Vaaiga Mai le Nuu Folafolaina

Keresema—‘Matou te Tapuai mai Lenei Mauga’

O LE fafine Samaria i le vaieli. Po ua lē faamanatu mai ea e lena fuaitau ia te oe le tala faagaee loto i le molimau atu lē fuafuaina a Iesu i se fafine i le “vaipuna o Iakopo” i Sukara, o se aai o Samaria? Pe e te fia malamalama atili ea i lena mea uigā na tupu?—Ioane 4:5-14.

Seʻi matau mauga e lua o loo i le ata i luga, e tusa ma le 30 maila i le itu i matu o Ierusalema. * I le itu tauagavale (i saute) o le vaomatua lea o Keresema; e tele ona vaipuna ua faapogaia ai lona lauusiusi ma lona matagofie. I le itu taumatau (i matu) o le mauga lea o Evalu, e maualuga teisi aʻe lava, ae gaoā ma lafulafuā.

I le va o nei mauga o loo taatia ai le vanu lafulemū o Sekema. Manatua, ina ua faimalaga atu le uō a le Atua o Aperamo (na mulimuli ane faaigoa ia Aperaamo) e ui atu i le Nuu Folafolaina, sa malōlō ai o ia i inā i Sekema. O inā na ia fausia ai se fata faitaulaga mo Ieova, o lē na faatoʻā uma lava ona faaali ane ia te ia ma folafola atu i ai lenei nuu mo lana fanau. (Kenese 12:5-7) Maeu se nofoaga talafeagai na faia ai sea folafolaga, i totonu lava o lena fanua! Mai le tumutumu, a lē o le mauga o Keresema po o le mauga o Evalu, na mafai ai e le tamā matua ona vaaia vaega tetele o le Nuu Folafolaina. Sa avea le aai o Sekema (o Nablus i aso nei) ma eleele e matuā tāua, o loo taatia i le vaimauga i matu ma i saute, e latatala i le ala agaʻi i sasae ma sisifo, i le va o le talafatai ma le Vanu o Ioritana.

O le fata faitaulaga a Aperaamo sa na o se tasi lea o faiga faaletapuaiga na lauiloa ai i inā. Mulimuli ane, sa faatau e Iakopo se fanua i lena nuu ma faaauau ai le tapuaiga moni. Sa ia eliina foi pe totogia le eliina o se vaieli loloto, e latalata i le auvae mauga o Keresema. I senituri mulimuli ane, na taʻu atu ai e le fafine Samaria ia Iesu: O “lo matou tamā o Iakopo, na na tuu mai ia te i matou le vaieli, ua inu ai foi o ia.” Atonu e tafe mai lona vai i se vaipuna, lea ua mafua ai ona taʻua e le aposetolo o Ioane o le “vaipuna o Iakopo.”

 O le taʻua o le tapuaiga moni i Keresema ma Evalu, atonu foi e te manatua ai le taʻitaʻiina atu e Iosua o le fanauga a Isaraelu i inā, e pei ona sa faatonuina ai e Mose. Sa fausia e Iosua se fata faitaulaga i Evalu. Seʻi vaai faalemafaufau i le tutū atu o le ʻafa o tagata i luma o le mauga o Keresema, ma isi uma o loo tutū i luma o le mauga o Evalu a o faitau mai e Iosua “le tulafono, o le manuia ma le malaia.” (Iosua 8:30-35; Teuteronome 11:29) I tausaga mulimuli ane, na toe foi ai Iosua, ma na ia faapea atu i ana toe timaʻiga: “A o aʻu nei ma loʻu aiga, matou te auauna ia Ieova.” Ona folafola ane lea e tagata o le a latou faia foi faapea. (Iosua 24:1, 15-18, 25) Ae pe sa latou faia moni ea?

Atonu e fesoasoani le tali ia te oe e te malamalama ai i le uiga o le talanoaga a Iesu ma le fafine Samaria. Ioe, sa leʻi faaauauina ona faia i Samaria le tapuaiga moni lea na mulimuli ai Aperaamo, Iakopo ma Iosua.

Ina ua taapeape solo ituaiga e sefulu o le itu i matu, sa latou toe faia lava tapuaiga i tamai povi. Ona faataga ai lea e Ieova o autau a Asuria e faatoilaloina lenei nuu i le 740 T.L.M. Na latou tutuliesea le toatele o tagata o le nuu, ae suia i tagata ese mai isi nuu o le Emepaea o Asuria, o ē tapuai i atua ese. Ma o nisi o na tagata faapaupau atonu na faaipoipo atu i tagata Isaraelu ma latou iloa ai nisi aʻoaʻoga o le tapuaiga moni, e pei o le peritomeina. Peitai sa lē finagalo malie atoatoa le Atua i le tapuaiga a tagata Samaria.—2 Tupu 17:7-33.

I la latou tapuaiga fefiloi faatasi, na talia ai e tagata Samaria na o uluai tusi e lima a Mose, le Penetatuka, e avea ma a latou Tusi Paia. Pe tusa o le lona fa o senituri T.L.M., na latou fausia ai se malumalu i le Mauga o Keresema, e faatavā atu ai i le malumalu o le Atua sa iai i Ierusalema. I se taimi, sa latou tuuina atu ai le malumalu o Keresema ia Seu (po o, Iupita) ma sa mulimuli ane faatamaʻia lena malumalu. Peitai, sa faaauau pea ona avea Keresema ma laumua o le tapuaiga a tagata Samaria.

E oo mai lava i aso nei, o loo faia pea e tagata Samaria se faamanatuga o le Paseka faaletausaga i Keresema. E fasia ai le tele o tamai mamoe. Ona tuu lea o o latou tino i paelo vai vevela ina ia mafai ai ona toulu ese fulufulu, ma faavelaina loa fasi tufaaga mo ni itula se tele. E faitau selau tagata Samaria, o le toatele e mai Ierusalema, e fai a latou tausamiga o le Paseka faa-Iutaia i le valuāpo. I le itu agavale, o loo e vaaia ai le faitaulaga sili a Samaria, o loo ufiufi lona ulu, o loo faatasi ai i le faamanatuga o le Paseka i le Mauga o Keresema.

Manatua foi le tala a le fafine Samaria ia Iesu: “O matou tamā sa tapuai i lenei mauga.” Sa faasaʻoina lona manatu e Iesu, ma e faapena foi ia i tatou, i le faapea atu: “E oo mai ona aso, tou te tapuai i le Tamā e le gata i lenei mauga, po o Ierusalema. . . . A e oo mai ona aso, ua oo nei foi i ai, o e tapuai faamaoni latou te tapuai i le Tamā i le agaga ma le faamaoni; auā o loo saili le Tamā i e tapuai faapena ia te ia. O le Atua o le agaga lava ia; o e tapuai ia te ia, e tatau ona tapuai atu ai i le agaga ma le faamaoni.”—Ioane 4:20-24.

[Faaopoopoga i lalo]

[Ē Ana le Ata i le itulau 24]

Pictorial Archive (Near Eastern History) Est.

[Ē Ana le Ata i le itulau 25]

Garo Nalbandian

Garo Nalbandian