‘I Lea Fale ma Lea Fale’

“UA LE mapu foi i latou i aso uma ona aʻoaʻo atu, ma talaʻi atu i le malumalu, ma lea fale ma lea fale le tala lelei ia Iesu Keriso.” (Galuega 5:42) E masani lava ona faaaogā e Molimau a Ieova lenei mau ma le Galuega 20:20 e faamaonia ai le faavae faale-Tusi Paia mo la latou galuega talaʻi i lea fale ma lea fale. Ae peitai, i Siamani, ua luʻia ai e nisi na faitioina Molimau a Ieova le auala o loo faasino atu ai e le New World Translation nei fuaiupu, i le faapea mai ua ia faauiga sese le uluai gagana faa-Eleni.

Pe iai se aogā o na faitioga? E matuā leai lava. Mo le tasi o mea, a itiiti mai pe tusa ma le ono isi faaliliuga faa-Siamani o le Tusi Paia ua faapena ona faaliliuina ai nei fuaiupu. Faatasi ai ma nei Tusi Paia o loo iai le toe teuteuga o le Zürcher Bibel ma le “Feagaiga Fou” a Rupert Storr, Franz Sigge, ma Jakob Schäfer (toe teuteuina e N. Adler). E ioeina e le tele o isi faaliliuga faa-Peretania.

Ua taʻutonuina e le tagata poto Siamani o Hans Bruns lana faaliliuga, “mai lea fale ma lea fale,” i le Galuega 5:42, ua faapea mai: “E tusa ai ma le uluai mau lava, e foliga mai e pei lava na latou ō atu mai lea fale i lea fale.” Ioe, o le katʼ oiʹkon, o le uluai faaupuga i lenei mau, e lē o faaaogāina i se uiga faasoāveape (“i le aiga”) ae i se uiga lautele, o le uiga moni “e faatatau i le fale.” (O le tulaga numera tele, katʼ oiʹkous, o lona uiga “e faatatau i fale,” o loo maua i le Galuega 20:20.) O isi tagata aʻoga, e pei o Heinz Schürmann, ua ia faamaonia le faasino atu i le lautele o le faaliliuga o nei faaupuga. Ua faapea mai Horst Balz ma Gerhard Schneider, o ē na lomia ma faasalalauina se lomifefiloi auiliili o le Feagaiga Fou, o lenei faamatalaga e mafai ona faasino atu i “le fale pe a teʻa le isi fale.” Ua faapena ona faamatala e nisi faasino tusi faa-Peretania lenei fuaiupu.

O lea la, ua toe mafaia foi e le New World Translation ona tulaʻi atu e faamaonia le sese o osofaiga a tagata faitio. O le mea e sili ona tāua, ona e manino o lea o loo iai se faavae mautū faale-Tusi Paia mo le faiva i lea fale ma lea fale. (Faatusatusa Mataio 10:11-14; 24:14.) Ua faaeaina Molimau a Ieova e faaaʻoaʻo i a latou paga o le uluai senituri e tusa ai o lenei mea.