Lipoti a Ē Faalauiloa le Malo

Sa Latou Faalagolago ia Ieova

UA POLOAIINA e Ieova Molimau a Ieova ina ia talaʻi le tala lelei o le Malo i le lalolagi uma lava ina ia maua ai e tagata o atunuu uma se avanoa e iloa ai e uiga i le lalolagi fou a le Atua. I nisi o atunuu, e masani lava ona o uunaiga a taʻitaʻi lotu o Kerisinetoma, e faasaina ai la tatou galuega. O le tulaga lena na tupu i se tasi o atunuu i Aferika. Ae na faia e Molimau a Ieova i inā e pei ona faia e le Tupu o Tavita. Na ia faapea mai: “Ua ou [faalagolago] i le Atua; ou te le fefe.” (Salamo 56:11) O mea na tutupu i o tatou uso i lena atunuu ua faaalia ai lo latou faalagolago ia Ieova ma faaauau ai i lana galuega tāua.

O se Molimau sa galue o se uluaʻoga i se aʻoga sa tausisi pea e usiusitai i “le Atua o le pule na i lo tagata,” i le folafola atu o lona solitu agaʻi i mataupu a le Setete. (Galuega 5:29) Sa matuā fasi leaga o ia ma faatalitalia e faamasinoina e pei o se tagata faalata. Sa manatu tagata uma lava faapea o le a fasiotia o ia. Ae peitai, sa faalagolago le Molimau ia Ieova. Sa tumau pea ma le faamaoni ma faamatala atu mafuaaga tonu lava mo lona tulaga. O le iʻuga? Sa toe faasilasila mai lona lē agasala, ma na toe foi atu ai loa i lona nuu moni, o inā na toe faatoese ane ai ia te ia sui o le Setete o ē na latou fasia o ia. Sa toe avatu lenei Molimau faamaoni i le galuega o le faiaʻoga ma na siitia o ia e avea ma asiasi aʻoga!

Na faateʻa e le pule o le tasi aʻoga se faiaʻoga o se Molimau. I se masina mulimuli ane, na talia ai e lenei pule aʻoga le tusi E Mafai ona E Ola e Faavavau i Parataiso i Le Lalolagi mai se paeonia faapito ma na ioe i le faia o se suesuega faale-Tusi Paia. Ina ua uma le mataupu lona ono, ona faamavae loa lea o ia mai le tulaga o le pule o le aʻoga, ma na amata ai loa e ia ma lana avā ona auai i sauniga uma lava a Molimau a Ieova. I le taeao o le tasi Aso Sa sa faateʻia ma le fiafia le faiaʻoga lea na faateʻaina e feiloai atu i le tamaloa o lē na faateʻaina o ia ma iloa ai ua iai o ia i le auala e avea ai o se uso faaleagaga.

O se tasi foi o mea na tupu mai le atunuu lava lea na faaatagia ai le auala na totō mau ai e Molimau a Ieova le faaaloalo mo faatulagaga a Ieova ma galulue ina ia tausia le mamā o le faalapotopotoga. O se paeonia faapito sa galueaiina se oganuu tūese sa oo i le tele o teteega. Talu ai ona o ia e mai i le isi ituaiga ma e ese foi le itu o le atunuu e sau ai, na mananao ai fili o le upu moni e tuli ese o ia mai le nuu. Ae peitai, sa faasino atu e le alii o le nuu i lana amio lelei ma iʻuga matagofie o lana faiva ma ua lē faatagaina ai le tuliesea o ia. Sa matauina e le alii o le nuu faapea, talu lava ona taunuu atu le paeonia faapito lea, sa faaalia ai e tagata le āva i pulega a faipule silisili e ala i le totogia o a latou lafoga ma faia le galuega faalenuu i le faaleleia o auala e faatasi i le vaiaso.—Roma 13:1, 7.

Ona oo lea i le isi po, na maua ai se tasi Molimau ua faia le mulilua ma se fafine e lē se Molimau. O i inā na tupu ai se vevesi, ma na valaaulia ai le paeonia faapito i luma o le alii o le nuu, o lē na otegia leaga o ia, i le faapea atu: “O lou uso lea na maua o fai le mulilua. E leai lava se mea e ese ai outou Molimau a Ieova mai isi lotu.” Ae peitai sa faamalamalama atu i ai e le paeonia faapito e faapea: “E ui lava e lē lelei atoatoa, ae e ese lava i matou mai isi lotu auā matou te lē faamagaloina gaoioiga a i latou o ē faia agasala mamafa.”

O le Molimau o lē na faia le mulilua na faasalaina i le fale puipui ma totogi se sala tupe. E lē gata i lea, sa faateʻaina ese o ia mai le faapotopotoga i le avea o se tagata fai mea sese lē salamō. O lenei gaoioiga na maofa ai le alii ma tapunia ai gutu o i latou o ē na faatauemu i Molimau a Ieova. Na faapea mai le alii o le nuu: “Aua le tautala i mea leaga e uiga i Molimau a Ieova. O loo ia i latou le upu moni. O gaoioiga faapena e lē o faia e isi lotu.”

O loo mulimuli Molimau faamaoni i lena atunuu i le apoapoaiga a le Salamo 37:3: “Ia e [faalagolago] ia Ieova, ma e faia amio lelei; ia e nofo i le nuu, ma tausisi i le faamaoni.” Pe o le a tatou faalagolago ia Ieova e pei ona faia e nei Kerisiano?