Soifua Maloloina ma le Fiafia—E Mafai Faapefea ona E Maua?

UA LEVA ona iloa e le tagata se sootaga vavalalata i le va o le soifua maloloina ma le fiafia. Na taʻua e Hippocrates, o lē sa manatu i ai “o le tamā o vailaau,” e faapea: “E ao i se tagata poto ona manatunatu faapea, o le soifua maloloina o le mea aupito silisili lea o faamanuiaga o le fanau a tagata.” Sa matauina e se fai filosofia Siamani o Arthur Schopenhauer e faapea: “O fili e lua o le fiafiaga faaletagata, o le tigā ma le fiu.”

I le tusi Anatomy of an Illness as Perceived by the Patient, na taʻua ai e Norman Cousins se mea na tupu ia te ia i le faaaogāina o le ʻata e tau ai ma le maʻi o loo faamataʻuina ai lona ola i le lumanai. Sa ia manatu faapea ua ala ona toe malosi o ia ona o le iʻuga o lona matuā ʻata e gaeʻeeʻe uma ai lona manava i le olioli a o ia matamata i ata komi. Ua amata e fomaʻi popoto ona iloiloina se aogā e mafai ona maua mai i na ituaiga o vailaau ua taʻua o endorphins, ma e faamatuu atu i totonu o le tino pe a tatou toē. I lea, ua mafai ai ona tatou iloa le atamai o le faataoto faagaeeina: “O le loto fiafia, e fai ma vailaau aoga lea.”—Faataoto 17:22.

Ae, ona ua iso, ua iloa ai e tagata suesue faapea e lē tau manaomia le soifua maloloina lelei e faamaonia ai le fiafia, auā e toatele tagata soifua maloloina e lē o maua le fiafia. O suesuega sa faavae i tali na tuuina mai i fesili na fesiligia ma faatalanoaga o tagata e sili atu i le 100,000, na taʻitaʻiina atu ai Jonathan Freedman e faia se faaiʻuga sa lē faatalitalia faapea, e sili atu i le 50 pasene o ē na faanoanoa i o latou olaga, o i latou ia sa matuā soifua maloloina i le amataga.

 Soifua Maloloina ma le Fiafia—I se Otootoga

O fea la o le a tatou vaavaai i ai mo le tuufaatasia o le soifua maloloina ma le fiafia lea e faigata ona maua? Na aumaia se malamalamaaga e naunau i ai i senituri ua mavae e Confucius e faapea: “E tumau le malo lelei pe a faafiafiaina i latou o ē o latalata ane, ma o i latou o ē o mamao ese, e tosina mai i ai i latou.” I le latalata mai lava i o tatou taimi, na folafola mai ai e se tagata poto o Thomas Jefferson faapea, e na o le pau lava le sini a le malo o le “puipuimalu o le tulaga aupito silisili o le fiafia ua mafai ona maua e le anoanoai o tagata lautele o ē ua aufaatasia ai i lalo o lana pulega.”

O le mea moni, ua faaalia i ni sailiiliga totoʻa faapea o le tali mulimuli i le sailiga a le fanau a tagata mo le soifua maloloina ma le fiafia ua taulaʻi moni atu lea i le mea e tasi—o le malo.

I le faagasologa o tausaga, ua vaavaai atu ai tagata i inā—i le malo—mo lo latou fiafia. Mo se faaaʻoaʻoga, ua aofia ai i le Taʻutinoga o le Tutoatasi o le Iunaite Setete nei upu taʻutaʻua: “Ua matou taofia nei upu moni e avea o ni faamaoniga ia i matou lava, faapea o tagata uma lava na foafoaina e tutusa, faapea na tuuina e Lē na Foafoaina i latou nisi o Aiā e lē ese mai, e aofia ai i nei le Ola, Saolotoga ma le sailiili i le Fiafia.” Ia matau lelei o le malo na faamoemoe i ai na ia folafola atu i ona tagatānuu le na o le aiā e sailiili ai i le fiafia. E tusa ai ma le manatu i le soifua maloloina, e faamalo atu ai i le tele o faiga malo na faatinoina polokalama ina ia faaleleia le soifua maloloina o o latou tagatānuu. Ae ua faamaonia pea lava le faigata ona maua e le toatele o tagata lautele le soifua maloloina lelei.

Ae faapefea se malo na te folafolaina mai le saunia o ni mea e sili atu? Ae faapefea pe a ia folafola mai e lē gata i le sailiili o le fiafia ae o le fiafia lava ia? Ma e faapefea pe a na folafola mai, e lē o le inisiua o le soifua maloloina lelei, ae o le soifua maloloina lelei lava ia? Pe o le a e lē olioli ea faapea o le malo lenei ua iai le ki mo le sailiga a le fanau a tagata mo le soifua maloloina ma le fiafia?

E toatele i aso nei atonu ua manatu faapea o lenei mea ua na o se miti e lē o se mea moni, ae o se malo faapea, na valoia moni mai lava ma faamatala mai i ni auiliiliga. E mafai ona tatou maua ni faamatalaga maufaatuatuaina i le Tusi Paia, ma o le pulega o le Malo faa-Mesia o le Atua.

Le Malo, po o le Pulega, a le Atua

E masani ona tautala le Tusi Paia e uiga “i le malo o le Atua.” Ae po o le ā lea mea? Ua faamatalaina e le Webster’s New World Dictionary of the American Language le “malo” o se “pulega po o se atunuu e faauluulu ai se tupu po o se masiofo [tupu tamaitai].” I se faaupuga faigofie, o le Malo o le Atua o se pulega, o se pulega tautupu e faauluulu i le Alo faauuina ma le Tupu a le Atua, o Iesu Keriso. O le ā lava le tāua o lenei malo i le fuafuaga a le Atua? Seʻi tuu atu e tali mai i upu a Iesu: “A ia outou muai saili le malo . . . E talaʻiina atu foi lenei tala lelei o le malo i le atu laulau uma . . . E tatau ona ou folafola le tala lelei o le malo o le Atua . . . auā o le mea lea na auina mai ai aʻu. . . . Talu ai ia ona po ua folafolaina le tala lelei o le malo o le Atua, ua taufaoa foi e tagata uma.”—Mataio 6:33; 24:14; Luka 4:43; 16:16.

E sili atu i le faaselau ona faaaogā le upu “malo” i faamatalaga faa-Evagelia i le soifuaga o Iesu, i nisi taimi e matuā patino mai lava i le fesootai atu ma le soifua maloloina ma le fiafia. Ia matau le Mataio 9:35: “Ua faataamilo Iesu i aai uma ma faoa aai, ua aʻoaʻo i o latou sunako, ma talaʻi i le tala lelei o le malo, ua ia faamalolo foi i maʻi uma, ma maʻi tiga uma o le nuu.” E ui lava sa faafesootai e Iesu le maua o le soifua maloloina lelei ma ana aʻoaʻoga e uiga i le Malo, ae ao ona tatou matauina faapea o lona faamaloloina o maʻi sa faatulaga lua i lana talaʻiga ma le aʻoaʻo atu. Sa lauiloa o ia ‘O le Faiaʻoga,’ ae lē o “Lē Faamalolo.” (Mataio 26:18; Mareko 14:14; Ioane 1:38) Sa leʻi uaʻi muamua atu o ia i le faamaloloina o tagata po o le tausia o ē mamaʻi. O le mea muamua sa manatu mamafa pea i ai, o le Malo. E ala i le tausia o maʻi o tagata, na ia faaalia ai le matuā tele o lona alofa mutimutivale ma na faaalia ai foi sa iai ia te ia le lagolagosua tauatua.

O faamalologa a Iesu sa avea foi o se uluai vaaiga o le toe faafoisia mai o le soifua maloloina faaletagata lea o le a ia faataunuuina pe a faatinoina e le Malo o le Atua le pule atoatoa i le  lalolagi. Ua faamalosia lenei e le vaaiga lena o loo faamatalaina i le Faaaliga 22:1, 2, NW: “Ona faaali mai lea e ia ia te au le vaitafe manino o le vai o le ola, e manino e pei o le maa tioata, ua tafe ifo mai le nofoālii o le Atua ma le Tamai mamoe agaʻi i le moa o lona ala tele. Ma i itu taitasi o le vaitafe, sa iai laau o le ola ua fua mai i fuata e sefululua, e taitasi le masina ma fua mai o latou fua. O lau foi o laau sa faamaloloina ai nuu.”

Ae o fea o le a mafai ai ona tatou olioli i lenei mea? E pei e foliga mai e faigata ona talitonuina le faatalitalia o sea faamalologa ofoofogia e tupu i le lalolagi. Ae peitai, i le manatua o upu a Iesu atonu sa e talanoa atu ai i le tatalo: “Ia oo mai lou malo. Ia faia lou finagalo i le lalolagi, e pei ona faia i le lagi.”—Mataio 6:10.

O lea la, o lo tatou faamoemoe moni, maufaatuatuaina mo le soifua maloloina lelei ma le fiafia i le lumanai, ua taatia atu nei i le Malo Faa-Mesia o le Atua. Ae ui i lea, o loo tumau pea se fesili.

Pe Mafai ona Tatou Olioli Nei i le Soifua Maloloina ma le Fiafia?

E oo lava i le taimi nei, o a tatou mataupu silisili faale-Tusi Paia ia o loo mulimuli mai o le a faaono mafai ai e i tatou ona olioli i se fua sili ona telē o le soifua maloloina, faatasi ai ma le fiafia faateleina. E pei lava ona faasino mai pea i itulau o lenei mekasini, o i latou o ē faatatauina le Tusi Paia i o latou olaga i aso fai soo e masani lava ona puipuia i latou mai faafitauli o le soifua maloloina ua iʻu i ai ona o feusuaiga lē mamā, ulaula, inu tele, ma le faaaogāseseina o vailaau oona. Ua latou tofo foi i aogā o se olaga toʻafilemu ma faiā sili ona lelei ma aiga ma isi.

E ui i lea, ua uma ona tatou iloa faapea, o le maua o le soifua maloloina lelei e lē iʻu ai i le fiafiaga e faavavau. O le ā la e manaomia mai ia te oe ina ia e olioli ai i se fua e sili atu ona telē o le fiafia?

I le sailiiliga na uluai taʻua, sa matuā iloilo totoʻa ai e Jonathan Freedman lena fesili. Sa ia vaai i vala e pei o le “Alofa ma Faiga Faaleituaiga,” “Talavou ma Ē Matutua,” “Tupe Maua ma Aʻoaʻoga,” e oo lava i “Aai ma Atunuu.” Atonu o le a faaosofia ai lou naunau i le iloa faapea sa ia iloa, faapea o nei vala sa itiiti lava ni iʻuga lelei na faia ai i le mauaina e se tasi o le fiafiaga sili. Mo se faaaʻoaʻoga, i le siitia mai o faataʻitaʻiga a tagata o ē sa matuā tele lava a latou mea faitino ae sa tumau pea ona lē maua le fiafia, na ia faaiʻu mai ai faapea: “Ua tatou vaai i lena mea e peiseai o se mea e ofo ai, ona ua lē o le tupe maua po o le aʻoaʻoga e foliga mai ua mafai ona maua ai le fiafiaga sili.”

O ana faaiʻuga na toe faaleoina mai ai upu a se tusitala poto o le Tusi Paia, le aposetolo o Paulo, o lē na faapea mai: “Ua aʻoaʻoina aʻu, ia malie loʻu loto i so o se mea ua ia te aʻu.” (Filipi 4:11, King James Version) Ua manatua ai foi upu a Iesu: “Ia outou mataala ma ia leoleo faasaga i ituaiga uma lava o matapeapea, auā e tusa lava pe tele mea ua maua e se tasi, na te lē maua ai lona ola i mea ua ia te ia.” —Luka 12:15, NW.

E moni, na maua e Polofesa Freedman lenei mea: “I le mavae atu o lea taimi ma lea taimi, a tatou vaavaai i faamatalaga mai tagata e lē fiafia o ē foliga mai sa latou maua mea uma, ua tatou iloa ai ua latou faapea mai sa lē uigā ma leai se taʻitaʻiga i o latou olaga.” Na ia faaopoopo mai: “Ou te tau faatalatū e soona tautala i lenei mea, ae foliga mai o ʻoa tāua faaleagaga e taaʻina ai faalogona o se tasi agaʻi i le mea moni, ae i se isi itu o le lē maua o nei mea e oo ina sili ona faaoonaina pe faavaivai ai foi mai isi mea uma lava.”

I o tatou aso ua tatou vaaia ai faamaoniga o le moni o nei manatu. Seʻi vaavaai ane i ou autafa. Pe e te lē o iloa ai ea toetoe lava o tagata uma—o nisi e itiiti a latou mea faitino, o nisi e tele—ua latou tulituliloa le fiafia ae lē tele so latou olioli o maua ai? E moni, ua fiu nisi ma ua faamavae atu i le faiga o mea o iai nei ma ua na ona nonofo ai lava ma le tigā e aunoa ma se upu, ae toatele ua ola e pei ona iai i se mea taavili ua na o le taavilivili lava, e tulituliloa le fiafia ae lē o matuā maua le mea o latou tuliloaina. Ua faaipoipo nisi ina ia maua le fiafia, e tusa lava pe ua tatalaina le faaipoipoga a lo latou tuaoi ona o le sini lava lea e tasi. Ua matuā faatigaina tino ma faalogona o isi i galuega, ae o loo iai pea isi ua tuua galuega ae ō atu i a latou malologa uumi ma atonu foi e taugatā. O loo sailia e tagata uma lava le iʻuga lava lea e tasi e faigata ona maua, ina ia soifua maloloina ma fiafia. Pe ua latou  maua ea? Pe ua e maua ea lena mea?

Lou Soifua Maloloina, Lou Fiafia

O le mea moni, e mafai ona e maua i le taimi nei se fua sili ona telē o le soifua maloloina ma le fiafia. E faapefea?

E mautinoa o se mea poto le taumafai e tausia lou soifua maloloina i se auala paleni, e pei o le faatatauina o fautuaga aogā mai le Tusi Paia. O le a fesoasoani foi lea e manatu ai i ai o se mea moni lava. E aofia ai i lena le iloa lelei faapea atonu e oo mai maʻi i o tatou tino lē lelei atoatoa, peitai o le a lē lofituina ai i tatou pe a tutupu mai na mea. Atonu e manaomia ai i lenei mea nisi taumafaiga atili ina ia tausia se vaaiga mautinoa a o tatou taulaʻi atu i le folafolaga e uiga i le soifua maloloina lelei i le lalolagi fou o loo sau.

I le iloa po o iai i se tulaga talafeagai lou fiafia i le taimi nei, ia fesili ifo ia te oe lava i fesili nei: 1. Po o mafaia ona ou pulea loʻu lava olaga? 2. Pe o muamua ona ou filemu ia te aʻu lava ma i latou o siosiomia ai aʻu? 3. Pe masani ona ou lotomalie i mea ua faataunuuina e loʻu olaga e fuafua i le malamalamaga o le Tusi Paia? 4. Po o olioli loʻu aiga ma aʻu ina ua mafai ona auauna i le Atua?

I le tulaga sili, o i tatou lava e faia le filifiliga. O le toatele lava o i tatou atonu i le amataga e maloloina lelei lava, ma ua iai foi ia i tatou le aiā e fiafia ai. Ae tatau ona ia i tatou ni sini faaleagaga ma ia galulue i ai ina ia maua ia sini. Ia manatua upu a Iesu: ‘O le mea ua iai lau ʻoa, e iai atoa foi ma lou loto.’ (Mataio 6:21) Ma e iai sa tatou mafuaaga faavae i le Tusi Paia e tulimatai atu ai agaʻi i luma mo le soifua maloloina ma le fiafiaga e sili atu i lalo o le pulega lelei atoatoa a le Malo faa-Mesia. Ona mafai ai lea i le taimi o le pulega a le Malo ona avea le soifua maloloina atoatoa ma le fiafia ma ā tatou.

[Ata i le itulau 7]

O tagata fiafia e fiafia e fetufaʻi ma isi lo latou faamoemoe mo le soifua maloloina lelei atoatoa