kenese 2:7, 15, 19, 20.

4, 5. (a) Ina ua lē toe lelei ona faaauau na o Atamu, o le ā sa faia e Ieova? (e) O le ā le tofiga faaumiumi sa avatu e Ieova ia Atamu ma Eva, ma o le ā sa manaomia e lenei mea mai ia i laʻua uma?

⁴ Peitai, ina ua mavae sina taimi mulimuli ane, na folafola ai e Ieova faapea “e le lelei ina toatasi o le tagata,” ma ia saunia ai loa se paaga mo Atamu la te saosaolaumea i galuega ua taatitia mai luma. Na ia faamoegase Atamu, ae toina ese se tasi o ona ivi asoaso, ma faia aʻe ai se fafine, ‘o le ivi lava o ivi o Atamu ma aano o ona aano.’ O lea la ua iai nei ia Atamu “se fesoasoani,” ‘se soa,’ po o se paaga. “Ua faamanuia foi e le Atua ia te i laua, ma ua fetalai atu le Atua ia te i laua, Ia fanafanau ia, ma ia uluola, ma ia tumu ai le lalolagi, ia faatoilalo i ai, ma ia pule i iʻa i le sami, ma manu felelei, atoa ma mea ola uma e fetolofi i le eleele.”—Kenese 1:25, 28; 2:18, 21-23.

⁵ Matau o lenei tofiga sa avatu ia te i “laua,” e mo i laua uma, le tamaloa ma le fafine. O le a lē gata mai le la galuega faitoalua i le faatumuina o le lalolagi. E aofia ai foi  le galueaiina o le lalolagi ma le faatinoina o le aiā tatau i luga o meafaiola maualalalo uma lava. O le a manaomia ai le atamai ma uiga faaleagaga, ma sa iai uma i le tamaloa ma le fafine se faamoemoe talafeagai mo le atiina aʻe o ia mea i le ōgatasi ma le finagalo o le Atua.

Le Matafaioi Moni a le Fafine

6. (a) O le ā ua faaalia e le Tusi Paia e uiga i le malosi faaletino o le tamaloa ma le fafine? (e) E lelei faapefea i fafine ona fefulisai ina ia talia le faatulagaga o mea a Ieova?

⁶ E mautinoa, o le galueaiina o le lalolagi e alu ai foi le malosi faaletino. I lona atamai e faavavau, na muai foafoaina ai e Ieova Atamu, ae mulimuli Eva. Sa foafoaina o ia “mai le tane,” ‘mo le lelei o le tane,’ ma peiseaī e itiiti ifo le malosi faaletino na i lo le tamaloa. (1 Timoteo 2:13; 1 Korinito 11:8, 9; faatusatusa 1 Peteru 3:7.) O se mea moni lenei o le olaga e foliga mai e toatele tamaitai, ma nisi foi fafine, e faafaigata ona taliaina. E mautinoa o le a atili lo latou fiafia pe afai latou te taumafai e malamalama i le pogai na fuafua ai e Ieova mea i lenei auala, ma taliaina ai la latou matafaioi ua tuuina mai e le Atua. O tagata e faitio e uiga i fuafuaga a le Atua e ono faatusaina i se lupe e olo filemu i lona faamoega ona e lē pei lona malosi o se gogosina o le sami, na i lo le lele atu i se lālā laau maualuga ma pesepese ai ona o le loto faafetai mo meaalofa tutasi ua avatu i ai e le Atua.

7. Aiseā na tu ai Atamu i se tulaga lelei ina ia faatinoina le tulaga ulu i luga o Eva ma fanau uma o le a fananau mai, ae pe sa afaina Eva i lenei mea?

⁷ A o leʻi foafoaina Eva, e lē taumatea na maua e Atamu le tele o le poto masani i le olaga. I le gasologa o lena taimi, na avatu ai e Ieova ia te ia nisi o faatonuga patino. Sa tatau ia Atamu ona taʻu atu ia mea i lana avā, i le gaoioi o se tautuu upu a le Atua. O le tulaga moni, sa ao ona fai o ia ma taʻimua i mataupu uma lava e faatatau i le tapuaiga ma gaoioiga faaleatua na tatau ona la tauaveina faatasi ma se vaaiga i le faataunuuina o lo la  tofiga. Pe a fananau mai ni tamaiti, o ia o le ulu o le aiga. Ae o le a lē afaina ai lana avā i lenei mea. Na i lo lea, o le a lelei lea mo ia ona o le a iai se tasi e lagolagoina o ia pe a faatinoina lana lava pule mai le Atua i luga o lana fanau.

8. O le ā le faatulagaga tauatua o mea ua faaauivi mai i le Tusi Paia?

⁸ E tusa ai ma le faatulagaga tauatua o mea, na tali fuaitau atu Atamu ia Ieova, o Eva sa i lalo o le tulaga ulu o Atamu, o fanau uma e i lalo o le faatonutonuga a o latou mātua, ma sa gauai atu meaola i le fanau a tagata. Sa maioio matafaioi na iai i le tamaloa ma le fafine, ma na la mafai taitoatasi ona ola i se olaga fiafia ma le fuatele mai. O lea, ‘na mafai ai ona faia mea uma ma le matagofie ma tusa ai ma faatulagaga.’—1 Korinito 11:3; 14:33, 40, faamatalaga pito i lalo.

Faauiese e le Agasala le Matafaioi a le Fafine

9, 10. O ā iʻuga o le paʻū atu i le agasala o le tamaloa ma le fafine, ma o le ā sa iʻu i ai lenei mea mo le toatele o fafine?

⁹ O le mea moni, sa faaleagaina lenei faatulagaga saʻo o mea ina ua ofi atu le agasala ma le lē lelei atoatoa i le uluai Parataiso. (Roma 7:14-20) Na aumai ai faigata mo le tamaloa fouvale ma lana avā lē usiusitai. (Kenese 3:16-19) Talu mai lena taimi, ua melea ai e le toatele o tamaloloa manatu faapito lo latou aiā tau tulaga ulu, ma aumaia ai le tele o mafatiaga i fafine i le gasologa mai o tausaga.

¹⁰ I le muai valoiaina o lenei taunuuga patino o le agasala, na fetalai atu ai Ieova ia Eva: “E uai atu lou manao i lau tane, e pule foi o ia ia te oe.” (Kenese 3:16) O lenei pule soonafai ua lē o se faatinoga tatau lena o le tulaga ulu. Ae ua atagia ai le tulaga agasala o le tamaloa ma le lē lelei atoatoa o le fafine, lea ua mafatia ai fafine i nisi taimi ona o lo latou taumafai e fāoa le pule a latou tane.

11. O le ā ua moni i le toatele o fafine, ma o le ā na tusia e se tasi tusitala e uiga i fafine i ona po o augātamā faatuatua?

¹¹ Peitai ona o le gauai i mataupu silisili o le Tusi Paia, ua maua ai e le toatele o fafine le lotomalie ma le fiafiaga. O le tulaga foi lenei sa iai i ona po o augātamā faatuatua. I lana tautalaga e uiga i lena vaitaimi i lana tusi La Bible au Féminin (Le Tusi Paia i le Ituaiga o Tamaitai), ua tusia faapea e le tusitala o Laure Aynard: “O le mea e patino ona matilatila i nei tala uma o le matafaioi tāua ua faatinoina e fafine, o lo latou tauagafau i le vaai a augātamā faatuatua, lo latou taulamua ma le loto tetele, ma le ituaiga o saolotoga sa latou ola ai.”

Fafine i le Tulafono a Mose

12, 13. (a) O le ā le tulaga o fafine i le Tulafono a Mose? (e) Sa faapefea ona manuia faaleagaga fafine i le Tulafono?

¹² E tusa ai ma tulafono a Ieova na tuuina mai e ala ia Mose, sa tatau ona ‘faapelepeleina’ avā. (Teuteronome 13:6) Sa tatau ona faaaloalogia le mamalu o avā i mataupu tau feusuaiga, ma sa leai se fafine e ao ona faataumaoia faaleituaiga. (Levitiko 18:8-19) I luma o le Tulafono sa tutusa tamaloloa ma fafine pe afai e agasala i le mulilua, feusuai ma tauaiga felataʻi po o manu. (Levitiko 18:6, 23; 20:10-12) Sa manaomia e le poloaiga lona lima ona tutusa le āva e avatu i le tamā ma le tinā.—Esoto 20:12.

¹³ I luga o na mea uma, sa saunia e le Tulafono se avanoa atoatoa mo fafine e atiina aʻe ai lo latou tulaga faaleagaga. Na latou maua aogā mai le faitauina o le Tulafono. (Iosua 8:35; Neemia 8:2, 3) Sa manaomia ona latou anaana i tausamiga faaletapuaiga. (Teuteronome 12:12, 18; 16:11, 14) Na latou auai i Sapati faalevaiaso ma na mafai ona latou faia tautoga faa-Naseri. (Esoto 20:8; Numera 6:2) Sa ia i latou se faiā totino ma Ieova ma tatalo atu taitoatasi ia te ia.—1 Samuelu 1:10.

14. O le ā na fai mai ai se tagata aʻoga Katoliko o le Tusi Paia e uiga i fafine Eperu, ma o le ā e ono taʻua e uiga i le matafaioi a fafine i le Tulafono?

¹⁴ E faatatau i fafine Eperu, na tusi mai se tagata aʻoga Katoliko o le Tusi Paia o Roland de Vaux: “O galuega mamafa uma lava i le aiga sa paʻū atu ia te ia; na te vaavaaia le lafu  mamoe, galue i le fanua, gasese le meaʻai, faia o suʻisuʻiga, ma isi mea. Peitai, e aliali mai o nei galuega fita, na i lo le tuua ai i lalo o lona tulaga, ua aloaia ai o ia. . . . Ma o itu na e seāseā tutupu ua aumaia ai ia i tatou sina ata puupuu i le felataʻi o le olaga faaleaiga, e faaalia ai sa alofagia se avā Isaraelu ma sa faalogo atu i ai lana tane, ma tausia o sē e tutusa ma ia. . . . Ma e leai se faaletonu o le tulaga masani lenei sa iai. Sa o se faailoaga faamaoni lea o le aʻoaʻoga ua taaofaia i le Kenese, lea na fetalai ai le Atua faapea na te foafoaina se fafine e fai ma fesoasoani mo le tamaloa, o lē sa ia lolo atu i ai (Kene. 2:18, 24); ma i le mataupu mulimuli o Faataoto o loo lagi faapese ai viiviiga mo se avā lelei, ua faafetai atu i ai lana fanau, ma o ia o se mitamitaga o lana tane (Faata 31:10-31).” (Ancient Israel—Its Life and Institutions) E lē tau fesiligia, ina ua tausia le Tulafono i Isaraelu, sa matuā lē afaina ai fafine.

Fafine Tulagaese

15. (a) Ua faapefea i le amio a Sara ona faataʻitaʻia ai se faiā lelei i le va o se tamaloa ma lana avā? (e) Aiseā e aogā ai ona matauina le tulaga o Raava?

¹⁵ O loo iai i Tusitusiga Eperu le tele o faaaʻoaʻoga o fafine o ē na avea ma auauna tulagaese a Ieova le Atua. Ua saunia e Sara se faataʻitaʻiga lelei o le auala e mafai ai e se fafine faaleatua ona gauai i taimi uma i lana tane ma fesoasoani ia te ia i le faia o faaiʻuga. (Kenese 21:9-13; 1 Peteru 3:5, 6) E aogā foi ona matauina le tulaga o Raava. Ua taʻu pepeloina ai le tuuaʻiga faapea o Ieova e faailoga lanu ma soona sauā i fafine. O Raava o se fafine talitane e lē o se Isaraelu. E lē gata sa talia o ia e Ieova o se tagata tapuai ae ona o le tele o lona faatuatua, lea sa lagolagoina e galuega e aofia ai se suiga i lona olaga, na taʻuamiotonuina ai o ia. I le faaopoopo atu i ai, sa tauia o ia i se faaeaga ua faamaonia e avea ma gafa o le Mesia.—Mataio 1:1, 5; Eperu 11:31; Iakopo 2:25.

16. O le ā ua faataʻitaʻi mai e le faaaʻoaʻoga a Apikaila, ma aiseā sa faamaonia ai le auala o lana gaoioiga?

¹⁶ Ina ia faataʻitaʻia faapea e lē manaomia e Ieova se avā e gauai tauaso i lana tane, o le tulaga o Apikaila. O lana tane o se tagata tamaoaiga, e iai ni ana lafu manu tetele o mamoe ma ʻoti. Ae sa “finauvale ia ma le leaga i ana mea e fai.” Na musu Apikaila e mulimuli i lana tane i lona ala leaga. I le faaalia o le faautauta, faaeteete, loto maulalo, ma le vave mafaufau, na ia taofia ai se tulaga na semanū e faatamaʻia ai lona auaiga, ma sa matuā faamanuiaina ai o ia e Ieova.—1 Samuelu 25:2-42.

17. (a) O ā faaeaga tulagaese sa maua e nisi fafine i Isaraelu? (e) O le ā le lesona ua iai i le faaaʻoaʻoga ia Miriama mo fafine Kerisiano o ē atonu e avatu i ai nisi o faaeaga o le auaunaga?

¹⁷ E toaitiiti foi ni fafine sa fai ma perofeta. E pei o le tulaga o Tepora, i le taimi o Faamasino. (Faamasino, mataupu 4 ma le 5) Sa avea Ulata ma perofeta fafine i Iuta, a o toeitiiti lava oo i le faaumatiaga o Ierusalema. (2 Tupu 22:14-20) E aogā foi ona matau le tulaga o Miriama. E ui ina taʻua o ia o se perofeta fafine na auina mai e Ieova, ae i se tasi itu, e aliali mai sa faamaualuga o ia i lenei faaeaga. Sa lē taulau ona ia amanaia le pule a Ieova na tuu atu i lona tuagane laitiiti o Mose e taʻitaʻia Isaraelu, ma sa faasalaina o ia ona o lena, e ui ina sa salamō ma faamalōlōina mulimuli ane.—Esoto 15:20, 21; Numera 12:1-15; Mika 6:4.

Fafine i le Faa-Iutaia

18, 19. O le ā le tulaga sa i fafine i le faa-Iutaia, ma na faapefea ona oo mai lenei tulaga?

¹⁸ E pei ona tatou matauina, sa puipuia e le Tulafono a Mose aiā a fafine, ma ina ua mulimuli ai, na faataga ai fafine ina ia maua ni olaga faamalieina. Ae a o mou atu le taimi, ae maise lava ina ua maeʻa le faaumatiaga o Ierusalema i le 607 T.L.M., sa tuputupu aʻe ai i inā le lotu faa-Iutaia, lea sa tele ina faavae i uputuu tuugutu na i lo o le Tulafono tusia a Ieova. Mai le senituri lona fa T.L.M. ma faasolo mai ai, sa faaaogā ai e le faa-Iutaia le tele o filosofia Eleni. I le tele lava o taimi e faaleamanaia ai e faifilosofia Eleni aiā a fafine, o i inā la na mafua ai se paʻū tali tutusa i tulaga o fafine i totonu o le faa-Iutaia. Mai le  senituri lona tolu T.L.M., sa amata ai ona vavae ese fafine mai tamaloloa i sunako o Iutaia ma faavaivai ai mai le faitauina o le Torah (Tulafono a Mose). Ua faailoa mai e le Encyclopaedia Judaica: “O le iʻuga e toaitiiti lava fafine sa aʻoaʻoina.” Sa matele lava aʻoaʻoga i tama.

¹⁹ Ua tusia e J. Jeremias, i lana tusi Jerusalem in the Time of Jesus: “I le aotelega, o le tulaga o fafine i aiaiga faaletulafono a lotu ua sili ona faamatalaina i le faiga lenei ua faalausosoo pea: ‘O fafine, pologa (Nuu Ese) ma tamaiti.’ . . . E mafai ona tatou faaopoopo atu i nei mea uma faapea e anoanoai manatu faatauvaa sa faaalia i fafine. . . . Ua tatou iloa ai la faapea sa iai foi i le faa-Iutaia i ona po o Iesu se manatu maulalo e uiga i fafine.”

Fafine Faamaoni o Ē sa Faatalitalia le Mesia

20, 21. (a) E ui i se uiga manatu faatauvaa o taʻitaʻi lotu Iutaia agaʻi i fafine, ae o ai sa auai ia i latou na mataalia a o latalata mai le taimi o le Mesia? (e) O le ā ua faaalia ai sa iai ia Elisapeta ma Maria se tuutoina loloto faaleatua?

²⁰ O lenei uiga manatu faatauvaa agaʻi i fafine o se tasi lea o auala sa ‘faaleaogāina ai e aʻoaʻo Iutaia le afioga a le Atua i a latou uputuu.’ (Mareko 7:13) Peitai e ui i lenei lē faaaloalo, ae ina ua oo i le taimi e afio mai ai le Mesia, sa mataalia pea nisi o fafine faaleatua e vaavaai totoʻa. O se tasi o i latou ia o Elisapeta, le avā a le faitaulaga sa Levī o Sakaria. Sa “amiotonu i laua [ma lana tane] i luma o le Atua, o savavali i poloaiga ma tulafono uma a [Ieova] e le mataʻuleagaina.” (Luka 1:5, 6) Sa alofagia e Ieova Elisapeta, o lea e ui ina pā e lē fanau ma ua loomatua foi, ae na avea o ia ma tinā o Ioane le Papatiso.—Luka 1:7, 13.

²¹ E ala i le uunaiga a le agaga paia, na faaalia ai e Elisapeta le alofa loloto mo se isi foi fafine faaleatua o ona aso, o sē la te aiga e igoa ia Maria. Ina ua, pe tusa o le faaiʻuga o le 3 T.L.M., na faailoa ane ai e le agelu o Kaperielu ia Maria faapea o le a ia afuafuaina faavavega se tama (o Iesu), sa ia taʻua o ia o “Le ua alofaina,” ma faaopoopo atu: “ua ia te oe [Ieova].” A o leʻi leva ona asiasi atu Maria ia Elisapeta, o lē na ia faamanuia ia te ia ma le tama sa ia tauaveina e leʻi fanau mai, na ia taʻua ai Iesu o lona “Alii” e oo lava a o leʻi fanau mai. O lea, na alaga ai Maria i se faaleoga o le viiga ia Ieova o lē na molimauina le faamaoniga aʻiaʻi o le loloto o lona tuutoina faaleatua.—Luka 1:28, 31, 36-55.

22. Ina ua mavae le fanau mai o Iesu, o ai le fafine mataʻu i le Atua na faaalia faapea sa auai o ia ia i latou na faatalitalia le Mesia?

²² Ina ua fanau mai Iesu ma aumaia o ia e Maria i le malumalu i Ierusalema ina ia foai atu ia Ieova, sa faaalia e se isi fafine mataʻu i le Atua, le perofeta fafine ua aumatuā o Ana, lona olioli. Na ia faafoi atu le faafetai ia Ieova ma taʻutaʻu atu e uiga ia Iesu i ē uma sa faatalitali ma le naunau atu i le Mesia folafolaina.—Luka 2:36-38.

23. Ua tautala faapefea le aposetolo o Peteru e uiga i fafine faamaoni i tua atu o Kerisiano, ma o ā fesili o le a iloiloina i le mataupu o loo sosoo ai?

²³ O lea, ina ua oo mai i le taimi mo le faiva faalelalolagi a Iesu, sa iai pea lava “fafine paia . . . o ē na faamoemoe i le Atua.” (1 Peteru 3:5) Na oo ina avea nisi o ia fafine ma soʻo o Keriso. Sa faapefea ona taulima i latou e Iesu? Ma o iai ea ni fafine i aso nei o ē talia ma le fiafia la latou matafaioi e pei ona faaauivi mai i le Tusi Paia? O na fesili o le a iloiloina i le mataupu o loo mulimuli mai.

[Faaopoopoga i lalo]

Fesili mo le Autaluga

□ Sa faapefea ona ese le taulimaina o fafine i Isaraelu ma isi atunuu?

□ O ā tulaga sa tutusa ai Atamu ma Eva, ma aiseā?

□ O le ā le tulaga sa iai fafine Isaraelu i le Tulafono, ma pe sa faaletonu ai ea lo latou itu faaleagaga?

□ O ā nisi o lesona e ao ona aʻoaʻoina mai i olaga o fafine tulagaese i Tusitusiga Eperu?

□ O ā faaaʻoaʻoga lelei o le faatuatua e mafai ona maua e ui lava i ni manatu faa-Iutaia?

[Fesili mo le Suʻesuʻega]

[Pusa i le itulau 10]

“LE FAFINE E MATAʻU IA IEOVA”

“10 O le avā [agavaa], o ai ea se ua maua? e silisili lona tau i penina. 11 Ua faatuatua ia te ia le loto o lana tane; e le mativa o ia i oloa. 12 E agalelei o ia ia te ia, a e le agaleaga i aso uma o lona olaga. 13 Na te sailia fulufulu mamoe ma lino; ua galue ai ona lima ma le fiafia. 14 E tusa o ia ma vaa o le faatauoa; e mamao le mea e au mai ai ana mea e ʻai. 15 E tulai foi o ia, a o po lava, ma avatu mea e ʻai i lona aiga, ma le galuega ua tofia i ana auauna teine. 16 Ua manatunatu o ia i se fanua, ona maua ai lea e ia; o le fua o ona lava lima ua ia fai ai le tovine. 17 Na te fusia lona sulugatiti i le malosi; na te faamalosia ona lava lima. 18 Ua iloa e ia ua lelei lana tau; e le mate lana lamepa i le po. 19 Ua tuu atu e ia ona lima i le kisuro, ma ua tago atu ona lima i le peleke. 20 Ua faamafola lona lima i le ua tigaina; ua tuu atu foi ona lima i le ua mativa. 21 E le fefe o ia ona o lona aiga i le kiona; auā ua oofu lona aiga uma i ofu mūmū. 22 Ua fai ie afu mona; o le ie vavae ma le ie pāuli, o ona ofu ia. 23 Ua iloga lana tane i faitotoa, pe a saofai o ia faatasi ma toeaina o le nuu. 24 Ua fai e ia le ofu lino, ma faatau ai; ua avatu foi fusi i le faatauoa. 25 O le malosi ma le mamalu e fai mona ofu ia; ua ʻataʻata foi o ia i aso o lumanai. 26 Ua tautala o ia ma le poto; ua i lona laulaufaiva le tulafono o le alofa. 27 Ua vaavaai o ia i amioga a lona aiga; e le ʻai foi o ia mea e ʻai a le paie. 28 E tulai mai lana fanau, ma faafetai ia te ia; o lana tane foi ua vivii ia te ia. 29 E toatele fafine e [agavaa] i latou; a o oe, ua faasilisili oe ia i latou uma. 30 O le matagofie e pepelo lea, o le mea faatauvaa le lalelei; a o le fafine ua mataʻu ia Ieova, e viia lava o ia. 31 Avatu ia te ia le fua o ona lima; o ana galuega foi e viia ai o ia i faitotoa.”—Faataoto 31:10-31.

[Ata i le itulau 8, 9]

Sa faaaloalogia le tulaga o le fafine i le aiga