Lē Silisili na Foafoaina i Tatou ma Ana Galuega

MAEU LE MATAGOFIE! O le gogolo o āfu maualuluga o Iguaçú po o Niagara, o vanu tafatō tetele o Arizona po o Hawaii, o tofē maulalalo o Norway po o Niu Sila—maeu ni faailoaga o viiviiga ua tuuina atu i nei mea ofoofogia na foafoaina! Ae po o nei mea, ua na o ni mea na teʻi lava ua iai na mafua mai i le Tinā o le Foafoaga (Mother Nature)? E leai, e uigā tele na mea! O galuega ia e mataʻutia ma ofo ai a Lē Silisili na Foafoaina Mea, o se Tamā faalelagi alofa o lē na tusi faatatau i ai le Tupu poto o Solomona e faapea: “Ua faia e ia mea uma lava e matagofie i o latou lava tausaga. Na ia tuu foi le faavavau i o latou loto, ae ua lē iloa e le tagata le galuega ua faia e le Atua moni mai le amataga e oo i le gataaga.” (Failauga 3:11, NW) E moni, e oo lava i le faavavau, o tau saili le tagata i galuega ofoofogia uma a Lē na Foafoaina i tatou, ia ua faatumuina ai le lagi ma le lalolagi.

Maeu Lē Silisili na Foafoaina Mea ua tatou maua! Ma maeu lo tatou fiafia ona o lenei Atua e ou le malosi uma “ua fetalai mai o ia ia i tatou i nei ona aso e gata ai [e ala] i lona Alo, o le ua tofia e ia e fai mea uma lava mona tofi, na ia faia foi e ia mea uma.” (Eperu 1:2) O lenei Alo, o Iesu Keriso, sa ia talisapaia mea matagofie o le foafoaga a lona Tamā. Sa ia faasino atu pea i ia mea i le faaatagiaina o fuafuaga a lona Tamā ma i le fetalai atu i upu faamalosiau i lana au faalogologo. (Mataio 6:28-30; Ioane 4:35, 36) “O le faatuatua” ua iloa ai e le toatele faapea o le foafoaga ofoofogia ‘na faia ona o le afioga a le Atua.’ (Eperu 11:3) E ao ona atagia atu i o tatou olaga i aso fai soo lena faatuatua.—Iakopo 2:14, 26.

Ua matuā sili le matagofie o foafoaga a lo tatou Atua. Ua matuā faaatagia mai ai lona atamai, lona mana, lana amiotonu, ma lona alofa. Mo se faataʻitaʻiga, ua ia faatū faasipa lo tatou lalolagi, ma tuu atu e malaga faataamilo i le la, ina ia mafai ai e lana foafoaga o le a ia faia mulimuli ane, o le tagata, ona olioli i le faasologa o tau matagofie. Na fetalai le Atua: “O aso uma o le lalolagi e le toe utuva ai o tausaga e lulu ai, ma tausaga e selesele ai, o le maalili foi ma le vevela, o le vaitoelau ma le vaipalolo, o le ao foi ma le po.” (Kenese 8:22) E lē gata i lea, ua faatamaoaigaina e le Atua lo tatou laueleele i minerale tāua. Ae maise, ua ia saunia le tele o vai, ua mulimuli ane avea o se mea e sili ona manaomia ma o se fesoasoani i foafoaga ola uma i le lalolagi.

 I se faasologa maopoopo lelei o ‘aso faalefoafoaga’ e ono, e faitau afe tausaga le umi o aso taitasi, na sagaʻi atu ai le “mana galue o le Atua” e sauniunia le lalolagi, ina ia aināina e tagata. O le malamalama o loo mafai ai ona tatou vaaia mea, o le ʻea o loo tatou mānavaina, o le laueleele matūtū lea o loo tatou mau ai, le vaomua, le feauauai mai o le ao ma le po, o iʻa, o manu felelei, o manuvaefa—na tuuina mai na mea uma i se faasologa maopoopo e Lē Silisili na Foafoaina i tatou, mo manaoga ma le fiafiaga o le tagata. (Kenese 1:2-25, NW) Ma le mautinoa lava, e mafai ona tatou aufaatasi ma le faisalamo i le alalaga atu: “Ieova e, ua matuā tele au galuega. Ua e faia ia mea uma i le poto; ua tumu le lalolagi i au oloa.”—Salamo 104:24.

Le Palealii o Foafoaga a le Atua

A o faagasolo ina faaiʻuina le “aso” faalefoafoaga lona ono, na faia ai e le Atua le tamaloa ma mulimuli ane, o lona fesoasoani, o le fafine. Maeu se tumutumuga sili mo le foafoaga faalelalolagi, e sili mamao atu lona matagofie na i lo o foafoaga faitino uma na muai faia! Ua faailoa mai ia i tatou e le Salamo 115:16 e faapea: “O le lagi, o le lagi lava, e ia Ieova lea; a ua tuuina mai e ia le lalolagi mo le fanau a tagata.” E tusa ai ma lea, na fuafuaina i tatou e Ieova o ni tagata ola ina ia mafai ona tatou fiafia ai, ma ia faaaogāina ana uluai foafoaga i luga o le lalolagi. Maeu le loto faafetai e ao ona ia i tatou mo o tatou mata—e sili atu ona lavelave na i lo o se mea puʻeata e sili ona lelei—e mafai ona puʻeina ai le lalolagi felanulanuai o loo siomia ai i tatou! Ua iai o tatou taliga—e sili atu foi ona lelei na i lo o ni mea faaleotele leo ua faia e tagata—ua fesoasoani lea ia i tatou e olioli i talanoaga, musika, ma pesega mālie a manu felelei. Ua uma ona fausia i totonu o i tatou se faiga e mafai ai ona tautala, e aofia ai le laulaufaiva e sili ona tomai. O sela o le laulaufaiva mo le tofo, faatasi ma lo tatou lagona o le sogisogi, ua maua ai foi le olioli i le tofoina o le anoanoai o meaʻai eseese. Ma maeu lo tatou talisapaia o le paʻi mai o se lima alofa! E mautinoa lava le tatau ona tatou faafetai atu i Lē na Foafoaina i tatou, e pei ona faia e le faisalamo o lē na faapea mai: “Ou te vivii atu ia te oe, auā na faia aʻu e ala ai ona matautia ma ofo tele ai; o mea na e faia, o mea mamana ia; ua ou matuā iloa e aʻu nei mea.”—Salamo 139:14.

Le Alofa ma le Agalelei o Lē na Foafoaina i Tatou

Na tusia e le faisalamo: “Ia outou vivii atu ia Ieova, auā e lelei o ia; . . . . O lē faia vavega tetele, na o ia lava; auā e faavavau lava lona alofa [ma le agalelei, NW].” (Salamo 136:1-4) O le alofa ma le agalelei lena ua uunaia ai o ia e faia mea ofoofogia e sili mamao atu na i lo o foafoaga na seʻi faatoʻā uma ona tatou faamatalaina. Ioe, e ui lava o loo ia malōlō mai le foafoaina o mea faitino, ae o loo ia foafoaina pea mea i se tulaga faaleagaga. O loo ia faia lenei mea e tali atu ai i le luʻi taufaaleaga lea na tuuaʻia ai o ia. E faapefea?

Sa tuuina le uluai tane ma le fafine i se parataiso matagofie, i Etena. Ae peitai, o se agelu fouvale o Satani, na ia faia o ia lava ma atua ma taʻitaʻiina ai lena ulugalii i se fouvalega ia Ieova. Na faasalaina i laua ma le tonu e le Atua i le oti, ma le iʻuga e faapea, o a la fanau, ma tagata uma lava, o le a oo i se tulaga agasala, ma oti ai. (Salamo 51:5) O le tala a le Tusi Paia e uiga ia Iopu ua faaalia ai na luʻia e Satani le Atua, i le faapea mai e leai se tagata e mafai ona tumau i le faamaoni ia te Ia pe oo i ai ni tofotofoga. Ae na faamaonia e Iopu le matuā pepelo o Satani, e pei foi ona faamaonia e le toatele o isi auauna faamaoni a le Atua i taimi o le Tusi Paia, ma e oo mai lava i o tatou aso. (Iopu 1:7-12; 2:2-5, 9, 10; 27:5) Ona o Iesu o se tagata lelei atoatoa, na ia faataatia ai se faaaʻoaʻoga e lē mafaatusalia o le tausisi i le faamaoni.—1 Peteru 2:21-23.

I lea, ua mafai ai ona faapea mai Iesu, “E le maua e [Satani] se mea ia te au.” (Ioane 14:30) Peitai, e oo mai lava i le asō, ‘o loo nofo toilalo pea le lalolagi uma i lē o leaga.’ (1 Ioane 5:19) I le luʻia o le saʻolele o le pule silisiliese a Ieova, na tuuina atu ai ia Satani le 6,000 tausaga e faaalia ai po o le a manuia lana lava pulega i luga o tagata. Ae pagā le matuā leaga o lona lē taulau, ona o loo faamaonia lea i le faateleina  pea ona leaga tulaga o loo iai i le lalolagi! Ua lē o toe mamao ona aveesea lea e lo tatou Atua alofa o Ieova, lenei sosaiete o le lalolagi ua faaleagaina, ma o le a faamautinoa ai lana pule tonu silisiliese i le lalolagi. Maeu se mapusaga fiafia o le a aumaia e lena mea i tagata o ē o loo moomoo mo se pulega filemu ma le amiotonu!—Salamo 37:9-11; 83:17, 18.

Ae peitai, e lē ona pau lena! O le alofa ma le agalelei o le Atua, o le a faatinoina atili e faavae i upu a Iesu i le Ioane 3:16: “Aua ua faapea lava ona alofa mai o le Atua i le lalolagi [o tagata uma lava], ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” O lenei toe faafoisia i tagata o le faamoemoe o le ola e faavavau i le lalolagi, e aofia ai ma le foafoaina o mea fou. O ā nei mea? O le a faapefea ona maua ai e tagata o loo feōi ni aogā i nei mea? O le a faailoa mai e le isi a tatou mataupu o loo sosoo mai.