Lipoti a Ē Faalauiloa le Malo

Talaʻiina o se “Saolotoga i le Tafeaga” i Pasili

O LOO matuā galue malosi le agaga o Ieova i ona tagata i Pasili a o latou talaʻia le tala lelei o le saolotoga ia i latou o ē o loo noanoatia i lotu sese. (Isaia 61:1, 2; Luka 4:18) I le 1947 sa na o le 648 Molimau i le atunuu. I le 1967 na oso aʻe ai le fuainumera i le 41,548. Ona o faamanuiaga a Ieova, i le tau amataga o le 1991 na ia ausia ai se tumutumuga e sili atu i le 302,000! E moni lava ‘o le Atua na te faatupuina.’ (1 Korinito 3:7) I le na o le tausaga faaleauaunaga lava o le 1990, e 27,068 na papatisoina ai.

O lena faatupuina, na mafai ai ona faamaopoopoina se matagaluega fou e tasi i masina taitasi, ma e 150 Maota o le Malo fou na faaulufaleina i le na o le tasi le tausaga. E lē gata i lea, na faatauina e le ofisa o le lala le fanua e 450 eka [180 ha] auā le faateleina o o latou fale lomitusi, lea ua latou lomia ai nei Tusi Paia i a latou lava masini lomitusi. O lea, ua galulue malosi ai Molimau i Pasili e fesoasoani atu ai i ē loto maulalo ina ia ō ese mai “Papelonia le Aai Tele” a o leʻi oo i le “puapuaga tele.”—Faaaliga 7:9, 10, 14; 18:2, 4.

□ Sa tuu e se tagata talaʻi e valu tausaga le matua se tusi i le faletua o le taʻitaʻi leoleo ma i lea, na ia faia ai le toe asiga na o ia lava. O lona sini o le manao ina ia faitau atu e le fafine ia te ia nisi o tala ma ia faamatala atu e le fafine ia te ia po o le ā sona malamalamaga e uiga i nei tala taitasi. A o ia faamatala atu ia te ia nei tala, sa amata ai foi e ia lava ona talisapaia le tusi ma talosaga atu i le tamaitiiti ina ia faafeiloai atu o ia [le fafine] i lona tinā. Sa ia faia faapea, ma i le taimi nei ua olioli ai le fafine i se suesuega faale-Tusi Paia e lē aunoa i le aiga.

□ I le 1984, na lē lavātia ai e Maria le faafiaamiotonu na ia vaaia i le sosaiete o tagata, ma sa mafatia o ia ona o mala sa ia faitau i ai o loo tutupu i le lalolagi. O lea sa ia faia ai loa se ituaiga o olaga matagā. Ua faapea mai o ia: “O lo matou sini, o le faasagatau i mea uma ma tagata uma lava. Sa faia oʻu foliga ia na ona faateʻia ai tagata—o ofu uigaese lanu malolosi, sa sele poo le isi itu o le ulu. Sa galo ia te aʻu laʻu tane, fanau, ma le aiga ma amata ona ula mariuana ma faaaogā le cocaine ina ia solaese ai mai le olaga moni. Ae sa na ona sili atu ai ona faaleagaina o aʻu i lenei mea. Sa ou tagi. Pe a ou faitau le Tusi Paia, sa leai soʻu malamalama i ai. O lea na ou tatalo ai i le Atua mo le fesoasoani.

“I se tasi aso na asiasi mai ai ni Molimau se toalua i loʻu fale, ma ina ua uma sina talanoaga puupuu, na la ofo mai ia te aʻu ni mekasini se lua. I le sueina o itulau uma o se tasi o ia mekasini, sa ou matauina ai se mataupu e faaulutalaina faapea ‘Independence From God—Why Not?’ [‘Tutoatasi mai le Atua—Aiseā e Lē Tatau Ai?’] * Sa pāʻia loʻu loto i le mataupu. Sa ou lagona faapea ua talia e le Atua aʻu tatalo, ma i lena lava aso, na amata ai ona matou suesue le Tusi Paia ma Molimau. Mai lena taimi e agaʻi mai ai, sa ou faia ai ni suiga mo le lelei. I le taimi muamua sa tetee ai laʻu tane ma le aiga i laʻu suesuega o le Tusi Paia, ae ina ua latou vaaia suiga ua ou faia, ona amata lea ona latou faamalosiau mai ia te aʻu. Ua avea nei aʻu o se auauna papatisoina a le Atua.”

O loo mataalia Molimau a Ieova i Pasili i le talaʻiina atu o se “saolotoga i le tafeaga” e pei ona faia i isi vaega o le lalolagi. Ua tali mai le vao o tagata e toatele, ua maua ai le saolotoga moni ma le fiafiaga i le auauna atu ia Ieova.

[Faaopoopoga i lalo]

[Pusa i le itulau 20]

PASILI

Faitau Aofai o Tagata - 150,367,800

Tumutumuga o le Au Talaʻi 1990 - 293,466

Aofaiga o Tagata, e 1 le Tagata Talaʻi i le - 512

Fuainumera o Ē na Papatisoina 1990 - 27,068

Faatatauga o Paeonia Talaʻi - 30,115

Aofaiga o Faapotopotoga - 4,625

Faatatauga o Suesuega Faale-Tusi Paia - 341,305

Ē na Auai i le Faamanatuga - 790,926