Fuaina mai ‘Ituaiga Uma o le Agalelei’
Fuaina mai ‘Ituaiga Uma o le Agalelei’
“O le fua o le malamalama e aofia ai ituaiga uma o le agalelei.”—EFESO 5:9, NW.
1, 2. O ā vaega e lua ua iai talu mai taimi anamua, ma ua faapefea ona eseese o la tulaga i aso nei?
INA ua mavae le fouvalega i Etena, pe tusa o le ono afe tausaga anamua, ma faapena foi ina ua mavae le Lolo i ona po o Noa, sa vaevaeina ai le fanau a tagata i ni vaega se lua, po o ni faalapotopotoga, o le tasi sa fai aʻe ia i latou o ē na tauivi e auauna ia Ieova, ae o le isi na fai aʻe ia i latou o ē sa mulimuli atu ia Satani. Pe o iai pea ia faalapotopotoga? O le mea mautinoa o loo iai! Na taʻua e le perofeta o Isaia ia vaega e lua ma muai valoia o la tulaga i o tatou aso: “Faauta mai, e ufitia le lalolagi i le pouliuli, e ufitia foi nuu i le pogisa; a e afio ae Ieova i ou luga, ma le pupula o Ieova e aliali mai lea i ou luga.”—Isaia 60:1, 2.
2 Ioe, o le eseesega o ia faalapotopotoga e lua e pei lona telē o le va o le pouliuli ma le malamalama. Ma e pei ona tosina o se tagata ua taasē i le pouliuli i se ave o le malamalama, ua faapena foi i le malamalama mai ia Ieova o loo susulu atu i lenei lalolagi pogisa, ona tosina i ai le faitau miliona o ē saʻo o latou loto i le faalapotopotoga a le Atua. E pei ona faapea mai atili Isaia: “E o mai nuu ese [isi mamoe] i lou malamalama, o tupu [suli faauuina o le Malo] foi e o mai i latou i le pupula o lou alu ae.”—Isaia 60:3.
3. I ā auala ua faaalia ai e Kerisiano le mamalu o Ieova?
3 Ua faaalia faapefea e tagata o Ieova le mamalu o Ieova? O se tasi o auala, o lo latou talaʻia lea o le tala lelei o le Malo faalelagi o le Atua, ua faavaeina. (Mareko 13:10) Ae sili atu i lena, o loo latou faataʻitaʻi ia Ieova, le faaaʻoaʻoga autū o le agalelei, ma e ala i a latou amio ua tosina mai ai ē agamalu i le malamalama. (Efeso 5:1) Na taʻua e Paulo: “Auā sa outou pouliuli anamua, a o lenei ua outou malamalama i le Alii; ina savavali ia pei o e ua malamalama.” Sa faaauau ona ia faapea mai: “(Auā o le fua o le [malamalama e aofia ai ituaiga uma o le agalelei], ma le amiotonu, ma le faamaoni;) ia suesue outou pe se a se mea e fiafia i ai le Alii. Aua foi tou te amio faatasi ma galuega le aoga a le pouliuli.” (Efeso 5:8-11) O le ā na faauiga i ai e Paulo “ituaiga uma o le agalelei”?
4. O le ā le agalelei, ma ua matauina faapefea i se Kerisiano?
4 E pei ona faaalia i la tatou mataupu muamua, o le agalelei o se uiga lea po o se tulaga maoaʻe tau amio, e amioatua. Sa fetalai Iesu faapea e na o Ieova lava e lelei i lena uiga aʻiaʻi. (Mareko 10:18) Ae peitai, e mafai e se Kerisiano ona faaaʻoaʻo ia Ieova e ala i le galueaiina o le agalelei o se fua o le agaga. (Kalatia 5:22) I le faamatalaina o le a·ga·thosʹ, le upu Eleni mo le “agalelei,” fai mai le Vine’s Expository Dictionary of Old and New Testament Words: “[Na te] faamatalaina se mea, a lelei i lona uiga po o le fausaga, e aogā foi la lona taunuuga.” O le mea lea, o se Kerisiano e atiina aʻe le agalelei e lē gata e lelei ae na te faia le amiolelei. (Faatusatusa Teuteronome 12:28.) O le a ia alofia foi mea e feteenai ma le agalelei, o “galuega le aoga a le pouliuli.” O auala eseese e mafai ai e se Kerisiano ona faaalia le agalelei i lana amio, o ‘ituaiga ia o le agalelei’ na taʻua e Paulo. O ā nisi o na ituaiga?
‘Faia Pea le Amio Lelei’
5. O le ā se tasi o ituaiga o le agalelei, ma aiseā e ao ai i se Kerisiano ona atiina aʻe?
5 Sa faasino e Paulo i se tasi o na ituaiga i lana tusi i tagata Roma. E faatatau i le gauai atu i “faipule silisili,” na ia faapea mai: “O lou manao ea, ia e le fefe i le pule? ia e amio lelei, ona taʻuleleia mai lea o oe e ia.” O le “amio lelei” o loo ia faasino i ai, o le usiusitai lea i tulafono ma faatulagaga a faipule o loo iai. Aiseā e ao ai i se Kerisiano ona gauai atu i ia mea? Ina ia alofia ai se feteenaʻiga e lē manaomia ma faipule, ma sao mai ai i se faasalaga, ae—sili atu ona tāua—ina ia faatumauina ai se loto fuatiaifo mamā i luma o le Atua. (Roma 13:1-7) A o faatumauina lona usiusitai muamua ia Ieova, e ao i se Kerisiano ona ‘āva i le tupu,’ ae lē o le fouvale faasaga i faipule ua faatagaina e Ieova le Atua ia iai. (1 Peteru 2:13-17) I lenei auala, ua avea ai Kerisiano o ni tuaoi lelei, tagatānuu lelei, ma o ni faaaʻoaʻoga lelei.
Magafagafa mo Isi
6. (a) O le ā se isi vala o le agalelei? (e) O ai ua taʻua i le Tusi Paia e alagātatau i ai lo tatou magafagafa?
6 Ua folasia le agalelei o Ieova i lona saunia mo tagatānuu uma o le lalolagi o ‘ua mai le lagi ma vaitau o fuata.’ Ua iʻu lenei mea i le ‘faamalieina ai i meaʻai ma le olioli’ ma faaalia ai o ia o se Atua e magafagafa moni lava. (Galuega 14:17) E mafai ona tatou faaaʻoaʻo ia te ia i lenei itu e ala i le faaalia o le magafagafa mo isi i ni ala laiti ma le tetelē. Ae maise lava mo ai? Ua patino ona faasino atu e Paulo i toeaina, i latou “o galulue ia te outou, ma pule ia te outou i la le Alii, ma latou apoapoai atu ia te outou.” Ua ia uunaia Kerisiano e avatu ia i latou ia ‘le mea e sili atu i lo le magafagafa masani i le alofa ona o la latou galuega.’ (1 Tesalonia 5:12, 13) E mafai faapefea ona tatou faia lenei mea? E ala i le felagolagomai atoatoa ma i latou—mo se faaaʻoaʻoga, i le auai i galuega e manaomia i le Maota o le Malo. A o lagona le saoloto pea e oo atu i toeaina mo se fesoasoani pe a manaomia, e ao ona tatou lē tagisā faalētatau. Na i lo lea, i auala uma lava tatou te mafaia, ia tatou taumafai e faamāmā avega i nei leoleo mamoe galulue mamafa, o ē e toatele o loo iai avega tauave faaleaiga e faaopoopo i o latou tiute i le faapotopotoga.
7. O ā auala e mafai ai ona tatou faaalia le magafagafa i ē matutua?
7 E alagātatau foi lo tatou magafagafa i ē ua matutua i le tino. Sa faapea se poloaiga faapitoa i le Tulafono a Mose: “Ia e tulai atu i luma o le ua ulu sinā, [ma e tatau ona e faaalia le magafagafa i se tagata ua toeaina], ma ia e mataʻu i lou Atua; o aʻu o Ieova.” (Levitiko 19:32) E mafai faapefea ona faaalia lenei magafagafa? O se mea lelei pe afai e mananao le au talavou e tauofo atu e fesoasoani ia i latou i faatauga po o le faia o isi feau. E mafai ona siaki ma le faaeteete e toeaina ina ia vaai pe manaomia e so o se tasi o ē matutua se fesoasoani e auai i sauniga. I fonotaga, o le a alofia ai e tagata talavou ma malolosi, le tautulei o ē matutua e telegese le savavali i se taumafaiga ma le lē onosai ina ia sao ese ai, ma o le a latou onosai foi pe afai e faatuatuai ona nofoi po o le maua mai o se meaʻai a se tasi ua matua.
8. E mafai faapefea ona tatou faaalia le magafagafa i se isi vaega e tatau i ai ua faamatilatila mai e le Tusi Paia?
8 Ua taʻua foi e le faisalamo se isi vaega e manaomia ai le magafagafa: “Amuia le tagata ua [magafagafa i] le ua mativa.” (Salamo 41:1) Atonu e faigofie ona manatunatu i ē lauiloa po o ē tamaoaiga, ae faapefea ē e maualalalo po o ē matitiva? Na faailoa mai e le tusitala o le Tusi Paia o Iakopo faapea o le faaalia o le magafagafa tutusa mo i latou ia o se tofotofoga lea o lo tatou amiotonu ma le alofa faa-Kerisiano. Talosia ia tatou sao mai lenei tofotofoga e ala i le manatunatu agaʻi i tagata uma lava e ui i ni tulaga o loo latou iai.—Filipi 2:3, 4; Iakopo 2:2-4, 8, 9.
“Ia Mutimuti Vale [Pea] lo Outou Alofa”
9, 10. Aiseā e ao ai i Kerisiano ona alolofa mutimutivale, ma e mafai faapefea ona faaalia lenei ituaiga o le agalelei?
9 Ua matauina se isi ituaiga o le agalelei i nisi o faataoto a Iesu. I se tasi o ia faataoto, na taʻua ai e Iesu se tagata Samaria o lē na tau ane i se tamaloa na osofaia, ua fasi tigaina, ma tuu ai e taatia i le auala. Sa ui ese ai se sa Levī ma se faitaulaga i le tagata manuʻa, e mumusu e fesoasoani ia te ia. Peitai na nofo ai le tagata Samaria ma fesoasoani atu ia te ia, i le faia o le mea e sili atu na i lo le mea atonu sa tatau ona faatalitalia. Ua masani ona taʻua lena tala o le faataoto i le Samaria Agalelei. O le ā le ituaiga o agalelei na faaalia e le tagata Samaria? O le alofa mutimutivale. Ina ua fesili atu Iesu i lē na faalogologo ia te ia e taʻu mai po o ai na fai ma tuaoi o le tamaloa na manuʻa, sa saʻo le tali na avatu: “O le na alofa [mutimutivale] ia te ia.”—Luka 10:37.
10 E faaaʻoaʻo Kerisiano alolofa mutimutivale ia Ieova, o lē na taʻu atu e Mose i le fanauga a Isaraelu: “(Auā o Ieova lou Atua o le Atua alofa [mutimutivale] ia,) na te lē tuuna oe, na te le faaumatia oe, e le galo foi ia te ia le feagaiga ma ou tamā, na ia tauto ai ia te i latou.” (Teuteronome 4:31) Sa faaalia e Iesu le auala e ao ai ona faaaafia i tatou i le alofa mutimutivale o le Atua: “Ia mutimuti vale [pea] lo outou alofa, pei ona alofa mutimuti vale o lo outou Tamā.” (Luka 6:36) E mafai faapefea ona tatou faaalia le alofa mutimutivale? E pei ona folasia i le faataoto a Iesu, o se tasi o auala o le nofo sauni lea e fesoasoani atu i o tatou uso, e tusa lava pe aofia ai ni toʻatugā po o ni faigata. O se tagata lelei na te lē faalēamanaiaina mafatiaga o sona uso pe afai o loo ia tu i se tulaga e tatau ona faia ai se mea i ai.—Iakopo 2:15, 16.
11, 12. E tusa ai ma le faataoto a Iesu i auauna, o le ā ua aofia ai i le alofa mutimutivale, ma e mafai faapefea ona tatou faaalia lenei uiga i aso nei?
11 Ua faaalia i se isi o faataoto a Iesu faapea o le agalelei mutimutivale e aofia ai le nofo sauni e faamagaloina isi. Na ia fetalai e uiga i se auauna o lē na ia nonōina mai i lona matai ni taleni e sefulu afe. Ina ua lē mafai ona toe totogi atu, na aioi atu ai le auauna ina ia alofa mutimutivale ane ia te ia, ma na faamagaloina ma le agalelei e lona matai le nogātupe telē e 60,000,000 tenari. Peitai na alu ese lena auauna ma tau atu i le isi auauna o lē na ia nonōina ana tenari e na o le selau. Sa lafoina ma le lē alofa e le auauna na faamagaloina lē na nofo aitalafu i le falepuipui seia mafai ona ia toe tauia. Ma le manino lava, o le auauna sauā sa lē o se tagata lelei, ma ina ua faalogo le matai i le mea na tupu, sa ia faasalaina o ia.—Mataio 18:23-35.
12 O loo tatou iai i se tulaga e pei o le mea na tupu i le auauna na faamagaloina. E faavae i le taulaga a Iesu, ua faamagalo ai e Ieova se aofaiga tele o aitalafu ona o a tatou agasala. O le mea mautinoa la, e ao ona tatou nofo sauni e faamagaloina isi. Na fetalai Iesu faapea e ao ona tatou nofo sauni e faamagalo atu “ia fitugafulu ni fitu,” e aunoa ma le faatapulaaina. (Mataio 5:7; 6:12, 14, 15; 18:21, 22) O lea, o se Kerisiano e alofa mutimutivale o le a lē tumau pea ona ita. Na te lē teu fatuina se toʻatamaʻi pe musu e talanoa i se uso Kerisiano ona o faalogona tigā. O sea leai o se alofa mutimutivale e lē o se faailoga lea o le agalelei faa-Kerisiano.
Agaalofa ma le Limafoai
13. O ā isi mea e aofia ai i le agalelei?
13 Ua faaalia foi le agalelei e ala i le agaalofa ma le limafoai. I se tasi o mea na tupu na alu ane ai se taulealea ia Iesu mo se fautuaga. Ua ia faapea atu: “Le aʻoaʻo lelei e, se a se mea lelei ou te faia ou te maua ai le ola faavavau?” Na fetalai atu Iesu ia te ia e ao ona faaauau pea ona ia tausia poloaiga a le Atua. Ioe, o le usiusitai i poloaiga a Ieova o se vaega lea o le agalelei. Sa manatu lava le taulealea ua maeʻa ona ia faia o lenei mea i le mea e gata mai ai lona mafaia. E manino a, i le manatu o ona tuaoi ua maeʻa ona ia foliga mai o se tagata lelei, e ui i lea sa ia manatu e iai se mea o loo paʻū ia te ia. O lea na fetalai atu ai Iesu: “Afai e te manao ina ia atoatoa ona lelei o lau amio, ia e alu ma e faatau atu au mea, i le e avatu ai i e matitiva; ona ia te oe lea o le faulaigāoloa i le lagi, i le e sau ma mulimuli mai ia te au.” (Mataio 19:16-22) Na alu ese le taulealea ma le tigā. Sa matuā mauoa o ia. Ana fai sa mulimuli i le fautuaga a Iesu, semanū na te faaalia ai sa lē pupū o ia i mea faitino. Ma semanū na te faatinoina ai se galuega lelei o le agaalofa moni e lē manatu mo ia lava.
14. O ā fautuaga aogā na aumaia e Ieova ma Iesu e faatatau i le agaalofa?
14 Sa timaʻia e Ieova le fanauga a Isaraelu ina ia agaalofa. Mo se faaaʻoaʻoga, tatou te faitau ai: “E te matuā avatu lava [i lou tuaoi ua matelaina], aua foi le avatu ia te ia ma le tiga o lou loto; auā ona o lenei mea e faamanuia ai oe e Ieova lou Atua i au galuega uma, ma mea uma lava e tago i ai ou lima.” (Teuteronome 15:10; Faataoto 11:25) Sa timaʻia totino foi e Iesu Keriso le agaalofa: “Ia outou foai atu, e foaiina mai ai ia te outou; e foai mai e i latou i lo outou lava ie pulupulu le fua lelei, e lolomi ma luluina, e tumu ma solo i tua.” (Luka 6:38) E lē gata i lena, sa matuā agaalofa totino lava Iesu. I se tasi o mea na tupu, na ia faataatia ese ai se taimi e malōlō teisi ai. Na iloa e le motu o tagata le mea sa iai o ia ona ō atu ai lea ia te ia. Sa faagaloina ma le agaalofa e Iesu le fia malōlō ae faaavanoaina ia lava mo le motu o tagata. Mulimuli ane, na ia faaalia le limafoai uigaese i le saunia o meaʻai mo lena motu o tagata e toatele.—Mareko 6:30-44.
15. Sa faataatia faapefea e uluai Kerisiano se faaaʻoaʻoga e sili ona lelei i le faaalia o le agaalofa?
15 I le faamaoni i fautuaga a Ieova atoa ma Iesu, na matauina ai le agaalofa ma le limafoai o le toatele o soʻo o Iesu. I po po fou o le faapotopotoga Kerisiano, na faalogo ai se aofaiga tele o i latou o ē na ō ane e faamanatu le Penetekoso i le 33 T.A. i le talaʻiga a le au aposetolo ma avea ai ma ē talitonu. Ina ia nonofo ai pea e aʻoaʻo atili ina ua maeʻa le tausamiga, na faaitiitia ai mea e tausia ai. O le mea lea, na faatau atu ai e ē talitonu i inā a latou mea totino ae foai ane tupe e tausia ai o latou uso fou ina ia mafai ai ona faatumauina atili i latou ia i le faatuatua. Maeu se agaalofa!—Galuega 4:32-35; tagai foi i le Galuega 16:15; Roma 15:26.
16. Taʻu mai nisi auala e mafai ai ona avea i tatou ma ē e limafoai ma agaalofa i aso nei.
16 I aso nei, e faapena foi le agaalofa faa-Kerisiano o loo matauina pe a foai ane e Kerisiano le taimi ma tupe i a latou faapotopotoga ma i le galuega talaʻi i le lalolagi aoao. Ua faamaonia lea pe a latou fesoasoani atu i uso e mafatia mai mala faalenatura po o taua. E faaalia foi i le tausia o le ovasia matagaluega a o faagasolo lana asiasiga masani. Pe a valaaulia foi ma le agaalofa ‘tamaiti ua mātuaoti’ e auai i ni evaevaga ma suesuega faale-Tusi Paia faaleaiga faatasi ma isi aiga Kerisiano, e tutusa lenei ma le limafoai, o se faaaliga o le agalelei faa-Kerisiano.—Salamo 68:5.
Tautala Faamaoni
17. Aiseā ua avea ai le faamaoni o se luʻi i aso nei?
17 Ina ua faamatalaina e Paulo le fua o le malamalama, sa ia faafesootaia le agalelei ma le amiotonu ma le faamaoni, ma ua tonu ai la ona faapea atu o le faamaoni o se isi lea ituaiga o le agalelei. O tagata lelei e lē tala pepelo. Ae peitai, ua avea le tautala faamaoni o se luʻi faapitoa i aso nei ona o le taatele nauā o le tala pepelo. E toatele tagata e pepelo pe a faatumu a latou lafoga mo tupe maua. O tagata faigaluega e tala pepelo i galuega latou te faia. E tala pepelo tamaiti aʻoga i a latou lesona ma suega. A faatulaga ni fuafuaga faapisinisi a tagata faipisinisi e pepelo. E pepelo fanau ina ia sao ai mai se faasalaga. Ua faaleagaina ma le pepelo e tagata faitatala ma le loto i ai talaaga lelei o isi.
18. Ua faapefea ona silasila Ieova i tagata pepelo?
18 O le pepelo o se mea e toasa i ai Ieova. E aofia i ‘mea e fitu’ na te inosiaina “le laulaufaiva pepelo” ma “le molimau pepelo, na te tautala i mea pepelo.” (Faataoto 6:16-19) O loo aofia ai “e tala pepelo uma” i le lisi o ē loto vaivai, o ē fasioti tagata, ma ē faitaaga, e leai so latou nofoaga i le lalolagi fou a le Atua. (Faaaliga 21:8) Ma le isi, ua taʻu mai ia i tatou e le faataoto: “O loo savali i lana amiotonu le ua mataʻu ia Ieova; [a o lē e faapiopio ona ala] ua ʻinoʻino ia te ia.” (Faataoto 14:2) E faapiopio le tagata pepelo i ona ala. O lea, e aumaia e le tagata pepelo faamaoniga o le inoino ia Ieova. Pagā le matuiā o sea manatu! O lea seʻi o tatou tautatala pea ia ma le faamaoni, e tusa lava pe oo ai i le aʻoaʻia o i tatou pe uma ai a tatou tupe. (Faataoto 16:6; Efeso 4:25) O i latou o ē tautatala ma le faamaoni o loo faaaʻoaʻo ia Ieova, “le Atua faamaoni.”—Salamo 31:5.
Atiina aʻe le Agalelei
19. O le ā o loo matauina i nisi taimi i le lalolagi, e faaatagia ai o se viiga lea i Lē na Foafoaina mea?
19 Ua na o nisi ia o ituaiga o le agalelei e ao i se Kerisiano ona atiina aʻe. E moni o loo faaalia e tagata o le lalolagi sina fua o le agalelei. Mo se faaaʻoaʻoga, o nisi e limafoai, ae o isi e alolofa mutimutivale. Ae mautinoa, o le mea ua mataʻina tele ai le faataoto o le Samaria Agalelei ona sa fetalai Iesu faapea na faaalia e se tasi e lē o se tagata Iutaia le alofa mutimutivale ae sa leʻi faia faapea e toeaina i le faapotopotoga i Iutaia. O le mea moni o se viiviiga lea mo Lē na Foafoaina tagata ona o loo aliali mai pea na uiga i nisi o tagata e ui ina ua mavae le ono afe tausaga o le lē lelei atoatoa.
20, 21. (a) Aiseā ua ese ai le agalelei faa-Kerisiano mai so o se agalelei atonu tatou te matauina i tagata o le lalolagi? (e) E mafai faapefea e se Kerisiano ona atiina aʻe le agalelei, ma aiseā e ao ai ona tatou tinoū e faia faapea?
20 Ae peitai, mo Kerisiano, o le agalelei e sili atu na i lo na o se uiga atonu e fai pe atonu foi e lē fai mo i latou. O se uiga e tatau ona latou atiina aʻe i ona vaega uma, ona e tatau ona avea i latou ma faaaʻoaʻo i le Atua. E mafai faapefea lenei mea? Ua taʻu mai e le Tusi Paia ia i tatou faapea e mafai ona tatou aʻoaʻoina le agalelei. Na tatalo le faisalamo i le Atua: “Ia e aʻoaʻo mai ia te au i le [agalelei].” E faapefea? Sa faaauau ona ia faapea mai: “Auā ua ou faamaoni i au poloaiga.” Ua ia faaopoopo mai: “E lelei oe, ua e agalelei foi; ia e aʻoaʻo mai ia te au i au tulafono.”—Salamo 119:66, 68.
21 Ioe, afai tatou te aʻoaʻoina poloaiga a Ieova ma usiusitai i ai, o le a tatou atiina aʻe ai la le agalelei. Tau ina manatua pea o le agalelei o se fua o le agaga. Afai tatou te saili i le agaga o Ieova e ala i le tatalo, i aufaatasiga, ma suesuega faale-Tusi Paia, o le a mautinoa la le fesoasoania o i tatou ina ia atiina aʻe lenei uiga. E lē gata i lena, e malosi tele le agalelei. E mafai foi ona faatoilalo ai le leaga. (Roma 12:21) Maeu la le matuā tāua, o lo tatou faia o mea lelei i tagata uma, ae maise lava i o tatou uso Kerisiano. (Kalatia 6:10) Afai tatou te faia faapea, o le a tatou auai la ia i latou o ē o loo olioli i le “viiga, ma le mamalu, ma le manuia” ua folafolaina mai mo i “latou uma o e fai amio lelei.”—Roma 2:6-11.
Pe Mafai ona E Taliina?
□ E mafai faapefea ona tatou faia pea mea lelei agaʻi i faipule silisili?
□ O ai isi e aofia ai, i ē ua tatau i ai lo tatou magafagafa?
□ I ā auala ua faaalia ai e le alofa mutimutivale ia lava?
□ O ā gaoioiga o le agaalofa ma le limafoai ua mataulia ai Kerisiano i aso nei?
□ E mafai faapefea ona atiina aʻe le agalelei?
[Fesili mo le Suʻesuʻega]
[Ata i le itulau 15]
O le magafagafa mo isi o se vala lea o le agalelei
[Ata i le itulau 18]
I le avea ma Faiaʻoga Sili, sa faaavanoaina ai e Iesu ia lava ma le agaalofa