Soifua Maloloina ma le Fiafia—Pe Mafai ona Avea ma Āu?

AO IAI pea tane ma fafine lē lelei atoatoa, ua leva ona latou moomoo mo le soifua maloloina ma le fiafia. E ui o nei mea e lua e mautinoa lava o nisi ia o faanaunauga faaletagata aupito sili ona tāua, ae ua faamaonia le faigata ona maua.

Na tuuina atu e tagata le tele o manatu ma ofoina atu le tele o fautuaga i lenei sailiga. Na matauina e Dr. Dennis Jaffe e faapea: “I aso nei, o le ki mo le faatumauina o le soifua maloloina ma le faamaloloina e masani lava ona taatia atu lea i lau lava amio.” Na faapea mai Abraham Lincoln i se tasi taimi: “E matuā fiafia lava tagata pe a tuu atu ia i latou lava e filifili i le mea latou te mananao i ai e fai.” E te ioe i lea manatu? O le ā le tele o e faanaunau ai i le fiafia? O le ā le tele e maua mai i le mauaina o le fiafia, e faalagolago i le maua o le soifua maloloina lelei?

Ua vaavaai solo tagata i so o se mea mo le fiafia, i le mulimuli atu i ni taʻitaʻiga e foliga mai e leai ni taunuuga. Ua latou suesueina le faafilosofia, suesuega tau i le mafaufau, ma le suesueina o mea tau i fesili faigata ua lē mafai ona taliina. I la latou sailiga mo le fiafia, ua tofo ai nisi i le aʻoaʻoina o le faasaienisi, le aʻoaʻoina o tomai eseese, ma musika. Ae itiiti lava le masalosaloga faapea, o le vaega sili o le fiafiaga moni e fesootai atu lea ma le maua o le soifua maloloina lelei. Fai mai se faasalalauga faapisinisi lauiloa i televise: “Afai e te maua lou soifua maloloina, ua e maua toetoe lava o mea uma.”

I le tuliloaina o lenei auala e maua ai le fiafia, e toatele tagata ua latou suesueina aʻoaʻoga eseese masani po o le 1ē masani tau i le soifua maloloina. Toeitiiti lava o so o se faletusi mo le lautele ua faaalia ai le leai o se mea e gata mai ai le tele o fua o meaʻai paleni ma ituaiga o togafitiga. “E tele tusi ua tusia faatatau i le soifua maloloina, e amata mai lava i taimi anamua,” na taʻua ai e se tagata poto faapitoa o le fatu o Dr. Paul Dudley White. “O se tasi o tusi sa aupito sili ona lelei o le Regiment of Helthe na tusia pe tusa o le afe tausaga ua mavae.”

E ui lava i nei mea uma, ae o le sailiga mo le soifua maloloina ma le fiafia ua avea o se mea  ua faanoanoa ai le toatele o le fanau a tagata. Pe e te ofo ai i lenei mea, i le manatu i le maeu o le agaʻi i luma atonu ua oo i ai lo tatou tupulaga o le malamalama? E manino lava, ua lē mafai e le faasaienisi ona faaiʻuina maʻi, tagata matua, ma le oti.

Ae po o le a e ofo atili ea i le iloa faapea e oo lava i lenei taimi tatou te lē o maua se auala e fuafua ai le fiafia ma e leai se faamalamalamaga lelei po o le ā lea mea? I se lauga na talanoaina ai “Manatunatuga i le Fiafia,” na faaiʻu mai ai Pierre Teilhard de Chardin e faapea: “Mo le tele o senituri, sa avea ai lenei mea ma mataupu i le tele o tusi, suesuega, iloiloga a vaega ma tagata taitoatasi, a lea tagata ma lea tagata; ma, e faanoanoa lava e fai atu ua matuā lē taulau atoatoa lava e ausia le lotomalie. Mo le toatele o i tatou, i le iʻuga, e na o le pau lava le faaiʻuga aogā na maua mai lena talanoaga atoa e faapea, e leai se aogā e faaauau ai le sailiga.”

Po o lou lagona lena e uiga i le fiafia? Ia fesili ifo ia te oe lava i ni fesili totino ae ia faamaoni. Pe o e fiafia moni i le taimi nei? Pe na o le lagi e mafai ona maua ai le fiafiaga moni? Pe o iai se faamoemoe mautinoa faapea e mafai ona tatou maua le soifua maloloina ma le fiafia, ma oo lava ina maua nei mea i inei lava i luga o le lalolagi?