Faailoaina mai o Foafoaga Fou!

NA FAAPEA mai i se tasi taimi le Tupu atamai o Solomona: “Ua leai foi se mea fou i lalo o le la.” (Failauga 1:9) Ua moni lena i le lalolagi faitino lea o loo tatou mau ai, ae faapefea i le nofoaga vavaloloa o le foafoaga faaleagaga a Ieova? O le mea moni, i lena nofoaga, ua avea ai lē e sili atu ia Solomona, o le tagata silisili o ē uma na soifua mai, ma foafoaga fou mataʻina. Na faapefea ona faia o lenei mea?

I le tausaga e 29 T.A., na alu atu ai le tagata lelei atoatoa o Iesu, ina ia papatisoina e Ioane i le Vaitafe o Ioritana. “Ua papatisoina Iesu, ona maliu ae loa lea o ia nai le vai, faauta foi, ua faaavanoaina le lagi ia te ia, ua ia iloa atu foi le Agaga o le Atua ua afio ifo e peiseai se lupe, ua oo i ona luga. Faauta foi, o le siufofoga mai le lagi, ua faapea mai, O loʻu Atalii pele lenā, ua ou [faamaonia, NW].” (Mataio 3:16, 17) I lea, na avea ai le tagata o Keriso Iesu ma uluai foafoaga fou, na faauuina e faia le finagalo o le Atua. Mulimuli ane, e faavae i lona maliu faataulagaina, na avea ai Iesu ma Puluvaga o se feagaiga fou i le va o le Atua ma se vaega filifilia o tagata. Ua avea i latou taitoatasi ma “foafoaga fou,” na fanauagagaina e le agaga o le Atua mo se faamoemoe faalelagi, ua alo atu e pule faatasi ma Iesu i lona Malo faalelagi.—2 Korinito 5:17, NW; 1 Timoteo 2:5, 6; Eperu 9:15.

I le faagasologa o senituri, na aoaoina ai nei Kerisiano fanauagagaina e aufaatasi ma Keriso, o se faapotopotoga o Kerisiano moni, ma ua avea ai o se foafoaga fou. Na valaauina o ia e le Atua nai lenei lalolagi mo se fuafuaga, e pei ona taʻua ai e le aposetolo o Peteru e faapea: “O outou o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai, ina ia outou taʻutaʻu atu ona lelei na ia valaau ia te outou nai le pouliuli e oo i lona lava malamalama e matuā ofo ai.” (1 Peteru 2:9) E pei o Keriso Iesu, le uluai foafoaga fou a le Atua, o lenei foafoaga fou na mulimuli mai, ua iai sana matafaioi autū ina ia talaʻiina le tala lelei. (Luka 4:18, 19) E tatau i ona sui taitoatasi, o lona aofaiga e 144,000, ona ‘oofu i latou i le tagata fou ua faia e tusa ma le finagalo o le Atua i le amiotonu moni ma le faamaoni.’ (Efeso 4:24; Faaaliga 14:1, 3) E manaomia ai i lenei mea lo latou atiina aʻe o “fua o le agaga,” ua faamatalaina i le  Kalatia 5:22, 23, ma tausia ma le faamaoni lo latou tulaga o se auauna tausi mea.—1 Korinito 4:2; 9:16.

O ā mea ua faia e lenei foafoaga fou i le taimi nei? I le tausaga e 1914, e pei ona faaalia i le faasologa o taimi a le Tusi Paia, na faataunuuina ai upu o loo i le Faaaliga 11:15: “O malo o le lalolagi ua avea mo lo tatou Alii ma lona Keriso, e fai foi o ia ma tupu e faavavau faavavau lava.” O le uluai gaoioiga a Keriso ina ua avea o se Tupu fou ua faapaleina, o le lafoina ifo lea o Satani ma ana agelu o temoni mai le lagi i le nofoaga maulalo i le lalolagi. O lenei mea na oo mai ai le ‘pagātia i le lalolagi,’ ina ua pa le taua muamua a le lalolagi ma oo ai puapuaga i ē o nonofo ai.—Faaaliga 12:9, 12, 17.

Na avea foi lenei mea o se lapataiga i ē o totoe o le foafoaga fou o loo i le lalolagi faapea, e tatau ona faia so latou sao i le faataunuuina o le valoaga a Iesu: “E talaʻiina atu foi lenei tala lelei o le malo [ua faavaeina] i le atu laulau uma, e fai ma molimau i nuu uma; ona oo mai lea o le gataaga.” (O upu faasisipa o a matou.) O le ā lena “gataaga”? Ua faaauau ona faamatala mai e Iesu: “Auā o ia ona po e oo ai le puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli. A le faapuupuuina foi ia aso, e le faaolaina se tasi; a e faapuupuuina ia aso ona o e ua filifilia.”—Mataio 24:3-14, 21, 22.

Sa uunaia e le agaga o Ieova na sui faauuina o lana foafoaga fou ina ia toaaga i le tauiviga sili ona telē o le galuega talaʻi sa leʻi faapea ona faia muamua i lenei lalolagi. Mai i ni nai afe i le 1919, na faateleina ai le faitau aofai o nei tagata o ē folafolaina ma le maelega le Malo i le 50,000 i le taimi pe tusa o le 1935. E pei ona valoia, “ua oo atu lo latou leo i le lalolagi uma lava, o a latou upu foi i tuluʻiga o le atu laulau.”—Roma 10:18.

Pe na o i latou ea o ē o loo totoe o le foafoaga fou na aoaoina mo le faasaoina? E leai, auā na taʻua i le valoaga faapea o le a taofia e agelu a le Atua matagi o le puapuaga tele seia faaumaina le aoaoina, e lē gata ia i latou ua faamaufaailogaina mo le Isaraelu faaleagaga ae faapea foi ma isi o i latou nei, o “le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi.” O ā mea o le a tutupu ia te i latou? Ioe, o le a sao mai i latou e aunoa ma le āfaina “mai le puapuaga tele” ma olioli ai i le ola e faavavau i se lalolagi parataiso!—Faaaliga 7:1-4, 9, 14.

Ma le fiafia lava, o lenei motu o tagata e toatele, na aoaoina mai i atunuu e 229, ua faapotopoto faatasi i le toetoe o le 4,500,000 i le avea o ni Molimau mataalia. E sili atu foi ona toatele isi o loo ō mai, e pei ona faaalia i le 11,431,171 o i latou na auai i le Faamanatuga o le maliu o Iesu ia Aperila 17 i le tausaga ua mavae. Mai lenei faitau miliona, e na o le 8,683, ē na taʻutino mai faapea o i latou o le vaega totoe i le lalolagi o le foafoaga fou, sa tagofia le areto ma le uaina i le Faamanatuga. O i latou e i lenei vaega toaitiiti e lē taitai mafai ona latou faataunuuina na o i latou lava lenei galuega talaʻi lea ua matuā telē i aso nei. O le faitau miliona o ē o faia aʻe ai le motu o tagata e toatele, ua galulue soosoo tauʻau nei ma i latou i le faaiʻuina o le galuega. (Sefanaia 3:9) E lē gata i lea, o sui ua aʻoaʻoina lelei o le motu o tagata e toatele, ua latou faia nei ni galuega o le puleaina ma isi galuega talafeagai faatasi ma le Vaega Pule faauuina o le Isaraelu faaleagaga, e pei ona sa faia e le au Netini e lē ni Isaraelu, sa galulue faatasi ma faitaulaga i le toe faafouina o pa o Ierusalema.—Neemia 3:22-26.

Le Foafoaina o le “Lagi Fou ma le Lalolagi Fou”

Maeu se olioli ua iai i lenei aoaoina! Ua pei lava ona sa fetalai i ai Ieova, o le a faapena lava ona iai: “Faauta mai, ou te faia le lagi fou ma le lalolagi fou; e le toe manatua mea na muamua, e le alu ae foi i le loto. A e peitai, ia outou olioli ma fiafia e faavavau i le mea ou te faia; auā faauta, ou te faia Ierusalema ma faafiafia, ou te faia foi lona nuu ma  faaolioli. Ou te fiafia foi i Ierusalema, ma aʻu olioli i loʻu nuu; e le toe lagona ai le leo o sē tagi, ma le leo o sē alaga [ona o le faanoanoa, NW].” (Isaia 65:17-19) O le lagi fou o foafoaga a Ieova, o le a mulimuli ane ona faia aʻe lea ia Keriso Iesu ma le 144,000, o sui ua toe faatutūina o le foafoaga fou o ē na faatauina nai tagata, i le sili atu i le 19 senituri ua mavae. E matuā sili mamao atu ona mamalu lenei foafoaga na i lo o so o se malo faalelalolagi na ia pulea Ierusalema faaletino, e oo lava i aso o Solomona. Ua aofia ai i lea le Ierusalema Fou, o se aai faalelagi, ua faamatalaina lona matagofie fepulafi uma i le Faaaliga mataupu e 21.

O le Ierusalema Fou, o le faatoanofotane faaleagaga a Keriso, lana 144,000 o soʻo faauuina, o ē na aufaatasi atu i la latou Faatoafaiavā i le lagi ina ua mavae lo latou maliliu ma lo latou toe faatutūina aʻe faaleagaga. O loo faaatagia i latou i le Faaaliga 21:1-4 faapea “ua alu ifo mai le Atua i le lagi,” o lona uiga, o lona faaaogāina lea e aumaia ai faamanuiaga i tagata i inei i le lalolagi. O le faataunuuga lena o le valoaga: “Faauta, ua faatasi ma tagata le fale fetafai o le Atua, e mau foi o ia ma i latou; e fai foi i latou mona nuu, e ia te i latou le Atua lava, o lo latou Atua ia. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”

 Maeu lo tatou loto faafetai mo le foafoaina e le Atua o lena lagi fou! E lē pei o pulega lē tumau, ma iʻuvale ua leva ona faapologaina ai tagata, o le a tumau lenei faatulagaga a le Atua mo se pulega. Ua vivii atu le foafoaga fou ma a latou fanau faaleagaga, le motu o tagata e toatele, i le isi folafolaga atili a le Atua: “Auā e pei ona tumau i oʻu luma o le lagi fou ma le lalolagi fou ou te faia, ua fetalai mai ai Ieova, e faapea ona tumau o a outou fanau ma lo outou igoa.”—Isaia 66:22.

E amata “le lalolagi fou” i na fanau a ē faauuina o le foafoaga fou. O se sosaiete fou lea, o tagata e matataʻu i le Atua i le lalolagi. O le feitagai, solitulafono, faiga sauā, le iʻuvale, ma amioga lē mamā a le sosaiete faaletagata i aso nei, ua faamamafaina ai lava le manaomia ona faia o se suiga atoatoa mo se sosaiete fou i le lalolagi, e faagaoioia i lalo o le taʻitaʻiga alofa a le lagi fou. O le fuafuaga lena a Ieova. E pei lava ona ia foafoaina le lagi fou, ua faapena foi ona ia foafoaina le lalolagi fou e ala i le faapotopotoina o le motu o tagata e toatele e avea ma autū o se sosaiete fou ae filemu i le lalolagi. Ua na o le sosaiete lava lenei o le a faasaoolaina atu “nai le puapuaga tele.”—Faaaliga 7:14.

O le ā e mafai ona tatou faatalitalia pe a mavae le puapuaga tele? I le talanoa atu i ona aposetolo, o uluai sui o i latou o ē o le a faia aʻe ai le lagi fou lea o le a pule mai i le lalolagi fou, na folafola ai e Iesu: “E moni, ou te fai atu ia te outou, o outou ua mulimuli mai ia te au, pe a tietie le Atalii o le tagata i lona nofoālii mamalu i le toefuataiga, tou te tietie ai foi i nofoālii e sefulu ma le lua, e faamasino ai i itu aiga o Isaraelu e sefulu ma le lua.” (Mataio 19:28) O le a auai uma le 144,000 o lenei Ierusalema Fou faatasi ma Iesu i le faamasinoina o tagata. Ona suia lea o le manatu faapito ma le feitagai i le alofa, e avea ma faavae e fausia aʻe ai le sosaiete faaletagata. O le a sōloiesea uma le faailoga tagata, faailoga lanu, ma faafitauli ona o le lotonuu. O le a faasolosolo foi ona toe faafoisia mai e le toetu ē pele. O le a avea le faitau piliona o tagata faamaoni o se aiga telē, autasi, ua faaeaina i le ola e faavavau i luga o se lalolagi ua faaliliuina e fai ma parataiso.

O le a sili atu lenei na i lo o nofoaga lelei atoatoa i tala faafagogo e pei o Utopia ma Shangri-la. O le a avea o se foafoaga tumau—‘o le lagi fou ma le lalolagi fou, lea o loo tatou faatalitali i ai e tusa ma lana folafolaga, ma o i inei e mau ai le amiotonu’! (2 Peteru 3:13) E mautinoa lava, o se faamoemoe ofoofogia lenei, o se folafolaga uigaese lea a lē na fetalai mai, “Faauta, ou te faia ia fou mea uma lava,” ma o lē foi na faaopoopoina mai le faamatalaga faagaee faatuatua: “O upu nei e moni ma le faamaoni ia.”—Faaaliga 21:5.