Pe E te Faafitia Faanaunauga Agasala?

“O LENEI, ua ou iloa peiseai se tulafono ua ia te au; pe a ou loto atu i le lelei e fai, ua ia te au le leaga. Auā ou te fiafia i le tulafono a le Atua i le tagata i totonu. A ua ou iloa le tulafono ese i oʻu tino, o loo tau le taua i le tulafono a loʻu mafaufau, ua fai foi aʻu ma tagata o taua i le tulafono a le agasala o loo i oʻu tino.”—Roma 7:21-23.

Sa manaomia e le aposetolo o Paulo le loto maulalo e taʻutino ai upu na e i luga. Ae i lona faia faapea, sa fesoasoani ai ia te ia e puipuia ona faanaunauga agasala mai le pulea o ia.

E faapena foi i Kerisiano moni i aso nei. Ina ua tatou maua le poto saʻo lelei o upu moni o le Tusi Paia, na tatou faia ai suiga manaomia i o tatou olaga, i le faatatau atu lea ia ōgatasi ma tapulaa a Ieova. E ui i lea, e tumau pea faanaunauga agasala, ona o le “leaga o manatu o loto o tagata e afua mai ina o tama iti.” (Kenese 8:21) Po ua lava lo tatou faamaoni e ioe ai i le iai ia i tatou o faanaunauga patino na e faamalosia omiga ia i tatou? Pe o le mea tatou te faafiti faapea e lē o ia i tatou ia faanaunauga, atonu i le faia o se faaiʻuga faapea, ‘O faafitauli nei e mo isi ae lē mo aʻu’?

O le faaseseina faapena o oe lava e faaono iʻu ai i le oti. O se tala faatusa faavae mai le Tusi Paia atonu o le a fesoasoani ia i tatou ina ia amanaia o tatou faanaunauga agasala ma taofia ai pea.

Aiseā e Oti ai pe a Faafitia

I taimi o le Tusi Paia, e tele aai sa puipuia e pa. O ala tatala—sa masani ona faia i laau—sa avea o se vaega e lē puipuia o pa pito i totonu o se aai; o le mea lea, sa aupito sili ai ona malosi le leoleoina. Sa faia e tagata na ʻaināina, le tele o ala tatala sa mafaia ona fai mo na o le feoaiga i le taimi o le filemu. O ala tatala na faia i laau, sa masani ona ufitia i uamea, e taofia ai mai le faaleagaina i le afi. Sa fausia olo i luga o pa ina ia mafai ai e tagata vaai sa leoleo ai i luga o ia olo ona iloa mamao atu le ō mai o fili.

Seʻi manatu nei la: O le ā o le a tupu pe afai e faafitia e tagata o ʻaināina le aai le lē malupuipuia o ala tatala o le aai, ma i lea ua lē lava saunia ai se puipuiga? O le a ono mafai e fitafita a fili ona ulu atu i le aai, ma oo ai i lona faatoilaloina.

O lea, e faapena foi i tatou. Ua silafia e Ieova o tatou manatu taitoatasi e lē o malupuipuia. “E le lilo foi se tasi mea na faia i ona luma, a ua taatia fua ma ua aliali mai o mea uma lava i lana silafaga, tatou te taʻu atu ia te ia a tatou amio.” (Eperu 4:13) Atonu foi o matauina e Satani ni faanaunauga agasala ia i tatou, pe agaʻi i le faauigaseseina o le upu moni, le ita vave, le naunau i amioga lē mamā faaleituaiga, le manao tele i mea faitino, faamaualuga po o se isi lava mea. Afai tatou te faafitia le iai o o tatou faanaunauga agasala, ua tatou faia ai lava la i tatou e sili atu ona lē puipuia i osofaiga a Satani i lo tatou faatuatua. (1 Peteru 5:8) E faaono mafai ona faatoilaloina i tatou a o uunai atu tuʻinanauga sese i tala atu o na o ni faanaunauga masani ma oo ina fanau mai ai le agasala. (Iakopo 1:14, 15) E manaomia ona tatou pei o Paulo, i le iloa lelei ma taʻutino ma le faamaoni o so o se ‘lē malu puipuia [ala tatala laau]’ atonu o iai.

Ia Faamalosia Oe Lava!

O le a lē aogā le faailoa mai o faanaunauga sese ae leai se mea o faia i ai. O le a pei lava le mea lenei o se tagata e vaavaai ia te ia i le faʻata, ma matauina vaipanoa e manaomia ona uaʻi totoʻa i ai, ona alu ese lea e aunoa ma le faia o faasaʻoga manaomia. (Iakopo 1:23-25) Ioe, e manaomia ona tatou faia ni gaoioiga e puipuia ai i tatou lava mai le faatoilaloina e faanaunauga agasala. E mafai faapefea ona tatou faia o lenei mea?

 I taimi o le Tusi Paia, sa masani lava i aai laiti po o “faoa aai,” ona leai ni pa e siomia ai. (Numera 21:25, 32; Faamasino 1:27; 1 Nofoaiga a Tupu 18:1; Ieremia 49:2) Sa ono mafai e ē na ʻaināina ia aai ona sosola atu i se aai e puipuia e pa pe a tupu mai so o se osofaiga a fili. O aai sa siosiomia e pa e faamalosi ai sa avea o se sulufaiga mo tagata i vaifanua sa siosiomia ai na aai.

Ua faamatala e le Tusi Paia Ieova le Atua o se olo, o se sulufaiga, o se pa o lē e mafai ona tatou sosola atu i ai mo le puipuiga. (Faataoto 18:10; Sakaria 2:4, 5) O lea, o Ieova o le puipuiga sili mo ana auauna. E matuā tatau ai lava la le tatalo faatauanau ia te ia. (1 Tesalonia 5:17) O le isi fesoasoani, o le Tusi Paia. O le faaaogāina o le Afioga a le Atua, ua lelei ai mo i tatou ona suesueina faapitoa na vaipanoa o loo tatou vaivai ai. E mafai foi ona tatou faataatia ese mo le toe suesueina, mataupu faavae mai le Tusi Paia na o loo feagai ma ‘mea o tatou vaivai ai [ala tatala laau]’ taitoatasi.

E pei foi o se tagata vaai i se olo, e mafai ona tatou iloa mamao atu le fili, ma gaoioi ai ma le tusa. Faapefea? E ala i le alofia o tulaga e faaono tatou fesagaʻi ai ma faaosoosoga po o omiga. Mo se faaaʻoaʻoga, o se tagata o loo galue ina ia onomea i lana inu i le ava malosi, o le a ia filifilia ma le atamai ina ia aloese mai nofoaga e faataga ai na ava malolosi pe faamalosia ai foi e inu.

O nei mea uma lava e manaomia ai se taumafaiga. Ae peitai, afai ‘na tuʻi le tino’ o le aposetolo o Paulo ina ia mafai ai ona ia tetee atu i faanaunauga sese, pe lē manaomia ai foi la e i tatou ona faia ni taumafaiga? O lena uaʻi atu ma le iloa lelei o o tatou faanaunauga agasala, o le a faaatagia ai lo tatou mulimuli atu i le taʻitaʻiga a le aposetolo o Peteru: “Ia outou finafinau ai lava ina ia maua outou e ia ma le manuia, ua le ponā, ma le le mataʻuleagaina.”—1 Korinito 9:27; 2 Peteru 3:14.

 Iloa Lelei ma Gaoioi

Aua neʻi loto vaivai pe afai, e lē mafai ona galo ese atu ou faanaunauga lē lelei atoatoa uma e ui lava i au taumafaiga. A o tatou lē lelei atoatoa pea, o le a iai pea faanaunauga sese e tele, e pei ona moni i le tulaga o Paulo. Ae manaomia ona faaauau pea ona tatou galulue ina ia faatoilaloina nei uiga, ina ia taofia pea ia uiga mai le fanau mai ai o le agasala.

Ae peitai, ia iloa lelei, le eseesega i le va o le talia o le mea moni i le lē lelei atoatoa, ma le faatagaina pea. E mafai ona faataʻitaʻia lena mea i se tamaloa o lē e iai i totonu o lona fatafata lona fatu ae vaivai. E ao ona ia faafesagaʻia lenei mea moni e ala i lona taumafai e tausia lona fatu i se tulaga lelei e mafai ona ia faamoemoe e faia i ai. E lē manatu o ia faapea, talu ai ona e vaivai lona fatu faaletino, o le a faapea foi la ona ia lafoai ese taofiofiga uma ma ola e tusa ai ma so o se mea e loto o ia i ai.

Ia iloa la, o lo tatou malosi e lē o faalagolago i le faafitia ma le tauaso o faanaunauga agasala ae i le iloa lelei o ia faanaunauga ma ia gaoioi faasaga i nei uiga. O lea, aua le fefe e talia e oe lava ma taʻu atu ia Ieova itu uma o faigofie ona tofotofoina ma omia ai oe. E lē manaomia ona e manatu faatauvaa ia te oe i le faia ai faapea, o le a lē faaitiitia ai foi le alofa o Ieova mo oe. O le mea moni, a o sili ona e lalata atu i le Atua i le matuā manatu mamafa mo lana faamaoniga, o le a sili ai foi ona ia matuā latalata atu ia te oe.—Iakopo 4:8.

[Ata i le itulau 24]

O lenei faatusa o Mekito ua faaatagia ai ala tatala ua faamalosia ma pa e fai ma puipuiga o aai anamua

[Ē Ana le Ata]

Pictorial Archive (Near Eastern History) Est.