Faafiafia Ieova e Ala i le Faaalia o le Mataalofa
Faafiafia Ieova e Ala i le Faaalia o le Mataalofa
“Se a foi se mea e finagalo ai Ieova ia te oe, pe a le o ia mea, ia fai le amiotonu, ia naunau i le [mataalofa], ma ia feooai ma lou Atua ma le loto faamaulalo?”—MIKA 6:8.
1. Aiseā e lē ao ai ona tatou ofo ona o loo faatalitalia e Ieova ona tagata e faaalia le mataalofa?
UA FAATALITALIA e Ieova ona tagata ia faaalia le mataalofa. E lē tatau ona tatou ofo i lenei mea. O loo mataalofa mai le Atua lava ia i tagata uma, e oo foi i tagata amioleaga e lē loto faafetai. I lenei itu na fetalai atu ai Iesu Keriso i ona soʻo: “Ia outou alolofa atu i e o fai outou mo latou fili, ma ia agalelei atu, ma ia avatu tupe e nonoina, aua le faamoemoe i se mea e tasi e au mai; e tele ai so outou totogi, e avea foi outou ma fanau a le Silisili ese; auā o ia le agamalu i e agavale, atoa ma e amio leaga. O lenei, ia mutimuti vale lo outou alofa, pei ona alofa mutimuti vale o lo outou Tamā.”—Luka 6:35, 36.
2. O ā fesili e uiga i le mataalofa e tatau ona tatou iloiloina?
2 E pei ona folafola mai e le Mika 6:8, o i latou e feoai ma le Atua e tatau moni lava ona “naunau i le mataalofa.” E manino mai ai, e fiafia Ieova pe a naunau ana auauna i le mataalofa ma faaalia lea i se auala e sau mai le loto. Ae o le ā le mataalofa? O ā ni aogā e maua mai lona folasiaina? Ma e mafai faapefea ona folasia lenei uiga?
Le Uiga o le Mataalofa
3. E faapefea ona e faauigaina le mataalofa?
3 O le mataalofa o le faaalia lea o le naunau fiafia i isi. E folasia lea i gaoioiga fia fesoasoani ma upu magafagafa. Ina ia mataalofa o lona uiga ia faia mea lelei na i lo o mea e faaleagaina ai. O se tagata e mataalofa e faaleuo, agamalu, tigā alofa, ma alofa fua. E ia te ia le uiga matamau, ma magafagafa agaʻi i isi. Ma o le mataalofa o se tasi lea o vaega o le ofu faafaatusa o Kerisiano moni uma lava, auā na timaʻi mai Paulo: “Ia oofu outou i le alofa mutimuti vale, ma le mataalofa, ma le loto maulalo, ma le agamalu, ma le onosai.”—Kolose 3:12.
4. Ua faapefea ona taulamua Ieova i le faaalia o le mataalofa i le fanau a tagata?
4 Ua taulamua Ieova i le faaalia o le mataalofa. E pei ona faapea mai le aposetolo o Paulo, a “ua faaalia mai le [mataalofa] ma le alofa i tagata [e] lo tatou Faaola le Atua, ona faaola mai ai lea o ia ia i tatou, e le ona o galuega o i le amiotonu sa tatou faia, a e tusa ma lona lava alofa i le faataeleina i le toefuataiina ma le faafouina e le Agaga Paia.” (Tito 3:4, 5) Ua faamamāina, pe “faataeleina” e le Atua, Kerisiano faauuina i le toto o Iesu, i le faatatauina o le aogā o le taulaga togiola a Keriso mo i latou. Ua faafouina foi i latou e ala i le agaga paia, ma avea ai ‘o se foafoaga fou’ o ni atalii fanauagagaina o le Atua. (2 Korinito 5:17) O le mea moni, ua faasalafa atu foi le mataalofa ma le alofa o le Atua i tagata i se “motu o tagata e toatele” faavaomalo, o ē “ua ta foi o latou ofu, ma ua faasinasinaina o latou ofu i le toto o le Tamai mamoe.” (Faaaliga 7:9, 14; 1 Ioane 2:1, 2) E lē gata i lea, ua iai uma ē faauuina ma le motu o tagata e toatele o ē ua faamoemoe e ola i luga o le lalolagi, i lalo o le amo ‘mataalofa’ a Iesu.—Mataio 11:30.
5. Aiseā e ao ai ona tatou faatalitalia i latou o loo taʻitaʻia e le agaga o le Atua e faaalia le mataalofa i isi?
5 O le mataalofa o se vaega foi lea o fua o le agaga paia, po o le malosi galue o le Atua. Na faapea mai Paulo: “A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā; e le faatulafonoina mea faapena.” (Kalatia 5:22, 23) O lea, o le ā e ao ona tatou faatalitalia mai ia i latou o ē taʻitaʻia e le agaga o le Atua? E mautinoa, o le a latou faaalia le mataalofa i isi.
6. E ao i le mataalofa ona faapogaia toeaina ma isi Kerisiano e gaoioi i le ā le auala?
6 E mafai ona faaalia le mataalofa i le tele o auala. Tatou te folasia le mataalofa pe a tatou alolofa mutimutivale. Mo se faaaʻoaʻoga, e mataalofa toeaina Kerisiano pe a latou faasalafa atu le alofa mutimutivale i sē e amioleaga ua salamō ma saili e fesoasoani faaleagaga ia te ia. O lenei uiga mai le Atua o le mataalofa, ua faapogaia ai ovasia ina ia onosai, magafagafa, tigāalofa, ma agamalu. Ua uunaia ai i latou e ‘tausia le lafu ma le loto alofa.’ (Galuega 20:28, 29) O le mea moni, e ao i le fua o le agaga o le mataalofa ona faapogaia ai Kerisiano uma lava ia alolofa mutimutivale, onosai, magafagafa, tigāalofa, faaleuo, ma limafoai.
Alofia le Faatagā Mataalofa
7. Aiseā o le a e fai mai ai o se vaivaiga le faatagā mataalofa?
7 O nisi tagata e manatu i le mataalofa o se vaivaiga. Ua ia i latou le lagona faapea e tatau i se tagata ona lotomaaa, e oo foi ina lē migao, i nisi taimi, ina ia ofo ai isi i lona malosi. Peitai ua loa lava ona talagū faapea o le “lē migao o se faatusa lena o le malosi o se tagata vaivai.” O le mea moni lava la, e alu ai le malosi aʻiaʻi ina ia mataalofa moni ma ia alofia ai le faatagā mataalofa. O le mataalofa lea e avea ma fua o le agaga o le Atua e lē o se uiga vaivai, e lolo gofie i le amioleaga. Na i lo lena, o le faatagā mataalofa o se vaivaiga lea e faapogaia ai se tasi e faia le amioleaga.
8. (a) Sa faapefea ona faamaonia le faatalalē o Eli e uiga i ona atalii? (e) Aiseā e tatau ai i toeaina ona leoleo faasaga i le lolo atu i le faatagā mataalofa?
8 Sa faatalalē le faitaulaga sili o Isaraelu o Eli i le aʻoaʻia o ona atalii, o Hofeni ma Fineaso, o ē na tofia o ni faitaulaga i le fale fetafai. Ina ua lē faamalieina i le vaega o le taulaga na tuu atu mo i laua e le Tulafono a le Atua, sa la faatonuina ai se auauna e aumaia faamalosi se tufaaga mata mai sē e ana le taulaga a o leʻi faamuina le gaʻo o le taulaga i luga o le fata faitaulaga. Sa auai foi atalii o Eli i feusuaiga faaleituaiga lē mamā ma fafine na auauna i le faitotoa o le fale fetafai. Peitai, na i lo le tutuli esea o Hofeni ma Fineaso mai o la tofiga, sa na ona aʻoaʻia lemū i laʻua e Eli, ma faasilia ai lona āva i ona atalii na i lo le Atua. (1 Samuelu 2:12-29) E lē tioa la “le faaalia mai soo” le afioga a Ieova i na aso! (1 Samuelu 3:1) O lea e lē tatau i toeaina Kerisiano ona tosina atu i manatu sese po o le faaalia o le faatagā mataalofa e ono mafai ai ona lamatia le tulaga faaleagaga o le faapotopotoga. E lē tauaso le mataalofa moni i upu ma gaoioiga faatiapolo e solia ai tapulaa a le Atua.
9. (a) O le ā le uiga e mafai ona fesoasoani ia i tatou e alofia ai le lolo atu i le faatagā mataalofa? (e) Sa faaalia faapefea e Iesu le malosi i le faafoeina o aposetate mapo lotu?
9 Ina ia tatou alofia le faaalia o le faatagā mataalofa, e tatau ona tatou tatalo mo le fesoasoani a le Atua ina ia maua lena malosi e pei ona faailoa mai i upu a le faisalamo: “O ese ia ia te au, outou o e amio leaga; auā ou te anaana lava i poloaiga a loʻu Atua.” (Salamo 119:115) E manaomia foi ona tatou mulimuli i le faaaʻoaʻoga a Iesu Keriso, o lē sa lē taitai agasala i le faaalia o le faatagā mataalofa. O le mea moni, na avea Iesu ma faaaʻoaʻoga aupito sili o le mataalofa moni. Mo se faataʻitaʻiga, ‘sa mutimutivale lona alofa mo tagata ona ua lailoa i latou ma tuulafoaiina e pei o mamoe e leai so latou taʻitaʻi.’ O le mea lea, na saoloto ai ē loto faamaoni e faalatalata atu ia Iesu, ua aumaia foi a latou fanau iti ia te ia. Ma tau a ina manatunatu i le mataalofa ma le tigāalofa na ia faaalia ina ua “siitia . . . e ia o i latou i ona lima, . . . ma faamanuia ia te i latou.” (Mataio 9:36; Mareko 10:13-16) E ui ina mataalofa Iesu, peitai sa tumau o ia i le mea na tonu i le silafaga a lona Tamā faalelagi. Sa lē taitai ona faia e Iesu se mea leaga; na ia te ia le malosi mai le Atua e taʻusalaina ai taʻitaʻi lotu faagutugutulua. I le Mataio 23:13-26, na ia toe taʻua ai foi i nisi taimi le faasalaga: “Oi talofa ia te outou tusiupu ma faresaio, tagata pepelo!” I nā foi taimi taitasi, na avatu ai e Iesu mafuaaga mo le faamasinoga tauatua.
Fesootai le Mataalofa ma le Alofa
10. Ua faapefea ona faaalia e soʻo o Iesu le mataalofa ma le alofa i uso talitonu?
10 Na fetalai Iesu e faatatau i ona soʻo: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) Ma o le ā se tasi o vala o le alofa e mataulia ai soʻo moni o Iesu? Ua faapea mai Paulo: ‘E onosai ma mataalofa le alofa.’ (1 Korinito 13:4) O le onosai ma le mataalofa o lona uiga ia tatou lavatia tulaga lē lelei atoatoa ma masei o isi, e pei foi ona folasia ma le mataalofa e Ieova. (Salamo 103:10-14; Roma 2:4; 2 Peteru 3:9, 15) E faaalia foi e le alofa ma le mataalofa faa-Kerisiano i laʻua lava i le taimi e oo ai faigata i uso talitonu i so o se mea i le lalolagi. I le tali atu e sili mamao aʻe i lo le ‘mataalofa faaletagata,’ ua faaalia ai e Kerisiano i so o se mea le alofa faaleuso e ala i le foai ane o mea faitino e fesoasoani i na tagata tapuai o Ieova.—Galuega 28:2.
11. O le ā le alofa (loving-kindness), e tusa ma le Tusi Paia?
11 E fesootai le mataalofa ma le alofa i le upu “alofa,” (loving-kindness) lea ua masani ona faaaogā i le Tusi Paia. O le mataalofa lenei e tupuga mai i le alofa faamaoni. O le nauna faa-Eperu ua faaliliuina “alofa” (cheʹsedh) e aofia ai e sili atu na i lo o alofaaga mālū. O le mataalofa e na te faapipiia ma le alofa ia lava i se mea seia oo ina iloatino lona fuafuaga e fesootai i ai. E matalasi auala ua faaalia ai le alofa, po o le alofa faamaoni o Ieova. Mo se faataʻitaʻiga, ua faaalia lea i ana gaoioiga tau laveaiga ma le puipuiga.—Salamo 6:4; 40:11; 143:12.
12. A tatalo auauna a Ieova mo se fesoasoani po o se laveaiga, o le ā e mafai ona latou mautinoa?
12 E lē tioa la ona tosina atu e le alofa o Ieova tagata ia te ia! (Ieremia 31:3) A manaomia e auauna faamaoni a le Atua se laveaiga po o se fesoasoani, latou te iloa faapea o lona alofa e mautinoa o se alofa faamaoni, lea o le a lē mafai ona lē faataulauina ia i latou. I lea, ua mafai ai ona latou tatalo ma le faatuatua, e pei ona faia e le faisalamo o lē na faapea mai: “A o aʻu nei, ou te faatuatua i lou alofa, e fiafia loʻu loto i lau faaolataga.” (Salamo 13:5) Talu ai e faamaoni le alofa o le Atua, e lē talitonu ai la ana auauna faapea o se ʻai a le matagi lona alofa. Pe a latou tatalo mo se fesoasoani po o se laveaiga, ua ia i latou lenei faamautinoaga: “Auā e le tuuna e Ieova lona nuu, na te le tuulafoaiina foi lona tofi.”—Salamo 94:14.
Taui o le Mataalofa
13, 14. Aiseā e maua ai e le tagata mataalofa uo faamaoni?
13 I le faataʻitaʻi ia Ieova, ua faaauau ai e ana auauna ona “agalelei ma alofa o le tasi i le tasi.” (Sakaria 7:9; Efeso 5:1) “O le mea e manaomia i le tagata, o lona alofa,” ma o se tagata e faaalia lenei uiga na te seleseleina mai taui faaʻoaina. (Faataoto 19:22) O ā nisi o ia taui?
14 Ua faapogaia e le mataalofa i tatou ia faautauta ma fesoasoani ia i tatou e faatumauina se faiā lelei ma isi. O le tagata faautauta e tautala o ia ma faatinoina mea pe taulimaina tulaga faigata i ni auala magafagafa ma le toʻafilemu. A o mafatia le “tagata sauā” ona ua faaesea e ana uo, ae “o le tagata alofa ua agalelei o ia ia te ia lava.” (Faataoto 11:17) E aloalo ese tagata mai le tagata sauā ae tosina atu i lē na te faaalia ia i latou le alofa. O lea, o se tagata mataalofa na te maua uo faamaoni.—Faataoto 18:24.
15. O ā iʻuga e mafai ona oo i se aiga e eseese tapuaiga ona o le mataalofa?
15 Atonu e mafai e se avā Kerisiano e iai sana paaga lē talitonu ona tosina maia o ia i le upu moni a le Atua e ala i sea uiga e pei o le mataalofa. A o leʻi aʻoaʻoina e le fafine le upu moni ma faaofuina i “le tagata fou ua faia e foliga i le Atua, i le amiotonu ma le amio lelei e faamaoni,” atonu sa agaleaga, pe faamisa foi o ia. (Efeso 4:24) Afai la sa iloa e lana tane nisi o faataoto, atonu o le a ia ioe ai faapea ‘o faamisa foi a le avā e pei o le tutulu o le fale, e tuliesea ai se tasi’ ma “e lelei ona nofo i le vao, a e leaga ona nofo ma le fafine faamisa ma le faaitaitagofie.” (Faataoto 19:13; 21:19) Ae o le amio mamā ma le faaaloalo loloto a se avā Kerisiano, faatasi ma na uiga e pei o le mataalofa, atonu o le a fesoasoani e manumalo ai i lana paaga e aumai i le faatuatuaga moni. (1 Peteru 3:1, 2) Ioe, atonu o se tasi lea o taui mo lona mataalofa.
16. E mafai faapefea ona aogā ia i tatou le mataalofa ua faaalia ia i tatou?
16 Atonu e mafai ona aogā le mataalofa ua faaalia ia i tatou e faapogaia ai i tatou ia atili ona tigāalofa ma loto faamagalo. Mo se faaaʻoaʻoga, afai sa tatou manaomia se fesoasoani faaleagaga ma na faafoeina i se auala mataalofa ma le agamalu, pe o le a lē uunaia ai ea i tatou e lena mea ia lolo atu atili e feutagai ma isi i se auala faapena? Ioe, e mafai ona faatalitalia mai tane agavaa faaleagaga se tausiga mataalofa ma le agamalu, auā na tusia e Paulo: “Le au uso e, afai e maua se tagata i se tasi agasala, o outou o i la le Agaga ia outou faafoi mai le ua faapeaina ma le loto o le agamalu, ma ia faaeteete oe ina neʻi faaosoosoina foi oe.” (Kalatia 6:1) E tautatala toeaina tofia i le agamalu ma le mataalofa pe a latou saili e fesoasoani i uso talitonu ua sese. Peitai, pe tatou te maua totino sea fesoasoani mataalofa pe leai, o le ā ua faatalitalia e le Atua mai ia i latou uma o loo auauna atu ia te ia? E ao i Kerisiano uma ona faaalia le mataalofa i isi ma e ao ona utagia le fautuaga a Paulo: “Ia outou feagaleleiai, ia femutimutivaleai lo outou alofa, ia fefaamagaloai outou, faapei ona faamagaloina outou e le Atua ia Keriso.” (Efeso 4:32) O le mea moni, afai ua faamagaloina i tatou e se tasi pe na fesoasoania foi i tatou mai se tulaga faigata faaleagaga i se auala mataalofa, e ao i lenei mea ona faateleina ai lo tatou lava malosi e faamagalo atu, tigāalofa, ma mataalofa.
Talisapaia le Alofa Tunoa o le Atua
17. Ona o i tatou o ni ē agasala talu ona fananau mai, o le ā le mataalofa e ao ona tatou faafetaia faapitoa?
17 Ona o i tatou uma lava na fananau mai o ni ē agasala ua taʻusalaina i le oti, o loo iai la se mataalofa e manaomia ona tatou faafetaia faapitoa lava. O le alofa tunoa lea o Ieova le Atua. Ina ia faasaolotoina ē agasala mai le taʻusalaina i le oti ma ia taʻuamiotonuina, o se mataalofa lea e faifua atoatoa. Na taʻu atu e Paulo i Kerisiano i Roma anamua, o lē na taʻua faa 90 le alofa tunoa o le Atua i ana tusi faagaeeina tauatua e 14: “Ua agasala tagata uma lava, ma ua le oo i le viiga mai le Atua; ua taʻuamiotonuina fua i lona alofa tunoa i le togiola e a Keriso Iesu.” (Roma 3:23, 24) Maeu le tatau ona tatou talisapaia o le alofa tunoa na faaalia e Ieova le Atua!
18, 19. E mafai faapefea ona tatou alofia le misia o le fuafuaga o le alofa tunoa o le Atua?
18 E mafai ona tatou misia le fuafuaga o le alofa tunoa o le Atua, e ala i le lē talisapaia. Na faapea mai Paulo e uiga i lenei itu: “O lenei, o sāvali i matou a Keriso, peiseai ua aioi mai le Atua ia te outou e [ala ia i] matou; matou te ole atu, o sui i matou o Keriso, ia outou lelei ma le Atua. Auā o ia na le iloa le agasala, na faia lea e ia ma agasala, o le sui o i tatou; ina ia avea i tatou ma amiotonu a le Atua ia te ia. O lenei foi, o i matou o faigaluega faatasi ma ia, ua matou aioi atu ia te outou, ina neʻi talia fua e outou le alofa tunoa o le Atua [ma misia ai lona fuafuaga]. (Auā ua faapea mai o ia [i le Isaia 49:8, Septuagint], O le tausaga e talia ai na ou faalogo ai ia te oe, o le aso foi e faaolaina ai na ou fesoasoani ai ia te oe. Faauta, o lenei le tausaga e talileleia mai ai; faauta, o lenei le aso e faaolaina ai.) Ua matou le tuuina atu se mea e tasi e tausuai ai, ina neʻi taʻuleagaina le galuega; a o mea uma lava ua faailoa ai i matou o auauna a le Atua i matou.” (2 Korinito 5:20–6:4) O le ā sa manatunatu i ai Paulo?
19 Ua avea Kerisiano faauuina ma sāvali e fai ma sui o Keriso, ae o le motu o tagata e toatele o ana ave feau. Latou te uunaia faatasi tagata e toe faalelei ma le Atua ina ia maua ai le faaolataga. Sa lē manao Paulo i so o se tasi na te maua le alofa tunoa o Ieova le Atua e ala ia Iesu Keriso ae misia ai lona fuafuaga. E ono mafai ona tupu lena mea ia i tatou pe afai e lē taulau ona tatou faia le galuega ua tuuina mai e lena alofa tunoa tatou te faia. I le iai i aiaiga faaleuo ma le Atua o ni ē ua faalelei ma ia, tatou te lē maua fua ai lona alofa tunoa pe afai tatou te faataunuuina ‘le galuega o le leleiga, o lona uiga, na osia e le Atua se leleiga ma le lalolagi e ala ia Keriso.’ (2 Korinito 5:18, 19) E mafai foi ona tatou faaalia i isi le mataalofa silisili e ala i le fesoasoani ia i latou ina ia faalelei ma le Atua.
20. O le ā e sosoo ai ona tatou iloiloina?
20 Ua faaaogā e auauna a Ieova lo latou taimi ma mea totino i galuega o le mataalofa pe a latou saili e fesoasoani faaleagaga i tagata e ala i le faiva faa-Kerisiano. Peitai o le ā e mafai ona tatou aʻoaʻoina mai faaaʻoaʻoga faale-Tusi Paia o le faatinoina o le mataalofa? Seʻi o tatou suesueina nisi o ia faaaʻoaʻoga ma iloiloina isi auala e faafiafia ai Ieova i le faaalia o le mataalofa, i le mataupu e sosoo ai.
O le a Faapefea ona E Tali?
□ O le ā le mataalofa?
□ E mafai faapefea ona tatou alofia le lolo atu i le faatagā mataalofa?
□ Aiseā e mafai ai ona talitonu tagata o Ieova i lona alofa (loving-kindness)?
□ O ā nisi o taui o le mataalofa?
□ I le faia o le ā o le a tatou lē misia ai le fuafuaga o le alofa tunoa o le Atua?
[Fesili mo le Suʻesuʻega]
[Ata i le itulau 13]
Ua faapogaia e le mataalofa toeaina Kerisiano ina ia onosai, magafagafa, ma tigāalofa
[Ata i le itulau 15]
E mafai ona fesoasoani le mataalofa o se avā Kerisiano e manumalo ai i lana paaga agaʻi i le faatuatuaga moni
[Ata i le itulau 17]
E mafai ona tatou faaalia i isi le mataalofa silisili e ala i le fesoasoani ia i latou e faalelei ma le Atua