Auai ma Lē Silisili na Foafoaina i Tatou i le Leoleoina

“O Ieova, o loʻu leoleo mamoe o ia; e leai se mea ou te mativa ai. Na te faafoisia mai loʻu agaga; na te taʻitaʻi ia te au i ala o le amiotonu ona o lona suafa.”—SALAMO 23:1, 3.

1. O le ā le faamalosiaga alofa ua saunia e Ieova?

O LE Salamo e 23, “le salāmo a Tavita,” ua faamalosia ai le toatele o tagata ua vaivai. Ua faalaeiauina ai i latou ina ia maua le mautinoa o loo faaleoina i le fuaiupu e 6: “E moni e mulimuli mai ia te au le agalelei ma le alofa i aso uma o loʻu ola; ou te nofo foi i le fale o Ieova i aso e tele lava.” Po o lou faanaunauga ea lena, ia e nofo i taimi uma i le maota o le tapuaiga ia Ieova,  ia autasi ma ona tagata o ē ua aoaoina nei, mai atunuu uma o le lalolagi? O le a fesoasoani ia te oe Lē Silisili na Foafoaina i tatou, o Ieova le Atua, o “Le na te leoleoina ma tausia o outou agaga,” ina ia mauaina lena sini.—1 Peteru 2:25.

2, 3. (a) Ua faapefea ona leoleoina ma le alofa e Ieova ona tagata? (e) Ua faapefea ona matuā faatoateleina le “lafu” a Ieova?

² O Lē na Foafoaina le “lagi fou ma le lalolagi fou,” o ia foi o Lē na te Faamaopoopoina ma o le Ovasia Silisili o le faapotopotoga Kerisiano, le ‘aiga o le Atua.’ (2 Peteru 3:13; 1 Timoteo 3:15) O loo matuā naunau mai lava o ia i le leoleoina o ona tagata, e pei ona taʻua manino i le Isaia 40:10, 11: “Faauta, e afio mai le Alii o Ieova ma le malosi; e pule lona aao mo ia; faauta, ua ia te ia lana taui, ua i ona luma le totogi o lana galuega. Na te leoleoina lona lafu e pei o le leoleo mamoe; na te sapaia tamai mamoe i ona lima, ma tauave i latou i lona fatafata; na te taʻitaʻi filemu i mamoe ua fananau.”

³ I se uiga lautele, ua aofia ai i lenei “lafu” i latou o ē ua loa ona savavali i le upu moni faa-Kerisiano, atoa ma “tamai mamoe” o ē faatoʻā aoaoina talu ai nei—e pei o le aofaiga toatele ua papatisoina nei i Aferika ma Europa i Sasae. Ua aoaoina mai i latou e le aao malosi o Ieova e puipuia ai i lona fatafata. E ui ina sa pei i latou o ni mamoe na taasē, a ua latou maua nei se faiā vavalalata ma le Atua alofa, o lo latou Leoleo Mamoe.

Le Leoleo Mamoe Lagolago a Ieova

4, 5. (a) O ai “le leoleo mamoe lelei,” ma na faapefea ona taulai atu valoaga ia te ia? (e) O le ā le galuega o le tuueseeseina o loo faatonutonuina e Iesu, ma o le ā le iʻuga mataʻina?

⁴ A o auauna i le itu taumatau o lona Tamā i le lagi, o loo uaʻi totoʻa atu foi ma le alofa le “leoleo mamoe lelei,” o Iesu Keriso, i “isi mamoe.” Na ia foaiina mai lona ola ina ia aogā muamua i le “lafu mamoe itiiti” o ē faauuina, ona sosoo ai lea ma le motu o tagata e toatele o ana “isi mamoe” i aso nei. (Luka 12:32; Ioane 10:14, 16) Ua fetalai atu le Leoleo Mamoe Silisili, o Ieova le Atua, i na mamoe uma e faapea: “Faauta, o aʻu, o aʻu lava, ou te faamasino . . . i lea [mamoe] ma lea [mamoe]. Ou te faatuina foi le leoleo mamoe e tasi ia te i latou, na te fagaina i latou, o laʻu auauna o Tavita; o ia na te fagaina i latou, e fai foi o ia ma leoleo mamoe ia te i latou; o aʻu nei foi o Ieova e fai aʻu mo latou Atua, o laʻu auauna foi o Tavita e fai o ia ma alii sili ia te i latou; o aʻu o Ieova ua ou fai atu ai.”—Esekielu 34:20-24.

⁵ O le faaupuga o “laʻu auauna o Tavita,” o loo faasino faavaloaga atu lea ia Keriso Iesu, le “fanau” o lē o le a soloai ane i le nofoalii o Tavita. (Salamo 89:35, 36) I lenei aso o le faamasinoga o nuu, o le a faaauau ai pea e le Leoleo Mamoe lagolago ma le Tupu a Ieova, o Keriso Iesu, le Atalii o Tavita, ona tuueseeseina “mamoe” o le fanau a tagata, mai ia i latou o ē atonu e faapea mai o ni “mamoe” ae o le mea moni o ni “ʻoti.” (Mataio 25:31-33) Ua faatuina foi lenei ‘leoleo mamoe e toatasi’ ina ia fafagaina mamoe. Maeu se faataunuuga mamalu o lenei valoaga ua tatou vaaia i aso nei! A o talanoa le au faipolotiki e uiga i le autasia o tagata e ala i se faiga fou o le lalolagi, ae o loo autasia moni lava e le Leoleo Mamoe e toatasi, mamoe mai atunuu uma e ala i se tauiviga o le molimau atu i gagana eseese, ua na o le faalapotopotoga lava a le Atua i le lalolagi ua mafai ona faia.

6, 7. Ua faamautinoa faapefea e “le auauna faamaoni ma le mafaufau” ua maua e mamoe ‘meaʻai e tatau mo le aso’?

⁶ A o faaauau pea ona faasalalau atu le feau o le Malo i oganuu fou, ua faamautinoa e “le auauna faamaoni ma le mafaufau” o Kerisiano faauuina, ua faia sauniuniga uma ina ia aauina atu ai ‘meaʻai e tatau mo le aso,’ e pei ona poloaia ai e le Leoleo Mamoe e toatasi. (Mataio 24:45) O le tele o lālā lomitusi e 33 a le Sosaiete o le Olo Matamata i le lalolagi atoa, ua faatelevaveina a latou lomiga e lolomi ina ia faafetaiaia ai le manaoga faanatinati mo nisi tusi ma mekasini faale-Tusi Paia e sili atu ma lelei.

⁷ Ua faia e le Vaega Pule o Molimau a Ieova  taumafaiga uma latou te mafaia, e faaleleia ai le uigā o faaliliuga i gagana e 200 ma ia amata ai ona faia faaliliuga i ni gagana faaopoopo o loo manaomia ina ia galueaiina ai le fanua i le lalolagi atoa. Ua lagolagoina ai i lea le poloaiga na avatu e Iesu i ona soʻo i le Galuega 1:8: “A e maua e outou le mana, pe a afio ifo le Agaga Paia i luga ia te outou; e fai foi outou ma molimau ia te au . . . e oo lava i le tuluʻiga o le lalolagi.” E lē gata i lena, ua maeʻa ona lomia le New World Translation of the Holy Scriptures, o se tusi atoa po o se vaega i gagana e 14, ma o loo agaʻigaʻi foi i luma le faaliliuina i isi gagana e 16 i Europa, Aferika, ma Asia.

Olioli i ‘le Filemu o le Atua’

8. Ua faapefea ona matuā faamanuiaina mamoe ona o le feagaiga o le filemu ua osia e Ieova ma i latou?

⁸ E ala i lana Leoleo Mamoe e toatasi, o Keriso Iesu, ua osia ai e Ieova se ‘feagaiga o le filemu’ ma Ana mamoe ua lelei ona fafagaina. (Isaia 54:10) I le faaalia o le faatuatua i le toto masaa o Iesu, ua mafai ai e mamoe ona savavali i le malamalama. (1 Ioane 1:7) Ua latou olioli i le ‘filemu o le Atua e silisili i mea uma e manatu i ai ma leoleoina ai o latou loto ma mafaufau e ala ia Keriso Iesu.’ (Filipi 4:7) E pei ona faamatala atili mai e le Esekielu 34:25-28 e faapea, ua taʻitaʻia atu e Ieova ana mamoe i totonu o se parataiso faaleagaga, o se tulaga matagofie o le saogalemu, le tamaoaiga e faafouina ai, ma fuatele mai. Ua faapea mai lenei Leoleo Mamoe alofa e uiga i ana mamoe: “Ona latou iloa ai lea o aʻu lava o Ieova pe a ou gagauina a latou amo, ma ou laveaiina i latou ai lima o e na faapologaina i latou. E le toe fai lava i latou ma mea e saeia i nuu ese, . . . a e latou te nonofo fifilemu, e leai foi se na te faamatau ia te i latou.”

9. O ā avanoa ua tatalaina atu i tagata o le Atua e ala i le ‘gagauina o amo’?

⁹ Ua maeʻa ona tofo Molimau a Ieova i le tele o atunuu i le gagauina o “a latou amo” i tausaga e leʻi mamao atu. Sa leʻi faapea ona latou saoloto muamua e talaʻi atu. Ma, talosia ia faaaogā tatau e i tatou uma, i atunuu uma le saogalemu ua saunia e Ieova, a o tatou faamalolosi pea e faamaeʻaina lana galuega. Maeu se faamautinoaga ua aumaia e Ieova a o tatou tulata atu i le taimi o le puapuaga e sili ona tele, e leʻi faapea ona vaaia muamua e tagata!—Tanielu 12:1; Mataio 24:21, 22.

10. O ai ua saunia e Ieova e fesoasoani i le Leoleo Mamoe Lelei, o Keriso Iesu, ma sa faapefea ona tusi atu le aposetolo o Paulo i nisi o i latou?

¹⁰ I le sauniuniga mo lena aso o lana taui ma sui i ē amioleaga, ua faaaogā ai e Ieova leoleo mamoe lagolago e fesoasoani i le Leoleo Mamoe Lelei, o Keriso Iesu, i le tausia o le lafu mamoe. Ua faatusaina i latou na e le Faaaliga 1:16 i se aofaiga atoa o “fetu e fitu” i le aao taumatau o Iesu. I le uluai senituri, na tusi atu ai le aposetolo o Paulo i se aofaiga o sui o na leoleo mamoe lagolago, e faapea: “Ina tausi ia outou ia te outou, atoa ma le lafu mamoe uma lava ua tofia ai outou e le Agaga Paia e fai ma leoleo, ia leoleo atu i le ekalesia a le Atua, ua faatauina e ia [i le  toto o lona lava Alo, NW].” (Galuega 20:28) I aso nei, e faitau sefuluafe leoleo mamoe lagolago o loo galulue i faapotopotoga e 69,558 i le lalolagi atoa.

Ia Taʻimua Leoleo Mamoe Lagolago!

11. Ua taulau faapefea nisi o leoleo mamoe i le taʻimua i oganuu ua galueaiina soo?

¹¹ I le tele o nofoaga, e tatau i nei leoleo mamoe ona taʻimua i oganuu ua galueaiina soo i nei aso e gata ai. E mafai faapefea ona latou faatumauina le maelega o le lafu i se tulaga maualuga? Ua faia e leoleo mamoe ni mea e sili ona lelei, ma o se tasi o auala na latou taulau ai, o le faagaeeina lea o le galuega faapaeonia lagolago ma le faapaeonia sauatoa. Ua auai le toatele o leoleo mamoe i lenei galuega, ma e oo foi i tagata talaʻi sa lē mafai ona faia faapea, ua faaalia nei le agaga faapaeonia, i le auauna faatasi ma le olioli e fesoasoani i le foiaina o le faaseā i oganuu. (Salamo 100:2; 104:33, 34; Filipi 4:4, 5) O lea, a o lofituina e le amioleaga ma le fenuminumiai le lalolagi, e toatele tagata e pei ni mamoe ua ala mai i le faamoemoe o le Malo.—Mataio 12:18, 21; Roma 15:12.

12. O le ā le faafitauli matuiā o loo iai i atunuu o loo vave le tuputupu aʻe, ma ua faapefea ona taulimaina i nisi taimi?

¹² O se isi faafitauli masani, o le lē lava lea o leoleo mamoe agavaa e tausia le lafu. I mea o loo vave ai le tuputupu aʻe, e pei o Europa i Sasae, e tele faapotopotoga fou e aunoa ma ni toeaina tofia o iai. O loo tauaveina faatasi e mamoe naunautai le avega, peitai, e lē taitai ona lava lo latou agavaa, ma o loo manaomia ai le fesoasoani ina ia aʻoaʻoina mamoe o loo lolofi mai i totonu o faapotopotoga. I atunuu e pei o Pasili, Mekisikō, ma Sāʻia, ia o loo vave ai tele le tuputupu aʻe, ua manaomia ai ona faaaogā nai Molimau talavou ina ia faamaopoopoina le auaunaga ma le toleniina o isi tagata fou. O loo avatu ai foi e paeonia se fesoasoani e sili ona lelei, ma o loo mafai e tuafāfine ona aʻoaʻoina isi tuafāfine fou i na atunuu. Ua faamanuia e Ieova ona taunuuga e ala i lona agaga. O loo faaauau pea ona faateleina.—Isaia 54:2, 3.

13. (a) Ona o le telē nauā o le seleselega, o le ā e ao i Molimau uma ona tatalo atu ai? (e) Sa faapefea ona taliina tatalo a tagata o le Atua a o lumanai le taua lona lua a le lalolagi ma i le taimi foi sa faia ai lena taua?

¹³ I atunuu ua matuā lelei ona faavaeina ai le galuega talaʻi, i atunuu e leʻi mamao atu ona aveesea ai faasāsāaga, ma i oganuu fou faatoʻā faatagaina, o loo faatatau pea i ai upu a Iesu i le Mataio 9:37, 38 e faapea: “E tele le saito e seleseleina, a o le au fai galuega e toaitiiti ia; o lea ia outou aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.” E manaomia foi ona tatou tatalo, ina ia foaiina mai e Ieova ni leoleo mamoe se toatele. Ua ia faaalia e mafai ona ia faia lena mea. A o lumanai le Taua Lona Lua a le Lalolagi ma i le taimi foi sa faia ai lena taua, sa taumafai ai taʻitaʻi sauā e pei o taʻitaʻi o Asuria e faaumatia Molimau a Ieova. Ae, i le tali mai i a latou tatalo, na faamamāina ai e Ieova la latou faalapotopotoga, ma faia ai ina ia faatiokarate moni, ma aumaia ai ni “leoleo mamoe” sa manaomia. * Sa ōgatasi lenei ma le valoaga: “Pe a sau Asuria i lo tatou laueleele, pe a soli foi e ia o tatou maota, ona tatou totofi ai lea o leoleo e toafitu e tetee ia te ia, ma alii sili e toavalu”—ua lava ma totoe na i lo o toeaina tuuina atu e fai ma taʻimua.—Mika 5:5.

14. O le ā le manaoga uigaese o loo iai i le faalapotopotoga, ma o le ā le faalaeiauga ua tuuina atu i uso?

¹⁴ O loo iai se manaoga uigaese mo tane Molimau uma ua papatisoina, ina ia aapa atu mo ni faaeaga atili. (1 Timoteo 3:1) E faanatinati lena tulaga. Ua lalata tele mai le iʻuga o lenei faiga o mea. Fai mai le Sapakuka 2:3: “O le faaaliga ua tuuina mo ona aso ua tuupoina, a e tautala mai pe a oo i le iuga, e le pepelo lava; . . . e oo mai lava, e le faatuai  mai.” Uso e, pe mafai ea ona outou aapa atu ina ia agavaa ai mo ni faaeaga atili i lenei galuega faaleoleo mamoe—a o leʻi oo mai le iʻuga?—Tito 1:6-9.

Leoleoga Faatiokarate

15. I le ā le auala e faatiokarate ai tagata o Ieova?

¹⁵ Ina ia auai atoatoa i le faatelega o le faalapotopotoga a Ieova, e manaomia ona faatiokarate manatu o ona tagata. E mafai faapefea ona latou faia lenei mea? Ia, o le ā le uiga o le upu “faatiokarate”? Ua faamatalaina e le Webster’s New Twentieth Century Dictionary le upu “faatiokarate” i “le puleaina o se nuu e le Atua.” O le uiga la lena ua manatu ai i le “nuu paia” o tagata o Ieova e faatiokarate. (1 Peteru 2:9; Isaia 33:22) I le avea ma sui po o ni aumea a lena nuu faatiokarate, e tatau i Kerisiano moni ona ola ma auauna ma le usiusitai i le Afioga a le Atua ma ana mataupu silisili.

16. Muamua, e mafai faapefea ona tatou faaalia atu tatou te faatiokarate?

¹⁶ Ua faamatala manino mai e le aposetolo o Paulo le auala e ao ai i Kerisiano ona faatiokarate. Muamua, ua ia faapea mai e ao ona “oofu outou i le tagata fou ua faia e foliga i le Atua, i le amiotonu ma le amio lelei e faamaoni.” E tatau ona suia uiga o se Kerisiano ina ia tusa ma mataupu silisili a le Atua o loo faataatia mai i lana Afioga. E tatau ona ia faamaoni ia Ieova ma Ana tulafono. Ina ua uma ona faaalia le auala e mafai ai ona faia faapea, ona timai mai lea o Paulo: “Ia faaaʻoaʻo outou i le Atua, faapei o le fanau pele.” (Efeso 4:24–5:1) E tatau ona tatou faaaʻoaʻo i le Atua, e pei o ni fanau usiusitai. O le faatinoga lena o le faatiokarate moni, e faaalia ai o loo pulea moni lava i tatou e le Atua!—Tagai foi i le Kolose 3:10, 12-14.

17, 18. (a) O le ā le uiga matilatila o le Atua e ao ona faaaʻoaʻo i ai Kerisiano e faatiokarate? (e) I ana afioga ia Mose, sa faapefea ona faamamafa atu e Ieova Lona uiga autū, ae o le ā le mea na Ia faaopoopo atu e ao ona faaeteete i ai?

¹⁷ O le ā le uiga autū o le Atua e ao ona tatou faaaʻoaʻo i ai? Ua tali mai le aposetolo o Ioane i le 1 Ioane 4:8 e faapea: “O le Atua, o le alofa lava ia.” I fuaiupu e valu o loo mulimuli ane ai, i le fuaiupu e 16, o loo ia toe taʻua ai foi lenei mataupu silisili tāua: “O le Atua, o le alofa lava ia; o lē tumau i le alofa, ua tumau ia i totonu o le Atua, o le Atua foi o i totonu ia te ia.” O le Leoleo Mamoe Silisili, o Ieova, o ia o le faatinoina o le alofa. Ua faaaʻoaʻo ia te ia leoleo mamoe faatiokarate e ala i le faaalia o le alofa loloto mo mamoe a Ieova.—Faatusatusa i le 1 Ioane 3:16, 18; 4:7-11.

¹⁸ Na faaalia e le Faatiokarate Sili ia lava ia Mose, o ia o “Ieova, o Ieova, o le Atua alofa mutimutivale ma le alofa fua, e telegese lona toasa, a e tele le alofa ma le faamaoni; o lē tausi le alofa e oo atu i afe o tupulaga; o lē faamagalo foi i le amioletonu ma le solitulafono ma le agasala, a e le faasaoina lava e ia o e agasala; a e taui atu e ia le agasala a mātua i a latou fanau ma le fanau a latou fanau, e oo i le tolu ma le fa o tupulaga.” (Esoto 34:6, 7) O lea la, ua faamamafa mai e Ieova vala eseese o lona uiga faatiokarate matilatila o le alofa, ae o loo ia lapatai mai foi ma le maumauaʻi na te faasalaina mea sese pe a tatau ai.

19. I le tuufaafeagai ma le au Faresaio, e ao faapefea i leoleo mamoe Kerisiano ona gaoioi i se auala faatiokarate?

 ¹⁹ O le ā lona uiga ina ia faatiokarate, mo i latou o ē o loo tauaveina avega tauave i le faalapotopotoga? Na fetalai Iesu e uiga i le au tusiupu ma le au Faresaio i ona aso: “Ua latou saisai avega mamafa ma le avegata, ma latou faaee i ua o tagata; a e latou te le mafafai ina faagaoioi ai i so latou tamatamai lima.” (Mataio 23:4) Pagā se faaʻonoʻono ma le lē alolofa! O le faatiokarate moni, po o le puleaina e le Atua, e manaomia ai le puleaina o le lafu e ala i le faatatauina o mataupu silisili alofa a le Tusi Paia, ae e lē o le faatigaina o mamoe i le mau tulafono faaletagata. (Faatusatusa i le Mataio 15:1-9.) I le taimi lava e tasi, e tatau i leoleo mamoe faatiokarate ona faaaʻoaʻo i le Atua e ala i le faaopoopo atu i lo latou alofa, o le maumauaʻi mo le faatumauina o le mamā o le faapotopotoga.—Faatusatusa i le Roma 2:11; 1 Peteru 1:17.

20. O ā fuafuaga faalefaalapotopotoga ua iloa e leoleo mamoe faatiokarate?

²⁰ Ua iloa e leoleo mamoe moni faapea i nei aso e gata ai, ua tofia ai e Iesu lana auauna faamaoni ma le mafaufau e pule i ana mea uma, ma ua taʻitaʻia e le agaga paia lenei auauna i le tofiaina o toeaina mo le leoleoina o mamoe. (Mataio 24:3, 47; Galuega 20:28) O lea, e aofia ai i le faatiokarate le faaalia o le faaaloalo loloto mo lenei auauna, ona o fuafuaga faalefaalapotopotoga ua faavaeina e lena auauna, ma mo le fuafuaga o toeaina i totonu o le faapotopotoga.—Eperu 13:7, 17.

21. O le ā le faaaʻoaʻoga lelei na faataatia e Iesu mo leoleo mamoe lagolago?

²¹ Ua faataatia e Iesu lava ia se faaaʻoaʻoga lelei, i le vaavaai atu pea ia Ieova ma lana Afioga mo le taʻitaʻiga. Na ia faapea mai: “Ou te le mafaia ona fai o se mea e tasi, na o aʻu; e faatatau laʻu faamasinoga i loʻu faalogo; ua tonu lava laʻu faamasinoga, auā ou te le usiusitai i loʻu lava loto, a o le finagalo o le Tamā, o le na auina mai aʻu.” (Ioane 5:30) E ao i leoleo mamoe lagolago a le Alii o Iesu Keriso ona atiina aʻe se uiga loto maulalo faapena. Afai e pipii atu pea se toeaina i le Afioga a le Atua mo le taʻitaʻiga, e pei ona sa faia e Iesu, o ia la o sē e faatiokarate moni.—Mataio 4:1-11; Ioane 6:38.

22. (a) I le ā le auala e ao ai i tagata uma ona taumafai e faatiokarate? (e) O le ā le valaaulia agalelei ua avatu e Iesu i mamoe?

²² O outou tane ua papatisoina, aapa atu ia ina ia agavaa mo faaeaga i le faapotopotoga! A o outou uma o mamoe faapelepele, ia tausiniō ina ia faatiokarate, ia faaaʻoaʻo i le Atua ma Keriso i le faaalia o le alofa! I na fiafia ia leoleo mamoe faapena foi ma le lafu, ona ua latou tali atu i le valaaulia a Iesu e faapea: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga. Auā e avegofie laʻu amo, o laʻu avega foi e māmā ia.”—Mataio 11:28-30.

[Faaopoopoga i lalo]

Pe Mafai ona E Faamatalaina?

□ O le ā le “lafu” a Ieova, ma o ai ua aofia ai?

□ Sa faapefea ona gaoioi Iesu o se “leoleo mamoe lelei,” i le uluai senituri, ma i le taimi nei?

□ O le ā le vaega autū ua faia e leoleo mamoe lagolago i le tausia o le lafu?

□ O le ā le uiga tāua o le upu “faatiokarate”?

□ E ao faapefea i se Kerisiano—ae maise lava se leoleo mamoe lagolago—ona gaoioi ina ia faatiokarate ai?

[Fesili mo le Suʻesuʻega]

[Ata i le itulau 20]

E pei o se leoleo mamoe e alofa faamaoni, ua faapena ona tausia e Ieova lana lafu

[Ata i le itulau 23]

O le faaaʻoaʻo i le uiga o Ieova le Atua o le alofa, o le faatinoina lena o le faatiokarate