Ua Matuā Faatumuina i le Tala Lelei

SA IAI le aposetolo o Paulo i se tulaga faigata, o se mea ua iloa lelei e Molimau a Ieova o ē ua avea o faifeau galulue faataimi atoa—sa vaivai lava lona tulaga tau tupe. O lea, i Korinito sa ia faia ai se galuega faatauvaa o le faia o faleʻie, o se matātā faapitoa sa ia aʻoaʻoina a o talavou. Sa faigata le galuega, ma i nisi taimi sa lavelavea ona lima i le talatalaina o manoa o le faleʻie. O tupe na maua mai ai sa mafai ona lava mo na o meaʻai ma mea e lavalava ai, ae sa lotomalie o ia, auā pe a uma lana galuega masani i aso taitasi, sa ia tuu ese mea faigaluega o lana matātā faapitoa, ae fai le mea na sau ai i Korinito auā o le mea muamua lava—sa ia talaʻi atu le tala lelei!—Filipi 4:11, 12.

Pe a oo i le Aso Sapati, ona alu atu ai lea o Paulo i le sunako. E moni, i le taimi muamua sa faalatalata atu ai Paulo i lana au faalogologo i Korinito “ma le vaivai, ma le mataʻu, ma le gatete tele.” (1 Korinito 2:1, 3) Ae i le faagaeetia i le tali mai a nisi i lana feau, na faaauau ai ona alu atu Paulo “ua lauga foi o ia i le sunako i lea sapati ma lea sapati, ma pulunaunau atu ia Iutaia atoa ma Eleni.”—Galuega 18:1-4.

E ui i lea, mo sina taimi, sa lē mafai e Paulo ona fai atili nisi mea e sili atu na i lo o le talaʻi faavaitaimi. Ona ō mai ai lea o Sila ma Timoteo mai Maketonia ma se meaalofa na foai mai i le agalelei o le au uso lena ‘sa matuā lagolagosua i lona lē tagolima.’ (2 Korinito 11:9; Filipi 4:15) O se mea faamalosi loto foi le tala faapea o loo tumau pea uso i Tesalonia e ui lava i sauaga.—1 Tesalonia 3:6.

O le ā le iʻuga na oo ia Paulo? “Ona amata lea ona matuā faatumuina Paulo i le upu [“tuutoina lona taimi atoa i le talaʻiga,” Jerusalem Bible; Today’s English Version], i le molimau atu i tagata Iutaia e faamaonia ai o Iesu o le Keriso.” (Galuega 18:5, NW) Ina ua mapu mai omiga tau tupe mo sina taimi, sa lē mafai ona malōlō Paulo seia oo ina toe foi atu i le talaʻiga faataimi atoa. Sa ia toe foi atu ma le aasa i lenei galuega tāua, e lē gata i le talaʻi atu i tagata Iutaia ae sa oo foi ina faaalu se taimi e tusi ai le uluai tusi o ana evagelia faagaeeina—le tusi lea i tagata i Tesalonia!

O se Faaaʻoaʻo mo i Tatou i Aso Nei

O le faamaumauga o le galuega fitā a Paulo i Korinito sa faasaoina ina ia faalaeiauina ai Kerisiano uma lava ia tinoū i le faatumuina o i latou i le tala lelei. Sa iloa e Paulo faapea na tuuina mai e le Alii o Iesu lava ia i ona soʻo le mamalu maualuga o le avea ma “malamalama o le lalolagi.” E lē tatau la ona latou natia lenei malamalama. Na taʻu atu e Iesu ia i latou: “Ia faapea ona pupula atu lo outou malamalama i luma o tagata, ina ia latou iloa [a outou galuega] lelei, latou te vivii atu ai i lo outou Tamā o i le lagi.” (Mataio 5:14-16) O le uiga o lenei mea o le faia lea o se sao atoatoa i le galuega talaʻi na valoia e Iesu. (Mataio 24:14; 28:19, 20; Galuega 1:6-8) O le talaʻiina o lenei tala lelei o le Malo o le pogai sili lea o le iai o le faapotopotoga Kerisiano.

Sa matuā uigā i uluai Kerisiano pei o Paulo lenei galuega talaʻi. I lea, pe afai e manatu fili o le Atua faapea ua latou tineia lenei malamalama moni e ala i lo latou fasiotia ma le lē alofa o “le Sui Sili o le ola,” sa faaauau pea e ona soʻo ona avea o le malamalama o le lalolagi, i le talaʻi atu ma le maelega. (Galuega 3:15, NW) E oo lava i sauaga e leʻi taofia ai a latou taumafaiga. Fai mai le faamaumauga a le Tusi Paia: “Ua le mapu foi i latou i aso uma ona aʻoaʻo atu, ma talaʻi atu i le malumalu, ma lea fale ma lea fale le tala lelei ia Iesu Keriso.” (Galuega 5:42) E leai se mea na mafai ona taofia mai ai i latou!

 I aso nei, ua faapena foi ona matuā faatumuina Kerisiano i le galuega talaʻi. I le agaʻi atu i le faaiʻuga o le senituri lona 19, sa amata ai ona iloa e tagata aʻoga matuā faaeteete o le Afioga a le Atua le manaomia ona fetufaʻi upu moni o le Tusi Paia ma isi. Sa faavaeina ai faaletulafono i le 1884 se faalapotopotoga faavaomalo le Zion’s Watch Tower Tract Society. O nei Tagata Aʻoga o le Tusi Paia, ua lauiloa o Molimau a Ieova talu mai le 1931, ua latou matuā faatumuina moni lava le lalolagi i le poto i le Afioga a le Atua. O la latou galuega filigā ua iʻu ai i le iai o se ʻautau tele e sili atu i le fa miliona le malosi! Ma e leai se masalosalo o le a faaauau pea ona faatoateleina lo latou faitau aofai i lalo o le taʻitaʻiga a Ieova.—Isaia 60:22.

Pe o E Faia Lau Vaega?

Na fetalai Iesu: “E tele le saito e seleseleina, a o le au fai galuega e toaitiiti ia.” (Mataio 9:37, 38) I le 1990 toetoe lava sefulu miliona tagata na auai i le Faamanatuga o le maliu o Keriso. Maeu se faamoemoe ofoofogia ua iai mo se faatelega i le seleselega i le lalolagi aoao! Ae a o olioli i lenei faatelega o loo faia pea, e tatau ai i tagata taitoatasi ona fesili ifo ia te ia lava, ‘O le ā le tele o faia ai soʻu sao i lenei galuega sili? Po o oʻu faia e lē aunoa—i vaiaso uma pe afai e mafai?’

O toeaina e tatau ona taʻimua i lenei galuega e fai ma “faaaʻoaʻo i le lafu mamoe.” (1 Peteru 5:3) E moni, o le tele o toeaina e faigaluega i a latou galuega masani. Sa faapena foi le aposetolo o Paulo a o iai i Korinito. Ae sa ia faataatia ese se taimi mo le galuega talaʻi e lē aunoa. E toatele foi toeaina ua faapena ona matuā faatumuina i gaoioiga faaleagaga i faaiʻuga o vaiaso. O lenei mea e mafai ona maua ai se āuga matuā malosi ma faalaeiau i tagata uma lava o le faapotopotoga. I nisi o masina pe a faia ni tauiviga faapitoa, e tele lava faapotopotoga e auai le toatele o a latou tagata talaʻi i le auaunaga paeonia. O le mealilo? Ona e taʻimua le au toeaina i le talaʻiga atoa ma le faamaopoopoina o faatatauga mo le auaunaga i le fanua.

O auauna o le faiva e mafai foi ona avea ma taaʻiga mamā i le faapotopotoga pe afai latou te faia e lē aunoa se sao i le auaunaga i le fanua. Ia manatua, e manaomia e le Tusi Paia i latou ina ia “uigā, . . . o tane o ē auauna ma le amio lelei.” (1 Timoteo 3:8, 13, NW) O le faamaoni i le auaunaga i le fanua e matuā manaomia ina ia taʻuagavaaina ai e avea o se toeaina po o se auauna o le faiva.—Tito 1:8, 9.

I le pei o Paulo, ua mafai e nisi ona faaitiitia galuega masani ma i lea, ua avea ai ma paeonia. Na faateleina le fuainumera o paeonia sauatoa, lagolago, ma paeonia faapito mai le 137,861 i le na o le sefulu tausaga ua mavae, i le 536,508 i le 1990. E mautinoa, e na o le faamanuiaga lava ma le faamaoniga a Ieova na mafai ai ona aumaia lenei faatelega. E ui i lea, e tatau i paeonia ona faaeteete ina ia faaaogā ma le atamai le taimi, ae ia lē na o  le faitauina o itula e tele auā se lipoti lelei. Paeonia e, pe o outou sauniuni lelei ma uigā i le faiva? Pe o tou tauivi ina ia faia pea ni faaleleiga ina ia fuatele moni mai ai la outou faiva?

Taui o se Faiva Paleni

Pe e te talisapaia faamatalaga e maua ai le ola o loo aumaia i masina taitasi i Le Olomatamata ma lona soa o le Awake!? E lē taumatea o loo e faia faapea. Pe ua uunaia oe e lou talisapaia ina ia fai se sao i le tufatufaina atu o nei mekasini? Sa faia faapea e se tasi tuafafine i Botswana. Sa muai tetee o ia i le upu moni, ae sa faitau atu ia te ia e lana tane mekasini. I se taimi, na suia ai lona loto ma oo ai ina avea o se Molimau. E ui lava sa lē iloa faitau ma tusitusi, ae e matuā manuia tele o ia i le tufaina atu o mekasini, i le faapea atu, “Ou te lē iloa faitau, ae e faitau mai e laʻu tane ia te aʻu nei mekasini. Ou te olioli ai lava i ai, ma ou te mautinoa o le a faapena foi oe.”

Aiseā e lē fai ai sou sao faalevaiaso i lenei galuega faasaoola? O le taimi lava e te maua ai agavaa faaleagaga, o le a fiafia loa lava le faapotopotoga Kerisiano e fesoasoani atu ia te oe ina ia e amata ai. Ae peitai o le tufaina atu o mekasini ua na o se taualumaga lea e tasi o le auaunaga. So o se tasi e matuā faatumuina i le tala lelei e taumafai e faia se faiva paleni. Mo se faaaʻoaʻoga, ua lomia ma faasalalauina e le Sosaiete o le Olo Matamata le faitau miliona o tuufaatasiga o tusi, ma ua ofoina atu nei tusi i tagata lautele e avea o se puna sili ona tumau o meaʻai lelei faaleagaga. Pe ua lava lou tomai i lau faiva e tufa atu ai tusi, e pei o le E Mafai ona E Ola e Faavavau i Parataiso i Le Lalolagi?

Ma e faapefea tagata o ē faaalia le naunau? Pe o e tausia ni faamaumauga lelei ina ia toe faia ai ni toe asiga ia i latou? O na asiasiga e faaono taʻitaʻiina atu ai i le taualumaga o le auaunaga lena e aumaia ai le olioli sili i mea uma lava—le galuega o le faia o suesuega faale-Tusi Paia i aiga. Ia manatua, na poloaiina i tatou e Iesu i le Mataio 28:19, 20 ina ia ‘faia soʻo, ma papatisoina i latou.’ O le uiga o lena mea ia suesue le Tusi Paia ma i latou. E moni, o le amataina o se suesuega e masani lava ona manaomia ai le maumauai. Sa feiloai se tasi Molimau ma se ulugalii matutua o ē na matuā malilie e faia se suesuega faale-Tusi Paia. Ae tolu vaiaso sosoo o la tolopō pea le suesuega. Mulimuli ane ona amata loa lea o le suesuega. Ae mo sina taimi, na taofi ai e le ulugalii le suesuega toetoe lava i vaiaso uma. E ui i lea, i le iʻuga, na agaʻigaʻi i luma le avā e oo atu i le tulaga na papatisoina ai. “Ina ua uma ona papatisoina,” ua manatua ai e le uso faapea, “sa faatumulia ona mata i loimata o le fiafia, lea na aumaia ai loimata o le fiafia ia te i maʻua uma ma laʻu avā.” Ioe, o le matuā faatumuina i le tala lelei e aumaia ai le olioli e lē mafaamatalaina!

Ia Faaavanoa Oe e Oe Lava!

Ua faataatia e Iesu Keriso ma le aposetolo o Paulo ni faaaʻoaʻoga lelei o le tuutoina ina ia faataʻitaʻi i ai. Ma e tele faaaʻoaʻoga sili ua tatou maua i totonu o Molimau a Ieova i aso nei. Ua lava ma totoe le taimi mo i latou uma o ē iloa le tala lelei ina ia matuā galulue tiotio ai e faailoa atu i isi. Ua faamautinoa mai e le Tusi Paia ia i tatou faapea “e le se mea faaleaoga” galuega faapena.—1 Korinito 15:58.

I le pei o Paulo, e toatele e iai tiute tauave tau tupe e ao ona faafetaiaʻia. Ona o lenei mea, ua lē mafai ai e le toatele ona paeonia. Ae faatasi ai ma le fesoasoani a Ieova, ua mafai ai e tagata uma ona mulimuli i le fautuaga lelei ua aumaia i le Roma 12:11, NW: “Aua le faifaiaga i lau galuega. Ia pupula i la le agaga. Ia auauna mo Ieova.” Ma afai e suia tulaga ina ia faatagaina ai le taimi e sili atu e faaalu i le auaunaga a Ieova, so o se tasi lava la e alofa moni ia Ieova, o le a pei o Paulo, na te puea le avanoa lea. Ia matuā faatumuina i le tala lelei! O le faia faapea o le a lē gata ina aumaia ai faamanuiaga i le taimi nei, ae i le lumanai o le a iʻu ai i le ola e faavavau faatasi ma le olioli ma le fiafia e lē uma!—Mataio 19:28, 29.