Talavou e, Kerisiano—Ia Mausali i le Faatuatua

“O TAGATA uma lava e tatau ona auai.” O le faasilasilaga lena. O tamaiti aʻoga uma lava i se isi aʻoga i Iapani, sa tatau ona auai i se feiloaiga masani i le potu fono a le aʻoga. Sa lē mafai e se talavou Kerisiano ona talia i lona loto nisi o manatu sa faaalia i le pese a le aʻoga. “Ia,” sa ia manatu ai, “Ua ou iloa o le a tāina le pese a le aʻoga. Ae o le a leai se faigata mo aʻu. O le a na ona tau lava ina ou nofo i tua e pei ona masani ai.”

Ae peitai, ina ua ulu atu le talavou Molimau a Ieova i le potu fono, sa ia iloa ai o sui uma lava o le vaega o taʻitaʻi o le aʻoga sa nonofo i le laina pito i tua. I lea, ua tatau ai ona ia nofo i o latou luma. Ina ua tutū i luga isi tamaiti mo le pese a le aʻoga, sa nofo pea o ia i lalo ma le faaaloalo. Ae sa matuā feita tele ai faiaʻoga i lenei mea. Sa latou taumafai ma le malosi e faamalosia o ia ina ia tū i luga. E mafai ona e vaai faalemafaufau ia te oe i se tulaga faapena? Faamata o le ā se mea e te faaono faia?

Le Pogai e Manaomia ai le Faatuatua Malosi

O le a avea o se mea lelei pe afai e tuu ai pea e tagata, Kerisiano lava latou ma faataga i latou e ola e tusa ma o latou loto fuatiaifo ua aʻoaʻoina i le Tusi Paia. Ae peitai, e masani lava ona fesagaʻi Kerisiano ma tulaga faigata. E lē o se mea lenei e ao ona tatou ofo ai, auā na fetalai le Alo o le Atua lava ia, o Iesu Keriso: “Afai ua latou faasaua mai ia te au, e faasaua foi ia te outou.” (Ioane 15:20) E ese ai i sauaga tuusaʻo, ua fesagaʻi foi auauna a Ieova ma isi tofotofoga eseese o le faatuatua.

E masani lava ona manaomia e talavou Kerisiano le faatuatua malosi e fesagaʻi ai ma tofotofoga latou te fetaiaʻi i le aʻoga. Atonu o le a lafoina atu i latou e faafesagaʻi ma tamaiti o a latou vasega o ē tautatala i gagana lē mamā pe faaalia foi uiga e lē viia ai le Atua. Atonu o le a fesagaʻi foi talavou Kerisiano ma le faateleina o faamamafaga o le lotonuu ma omiga e faaaafia i kalapu, faiga faapolotiki a aʻoga, po o isi gaoioiga e faaono faaleagaina ai faaleagaga. Atonu o le a taumafai faiaʻoga po o uo i le aʻoga e tuu atu omiga i talavou Kerisiano ina ia faagutugutulua. I lea, e tatau ai i talavou amio atua ona faalagolago i le agaga o Ieova mo le faatuatua manaomia ina ia avatu ai se puipuiga manino o lo latou faamoemoe.—Mataio 10:19, 20; Kalatia 5:22, 23.

‘Ia Nofo Sauni e Avatu se Puipuiga’

E talafeagai le fautuaga a le aposetolo o Peteru mo Kerisiano talavou uma ma ē matutua. Na faapea mai o ia: “Ia saunia pea lava outou e tali atu ma le agamalu ma le mataʻu ia i latou uma o e fesili mai ia te outou i le uiga o le faamoemoe o loo ia te outou.” (1 Peteru 3:15) O le ā le uiga o le nofo sauni e tali atu faapena? Muamua, e tatau ona e malamalama lelei i mea o aʻoaʻoina e le Tusi Paia. O le faia o se tulaga mautu i le aʻoga i mataupu e pei o le lotonuu, faiga faapolotiki, faaaogā sese o vailaau oona, po o amioga, e tatau ona ia e malamalama muamua i le mafuaaga mo le tulaga faa-Kerisiano ma ia talitonu ma le faamaoni i ai.

Mo se faaaʻoaʻoga, na taʻu atu e le aposetolo o Paulo i uso Kerisiano: “Aua neʻi faaseseina outou, O le feoai ma e amio leaga e leaga ai amio lelei.” (1 Korinito 15:33) E te ioe ea i lena mea? E pei ona faaalia e Paulo, e faigofie ona faaseseina i aumea. Atonu o se tagata e foliga mai e faauo ma e lolo gofie mai. Ae afai e lē auai i lou manatu mamafa mo le auaunaga ia Ieova pe talitonu foi i folafolaga a le Tusi Paia, o ia la o se aumea leaga. Aiseā? Auā e ese mataupu silisili na e faavae ai lona olaga, ma o mea e matuā tāua i se Kerisiano atonu e manatu faatauvaa i ai o ia.

 E lē o se mea lenei e ofo ai, auā na fetalai Iesu e uiga i ona soʻo: “E le ni o le lalolagi i latou, faapei o aʻu foi, ou te le so le lalolagi aʻu.” (Ioane 17:16) E lē o se mea talafeagai mo se tagata ona avea o se Kerisiano moni, ma i le taimi lava e tasi e avea ma vaega o lenei lalolagi, lea ua avea ai Satani ma atua. (2 Korinito 4:4) Pe e te iloa e faapefea i sea vavae ese mai le lalolagi ona puipuia se Kerisiano mai le iʻuvale ma le feʻainaʻi ua malaia ai le toatele i aso nei? Afai ua e iloa, ua e malamalama la pe aiseā e tatau ai ona e tausia lou vavae ese, e tusa lava po o le uiga o lenei mea faapea o le a lē mafai ai ona e auai i nisi o gaoioiga a le aʻoga. *

O le tāua o le mausalī i le faatuatua ma faamuamua faanaunauga o le Malo i le olaga sa faaalia i se mea na tupu i le olaga o se tasi teine talavou Kerisiano. (Mataio 6:33) Ina ua faasilasila mai ni faataʻitaʻiga mo lona faauuga, na ia iloa ai o lea mea e pauʻū faatasi ma le aso o le fonotaga matagaluega a Molimau a Ieova lea na ia fuafua e auai. Sa ia tusia se tusi faaaloalo e faamatala atu ai le mafuaaga o le a ia lē auai ai i le faataʻitaʻiga, ma tuuina atu i lona faiaʻoga a o leʻi amataina le vasega. Ina ua uma le lesona, ona valaau ese lea o ia e le faiaʻoga i le isi itu ma fesili atu e toe faamatala ane pe aiseā o le a ia lē auai ai i le faataʻitaʻiga. Fai mai le teine: “Sa fia iloa e le faiaʻoga pe o tutusa aʻu upu. Po o loʻu faalogona lea sa iai, po o le tusi sa na o ni upu a loʻu tinā? I le vaai mai i loʻu maumauai totino i le mataupu, sa leʻi tetee o ia ia te aʻu.”

Ia “Tali Atu . . . ia i Latou Uma”

E masani lava ona iloa e talavou Kerisiano faapea afai latou te faamanino atu o latou tulaga i sui taʻitaʻi o le aʻoga ma tamaiti aʻoga a o leʻi mapuna aʻe se finauga, o le a lē matuā telē le omiga pe a faafesagaʻia faafitauli. Ua faamatala mai e se tasi talavou Kerisiano i Iapani, ina o 11 ona tausaga, sa manaomia ona auai tamaiti uma lava o lana aʻoga mo se patī o le Kerisimasi. Sa uunaia o ia e tamaiti o vasega maualuluga ina ia auai, ae sa leʻi auai o ia, ma sa malamalama lona faiaʻoga i lona tulaga. Aiseā? Auā ina ua latalata i le amataga o le tausaga faaleaʻoga, sa feiloai le Molimau ma ona mātua ma le faiaʻoga ma faamatala atu i ai vala eseese o lo latou tulaga faa-Kerisiano.

Sa mamā nisi talavou Kerisiano e faafesagaʻi ma uo i le aʻoga po o faiaʻoga foi a o auai i le faiva i le fanua. Pe faapena lou lagona? Afai o lena, aiseā e lē muamua ai ona faailoa atu i au uo i le vasega faapea o oe e te talaʻi mai lea fale i lea fale ma le pogai e te faia ai faapea. Na lipoti mai e se Molimau a Ieova e 14 tausaga faapea: “Ua iloa e tagata uma i le aʻoga loʻu tulaga i le avea o se Kerisiano. E moni, ua latou iloa lelei lava, o lea afai ma te feiloai ma se uo i le vasega a o oʻu auai i le faiva, ou te lē mā. E masani lava ona faalogo uso aʻoga, ma i le tele o taimi latou te talia ai lomiga faale-Tusi Paia.” Ua lipoti mai e se tasi e 12 tausaga le matua faapea e aloalo atu lava o ia i le faafeiloaia o ana uo i le vasega pe a auai i le faiva. Na i lo o le loto vaivai ona o le manatu i lenei mea, e masani lava ona ia faataʻitaʻia mea o le a ia fai atu ai pe a tupu mai. I lea, ua nofo sauni ai o ia e tali atu ma le uigā i lona faatuatua.

O le tele o aʻoga, o isi gaoioiga pe a uma le aʻoga ua faapea mai, e fai lau lava filifiliga. Ae o le tulaga moni lava, e matuā uunaia ai e tamaiti aʻoga ma faiaʻoga tagata uma ina ia auai i na gaoioiga. Sa iloa e se Kerisiano e 20 ona tausaga se auala lelei e feagai ai ma lenei omiga. Fai mai o ia: “Sa ou auauna o se paeonia lagolago i le taimi atoa sa ou iai i le aʻoga maualuga. Sa iloa e tagata uma lava le tele o aʻu galuega faalelotu sa lē mafai ai ona ou auai i isi mea.” Sa mulimuli ai le uso laitiiti o lenei Molimau i le auala lava lea. O nisi talavou Kerisiano e faasasaʻo atu lava mai le auaunaga paeonia lagolago i le vaitaimi a o a‘ooga, i le galuega paeonia sauatoa ma avea o ni ē folafola faataimi atoa o le Malo ina ua uma a latou aʻoga.

Aua lava neʻi faagaloina āuga lelei o lau amio ma lau molimau lototele. Na i lo o le gūgū,  aiseā e lē faaalia ai e te mausalī i le faatuatua e ala i le tautala ma le faaaloalo ae lototele? O le mea lena na faia e se teine Isaraelu o lē na ave faatagataotaua ma oo ai ina iai i le aiga o le taʻitaʻiau Suria o Naamanu. (2 Tupu 5:2-4) Sa viia ai le suafa o Ieova ona sa tausolomua lena teine talavou. O se faatuatua foi faapena ia te oe e aumaia ai foi le faamamaluina o le Atua ma e mafai ona fesoasoani ai i isi e faia se tulaga e avea o ni ē vivii i lona suafa.

O le mea moni e lē mafai ona tatou faagutugutulua i lo tatou faaatuatua ma tumau pea o ni Kerisiano. Na fetalai Iesu: “O lenei, ai se na te taʻutaʻu aʻu i luma o tagata, o aʻu foi ou te taʻutaʻuina o ia i luma o loʻu Tamā o i le lagi. Ai se faafiti foi ia te au i luma o tagata, ou te faafitia foi o ia i luma o loʻu Tamā o i le lagi.” (Mataio 10:32, 33) O le mausalī i le faatuatua i le avea o se soʻo o Iesu o se tiute tauave uigā, a ea?

E Maua le Fesoasoani

Ina ia ia mafai ona faia se tulaga mausalī i le avea o se tasi o Molimau a Ieova, e te manaomia le faatuatau malosi. I lena itu, e tatau ona e suesue ma le filigā le Tusi Paia, auai i sauniga faa-Kerisiano, ma auai i le faiva i le fanua. Afai e tumau pea ona e lagona faapea o iai se mea e te lē o maua, o le ā e mafai ona e faia? Na faapea mai le soʻo o Iakopo: “A e afai ua leai se poto i so outou, ina ole atu ia i le Atua, o lē foai tele mai i tagata uma ma le le toe taʻutaʻua; ona foaiina mai ai lea ia te ia.” (Iakopo 1:5) Ia talanoa atu ia Ieova i le tatalo e uiga i ou faafitauli; e mafai ona ia faamalosia oe e fesagaʻi ma sauaga po o le tofo o lou faatuatua.

O le ā se isi mea e mafai e se talavou Kerisiano ona faia? Ua taʻu mai ia i tatou e le tusi o Faataoto: “Ia e faalogo i lou tamā, o le na fanaua oe; aua foi e te ʻinoʻino i lou tinā pe a loomatua o ia.” (Faataoto 23:22) Na lagolagoina e le aposetolo o Paulo lenei fautuaga, auā na faapea mai o ia: “O outou le fanau, ia outou faalogo i o outou matua i mea uma; auā o le mea mālie lea i le Alii.” (Kolose 3:20) E mafai e mātua Kerisiano ona fesoasoani ia te oe ina ia mausalī i le faatuatua. Faalogo i a la fautuaga. Faatasi ai ma la la fesoasoani, ia saili i le Tusi Paia ma lomiga ua faavae mai le Tusi Paia, ia vaavaai mo manatu, fautuaga, ma mea tutupu i olaga o isi. O le a olioli uma ai oe ma ou mātua i lenei mea, ma o le a fesoasoani ia te oe e foia ai le mā po o le fefe.—2 Timoteo 1:7.

Ia faaaogā atoatoa sauniuniga ua faia e Ieova le Atua e ala i le faapotopotoga Kerisiano. Ia sauniuni lelei mo sauniga. Ia talanoa atu i toeaina tofia ma isi o ē na oo i ai ni mea e tutusa ma na e te lua fesagaʻi nei. Na faapea mai Solomona: “E faalogo mai le tagata poto, e tupu ai pea lona poto; o le ua mafaufau foi e maua e ia le poto e pule ai.” (Faataoto 1:5) O lea, ia aʻoaʻo mai nei tagata matutua. E mafai foi ona e aʻoaʻo mai talavou Kerisiano o ē o manuia i lo latou faafeagai ai ma faafitauli e pei o ou faafitauli.

O le Faamaoni e Aumaia ai Faamanuiaga

E ala i le tu mausalī i le faatuatua, o le a e faatatauina ai le fautuaga a Paulo ina ia “tumau, ma le le faagaeetia, [ia tele pea mea e fai i le galuega a le Alii].” (1 Korinito 15:58) E silafia ma e malamalama Ieova i faafitauli o oulua fesagaʻi. Sa ia faamalosia le toatele sa faafeagai ma faigata faapena, ma o le a ia faamalosia oe. Afai e te faalagolago i le Atua, o le a ia lagolagoina oe, auā na faapea mai le faisalamo: “Ia e tuuina atu ia Ieova o mea e te popole vale ai; o ia lava na te tausia oe; na te  le tuuna e faavavau le amiotonu ia [tautevateva].”—Salamo 55:22.

Na tusia e Peteru: “Ia ia te outou le loto fuatia ifo lelei, o le mea foi latou te faaleaga ai ia te outou, peiseai ua outou amio leaga, ia masiasi i latou o e tuuaʻi fua la outou amio lelei o ia Keriso.” (1 Peteru 3:16) Afai e te musu e faagutugutulua e tusa ma tulafono amiotonu ma mataupu silisili a le Atua, o le a e maua se loto fuatiaifo lelei, o se faamanuiaga moni lea mai ia Ieova. E lē gata i lea, o le a e faataatia se faaaʻoaʻoga lelei mo Kerisiano talavou o ē atonu e vaivai lo latou faatuatua. (1 Timoteo 4:15, 16) O lau amio atonu o le a faalototeleina ai i latou ina ia faia ni taumafaiga e oo ai ina mausalī i le faatuatua ma i lea, o le a mafai ai ona tumau i sauaga.

O le a oo lava ina e fesoasoani atu ia i latou o ē na muai tetee i lou tulaga faa-Kerisiano. Ia manatua nei upu faagaee faamoemoe: “O le taeao ia e lulu ai au saito, aua foi le mapu lou lima i la afiafi; auā e te le iloa po o le fea e manuia, o lenei, po o lena, pe gatusa ona lelei o ia mea e lua.” (Failauga 11:6) O ai na te iloa po o ā ni iʻuga lelei e maua mai i lou lūlūina o fatu lelei e ala i au gaoioiga faamaoni?

I faamanuiaga aupito silisili o le a e seleseleina, o se tulaga faamaonia lea ma Ieova. O le mea aupito sili, o le mausalī i le faatuatua, o le a iʻu ai i le ola e faavavau. (Ioane 17:3; faatusatusa Iakopo 1:12.) E leai se aogā o le maua o se mapusaga puupuu e ala i le faagutugutulua ae leiloa ai lena meaalofa.

Ae faapefea le talavou na taʻua i le amataga o lenei mataupu? Ioe, na tumau o ia i lona tofotofoga. Ina ua uma le faatasitasiga a le aʻoga, ona ia taumafai ai lea ma le tomai e faamatala lona tulaga i faiaʻoga. E ui lava sa paʻū atu ana upu i taliga tutuli e lē fia faalogo, ae sa ia maua le lotomalie i le iloa ua ia faafiafia le finagalo o Ieova. (Faataoto 27:11) Sa faaauau pea ona ia puipuia lona faatuatua seia oo ina uma lana aʻoga. Ona avea loa lea o ia ma paeonia. Tau ina ia maua e lou tumau i le faatuatua se iʻuga faapena. O le a faapena pe afai e faamaonia lou mausalī i le faatuatua.

[Faaopoopoga i lalo]

[Pusa i le itulau 10]

FESOASOANI UA MAUA

□ Ia faalogo i le atamai o ou mātua matataʻu i le Atua.

□ Ia faaaogā sauniuniga faaleagaga i le faapotopotoga Kerisiano.

□ Ia talanoa atu i toeaina tofia ma isi o ē atonu na iai ni faafitauli e pei o ou faafitauli.

□ Ia talanoa atu i isi talavou Kerisiano o ē ua manuia i le feagai ai ma toʻatugā faapena.