Fesili Mai le Au Faitau

O le ā le avega tauave a Kerisiano i le faaitiitia o le faaleagaina o lo tatou siosiomaga—le laueleele, le sami, ma le ea?

Ona o ni Molimau a Ieova, tatou te matuā manatu mamafa ai i le tele o faafitauli tau le siosiomaga ua aafia ai nei lo tatou nofoaga faalelalolagi. E sili atu i tatou na i lo le toatele o tagata, ona tatou te sapaitalia faapea, na foafoaina le lalolagi e avea ma nofoaga mamā ma ola malōlōina mo se aiga faaletagata e atoatoa ona lelei. (Kenese 1:31; 2:15-17; Isaia 45:18) Ua ia i tatou foi le faamautinoaga a le Atua e faapea o le a ia ‘faafanoina i latou o loo fano ai le lalolagi.’ (Faaaliga 11:18) Ua fetaui ai la ona faia ni taumafaiga paleni ma alagātatau, ina ia alofia ai le soona faaopoopo atu i le faaleagaina o lo tatou lalolagi lea o loo faaauau pea ona faia e tagata. Ae peitai, ia matau le upu “alagātatau.” Ua fetaui foi lea e tusa ai ma le Tusi Paia, ina ia puipuia ai i tatou mai le soona popole fua i mataupu ma taumafaiga mo le puipuiga o le siosiomaga.

E oo lava i le soifuaga masani o le tagata e faatupuina ai foi otaota. Mo se faaaʻoaʻoga, o le totōina, le gasesega, ma le taumafaina o meaʻai e masani ona faapogaia ai otaota, e ui lava o le tele o nei otaota e mafai ona pala ma toe tutupu mai ai nisi laau ma meaola. (Salamo 1:4; Luka 3:17) O le taumafataga o iʻa tunupaʻu sa faia e Iesu mo ona soʻo ina ua ia toetu mai, atonu na alu aʻe ai se asu, na totoe ai le lefulefu, ma na iai otaota o ivi o iʻa. (Ioane 21:9-13) Peitai na fuafuaina ni foafoaga faiola ma mea e leai ni ola, po o faiga (cycle) e toe faaleleia ai le laueleele e faaaogāina i ai nei mea.

E lē tatau i tagata o le Atua ona faagaloina mea e uiga i le puipuiga o le siosiomaga. Sa faatonuina e Ieova ona tagata anamua ina ia uia laasaga e lafoaia ai o latou otaota vale, o ni laasaga e tāua mo le puipuiga o le siosiomaga, ae maise foi le tumamā o le soifua malōlōina. (Teuteronome 23:9-14) Ma talu ai ua tatou iloa lona finagalo e uiga ia i latou o loo faafanoina le lalolagi, e mautinoa la tatou te lē faatuatuanaia mea e ao ona tatou fai ina ia tausia ai le mamā o le siosiomaga. E mafai ona tatou faaalia lenei i le faatafunaina ma le talafeagai o lapisi po o otaota, ae maise lava vailaau oona. Tatou te lagolagosua ma le loto i galuega o le toe faaleleia o le siosiomaga, ae maise lava pe afai e faatonu aloaia nei galuega e faipule silisili (Kaisara). (Roma 13:1, 5) Ma ua faamalieina nisi tagata i ni taumafaiga faaopoopo ua latou faia, e pei o le filifili e faaaogā nisi o faiga e mafai ona puipuia ai le siosiomaga na i lo mea e faateleina ai le faaleagaina o le laueleele ma le sami.

Peitai, o le tele e ao ai i se Kerisiano ona aafia i lenei tulaga, o lana lava lea filifiliga, seʻi vaganā ua faatonuina mai e le tulafono. Ua manino mai i tala faasalalau faapea e faigofie tele i tagata lē lelei atoatoa ona aafia i le mailei o le soona faamamafa nauā. Ua matuā tuufaafeagai lena ma le fautuaga a Iesu: “Aua tou te faamasino atu, ina neʻi faamasinoina outou . . . Se a le mea e te vaai atu ai i si fāsi laau i le mata o lou uso, a e te le iloa e oe le utupoto i lou lava mata?” (Mataio 7:1, 3) O le manatuaina o lenei fautuaga o le a fesoasoani ia i tatou ina ia lē faagaloina ai isi vala e matuā tāua.

Na tusia e le perofeta o Ieremia: “Ieova e, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia.” (Ieremia 10:23) O le lē amanaiaina e tagata o lenei mataupu silisili ua latou matuā fesagaʻi ai ma “aso faigata” e pei ona taʻua i le 2 Timoteo 3:1-5. Ma o fetalaiga a le Atua e pei ona faamauina i le Faaaliga 11:18 ua faamaonia ai o taumafaiga a tagata ina ia faamutaina faafitauli tetele o le siosiomaga o le lalolagi e pei o le faaoonaina, o le a lē manuia atoatoa. Atonu lava o agaʻigaʻi i luma i nisi itu, peitai o le vaifofo tumau e tasi e manaomia ai le faalaa ane o le Atua.

Ona o lenei la mafuaaga, e lolo atu ai a tatou taumafaiga ma galuega i le vaifofo mai le Atua, na i lo le taumafai e faalagolago i fuafuaga e lē tumau. O le faia faapea ua tatou mulimuli ai i le faaaʻoaʻoga a Iesu, o lē na faaaluina le taimi tele o lana faiva e ‘molimau atu ai i le upu moni.’ (Ioane 18:37) Na i lo le fafagaina o le lalolagi po o le faaitiitia o mea o loo mafatia ai i lenei taimi i se tulaga lautele—e aofia ai le faaoonaina—sa faasino atu e Iesu le vaifofo atoatoa i faafitauli ua āfaina ai tagata.—Ioane 6:10-15; 18:36.

A o uunaia i tatou e le alofa mo o tatou tuaoi ina ia alofia ai le soona faaleagaina fua o le laueleele, le ea, po o vai taumafa, ae e faaauau pea ona tatou molimau atu i le upu moni. E aofia ai le aʻoaʻoina o tagata ina ia faatatau upu moni o le Tusi Paia ma alofia ai le faaleagaina o o latou tino mai le tapaa, le inu tele i le ʻava malosi, po o vailaau oona. A o avea le faitau miliona o ē fou ma soʻo, ua latou aʻoaʻoina ai uiga o le tumamā ma ia manatunatu i isi. O le galuega talaʻi la, ua avea o se sao moni i le faaitiitia o le faafitauli taatele o le faaoonaina i aso nei. Ae o le mea e sili ona tāua, o le tauivi lea o soʻo Kerisiano e faaleleia o latou uiga totino ma uiga i le taimi nei, ina ia latou fetaui atu ai i le lalolagi Parataiso mamā lea ua lē o toe umi ae aumaia e le Atua mo ona tagata tapuai moni.