‘Aveina Aʻe ina ia Fetaiai ma le Alii’—Faapefea?

O LE taimi faaiʻu o le oo mai o le iʻuga lē masuia o lenei faiga leaga o mea, o loo faaauau pea. I le mavae atu o itula, minute ma sekone taitasi uma, ua tatou lalata atu ai i mea mataʻutia na valoia mai i aso ua mavae. Po o le siitiaga o se tasi o nei mea? Afai o lea, o afea o le a tupu ai lea mea, ma o le a faapefea foi ona tupu?

O le upu “siitiaga,” e lē o maua i le Tusi Paia. A o i latou e talitonu i le siitiaga, ua latou faasino atu i upu a Paulo i le 1 Tesalonia 4:17 e fai ma faavae o lo latou talitonuga. Seʻi o tatou iloiloina lenei mau i lona manatu atoa e faamaonia ai. Na tusia e Paulo:

“Ou te loto ina ia outou iloa, le au uso e, i le mataupu i e o momoe [“i le oti,” NW], ina neʻi outou faanoanoa, pei o isi e leai so latou faamoemoe. Auā afai tatou te talitonu, ua  maliu Iesu ma toe tu mai, e faapea foi ona aumaia e le Atua faatasi ma ia e o momoe ona o Iesu. Matou te fai atu foi lenei mea ia te outou i le afioga a le Alii [“o Ieova,” NW], o i tatou o e ola ma totoe pe a afio mai le Alii, tatou te le muamua i e o momoe [“i le oti,” NW]. Auā e afio ifo mai le lagi le Alii lava, ma le alaga, ma le leo o le agelu sili, ma le pu a le  Atua; e muamua foi ona toe tutū mai o e ua oti o ia Keriso; ona faafuasei lea ona aveina ae o i tatou o e ola ma totoe, faatasi ma i latou i ao, ina ia fetaiai ma le Alii i le va nimonimo [“ʻea,” NW]; ona tatou faatasi pea lava lea ma le Alii. O lenei ia outou fefaamafanafanai i nei upu.”—1 Tesalonia 4:13-18. (O upu faasisipa o a matou.)

Sa matuā fou lava le faapotopotoga i Tesalonia ina ua tusi atu i ai e Paulo lana uluai tusi i Kerisiano i inā i le tusa ma le 50 T.A. Sa puapuagatia sui o le faapotopotoga ona ua ‘momoe nisi o i latou i le oti.’ Ae peitai, o le mea na tusi atu ai Paulo sa faamafanafanaina ai Kerisiano i Tesalonia i le faamoemoe o le toetu.

Le “Faatasi mai” o Keriso

A o faamautinoa atu faapea, o Kerisiano faamaoni na maliliu i lena taimi, o le a toe faatutūina mai, na faapea mai ai foi Paulo: “O ē ola ma totoe pe a afio [“faatasi,” NW] mai le Alii, tatou te le muamua i e o momoe [“i le oti,” NW].” (Fuaiupu 15) O le mea moni, e aogā ona matau faapea, o loo faasino atu le aposetolo i le “faatasi mai” o le Alii. I inei, i le uluai gagana tusitusia, o loo faaaogā ai le upu Eleni pa·rou·siʹan, o lona uiga moni lava “o le iai faatasi.”

Afai e asiasi mai le ao o se Malo ese i se atunuu, o aso uma lava e iai o ia i inā, e masani lava ona faasilasila mai. E moni foi lea e tusa ai ma le faatasi mai o le Alii o Iesu Keriso. Ua faaauau pea ona aumaia e Le Olomatamata faamaoniga i tagata aʻoga loto faamaoni e uiga i valoaga o le Tusi Paia e faapea, o le faatasi mai o Keriso i le mana o le Malo faalelagi, na amata i le 1914. O mea na tutupu talu mai lena tausaga ua molimau i le faatasi mai lē vaaia o Iesu. (Mataio 24:3-14) O lea, i le faapea atu o nisi o Kerisiano o loo ola i le taimi o le faatasi mai o le Alii, o le a ‘aveina aʻe i ao ina ia fetaiai ma le Alii i le ʻea,’ sa faauiga e Paulo faapea, o i latou o ē o le a faasaoina, o le a latou faafeiloaia Keriso, e lē i le vanimonimo o le lalolagi, ae i le nofoaga lē vaaia i le lagi i le mea o loo nofo ai Iesu i le itu taumatau o le Atua. (Eperu 1:1-3) Ae o ai i latou?

‘Le Isaraelu a le Atua’

E tele faamatalaga i le Tusi Paia e faatatau ia Isaraelu faaletino, ma o loo tautala ai foi e uiga i le “Isaraelu [faaleagaga a] le Atua” faaleagaga. O tagata talitonu o Iutaia ma Nuu Ese o i latou ia o le a faia aʻe ai le numera atoa o lenei vaega faauuina e le agaga paia, po o le mana galue o le Atua. (Kalatia 6:16; Roma 11:25, 26; 1 Ioane 2:20, 27) Ua faaalia i le tusi o Faaaliga faapea o le aofaiga atoa o le Isaraelu faaleagaga e 144,000, o i latou uma na o loo faaatagia faatasi ma le Tamaʻi Mamoe, o Iesu Keriso, i luga o le Mauga o Siona faalelagi. O le a avea i latou ma tupu ma ositaulaga faatasi ma Keriso i le lagi. (Faaaliga 7:1-8; 14:1-4; 20:6) O le a aofia ai faatasi ma i latou na tagata o ē na auaufaatasi ma faapotopotoga i Tesalonia ma isi nofoaga, e tusa lava po o ā o latou lanu ma talaaga faaleatunuu.—Galuega 10:34, 35.

A o leʻi maua e so o se sui faamaoni o le Isaraelu faaleagaga se taui faalelagi, e ao ona oo ia i latou se isi mea. E pei lava ona muai maliu Iesu i le satauro a o leʻi faatūina o ia i le ola faalelagi, o lea, o Kerisiano e iai le faamoemoe faalelagi, e tatau ona muai maliliu i latou a o leʻi maua lo latou taui. (1 Korinito 15:35, 36) E moni foi lena mea e tusa ai ma sui o le Isaraelu faaleagaga na soifua i le uluai senituri T.A. ma tagata faapena o loo soifua pea i aso nei.

Ina ua uma ona taʻua ‘le faatasi mai o le Alii,’ ona faasino atu lea e Paulo i le taimi o le a maua ai e sui o le Isaraelu faaleagaga o ē ua maliliu lo latou taui faalelagi. Na ia tusia e faapea: “E afio ifo mai le lagi le Alii lava, ma le alaga, ma le leo o le agelu sili, ma le pu a le Atua; e muamua foi ona toe tutū mai o e ua oti o ia Keriso.” (Fuaiupu 16) O lea la, i le taimi lava e amata ai le faatasi mai o Iesu e avea ma Tupu, ona tatou faatalitalia loa lea o le amataina o le toetu faaleagaga, e amata ia i latou o le Isaraelu faaleagaga o ē na maliliu a o avea pea o ni ē tausisi i le faamaoni. (1 Korinito 15:23) Ua latou auauna nei faatasi ma Iesu i le lagi. Ae faapefea i latou o se vaega toaitiiti o Kerisiano faauuina o ē o loo ola pea i inei i le lalolagi? Po o faatalitali i latou i le siitiaga?

“Aveina Ae”—Faapefea?

Ina ua uma ona faasino atu i Kerisiano faauuina o ē ua maliliu, ona faaopoopo mai lea o Paulo: “Ona faafuasei lea ona aveina ae o i tatou o e ola ma totoe, faatasi ma i latou i ao, ina ia fetaiai ma le Alii i le va nimonimo [“ʻea,” NW] ona tatou faatasi pea lava lea ma le Alii.” (Fuaiupu 17) “O e ola” o i latou ia o ē o le a ola i le taimi o le faatasi mai o Keriso. O le a “aveina ae” i latou ina ia fetaiai ma le Alii o Iesu. E pei lava o le tulaga o uluai Kerisiano faamaoni, sa tatau ona latou oti faaletagata ina ia aufaatasi atu ai ma Keriso i le lagi.—Roma 8:17, 35-39.

I le tusi atu i Kerisiano i Korinito, na taʻua ai e Paulo faapea: “Le au uso e, o laʻu upu lenei, e le mafaia ona avea o le malo o le Atua ma tofi o i latou ua i ai tino aano ma toto; e le fai foi le ola pea ma tofi o le iu vale. Faauta mai, ou te taʻu atu ia te outou le mea lilo; e le momoe i tatou uma [“i le oti,” NW], a e liua i tatou uma, e faafuasei lava, o le emo o le mata, pe a ilia le pu faauma; auā e ilia lava, e toe tutū mai ai e ua oti ma le ola pea, e liua foi i tatou.” (1 Korinito 15:50-52) I le maliliu faamaoni i le vaitaimi o le faatasi mai o Keriso, o le a faafuaseʻi ai ona maua e sui taitoatasi o le vaega totoe o le Isaraelu faaleagaga lona taui faalelagi. I “le emo o le mata,” o le a toe faatūina ai o ia e avea o se foafoaga agaga ma “aveina ae” ina ia fetaiai ma Iesu ma ia auauna ia te ia o se pule lagolago i le Malo faalelagi. Ae faapefea isi uma o ē o tapuai ia Ieova? A o lalata mai le faaiʻuga o lenei faiga leaga, pe o le a aveina aʻe foi i latou i le lagi?

Faasaoina—Ae e Lē Ala i le Siitiaga

Talu ai, ona o le faatasi mamalu mai o Iesu na amata i le 1914, ua tatou oo loloto atu ai i “ona po o le iuga” o lenei lalolagi. (Tanielu 12:4) Na lapatai mai Paulo: “A o aso ma tausaga, e le aoga ia te outou, le au uso e, ona ou tusi atu ai ia te outou. Auā ua outou iloa lelei lava, o le aso o le Alii e pei o le gaoi i le po, e faapea ona oo mai ai; auā pe a latou fai ane, O loo filemu, ua le afaina [“saogalemu,” NW], ona oo lea ia te i latou o le fano faafuasei, faapei o le faatiga o le fafine to a fanau mai, latou te le sosola ai lava.” (1 Tesalonia 5:1-3) A o Kerisiano mataalia o le a sosola. Faapefea?

O le alaga ‘O loo filemu ma saogalemu!’ o se faataʻimuaga lena o le vaitaimi na taʻua e Iesu o le “puapuaga tele.” I le faamatalaina o se “motu o tagata e toatele” o ē faamaoni ua iai le faamoemoe e ola e faavavau i le lalolagi parataiso, ua faapea mai ai le tusi o Faaaliga: “O i latou ia o e o mai nai le puapuaga tele, ua ta foi o latou ofu, ma ua faasinasinaina o latou ofu i le toto o le Tamai mamoe.” (Faaaliga 7:9, 14; Luka 23:43) E leai, o nei mea ua oo ia i latou, e lē ona o se siitiaga. Na i lo o lea, ua ia i latou le faamoemoe o le faasaoina i inei i luga lava o le lalolagi. Ina ia sauniuni mo lea mea, e tatau ia i latou ona tumau ona mataala faaleagaga. E mafai faapefea ona e faia o lenei mea, ma faasaoina ai i le iʻuga o lenei faiga o mea?

E manaomia ona outou ‘faautauta ma ia oofu i le ufi fatafata o le faatuatua ma le alofa, ma le puloutau o le faamoemoe i le faaolataga.’ (1 Tesalonia 5:6-8) O le taimi lenei e uaʻi totoʻa atu ai i le Afioga faavaloaga a le Atua, le Tusi Paia. A o mou mālie atu le taimi seia oo i le faaiʻuga o lenei faiga o mea, ia utagia le fautuaga a Paulo: “Aua le taʻufaatauvaa i perofetaga. Ia tofotofo i mea uma lava, ia taofi mau i le mea lelei.” (1 Tesalonia 5:20, 21) O lea, e talia ma le fiafia oe e Molimau a Ieova i o latou Maota o le Malo, o inā e mafai ona e fetufai ai  ma i latou i le suesueina o valoaga o le Tusi Paia, ma isi vala o le Afioga faagaeeina a le Atua.

A o e tuputupu aʻe i le mauaina o le poto saʻo ma le faatuatua, o le a e iloa lelei ai lava le galueaiina o le fuafuaga a Ieova le Atua i le aveesea mai i le lalolagi o ona fili ma toe faafoisia le lalolagi i se parataiso. E ala i le faatinoina o le faatuatua, atonu o le a mafai ai foi ona e iai faatasi ma i latou o ē o le a faasaoina mai le puapuaga tele, ma maua ai sou faaeaga e faafeiloaia le faitau miliona o ē o le a toe faatutūina mai i le ola i inei i le lalolagi. Ma maeu se olioli o le a maua i le ola i lalo o le Malo o le Atua i aao o Iesu Keriso ma ana pule lagolago, o ē na ‘aveina aʻe ina ia fetaiai ma le Alii’ e ala i le toe faatutūina i le ola i le nofoaga faalelagi!

O lea la, mo tagata lautele usiusitai, o le ā le faamoemoe moni faale-Tusi Paia? E lē o se siitiaga. Na i lo o lena, o le ola e faavavau lea i le lalolagi i lalo o le pulega a le Malo o le Atua.

[Ata i le itulau 7]

O ē e faasaoina mai le puapuaga tele, o le a faafeiloaia ē o le a toe tutū mai i le ola i luga o se lalolagi parataiso, i le pulega a Iesu ma i latou na “aveina ae” i le lagi