Ia Fiafia i Lē Silisili Na Foafoaina i Tatou

“Ia fiafia Isaraelu i le na faia i latou; ia olioli le fanau a Siona i lo latou Tupu.”—SALAMO 149:2.

1. E ui i ni faalauiloaga faapea ua “maua le saolotoga,” ae o le ā le tulaga moni o iai tagata?

UA PAGĀTIA le lalolagi o aso nei i “puapuaga.” O le faaupuga lena na faaaogā e Iesu i lana valoaga e faatatau i ‘le faaiʻuga o le faiga o mea,’ le vaitaimi o mala na amata mai i le taua muamua a le lalolagi i le 1914. (Mataio 24:3-8) Na pau le mea o loo iloa e le toatele o le au faipolotiki o le faanoanoa mo le lumanai. E ui i ni faalauiloaga faapea “ua maua le saolotoga” i Europa i Sasae, ae na aoteleina le tulaga e le peresitene sa iai o lena atunuu ina ua ia faapea mai: “O le faatoateleina o le aofaiga o tagata, ma le matuā velasia o le lalolagi, o pūpū i le mea o loo puipuia faataamilo ai le lalolagi, ma le FFP (AIDS), le faamataʻu mai o fouvalega faaniukelea ma le faalauteleina faasolosolo o le va o atunuu mauoloa i matū ma atunuu matitiva i saute, le mataʻutia o oge, le faaitiitia o laufanua ma mea e maua ai minerale mai le laueleele, le faalauteleina o tū ma aga o loo faasalalauina i televise, atoa ma le faatupulaʻia o le fefe i taua i atunuu lava latou—o na mea uma, faatasi ma le faitau afe o isi mea, ua aumaia ai se mataʻu lautele i tagata.” E leai se malosi faaletagata e mafai ona aveesea le faamataʻu mai o lenei faaumatiaga aʻiaʻi.—Ieremia 10:23.

2. O ai o loo iai le vaifofo tumau mo faafitauli o tagata, ma o le ā le laasaga ua uma ona ia uia?

² Peitai, e mafai ona tatou fiafia, ona o loo iai i Lē Silisili na Foafoaina i tatou le vaifofo tumau. I le valoaga a Iesu, o loo fesootai ai ‘le faaiʻuga o le faiga o mea’ ma lona ‘faatasi mai’ lē vaaia. (Mataio 24:3, 37-39) Ina ia foafoaina le “lagi fou,” na faaeaina ai e Ieova Iesu i lona nofoalii e fai ma Tupu faa-Mesia. Ua faaalia i faamaoniga faavaloaga, sa tupu lenei mea e tāua i talafaasolopito i le lagi i le tausaga e 1914. * (2 Peteru 3:13) I le avea ma pule lagolago i le Alii Silisiliese o Ieova, ua poloaia ai nei Iesu ina ia faamasinoina atunuu, ma ia tuueseeseina ē agamalu, o tagata ia e pei ni mamoe i le lalolagi mai ē loto maʻaa e pei ni ʻoti. O “ʻoti” e lē matataʻu i le Atua, ua faailogaina mo le “sala e faavavau,” a o “mamoe,” o le ola e faavavau i le nofoaga faalelalolagi o le Malo.—Mataio 25:31-34, 46.

3. O le ā le pogai e ao ai ona matuā fiafia Kerisiano moni?

³ Ua iai i le vaega totoe o le Isaraelu faaleagaga o loo i le lalolagi, lea ua aufaatasi atu i ai se motu o tagata e toatele o ia mamoe usiusitai, mafuaaga uma e olioli ai ia Ieova, le Tupu o le faavavau, a o ia faataunuuina ana fuafuaga silisili e ala i le Malo o lona Alo. E mafai ona latou faapea atu: “Ou te matuā fiafia ia Ieova, e olioli loʻu loto i loʻu Atua; auā ua na faaofuina aʻu i ofu o le olataga, . . . Auā e pei ona faatupuina e le laueleele lona fua, e pei ona faatupuina foi e le faatoaga mea ua totō ai, e faapea lava ona faatupuina e le Alii o Ieova o le amiotonu ma le viiga i luma o nuu uma.” (Isaia 61:10, 11) Ua faamaonia lenei “faatupuina” i le faitau  miliona o ē ua aoaoina nei mai atunuu, ina ia usuina atu ia Ieova le viiga.

‘Lona Faatelevaveina’

4, 5. (a) Sa valoia faapefea le aoaoina o tagata o le Atua? (e) O le ā le faatelega uigaese na matauina i le tausaga faaleauaunaga o le 1992?

⁴ Ua faatelevaveina le aoaoina a o latalata mai le iʻuga o le faiga o mea a Satani. Ua folafola mai e Lē Silisili na Foafoaina i tatou: “O lou nuu foi e amiotonu i latou uma lava; . . . o le tātupu o laʻu faatoaga, o le galuega a oʻu lima, e fai moʻu viiga. O le toaitiiti e fai ma toaafe, ma le ua faatauvaa e fai ma nuu malosi; o aʻu o Ieova, ou te faavave ona fai i ona lava aso.” (Isaia 60:21, 22) O lenei faatelevaveina, ua faaalia lea ma le ofoofogia i le Lipoti o le Tausaga Faaleauaunaga o le 1992 a Molimau a Ieova i le Lalolagi Aoao, ua lomia i itulau e 12 e oo i le 15 o lenei mekasini.

⁵ O se vala matilatila i lenei lipoti, o le tumutumuga fou e 4,472,787 tagata talaʻi o le Malo, o se faatelega lea e 193,967—e 4.5 pasene ua sili atu ai i le tausaga ua mavae. O le tumutumuga e 301,002 o ē sa papatiso i le 1992, ua faaalia ai foi le mea moni e faapea, e anoanoai i latou ua taliaina le upu moni o le Tusi Paia. Maeu lo tatou olioli, ona i nei “aso o le pouliuli ma le pogisa, . . . [o loo iai se] nuu tele ma le malolosi,” o ē ua pei o se autau a sē akerise, o loo faalauteleina atu le molimau o le Malo “i le tuluʻiga o le lalolagi”! (Ioelu 2:2, 25; Galuega 1:8) Mai le kiona o Alaska—lea ua silia i le faalimasefulu ona asiasi atu i ai le vaalele a le Sosaiete o le Olo Matamata i oganuu ua lofia i le aisa—e oo atu i toafa mugālā o Mali ma Burkina Faso ma atumotu tūtū solo o Maikoronesia, ua susulu atu ai auauna a Ieova e “fai ma malamalama o nuu ese, e [talaʻi lana] faaolataga ia oo i tuluʻiga o le lalolagi.”—Isaia 49:6.

6, 7. O le ā se suiga o mea e leʻi faatalitalia na molimauina i tausaga talu ai nei, ma ua faapefea ona tali atu i ai auauna a Ieova?

⁶ Ua avea Ieova e pei o se lafitaga ma o se ʻolo malosi i le puipuia ma le faatumauina o ona tagata. I le tele o vaega o le lalolagi, o loo onosaia ai e Molimau a Ieova le tele o faiga faatautala ma sauāga. (Salamo 37:39, 40; 61:3, 4) Talu ai nei, na pei o se vavega le aveeseina o faasāsāaga ma taofiofiga i nisi o atunuu e 21, ua mafai ai nei ona folafola atu ma le saoloto e tagata o le Atua e faapea, ua faaeaina Keriso e Lē Silisili na Foafoaina i tatou ina ia avea ma Tupu i le lalolagi.—Salamo 2:6-12.

⁷ Po o faaaogā tatau ea la e tagata o Ieova lo latou saolotoga fou ua maua? Tagai i le lisi o faatelega i Palakeria, Romania, ma le uluai Soviet Union i Europa i Sasae ma i Angola, Benin, ma Mozambique i Aferika. I Sāʻia foi ia, e matuā uigaese le faatelega ua oo i ai. Ona o le olioli i o latou loto, ua tali atu ai o tatou uso ua faasaolotoina i le valaau: “Ia outou vivii atu ia Ieova, auā e lelei o ia; . . . O lē faia vavega tetele, na o ia lava; auā e faavavau lava lona alofa.” (Salamo 136:1, 4) O na faafetai, ua faaalia ia i le auaunaga ma le maelega i le aoaoina o isi tagata e pei ni mamoe i le itu o le Malo.

8. Ua faapefea i ē fou o vivii atu ia Ieova ona “felelei e pei se ao,” i Europa i Sasae? ma i Aferika?

 ⁸ I le taumafanafana ua mavae atu i Europa, sa matuā uigaese le toatele o ē na auai i tauaofiaga a tagata o Ieova, na usuia i atunuu sa avea muamua ma atunuu Komenisi. Ae e sili atu ai foi ona mataʻina le aofaiga o ē na papatisoina, e pei ona faaalia i le lisi. E faapena foi i Togo i Aferika, na aveeseina le faasāsāaga ia Tesema 10, 1991. I le masina mulimuli ane ai, na usuia ai se tauaofiaga a le atunuu. Pe a faatusatusa atu i le tuu faatatau i masina taitasi o tagata talaʻi e 6,443 i le fanua, na oso aʻe le aofia o lena tauaofiaga i le 25,467, faatasi ma le 556 na papatisoina ai—o le 8.6 pasene lea o le aofaiga o tagata talaʻi. E pei ona faaataina mai i le Isaia 60:8, o ē fou faatoʻā vivii atu ia Ieova o loo “felelei e pei se ao, e pei o lupe foi i o latou faitotoa” i faapotopotoga a tagata o Ieova.

9. O ā sauniuniga sa faia ina ia mafai ai ona ‘aai ma maoona’ Kerisiano i atunuu na faasaolotoina talu ai nei?

⁹ Ua faamalieina foi le matelaina mo meaʻai faaleagaga i Europa i Sasae ma Aferika. Ua aauina atu e falelomitusi a le Sosaiete o le Olo Matamata i Siamani, Italia, ma Aferika i Saute, le anoanoai o loli e tutumu a latou uta i lomiga, i le tele o gagana, i atunuu sa matelaina faaleagaga. I taimi muamua atu, sa lē tofu le toatele o Molimau ma le kopi, o lea na latou faaaogāina ai mataupu na toe kopi mai mekasini. Ae o le taimi nei, e fau ma soloi meaʻai faaleagaga ua latou mauaina. Ua latou olioli e auai i le faataunuuga o le valoaga: “Tou te aai lava, ma maoona ai, tou te vivii atu foi i le suafa o Ieova lo outou Atua, o le ua faia vavega ia te outou.”—Ioelu 2:26.

Tausia o Faatelega Atili

10. Ona o le toatele o le aofia i le Faamanatuga, o le ā le valaaulia ua ofoina atu i ē uma e naunau?

¹⁰ O se mea foi e matuā ofo ai, o le aofaiga i le lalolagi aoao o ē na auai i le Faamanatuga o le maliu o Iesu, e 1,431,171, o se faatelega lea e 781,013, po o le 7.3 pasene e sili atu ai i le tausaga ua mavae. Afifio maia, outou uma o ē fou mai! Maeu le ofoofogia o le a iai, pe afai e olioli na tagata naunau uma e fou mai, i aogā o se suesuega faale-Tusi Paia i le aiga ma se tasi o Molimau a Ieova! (Tagai i le Isaia 48:17.) O loo faaalia i le Lipoti o le Tausaga Faaleauaunaga le 4,278,127 o na suesuega o loo faia i masina taitasi, o se faatelega lelei lea e 8.4 pasene. Peitai, e toatele atili atu nisi e mafai ona faaavanoaina i latou lava mo lenei auaunaga. Ua fiafia Molimau a Ieova e asiasi atu e lē aunoa i ē naunau, ina ia faia se suesuega faale-Tusi Paia e faifua i le aiga, ma faapea ona fesoasoani ai ia i latou na ina ia tutū mausalī i le ala i le ola e faavavau. (Ioane 3:16, 36) Aiseā e lē talosaga atu ai mo se suesuega faapena? Ma ia manatua, o loo faatali mai pea se faafeiloaiga mafana mo oe i le Maota o le Malo!—Salamo 122:1; Roma 15:7.

11, 12. (a) O ā faafitauli ua faafetaiaia i nisi atunuu? (e) O le ā le auala ua faia ai se “faatatau” i le va o atunuu mauoloa ma atunuu matitiva?

¹¹ O loo matuā faamanuiaina lava faapotopotoga na o loo lelei o latou Maota o le Malo. E eseese le tulaga ma atunuu o loo tutumau ai Molimau faamaoni mo le tele o tausaga i lalo o faasāsāaga, ma mafuta faananā ai i vaega laiti. I nisi o na nofoaga, ua saoloto ai nei i latou, a ua tau leai ni Maota o le Malo. Mo se faaaʻoaʻoga, i se atunuu o Aferika, e na o le tolu lava Maota o le Malo o loo faaaogāina e faapotopotoga e 93. O lea, ua masani ai ona faia sauniga i se vaipanoa telē e avanoa. Atonu sa toʻa 150 le aofai o se faapotopotoga, a ua oo atu nei i le 450 ē ua auai pea i na sauniga.

¹² I Europa i Sasae, e masani lava ona faigata ai le faatauina mai o se fanua po o le fausia ai foi o se fale, ae ua iai nei sina faaleleiga. Na fuafuaina le umusāina o se fale fou matagofie o le lālā ia Novema 28, 1992, i Polani. Ua faaaogāina meaalofa na foai ma le agaalofa i le galuega a Molimau a Ieova i le lalolagi aoao, e fesoasoani ai i le fausiaina  o maota ma isi fale. O lea, na faia ai se “faatatau” ina ia fesoasoani le agaalofa o uso o ē na foai mai i le “tamaoaiga” o a latou mea faitino, ina ia tausia ai manaoga faaleagaga o faapotopotoga i atunuu matitiva.—2 Korinito 8:13, 14.

E Piliona Itula!

13. E fia itula na faaaluina e talaʻi ma aʻoaʻo atu ai i le 1992, ma ua faaalia ai le malosi o ai?

¹³ O le ā lau mea a fai i itula e piliona? O ē uma lava e fia maua le ola e faavavau, e mafai ona latou faaaogāina le tele o na itula, ma nisi foi itula e sili atu, i se auaunaga e fuatele mai ma faamalie loto ia Ieova. Ae seʻi manatu i ai pe afai e fafao uma na itula e tele i se tausaga e tasi! O le mea lena na faataunuuina e tagata o Ieova i le 1992. A faaopoopo faatasi lipoti a tagata talaʻi taitoatasi o le Malo, ona tatou maua ai lea o se tumutumuga fou e 1,024,910,434 itula na faaaluina i se auala e sili ona lelei e mafai ona faaaogā ai le taimi—o le viivii atu lea i Lē Silisili na Foafoaina i tatou, i le “aʻoaʻo atu . . . i luma o le nuu, atoa foi ma lea fale ma lea fale.” (Galuega 20:20) I le tuu faatatau, e 4,289,737 Molimau na lipoti mai i masina taitasi. E eseese uma lava o latou tulaga. O nisi e faatapulaa le taimi e mafai ona latou tuuina atu i le galuega o le Malo. E aofia ai ulu o aiga o ē e tatau ona tausia le aiga; o ē matutua; ma le toatele o ē e iai faafitauli tau le soifua malōlōina; atoa ma fanau o loo iai pea i le aʻoga. E ui i lea, o lipoti na faia e i latou taitoatasi, o se faailoaga tāua lea o le alofa mo Ieova.—Faatusatusa i le Luka 21:2-4.

14. Ua faapefea i ē talavou ona ‘manatuaina Lē Silisili na Foafoaina i latou’?

¹⁴ O loo tuputupu aʻe se tupulaga talavou i le auaunaga ia Ieova, ma o se mea lelei, ona ua faia e le toatele o i latou na, se faatatauga o upu a Solomona i le Failauga 12:1: “O lenei, ia e manatua le na faia oe i ona po o lou taulealea.” Latou te tinoū e fai a latou lava mea aʻoga, atoa ma le aʻoaʻoina o mataupu faaleagaga mai o latou mātua tuutoina atu. O se mea e olioli ai le matauina o se aofaiga toatele o talavou laiti sa tutū aʻe i tauaofiaga talu ai nei, o loo ofoina atu i latou lava mo le papatisoga. Ma o se mea foi e olioli ai, i le iloaina o le toatele, e ala i le aʻoaʻoina o se matātā po o se tomai, ua faia ai se sauniuniga aogā mo le galuega faapaeonia pe a faauuina mai le aʻoga. O lea, o le a mafai ai ona latou tausia i latou lava, e pei ona sa faia e le aposetolo o Paulo mai lea taimi i lea taimi i le faia o faleie.—Galuega 18:1-4.

15, 16. Ua saosaolaumea faapefea paeonia ma isi auauna faataimi atoa i le agaʻigaʻi i luma o le galuega o le Malo, ma o le ā le faamanuiaga ua olioli ai nisi o i latou?

¹⁵ Maeu se sao uigaese o loo faia e paeonia ma isi auauna faataimi atoa i le galuega o le Malo! Na faateleina le aofaiga o paeonia i se tumutumuga e 931,521 i le tausaga ua mavae. A o talaʻi atu i latou na i lea fale ma lea fale i aso taitasi, ma faia suesuega faale-Tusi Paia i aiga o tagata, ua atili ai ona sili  atu lo latou uigā i le faamatalaina o le Tusi Paia. E lē gata i lena, o le toatele o i latou ua agavaa ina ia auai i le Aʻoga o le Auaunaga Faapaeonia mo le lua vaiaso, lea e fesoasoani ia i latou ina ia atiina aʻe le tomai e sili atu, ma olioli ai i le faia o le galuega a le Atua.

¹⁶ E mafai ona ioe na paeonia faamaoni taitoatasi i upu o loo i le Isaia 50:4: “Ua foai mai ia te au e le Alii o Ieova le laulaufaiva o e ua aʻoaʻoina, ina ia ou iloa ona faamafanafana i se upu le ua tigaina.” E lē mafaitaulia tagata i aso nei o ē o loo mafatia ona o le lalolagi iʻuvale o loo siomia ai i latou, ae ua latou maua le faafouina e ala i upu o tautatala atu ai a tatou paeonia faamaoni.—Faatusatusa i le Faataoto 15:23; Esekielu 9:4.

Se Polokalama Faufale e Sili ona Malosi

17. E faaopoopo i le atiina aʻe faaleagaga, o ā fausaga faaletino ua molimauina i tausaga talu ai nei?

¹⁷ Ona o le tamaoaiga faaleagaga o Molimau a Ieova i le lalolagi aoao, ua manaomia ai foi ona tuputupu aʻe i le itu faaletino. Ua tatau ai ona faateteleina falelomitusi, o ofisa, ma aiga Peteli ma le fausiaina o Maota o le Malo, atoa ma Maota Fono. E manaomia foi la ona avea Molimau a Ieova o ni faufale i se auala faaletino. Sa faia se galuega faapena i ona po o le Tupu o Solomona. Na fausia e Solomona le malumalu mo le tapuaiga ia Ieova e tusa ai ma le “ata na maua e ia i le Agaga,” na tuuina atu e Ieova i lona tamā, le Tupu o Tavita. (1 Nofoaiga a Tupu 28:11, 12) O lea, e lē gata ina sa faalaeiauina e Solomona lana au faalogologo i upu tautele o le atamai, ae na ia faatonutonuina foi le faia o se fale faaletino e sili ona matagofie e lē taitai ona maua i le lalolagi o iai nei.—1 Tupu 6:1; 9:15, 17-19.

18, 19. (a) O ā galuega faufale o loo vave agaʻigaʻi i luma ua faatinoina e le faalapotopotoga a Ieova? (e) Ua faaalia faapefea le agaga o Ieova i fausaga faaletino atoa ma fausaga faaleagaga?

¹⁸ I aso nei, ua lē o fauina e Molimau a Ieova ni fale e ala i ni ata ua faagaeeina e le Atua, ae o loo ia i latou le agaga o le Atua. E pei o ona po o Isaraelu, ua uunaia e lenei mea i latou ina ia fauina ai fale i se auala e maofa ai tagata o le lalolagi. (Sakaria 4:6) Ua utiuti le taimi. O loo manaomia ni Maota o le Malo, atoa ma isi fale e aunoa ma le faatuai. I nisi atunuu, ua masani ona fausia faavavave ai Maota o le Malo. Mo se faaaʻoaʻoga, i tausaga e 10 ua mavae, na lipotia mai ai e Kanata le fausiaina o ni maota e 306, e lē atoa ni aso se lua e fai ai maota taitasi. E 43 le aofaiga o fale fou o lālā po o ni faaopoopoga o lālā o loo fausiaina i le taimi nei po o loo fuafuaina, ona o le vave faateleina o le galuega a Ieova i le lalolagi aoao. E lē gata i lena, a ua toeitiiti foi ona maeʻa lea o se fale e 30 fogāfale i Brooklyn, e iai potu mo tagata  faigaluega tauofo e tusa ma le afe i Peteli. E faapena foi i le Setete o Niu Ioka, i Patterson, o loo agaʻi pea i luma ua sili atu ma le faasologa, le fausiaina o se faauluuluga o aʻoaʻoga faale-Tusi Paia, o se galuega lea e sili ona telē ua faia e le Sosaiete o le Olo Matamata.

¹⁹ O loo solo lelei le agaʻigaʻi i luma o nei galuega ma o ni galuega ua maofa ai kamupani popoto i mea tau faufale i le lalolagi. Aiseā? Ona o le maoaʻe o meaalofa ua foaiina atu e Molimau tuuina atu a Ieova. Ua uunaia i latou e lona agaga ina ia lē gata ina avatu le lagolagosua faaletino, ae ia foaiina atu foi ma le loto atoa lo latou taimi ma le malosi. E tumutumu nofoaga o loo fauina ai fale i tagata faufale tuutoina atu ua lelei ona aʻoaʻoina. E leai ni solo tetee a tagata faigaluega, ma e leai foi se fealoalofaʻi i le galuega. Ua saunia e le agaga o Ieova le uunaiga, e pei foi ona ia uunaia le au faufale o le fale fetafai i ona po o Mose, ma ē na fausiaina le malumalu i ona po o Solomona. O se uiga matilatila e manaomia i nei tagata faigaluega, o le taʻumatuaina faaleagaga.—Faatusatusa i le Esoto 35:30-35; 36:1-3; 39:42, 43; 1 Tupu 6:11-14.

20. (a) O le ā le mamao e ao ona talaʻia ai le tala lelei? (e) O le ā le faamoemoe faamanuiaina o loo faatalitali mai mo tagata o Ieova?

²⁰ Sa faaauau pea e Solomona lana polokalama faufale ina ua maeʻa le malumalu. (2 Nofoaiga a Tupu 8:1-6) Tatou te lē iloa—po o le ā le mamao o le a faalautele atu ai le molimau i aso nei—faatasi ma se manaoga faapena o le fausiaina o maota ma isi fale. Peitai, ua tatou iloa, pe a talaʻiina atu lenei tala lelei o le Malo i le mamao ua poloaiina ai e Ieova, ona oo mai loa lea o le iʻuga, po o “le puapuaga tele.” (Mataio 24:14, 21) I se lalolagi o le a lē toe faaleagaina e tagata matapeapea, o le a aumaia ai e le fuafuaga a Ieova o le “lagi fou ma le lalolagi fou” le anoanoai o faamanuiaga i tagata. O le mea lea, talosia ia tatou ‘olioli ai ma fiafia e faavavau i mea ua foafoaina e le Atua,’ ma avatu ai le viiga uma i Lē Silisili na Foafoaina i tatou!—Isaia 65:17-19, 21, 25.

[Faaopoopoga i lalo]

Pe Mafai ona E Faamatalaina?

□ O ā mafuaaga e ao ai ona tatou fiafia i Lē Silisili na Foafoaina i tatou?

□ O ā faatelega sa lipotia mai i le tausaga faaleauaunaga o le 1992?

□ I atunuu sa muai faasāina ai le molimau atu, o ā faamanuiaga ua lipotia mai ai?

□ Ua saosaolaumea faapefea talavou ma paeonia i le faatelega o le faalapotopotoga a Ieova?

□ E faapeī le toaaga o tagata o Ieova i galuega o fausaga faaletino atoa ma fausaga faaleagaga?

[Fesili mo le Suʻesuʻega]

[Pusa i le itulau 17]

I le tausaga ua mavae, e sili atu i le piliona itula sa faaaluina i le galuega talaʻi ma le aʻoaʻo atu

 [Siata i le itulau 12-15]

LIPOTI O LE TAUSAGA FAALEAUAUNAGA O LE 1992 A MOLIMAU A IEOVA I LE LALOLAGI AOAO

 (Tagaʻi i le lomiga)

[Ata i le itulau 10]

Ua faaalia i le faitau selauafe o sui papatiso i le tausaga ua mavae le faamanuiaina e Ieova o le galuega talaʻi ma le aʻoaʻo atu

[Ata i le itulau 16]

O se aofaiga tele o ē talavou ua ‘manatuaina Lē Silisili na Foafoaina i latou’