Le Faulai o le Agalelei o Ieova

“Maeu le faulai o lou agalelei, ua teua e oe mo i latou e matataʻu ia te oe!”—SALAMO 31:19, NW.

1, 2. (a) O le ā le galuega tele na faia e Ieova mo se taimi umi ua mavae? (e) Sa faamatalaina faapefea e Ieova le iʻuga o ana galuega faalefoafoaga?

SA IAI le taimi na amata ai ona foafoaina e le Atua le ‘lagi o lona nofoalii ma le lalolagi o lona tulaga aao.’ (Isaia 66:1) Ua lē o faaalia mai e le faamaumauga tauatua le taimi na tupu ai lenei mea. Ae na ona faapea mai: “Na faia e le Atua le lagi ma le lalolagi i le amataga.” (Kenese 1:1) I le vaitaimi o le foafoaga, na gaosia ai le faitau miliona e lē mailoa o aniva, ua iai i le tele o ia aniva le faitau afe miliona o fetū. I le pito i tua o se aniva faapena e tasi, o loo iai se fetū pupula ua faataaliʻoliʻo ai nisi o paneta e laiti ifo. Ua taʻua se tasi o ia paneta o le lalolagi. A faatusatusa atu i le malualii o fetu pupula, sa faatauvaa lava le lalolagi. E ui i lea, o le mea lenei na fuafuaina e Ieova e avea ma ona tulaga aao.

² O lea na liliu mai ai e Ieova ona tomai faalefoafoaga i le paneta o le Lalolagi. Sa i lona itu “le ulumatua o mea uma lava ua faia” o se Matai Tufuga a o suia lenei tamai pouliuli mafiafia i le faasologa o “aso” uumi faalefoafoaga e ono. Na avea lea, o se nofoaga talafeagai faafaatusa e mapu ai aao o le Atua. (Kolose 1:15; Esoto 20:11; Faataoto 8:30) O i inei na fuafuaina e le Atua e tuu ai se ituaiga fou o meafaiola atamai: le fanau a tagata. Sa faanofoia le uluai ulugalii, na foafoaina mai i elemeni na maua i le eleele, i ni siomaga matagofie faaparataiso. (Kenese 1:26, 27; 2:7, 8) Ona o le lelei atoatoa, le matagofie nauā o le iʻuga faaiʻu o lenei gaoioiga tumatilatila o le foafoaga, ua faaalia ai e le Tusi Paia lagona o le Atua i le taeao—le vaega faaiʻu—o le aso lona ono faalefoafoaga: “Ua silasila atu le Atua i mea uma ua na faia, faauta foi, ua matuā lelei lava.”—Kenese 1:31.

Le Agalelei o le Atua

3. O le ā le uiga matilatila o le Atua ua faaalia i le foafoaga?

³ I le faitau afe o tausaga mulimuli ane ai, na toe tepa ai i tua i le taimi o le foafoaga se tasi na tupuga mai i lena uluai ulugalii ma tusia: “O [uiga] e le vaaia [o le Atua] talu ona faia o le lalolagi, e vaaia lava ia i le mafaufau i mea na faia, o lona mana lava lea e faavavau ma lona Atua.” (Roma 1:20) Ioe, o le matagofie aupito sili o le lalolagi atoa ma meafaiola ua iai sa o se ata ofoofogia moni lea o uiga e lē vaaia o le Atua—o se tasi o ia uiga o le faulai o le agalelei o le Atua. Maeu la le talafeagai ona faapea, sa fetalai atu le Atua o mea uma lava na ia foafoaina sa lelei!—Salamo 31:19.

4, 5. O le ā le agalelei?

⁴ O le agalelei o le vala lona ono lea o fua o le agaga o le Atua ua faamatalaina e le aposetolo o Paulo i le Kalatia 5:22. I suesuega faatoʻā mavae atu o le mekasini o Le Olomatamata ua tatou talanoaina ai uluai fua e lima o le agaga, ma faaalia ai le tāua o ia uiga i le atiina aʻe o se uiga totino taʻumatuaina faa-Kerisiano. * E ui i lea, maeu le matuā tāua o  le aua neʻi galo ia i tatou o le agalelei! Ua fetaui ai la, ona taulaʻi atu nei o tatou manatu i lenei uiga.

⁵ O le ā le agalelei? O se uiga lea po o se tulaga o le amiolelei. E maoaʻe i mea tau amio, e amioatua. O se uiga mautinoa lea, na te faaalia ia lava i le faatinoga o galuega lelei ma le aogā agaʻi i isi. E mafai faapefea ona tatou faaalia lenei uiga mataʻina? Muamua, e ala i le faataʻitaʻi ia Ieova. O lea, a o leʻi talanoaina atili pe mafai faapefea ia i tatou o ni Kerisiano taitoatasi ona faaalia le agalelei, seʻi o tatou muai iloiloina le agalelei ua faaalia e lo tatou Atua alofa, o Ieova, i lona saunia, ma i feutagaʻiga ma le aiga faaletagata.

Faaalia le Agalelei e Ala i le Foafoaga

6. O le ā na faamaʻitea Ieova e foafoaina isi ituaiga atamamai o meafaiola?

⁶ O le ā na muai faamaʻitea lo tatou Tamā faalelagi ina ia faasoa mai lona fiafiaga o le ola i meafaiola atamamai? Ua taliina e le aposetolo o Ioane lena fesili ina ua ia faapea mai: “O le Atua, o le alofa lava ia.” (1 Ioane 4:8) Ioe, o le alofa lē manatu faapito na uunaia ai le Puna sili o le ola e foafoaina isi ituaiga o olaga, ma saunia ai se aiga faalelagi mo nisi ae o isi o se aiga faalelalolagi. O le mea moni, e itiiti so tatou iloa e uiga i le lagi ma pe faapeī foi meafaiola faalelagi. O i latou o ni agaga—e lē vaaia e mata faaletagata—ma o lo latou aiga e i le nofoaga o agaga. Ae tagai ane i le aiga faalelalolagi o loo siomia ai oe, sa faapea ona saunia e Ieova mo lana fanau faaletagata. Ma ia manatunatu foi i le fanau a tagata lava ia. O le a amata ai la ona e matauina i ou lava mata faamaoniga malolosi o le agalelei o le Atua.

7-9. Ua matauina faapefea le agalelei o le Atua i le auala na ia foafoaina ai le lalolagi ma tagata o loo iai?

⁷ Na avatu e Ieova i o tatou uluai mātua le ola. E lē gata i lena, ae sa ia faia ina ia mafai ona matuā fiafia, ma olioli le olaga. E amata ai, sa ia foafoaina lo la aiga, le lalolagi, e lapotopoto, e fesuisuiai le tau, atoa ma se siomaga sa fetaui lelei. Ua ia faatulagaina le gasologa o le faataamilosaga o le vai, le naitoresene, ma le okesene, ua lelei atoatoa ona fegasoloai mo le manuia ma le toʻafilemu o tagata. Na ia ufitia le mafolafola o le laueleele i le faitau afe o ituaiga o laau o le vao, o nisi  e mo mea taumafa a le tagata ae o nisi e faapitoa lava ona matagofie i le vaai. Na ia faatumuina le vanimonimo i manu felelei e aumai ai le fiafiaga atili i o latou lanu ma a latou tausani. Na ia faatumuina le sami i le anoanoai o iʻa ma le laueleele i le tele o ituaiga o manu, o nisi e feai ae o nisi e lalata. Maeu se agaalofa uigaese! Ma maeu se faamaoniga o le agalelei o le finagalo o le Atua!—Salamo 104:24.

⁸ Tagai ane nei i le auala na foafoa ai e le Atua le tagata. O ona ogālima, o ogāvae, ma lima o mea tonu lava ia e manaomia ina ia mafai ai ona ia faatumauina lona paleni ma faigofie ai ona feosofaʻi solo. O lea, ua mafai ai ona ia maua meaʻai ma isi mea e manaomia mo ia lava, mai le tele nauā o mea o loo maua i le lalolagi o loo siomia ai o ia. Na saunia e Ieova tofo eseese ina ia lē avea ai le ʻai ma le inu ua na o ni gaoioiga masani e faia ina ia maua ai le malosi—e pei o le faapipiiina o se masini i se palaka eletise i aso nei. Leai, sa fuafuaina le ʻai ma le inu ina ia aumai ai le fiafiaga, auā e lē gata ina maʻona ai le manava ae faagaee ai foi le lagona o le tofo. Na avatu foi e Ieova ni taliga i le tagata ma sa siosiomia o ia i le anoanoai o leo e faafiafiaina ai na taliga. Maeu se fiafiaga o le faalogologo i le tafe lemū o se alā vai, le olo a le lupe, po o se ʻataʻata lēleoa a se pepe! Ioe, faafetai i le agalelei o le Atua, e ui i mea leaga uma ua tutupu talu mai le foafoaga, ae o se mea e olioli ai ona o loo tatou ola pea.

⁹ Tagai foi i isi o tatou lagona. Maeu le matalasi tele, o lanu felanulanuai o loo iai e faafiafiaina ai la tatou vaai! Ma maeu le faamalie loto o le sogisogi i le manogi manaia o se fugalaau! E letioa ona alaga le faisalamo ia Ieova: “Ou te vivii atu ia te oe, auā na faia aʻu e ala ai ona matautia ma ofo tele ai; o mea na e faia, o mea mamana ia”!—Salamo 139:14.

Le Paʻū ma le Laveaia o le Fanau a Tagata

10. Ua tali atu faapefea le toatele o tagata i le agalelei o le Atua, peitai ua faaauau faapefea ona latou mauaina aogā?

¹⁰ Ma le faanoanoa lava, a o mavae atu le taimi sa faaalia ai e o tatou uluai mātua le leai o se talisapaia mo le agalelei uma o le Atua ia i laʻua. Na la faaalia lenei ina ua la lē usiusitai i poloaiga a Ieova ma sopotapulaa faasaga ai i le faasasaga e tasi na ia faatuina. O le iʻuga, na oo ai ina la iloa faatasi ma la la fanau le  faanoanoa, le mafatia, ma le oti. (Kenese 2:16, 17; 3:16-19; Roma 5:12) I le faasologa o meleniuma ua mavae atu talu mai lena gaoioiga o le lē usiusitai, ua faaalia ai e le toatele o le fanau a tagata le faaleogalua po o le leai o se talisapaia mo le agalelei o le Atua. Peitai, e ui i lenei tulaga, ae o loo maua pea e tagata lē loto faafetai ma lē talisapaia aogā mai le agalelei o le Atua. I le ā le auala? Sa faamatala atu e le aposetolo o Paulo i tagatānuu o Lusa i Sasae Tutotonu: “Ua le tuu e [le Atua] o ona faailoga, i lona agalelei mai, ma foai mai o ua mai le lagi ia te i tatou, ma tausaga o fuata a le tau, ma ona ua faamalilie i o tatou loto i le mea e ʻai ma le olioli.”—Galuega 14:17.

11. I le ā le auala ua faasalafa atili ai le agalelei o le Atua na i lo le saunia o se aiga matagofie mo le fanau a tagata?

¹¹ Peitai ua lē gata mai le agalelei o le Atua i le faaauau pea ona saunia o sauniuniga matagofie, e faatumauina ai le ola, ia o loo tumu ai le lalolagi. Leai, na ia faia e sili atu i lena. Sa faaalia e Ieova lava ia lona nofo sauni e faamagalo agasala a le fanau a Atamu ma faaauau pea ona tausia ni faiā ma ē faamaoni o le fanau a tagata. O lenei vala o le agalelei o le Atua sa faatōai ane ia Mose ina ua folafola atu e Ieova faapea o le a faapogaia ‘lona agalelei uma e faaui atu i luma o fofoga o [Mose].’ Ona faalogoina lea e Mose o le taʻutinoga: “O Ieova, o Ieova, o le Atua alofa mutimutivale ma le alofa fua, e telegese lona toasa, a e tele le alofa ma le faamaoni; o lē tausi le alofa e oo atu i afe o tupulaga; o lē faamagalo foi i le amioletonu ma le solitulafono ma le agasala.”—Esoto 33:19; 34:6, 7.

12. O ā sauniuniga o le Tulafono faa-Mose na faaalia ai le agalelei o Ieova?

¹² I ona po o Mose, sa faavaeina ai e Ieova se faiga faaletulafono mo le nuu fou o Isaraelu, lea e ono mafai ai e ē agasala paʻivalea ona maua se faamagaloga lē tumau, pe faafaatusa mo agasala. E ala i le feagaiga o le Tulafono sa puluvagaina e Mose, na avea ai tagata Isaraelu ma nuu faapitoa o le Atua ma sa aʻoaʻoina i latou e ofoina atu ia Ieova ni taulaga eseese i manu e faapea ona togiola ai a latou agasala ma gaoioiga lē mamā. O lea, e ui lava i ni o latou uiga lē lelei atoatoa, ae sa ono mafai e tagata salamō o Isaraelu ona faaauau pea ona faalatalata atu ma talileleia e Ieova ma iloa sa faafiafiaina o ia i la latou tapuaiga. Sa faaleoina e le Tupu o Tavita, o se sui o lena nuu i lalo o le Tulafono, lona amanaia o le agalelei o le Atua i lenei itu: “Aua e te manatua aʻu agasala ina ou taulealea, ma oʻu solitulafono; a e tusa ma lou alofa ia e manatua mai aʻu, Ieova e, ona o lou [agalelei].”—Salamo 25:7.

13. Na saunia faapefea e Ieova se auala e sili ona uigā mo le faamagaloina o agasala na i lo o taulaga i manu?

¹³ A o faagasolo le taimi na uunaia ai e le agalelei o Ieova o ia e saunia se auala e sili atu ona uigā ma tumau mo le faamagaloina o agasala. Na faia lenei e ala i le taulaga a Iesu, o lē na tupuga mai i le Tupu o Tavita. (Mataio 1:6-16; Luka 3:23-31) Sa leʻi agasala Iesu. O lea, ina ua maliu o ia, sa telē le aogā o lona ola na foaiina atu faataulaga, ma na talia lea e le Atua e fai ma togiola e mafai ona faaaogāina mo le fanau agasala uma lava a Atamu. Na tusia e le aposetolo o Paulo: “Ua agasala tagata uma lava, ma ua le oo i le viiga mai le Atua; ua taʻuamiotonuina fua i lona alofa tunoa i le togiola e a Keriso Iesu, o le ua tuuina mai i luma e le Atua, o le e finagalo malie ai i le faatuatua i lona toto.”—Roma 3:23-26.

14. O ā faamoemoega matagofie ua faataulauina mo tagata e ala i le taulaga togiola?

¹⁴ O le faatuatua i le taulaga togiola a Iesu, e tele mea ua faataunuuina ai mo Kerisiano, e sili atu i lo mea na faia mo tagata Isaraelu e na taulaga i manu i lalo o le feagaiga o le Tulafono. Sa taʻitaʻia ai i se numera faatapulaa o Kerisiano ua taʻuamiotonuina ma ua avea ma tamafai e le agaga o le Atua e fai ma ona atalii. O lea ua avea ai i latou ma uso o Iesu ma ua mauaina ai le faamoemoe o le toe tutū aʻe o ni meafaiola agaga ina ia auai ma ia i lona Malo faalelagi. (Luka 22:29, 30; Roma 8:14-17) Manatu faalemafaufau i le faaavanoaina mai e le Atua o na faamoemoega faalelagi i meafaiola o loo ola i lenei paneta itiiti, le lalolagi! O loo totoe pea se vaega itiiti ua olioli i lenei faamoemoe. Ae mo le faitau miliona o isi Kerisiano, o le faaalia o le faatuatua i le togiola ua tatalaina ai le auala  latou te olioli ai i le mea na leiloa ia Atamu ma Eva—o le ola e faavavau i se lalolagi parataiso, e pei se faatoaga. Sa lē mafai e le feagaiga o le Tulafono lava ia ona aumaia ni faamoemoe faalelagi pe faalelalolagi mo ē na gauai atu i ai.

15. O le ā ua aofia ai i “le tala lelei”?

¹⁵ Maeu la le talafeagai ona taʻua o le feau e uiga i faatatauga fou ua faatulaga e le Atua e ala ia Iesu Keriso o le “tala lelei,” auā ua faaatagia ai le agalelei o le Atua. (2 Timoteo 1:9, 10) I le Tusi Paia, ua taʻua ai le tala lelei faapea o le “tala lelei o le malo.” I aso nei ua faaautū lea tala lelei i le upu moni faapea ua faavaeina le Malo i lalo o le taʻitaʻiga a Iesu ua toe faatuina mai. (Mataio 24:14; Faaaliga 11:15; 14:6, 7) Ae peitai, e tele ni mea ua aofia ai i le tala lelei. E pei ona faaalia i upu faatoʻā mavae atu ona sii mai a Paulo ia Timoteo, e aofia ai le iloa faapea na ofoina atu e Iesu le taulaga togiola mo i tatou. Ana aunoa ma lena taulaga, o le a lē taulau—la tatou faiā ma le Atua, lo tatou lava faaolataga—ae lē tāea ai le Malo o Iesu ma le 144,000 o tupu ma faitaulaga mai le lalolagi. Maeu la se faaaliga ofoofogia o le agalelei o le Atua o le togiola!

Le Agalelei o le Atua i Aso Nei

16, 17. Sa faapefea ona faataunuuina le Hosea 3:5 (a) i le 537 T.L.M.? (e) i le 1919 T.A.?

¹⁶ I le tepa taulaʻi atu i “aso e gata ai,” na lapatai mai le aposetolo o Paulo: “E avea tagata ma e . . . [e lē naunau i le agalelei].” (2 Timoteo 3:1-3) E oo foi i faailoaga masani o le agalelei, e pei o le limafoai ma le alofa i tuaoi, o le a lē talisapaia. Maeu la le faalaeiau, o le valoaga faamafanafana loto o le Hosea 3:5: “E toe foi mai le fanauga a Isaraelu, latou te saili ia Ieova lo latou Atua, ma Tavita lo latou tupu; latou te matatau foi ia Ieova ma lona agalelei i ona po e gata ai.”

¹⁷ Sa muai faataunuuina lenei valoaga i le 537 T.L.M. ina ua toe foi ane tagata Iutaia i le Nuu Folafolaina mai le tafeaga i Papelonia. I ona po nei, na amata lona faataunuuga i le tausaga e 1919 ina ua ō ese mai se vaega totoe o le Isaraelu faaleagaga nai le faalapotopotoga a Satani ma amata ai ona saili ma le naunautai mo Ieova ma lona agalelei. Na latou iloa sa pule “Tavita lo latou tupu” e ala i le tagata o Iesu Keriso i le mana faalelagi talu mai le 1914. I lalo o lana faatonutonuga faalelagi, na latou tauaveina ai ma le maelega le faalauiloaina o lenei tala lelei i nuu ese. O lea na amata ai ona latou faataunuuina le poloaiga ua faamauina i le Mataio 24:14: “E talaʻiina atu foi lenei tala lelei o le malo [ua faavaeina] i le atu laulau uma, e fai ma molimau i nuu uma; ona oo mai ai lea o le gataaga.”

18. O ai ua aufaatasi atu i le vaega totoe o le Isaraelu faaleagaga i le folafolaina o le tala lelei?

¹⁸ I aso nei, ua aufaatasi atu i le vaega totoe o ē faauuina le “motu o tagata e toatele,” o ē ua faapena foi ona alalaga i le agalelei o Ieova. (Faaaliga 7:9) I le taimi nei, e silia i le fa miliona i latou ua toe faaleoina atu le siufofoga o le agelu na vaaia e le aposetolo o Ioane i le faaaliga a o latou folafola atu i nuu uma: “Ia outou matatau i le Atua, ma avatu ia te ia le viiga, auā ua oo mai le itu aso o lana faamasinoga; ma ia outou ifo i le na faia le lagi, ma le fanua, ma le sami, atoa ma puna o vai.”—Faaaliga 14:7.

19. Taʻu mai se tasi o faamaoniga aupito sili o le agalelei o le Atua.

¹⁹ O se tasi o faamaoniga aupito sili o le agalelei o le Atua o lona faatagaina lea o i tatou e avea ma ana aumea faigaluega i lenei  galuega tāua ua tau faaiʻuiʻu. Maeu se faaeaga o le maufaatuatuaina mai ia i tatou o “le tala lelei silisili a le Atua manuia”! (1 Timoteo 1:11) E ala i lo tatou talaʻi ma aʻoaʻo atu i isi o lenei mea, ua tatou faaalia ai i se tulaga maualuga lena fua tāua o le agaga o le Atua, o le agalelei. O lea, ua ia i tatou ai le manatu o le auauna anamua a le Atua o Tavita, o lē na faapea mai: “Latou te taʻu atu lava le faamanatuga i lou [agalelei] tele lava; latou te alalaga fiafia foi i lau amiotonu.”—Salamo 145:7.

20. O ā faamatalaga atili e faatatau i le agalelei o le a talanoaina i le mataupu o loo sosoo mai?

²⁰ Ae peitai, pe o le auai ea i le talaʻiga o le tala lelei, na pau lea o le auala e faaalia ai le agalelei i o tatou olaga? E matuā leai lava! Ua faalaeiauina i tatou ina ia “faaaʻoaʻo . . . i le Atua, faapei o le fanau pele.” (Efeso 5:1) E matalasi auala ua folasia ai le agalelei o le Atua. O lea, e ao foi i lo tatou agalelei ona aafia ai vala e tele o lo tatou olaga. O nisi o na vala o le a iloiloina i le mataupu o loo mulimuli mai.

[Faaopoopoga i lalo]

E Mafai ona E Taliina?

□ O le ā le auala ua faaatagia ai e le foafoaga le agalelei o le Atua?

□ O ā faatatauga na faia e Ieova e faamagalo ai agasala a tagata salamō?

□ I le faataunuuga o le Hosea 3:5, o anafea na maua ai e le vaega totoe faauuina Ieova ma lona agalelei, ma o le ā na taʻitaʻia i ai lenei mea?

□ O le ā se tasi o faamaoniga aupito sili o le agalelei o le Atua i aso nei?

[Fesili mo le Suʻesuʻega]

[Ata i le itulau 9]

Ua aumaia e le foafoaga le faamaoniga o le faulai o le agalelei o le Atua

[Ata i le itulau 10]

O le faatagaina o i tatou e auai i le galuega talaʻi o se faamaoniga matilatila lea o le agalelei o le Atua