Fesili mai le Au Faitau

▪ Aiseā na faatuina ai e Iesu le Faamanatuga na o le au aposetolo ae lē aofia ai isi soʻo o ē o le a aveina aʻe i le feagaiga fou?

O lenei fesili e foliga mai sa faavae i se manatu sese faapea, na faapotopoto faatasi Iesu ma lona au aposetolo i lena po ina ia faatuina le Talisuaga Afiafi a le Alii ma le faapotopotoga Kerisiano o ē faauuina na ua uma ona iai i le feagaiga fou. Na i lo lea, ia Nisani 14, 33 T.A., o le taimi lena e leʻi faavaeina ai le faapotopotoga Kerisiano, ma na ō mai faatasi Iesu ma lona au aposetolo mo le tausamiga faaletausaga o le Paseka faa-Iutaia.

E moni, sa iai isi soʻo o Iesu na i lo o le 12 lea sa lauiloa o aposetolo. I le tausaga a o leʻi maliu o ia, sa ia aauina atu le 70 soʻo i se malaga talaʻi faataamilo. Ina ua mavae lona toetu mai, “ona toe iloa lea o ia e le au uso e lima selau ma ona tupu.” Ma sa iai foi pe tusa ma le “toaselau ma le toaluafulu” soʻo na faapotopoto ai i le aso o le Penetekoso. (1 Korinito 15:6; Galuega 1:15, 16, 23; Luka 10:1-24) Ae seʻi o tatou iloiloina le vaega lea sa faatasi ma Iesu ina ua ia faatuina le faamanatuga faaletausaga lea ua lauiloa o le Talisuaga Afiafi a le Alii.

Ua aumaia i le Luka 22:7, 8 le faatatauga o le taimi, i le faapea mai: “Ona oo mai ai lea o le aso o areto e le faafefeteina, e tatau ona fasi ai o le paseka. Ona aauina atu lea e ia o Peteru ma Ioane, ua faapea atu, Lua te o e sauni le paseka mo i tatou, tatou te aai ai.” Ua faaauau le faamatalaga: “Lua te fai atu i le matai o le aiga, Ua fai mai le aʻoaʻo ia te oe, Po o ifea le afeafe e api ai malo, ina ia matou aai ai le paseka, o aʻu ma oʻu soo?” O lea, i le po lena sa faatasi ai Iesu ma le 12 mo se faamanatuga faa-Iutaia. Ona ia taʻu atu lea ia i latou: “O loʻu manao, ua tele lava loʻu manao e muai ʻai lenei paseka ma outou, a o lei oo i loʻu tiga.”—Luka 22:11, 15.

Mai lava i lona amataga i Aikupito, sa avea ai le Paseka o se faamanatuga faaleaiga. I le faatuina o le Paseka, na taʻu atu e le Atua ia Mose faapea, e tatau ona fasia se mamoe mo aiga taitasi. Afai sa toʻa itiiti se aiga e taumafaina se mamoe atoa, e mafai ona valaaulia se aiga o tuaoi ane e aufaatasi i le ʻaina o lea taumafataga. I lea, o se mea tatau faapea mo le Paseka o le 33 T.A., o le toatele lava o soʻo o Iesu sa aufaatasi ma o latou lava aiga mo lenei taumafataga.

Ae sa “tele lava [le] manao” o Iesu ina ia auai i le talisuaga lea sa avea o le Paseka mulimuli sili ona tāua, ma le po mulimuli a o leʻi maliu o ia, faatasi ma ona soʻo sili ona vavalalata ma ia, o ē na malaga faatasi atu ma ia mo le tele o taimi i lana faiva. I le faaiʻuga o le taumafataga o lena Paseka, na taʻu atu ai e Iesu ia i latou e uiga i se faamanatuga fou o le a faia e ona soʻo uma lava i le lumanai. O le uaina o lena faamanatuga faa-Kerisiano i le lumanai o le a faaatagia ai le toto o “le feagaiga fou” lena o le a suia ai le feagaiga o le Tulafono.—Luka 22:20.

Ae peitai, i le po o Nisani 14, 33 T.A., sa leʻi faatinoina ai i le taimi lea le feagaiga fou, ona e leʻi ofoina atu i lea taimi le taulaga aogā—o Iesu—e faamaonia ai lena feagaiga. O loo aogā pea le feagaiga o le Tulafono. E leʻi tuʻituʻiina i fao i luga o le laau. E lē gata foi i lea, sa leʻi faamaonia atoatoa ai seia oo i le aso o le Penetokoso, lena na suia ai le feagaiga tuai ma Isaraelu faaletino i le feagaiga fou ma Isaraelu faaleagaga.—Kalatia 6:16; Kolose 2:14.

O lea, sa leʻi iai lava se isi o aposetolo faamaoni e 11 po o nisi foi o isi soʻo i le feagaiga fou i lena po. Ma sa leʻi faaalia foi e Iesu se lē fiafia i isi soʻo Iutaia e ala lea i le faatagaina o i latou e faatasi ma o latou aiga i le faamanatuina o le Paseka.