Fesili Mai le Au Faitau

O le ā e mafai e se Kerisiano ona fai pe afai ua lē mafai ona ia maua se paaga faaipoipo talafeagai?

E ui lava o i tatou o ni Kerisiano ua tuutoina, ae e mafai lava ona tatou mafatia pe afai e lē faataunuuina se mea sa tatou faamoemoe ma le naunautai i ai. Ua matuā lelei ona faaleoina mai i le Faataoto 13:12 o tatou faalogona, e pei ona faapea mai: “O le faamoemoe ua tuai ona taunuu e faanoanoa ai le loto.” O le lagona lena ua oo i nisi Kerisiano pe afai latou te faanaunau e fia faaipoipo ae e lē mafai ona maua se paaga talafeagai. E patino lava lenei tulaga ia i latou o ē ua faamatalaina e le aposetolo o Paulo e faapea ‘ua mū i le manaonao.’—1 Korinito 7:9.

Na tuuina e Ieova i tagata se faanaunauga ina ia sailia se atoaga moni i se tagata o le isi itupā. O lea la, ua lē o se mea e ofo ai le tutupu malolosi aʻe o nei faalogona i le toatele o Kerisiano nofofua. (Kenese 2:18) O nei faalogona masani atonu e avea ma faatalatala i aganuu o loo matuā faamamafa ai le faaipoipo (po o ni tausaga patino e ao ai ona faaipoipo) pe afai foi o loo iai faatasi ni Kerisiano nofofua ma ni ulugalii faaipoipo e fiafia, i totonu o se faapotopotoga. Peitai, e lē lelei ona faatagaina lea popolega ina ia faateteleina pea mo se taimi umi. E faafetaiaia la faapefea e ni Kerisiano loto faamaoni lenei tulaga, e aunoa ma le matuā faapopoleina ai?

E lē faigofie, ma e lē tatau foi i isi ona latou manatu i lenei popolega faapea ua na o se lagona e faafuaseʻi ona pupuna tele aʻe, po o le manatu foi faapea ua na o sina lē mautonu itiiti. Ae o le tulaga moni lava ia, o le tomai ina ia faafoeina pe foia ai lea tulaga e faalagolago i gaoioiga e faia e le tagata nofofua.

Tatou te maua le manatu autū i le mataupu silisili aogā lenei a le Tusi Paia: “E sili le manuia o le na te foai atu, i le manuia o le na te talia mai.” (Galuega 20:35) O upu na sa fetalaia e le tagata nofofua o Iesu Keriso, ma sa talafeagai ona ia fetalai i lea mataupu. O le faia o ni mea mo isi i se agaga saʻo o se laasaga lelei lea e fesoasoani ai i so o se isi o i tatou ina ia faaleleia ni faalogona ua mafua ona o se faamoemoe ua lē taunuu. O le ā le uiga o lenei mea e tusa ai ma le itu o loo atugalu i ai se Kerisiano nofofua?

Ia faatino ni gaoioiga agalelei mo lou lava aiga faapea foi mo isi o le faapotopotoga, ma ia faateleina lau auaunaga i le faiva. E lē o le uiga o lenei fautuaga e faapea, ‘Ia matuā tele ni au mea e fai i taimi uma, ona galo ai lea ia te oe lou fia faaipoipo.’ E leai. O lou gaoioi i taimi uma i nei gaoioiga aogā faa-Kerisiano, atonu e te iloaina ai ua ‘toʻafilemu lou mafaufau, ua e pulea ou lava faanaunauga’ ma mafai ai ona e faaaogā ou tulaga o loo iai i le taimi nei i se auala e aogā.—1 Korinito 7:37.

O nisi o loo matuā faanaunau e fia faaipoipo ua latou faatagaina lenei faanaunauga e faaalu uma ai o latou taimi ma o latou mafaufau. O nisi ua oo lava ina faasalalau i nusipepa ni o latou manaoga mo ni paaga. Peitai ane, maeu le sili atu ona lelei pe a faamamafaina le talisapaia o aogā e mafai ona maua mai le taimi o le nofofua.—Faamolemole, tagai i mataupu “E Leʻi Faaipoipo a e ua Atoatoa mo le Auaunaga i le Atua” ma le “Nofo Fua—O se Auala Tauia o le Olaga” i Le Olomatamata o Oketopa 1, 1988, ma le “Pe ua na o le Faaipoipoga ea le Ki i le Fiafiaga?” i Le Olomatamata o Setema 15, 1992.

Ia tatalo ia Ieova mo se fesoasoani ina ia gafatia ai le tulaga nofofua. (Filipi 4:6, 7, 13) Ua iloa e le toatele o Kerisiano e leʻi faaipoipo faapea, o le faaaogāina o o latou taimi e suesue ai ma manatunatu loloto i le Afioga a le Atua, auai ma saosaolaumea i sauniga faa-Kerisiano, ua latou olioli ai i le ‘faafouina ua faaopoopo atu mo o latou mafaufau,’ e pei ona folafola atu e Iesu ia i latou e mulimuli ia te ia. (Mataio 11:28-30) Ua fesoasoani lenei itu ia i latou e atiina aʻe ai le itu faaleagaga, ina ia mafai ai ona avea i latou o ni tane po o ni avā e sili ona lelei pe a oo i se taimi latou te mauaina ai se paaga talafeagai.

Aua lava neʻi galo, o loo silafia e Ieova tulaga o tagata nofofua uma o loo auauna ia te ia. Ua ia silafia atonu o loo e iloa, e lē o fetaui ou tulaga o loo iai i le taimi nei ma sau fuafuaga ina ia faaipoipo. O loo silafia foi e lo tatou Tamā alofa faalelagi ni mea e sili ona lelei ma umi ni o latou aogā mo oe, e lē gata i le faaleagaga ae mo ou faalogona ootia. O le iʻuga fiafia, o le a e matuā mautinoa ai lenei manatu: O le faatalitali ma le onosai ia Ieova, ma le faatatauina o mataupu silisili o lana Afioga i le olaga i aso taitasi, e te mautinoa ai o le a ia faamalieina ou manaoga e sili ona tāua, i se auala e aumaia ai ia te oe manuia e faavavau.—Faatusatusa i le Salamo 145:16.