Leoleoina Mai Ituaiga Uma o Ifoga i Tupua
Leoleoina Mai Ituaiga Uma o Ifoga i Tupua
“Pe faapefea foi ona loto faatasi o le malumalu o le Atua ma tupua?”—2 KORINITO 6:16.
1. O le ā na faaataina mai e le fale fetafai ma malumalu o Isaraelu?
E IAI le malumalu o Ieova e lē tuua ai ni tupua. Sa faaataina mai lea e le fale fetafai o Isaraelu na fausia e Mose, atoa ma malumalu na mulimuli ane fausia i Ierusalema. O na fale sa faaataina ai le “fale fetafai moni,” le malumalu sili faaleagaga o Ieova. (Eperu 8:1-5) O lena malumalu o se fuafuaga lea e faalatalata atu ai i le Atua i le tapuaiga e faavae i le taulaga togiola a Iesu Keriso.—Eperu 9:2-10, 23.
2. O ai na avea ma pou tu i le malumalu sili faaleagaga o le Atua, ma o le ā le tulaga ua olioli ai le motu o tagata e toatele?
2 Ua avea Kerisiano taitoatasi ua faauuina ma “pou tu i le malumalu o [le Atua],” ma ua maua ai so latou nofoaga i le lagi. A o le “motu o tagata e toatele” o isi tagata tapuai o Ieova, o loo ‘latou avatua i le Atua le auaunaga paia’ i le mea ua faaataina mai e le lotoā o Nuu Ese, i le malumalu na fausia e Herota. Ona o le faatuatua i le taulaga a Iesu, ua latou maua ai se tulaga taʻuamiotonuina e iʻu i le faasaoina atu i “le puapuaga tele.”—Faaaliga 3:12; 7:9-15.
3, 4. O le ā ua faatusaina i ai le faapotopotoga o Kerisiano faauuina i le lalolagi, ma o le ā le mea leaga e tatau ona saoloto mai ai?
3 Ua faafaatusaina foi le faapotopotoga o Kerisiano faauuina i le lalolagi i se isi malumalu e saoloto mai i le ifo i tupua. Na tusi atu le aposetolo o Paulo ia i latou na ‘sa faamaufaailogaina e le agaga paia’ e faapea: “Ua atiina ae [outou] i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea; ua faatatauina ia te ia le fale atoa, o loo alu ae, ina ia fai ma malumalu paia i le Alii; o outou foi ua atiina ae faatasi outou ia te ia e le Agaga, e fai ma afioaga o le Atua.” (Efeso 1:13; 2:20-22) O nei tagata e 144,000 ua faamaufaailogaina, o ni “maa ola” ia ua ‘atiina aʻe ai le fale faaleagaga mo le au ositaulaga paia.’—1 Peteru 2:5; Faaaliga 7:4; 14:1.
4 Ona ua fai nei ositaulaga lagolago ma “malumalu o le Atua,” ua ia lē faatagaina ai lenei malumalu ina ia faaleagaina. (1 Korinito 3:9, 16, 17) Na lapatai atu Paulo e faapea: “Aua tou te amo faalegatasi ma e le talitonu; auā pe faapefea ona faatasi o le amiotonu ma le amio leaga? Pe faapefea foi ona mafuta o le malamalama ma le pouliuli? Pe faapefea foi ona loto gatasi o Keriso ma Pelialo? Pe faapefea foi ona tofusia faatasi o lē talitonu ma le ua le talitonu? Pe faapefea foi ona loto faatasi o le malumalu o le Atua ma tupua?” O Kerisiano faauuina, o ē ua fai mo “le Alii e ona le malosi uma lava,” e tatau ona saoloto mai le ifo i tupua. (2 Korinito 6:14-18) E tatau foi ia i latou o le motu o tagata e toatele ona aloese mai ituaiga uma o ifo i tupua.
5. O le ā ua faia e Kerisiano, i le iloa faapea e tatau ia Ieova le tuutoina atu atoatoa?
5 O loo iai ituaiga o ifoga i tupua e tuusaʻo atoatoa atu ma ituaiga e faigata ona iloa. Leai, e lē gata mai le ifo i tupua i le tapuai atu i ni atua sese po o ni atua fafine. O le tapuaiga lea i so o se mea po o se tasi e ese mai ia Ieova. I le avea ma Pule Silisiliese o le lagi ma le lalolagi, ua tonu ai ona ia manaomia ma ua tatau i ai le tuutoina atu atoatoa. (Teuteronome 4:24) O le iloaina o lena mea, ua utagia ai e Kerisiano moni lapataiga faasaga i ifoga uma i tupua. (1 Korinito 10:7) Seʻi tatou iloiloina la nisi ituaiga o ifoga i tupua e ao ona aloese ai auauna a Ieova.
Mea ua Faaataina e Ifoga i Tupua a Kerisinetoma
6. O ā mea inosia na vaaia e Esekielu i le faaaliga?
6 A o iai i le tafeaga i Papelonia i le 612 T.L.M., na oo ai i le perofeta o Esekielu se faaaliga o ni mea inosia sa faia e tagata aposetate o Iutaia i le malumalu o Ieova i Ierusalema. Na vaaia e Esekielu se “tupua o le fuā.” E toafitusefulu toeaina na mātauina o loo latou ofoina atu mea manogi i le malumalu. Sa vaaia ai foi fafine o loo fetagisi i se atua sese. Ma tamaloloa e toʻa 25 sa tapuai i le la. O le ā le uiga o na gaoioiga faaaposetate?
7, 8. O le ā atonu na fai ma “tupua o le fuā,” ma aiseā na ia faatupuina ai le fuā o Ieova?
7 O mea inosia na vaaia e Esekielu i le faaaliga, na faaataina ai ifoga i tupua a Kerisinetoma. Mo se faataʻitaʻiga, na ia faapea mai: “Faauta foi i le itu i matu, i le faitotoa o le fata faitaulaga, o lena tupua o le fuā i le mea e ui atu ai. Ua fetalai mai foi o [Ieova le Atua] ia te au, Le atalii e o le tagata, ua e iloa ea mea o loo faia e i latou; o mea tetele e inosia o loo faia e le aiga o Isaraelu iinei, ina ia ou faamamao ma loʻu malumalu?”—Esekielu 8:1-6.
8 O le tupua o le fuā sa ifo i ai, atonu o se pou paia lea na fai ma sui o le atua fafine sese, sa manatu i ai tagata Kanana o le avā a lo latou atua o Paala. Po o le ā lava le mea na fai ma faatusa, ae sa fai lena ma itu na fuā ai Ieova ona o le fevaevaeai o Isaraelu i lo latou tuutoina atu atoatoa ia te ia ma solia ai ana poloaiga: “O aʻu o Ieova lou Atua, . . . Aua neʻi e fai mo oe ni atua ese i oʻu luma. Aua e te fai mo oe se tupua ua ta, po o se faatusa lava o se mea o i le lagi i luga, po o i le fanua i lalo, po o i le sami o i lalo o le fanua; aua e te ifo i ai, aua foi e te auauna i ai; auā o aʻu o Ieova lou Atua, o le Atua fuā.”—Esoto 20:2-5.
9. Ua faapefea ona faatupuina e Kerisinetoma le fuā o le Atua?
9 O le tapuai atu i le tupua o le fuā i le malumalu o le Atua, o se tasi lea o mea e sili ona inosia na faia e tagata aposetate o Isaraelu. Ua faapena foi ona faaleagaina lotu a Kerisinetoma i faatusa ma tupua e faalumaina ai le Atua, ma vaeluaina ai le tuutoina atu atoatoa na latou faapea mai o loo avatu i Lē ua latou taʻutino mai o loo auauna i ai. E fuā foi le Atua ona o le teena e taʻitaʻi lotu o lona Malo, ua na o lea le faamoemoe mo tagata, ae tapuai i Malo Aufaatasi—“le mea e inosia . . . ua tu i le mea paia,” lea e lē tatau ona tu ai.—Mataio 24:15, 16; Mareko 13:14.
10. O le ā na vaaia e Esekielu i totonu o le malumalu, ma ua faatusaina faapefea lena i le mea ua mātauina i Kerisinetoma?
10 Ua lipotia mai e Esekielu, ina ua ulu atu i le malumalu: “Faauta foi, o faatusa o mea fetolofi, ma manu vaefa leaga uma, ma tupua uma a le aiga o Isaraelu, ua tusia i le pa ua matuā soo ai lava. O loo tūtū foi i o latou luma o tagata e toafitugafulu o toeaina o le aiga o Isaraelu . . . o le tagata ma lana ipu e mu ai mea manogi ua i lona lima, o loo alu ae foi le asuasu tele o mea manogi.” Seʻi tau ina manatu! O loo ofoina atu e toeaina o Isaraelu i le malumalu o Ieova, mea manogi i atua sese, na faaataina mai e mea inosia ua tusia i le pa. (Esekielu 8:10-12) A faatusatusa atu i ai, ua faaaogā foi manu felelei ma manu vaefa e fai ma faatusa o atunuu Kerisinetoma, ia o loo tuutoina atu i ai tagata. E sili atu i lena, ua agasala le toatele o taʻitaʻi lotu ona o le fesoasoani e faaseseina tagata e ala i le faalauiloaina o le tala sese faaevolusione e faapea na tupuga mai le tagata i ni mea faatauvaa, i manu na i lo o le faasilisilia o le tala moni a le Tusi Paia e uiga i le foafoaga a Ieova le Atua.—Galuega 17:24-28.
11. Aiseā na fetagisi ai fafine aposetate o Isaraelu ia Tamusa?
11 I le ala tatala o le faitotoa o le fale o Ieova, na vaaia ai e Esekielu fafine aposetate o Isaraelu o loo fetagisi ia Tamusa. (Esekielu 8:13, 14) Sa manatu tagata Papelonia ma Suria ia Tamusa o se atua o laautotō e tuputupu aʻe i le tau o timuga ma toe mavae atu i le vaitaimi e matūtū ai. O lona mavae atu sa faaataina ai le oti o Tamusa, lea sa fetagisi ai ona tagata tapuai i tausaga taitasi i le taimi e sili ai ona vevela. Ma o le totogo aʻe o laautotō i le vaitaimi o timuga, na faatusa i ai le toetu aʻe o Tamusa mai le lalolagi e lē mailoa. Sa fai ma ona sui le uluai mataitusi o lona igoa, o le tau i aso anamua, e pei o se koluse. Tatou te toe manatua lelei ai i lenei mea le ifo i tupua o Kerisinetoma ona o le faapaiaina o le koluse.
12. O le ā na vaaia e Esekielu o faia e tamaloloa aposetate e toʻa 25 o Isaraelu, ma o le ā le gaoioiga faapena o loo faia i Kerisinetoma?
12 I le lotoā tuloto o le malumalu, na vaaia ai foi e Esekielu ni tamaloloa aposetate e toʻa 25 o Isaraelu o loo tapuai atu i le la—ma solia ai le poloaiga a Ieova faasaga i lea ifoga i tupua. (Teuteronome 4:15-19) Na tuu atu foi e na tagata ifo i tupua se la laau matagā i fofoga o le Atua, atonu sa faaataina ai le totoga faafanautama o le tane. E letioa a lē taliaina e le Atua a latou tatalo, e pei foi ona lē maua e Kerisinetoma lana fesoasoani i le “puapuaga tele.” (Mataio 24:21) A o tapuai atu na tagata aposetate o Isaraelu i le la e aumaia ai le malamalama, ae o loo ū o latou tua i le malumalu o Ieova, ua faapena foi la ona faaleamanaia e Kerisinetoma le malamalama mai le Atua, ae aʻoaʻoina aʻoaʻoga sese, faasilisilia ai le atamai faalelalolagi ma lolo atu ai i amioga lē mamā.—Esekielu 8:15-18.
13. I ā auala ua aloese ai Molimau a Ieova mai ituaiga o ifoga i tupua na vaaia e Esekielu i le faaaliga?
13 Ua aloese Molimau a Ieova mai ituaiga o ifoga i tupua o loo faia e Kerisinetoma, po o le vaega faaonaponei o Ierusalema e pei ona muai vaaia e Esekielu. Tatou te lē faasilisilia ni faatusa e faalumaina ai le Atua. E ui ina tatou te faaalia le faaaloalo mo pulega faalemālō o “faipule silisili,” ae o lo tatou gauai atu ia te i latou, e fai faatatau. (Roma 13:1-7; Mareko 12:17; Galuega 5:29) E tuutoina atu o tatou loto i le Atua ma lona Malo. Tatou te lē suia Lē na Foafoaina Mea ma lana foafoaga i le tala o le evolusione. (Faaaliga 4:11) E lē taitai ona tatou faapaiaina se koluse pe faasilisilia foi aʻoaʻoga a tagata atamamai, ma ē faifilosofia, po o nisi ituaiga o atamai faalelalolagi. (1 Timoteo 6:20, 21) Ua leoleoina foi i tatou mai isi ituaiga uma o ifoga i tupua. O ā nisi o na mea?
Isi Ituaiga o Ifoga i Tupua
14. O le ā le tulaga ua tutū ai auauna a Ieova e uiga i le “manu feai” o le Faaaliga 13:1?
14 E lē auai faatasi Kerisiano ma tagata i le faasilisilia o se faatusa o le “manu feai.” Fai mai le aposetolo o Ioane: “Ona aʻu iloa ai lea o le manu feai ua alu ae nai le sami, e fitu ona ulu ma ona nifo e sefulu; ua i ona nifo foi o palealii e sefulu, . . . Ua ifo foi ia te ia o i latou uma o e nonofo i le lalolagi.” (Faaaliga 13:1, 8) E mafai ona faatusaina manu i “tupu,” po o malo faapolotiki. (Tanielu 7:17; 8:3-8, 20-25) O lea, o ulu e fitu o le manu feai faafaatusa, ua fai ia ma sui o malo malolosi o le lalolagi—o Aikupito, Asuria, Papelonia, Metai ma Peresia, Eleni, Roma, ma le malo tuufaatasi o Peretania ma le Iunaite Setete o Amerika. Ua faaalia e taʻitaʻi lotu o Kerisinetoma le augapiu o se faaaloalo mo le Atua ma Keriso e ala i le taʻitaʻia o tagata ina ia faasilisilia le faiga faapolotiki a Satani, “le alii o lenei lalolagi.” (Ioane 12:31) Peitai, i le avea ma Kerisiano solitū ma ē lagolagoina le Malo, ua teena ai e auauna a Ieova na ifoga i tupua.—Iakopo 1:27.
15. E manatu faapefea tagata o Ieova i tagata taʻutaʻua o le lalolagi, ma o le ā na fai mai ai se tasi o Molimau i lenei itu?
15 E taumamao foi tagata o le Atua mai le faasilisilia o tagata taʻutaʻua o le lalolagi i faafiafiaga ma taaloga. Ina ua avea ma Molimau a Ieova, na faapea mai se tasi tamaloa faimusika: “O musika mo faafiafiaga ma siva e mafai ona faagaeeina ai tuʻinanauga sese . . . E pese le tagata faafiafia e uiga i le fiafiaga ma le toʻafilemu atonu e manatu le toatele o le au faalogologo, e lē o maua e a latou paaga faaipoipo. Ua masani ona mātauina se fatu pese i mea e pese faatatau i ai. O nisi o faimusika ma tagata pese faapolofesa ou te iloa, e fiafia tele i ai tamaitai ona o lena mafuaaga. E lofia loa se tasi i mafaufauga faavalea o lenei lalolagi, ona taʻitaʻiina ai loa lea i lona faasilisilia o se tagata faafiafia. Atonu e amata lava e aunoa ma se āfaina i le fai atu e saini mai le igoa o lena tagata e avea ma suvania. Ae ua manatu nisi i se tagata fatu pese o se mea lelei ia i latou, ma i le faasilisilia faalētatau o lena tagata, ua fai ai o ia mo latou tupua. Atonu latou te faatautauina le ata o lena tagata taʻutaʻua i totonu o o latou fale ma amata ona oofu ma faia a latou lava tēuga e pei ona ia faia. E manaomia ona teu i manatu o Kerisiano, ua na o le Atua lava e tatau i ai le viiga.”
16. O le ā e faaalia ai le teena e agelu amiotonu o le ifo i tupua?
16 Ioe, e na o le Atua lava e tatau i ai le viiga po o le tapuaiga. Ina ua faapaʻū atu Ioane “e ifo atu i vae o le agelu” lea na ia faaalia ia te ia mea ofoofogia, sa teena e lena foafoaga agaga le faasilisilia o ia i so o se auala, ae na ia faapea ane: “Ia oe, aua lava; auā o aʻu o lou uso a auauna, ma lo le au perofeta ou uso, o lo latou foi o e tausi i upu o lenei tusi; ia e ifo i le Atua.” (Faaaliga 22:8, 9) O le mataʻu ia Ieova, po o le faaaloalo loloto mo ia, e uunaia ai i tatou e tapuai atu e tau lava o ia. (Faaaliga 14:7) O lea, o le tuutoina moni faaleatua, e puipuia ai i tatou mai le ifo i tupua.—1 Timoteo 4:8.
17. E mafai faapefea ona leoleoina i tatou mai le faasilisilia o feusuaiga lē mamā faaleituaiga?
17 O feusuaiga lē mamā faaleituaiga, o se isi lea ituaiga o ifoga i tupua e teena e auauna a Ieova. Ua latou iloa faapea, “ai sē faitaaga, po o sē fai mea leaga, po o sē manumanu, (o le ifo i tupua lava lea,) e le maua e i latou se tofi i le malo o Keriso [“ma lo le Atua,” NW].” (O upu faasisipa o a matou.) (Efeso 5:5) O le pogai ua aofia ai le ifo i tupua, ona ua avea le tuʻinanau mo fiafiaga e lē faatulafonoina ma mea e tuutoina atu i ai. Ua faaleagaina uiga faaleatua i tuʻinanauga leaga mo feusuaiga. I le tosina atu o ona mata ma ona taliga i tusiata o loo faaalia ai feusuaiga, ua lamatia ai e se tagata so o se faiā, semanū na te mauaina ma le Atua paia, o Ieova. (Isaia 6:3) Ina ia leoleoina la mai lena ifoga i tupua, e tatau i auauna a le Atua ona aloese mai tusiata o loo faaalia ai feusuaiga, atoa ma musika lē mamā. E manaomia ona latou taofi mau i mea aogā e malolosi faaleagaga ua faavae i le Tusi Paia, ma e tatau ona faaofuina pea i latou i “le tagata fou ua faia e foliga i le Atua, i le amiotonu ma le amio lelei e faamaoni.”—Efeso 4:22-24.
Aloese i le Matapeapea ma le Tuʻinanau Leaga
18, 19. (a) O le ā le matapeapea ma le tuʻinanau leaga? (e) E mafai faapefea ona leoleoina i tatou mai le faasilisilia o le matapeapea ma le tuʻinanau leaga?
18 Ua leoleoina foi Kerisiano mai le matapeapea ma le tuʻinanau leaga, ia ua avea ma ituaiga e felataʻi tele i le ifo i tupua. O le matapeapea, o se manaoga lea e lē pulea pe lē mataofia, ae o le tuʻinanau leaga o le losilosivale lea i so o se mea a se tasi tagata. Na lapatai mai Iesu e uiga i le tuʻinanau leaga ma taʻua ai se tagata mauoa e manumanu, o lē sa lē aogā i ai ana oa ina ua oti ma sa iai i se tulaga faanoanoa ona o le “le mauoa i le Atua.” (Luka 12:15-21) Na fautuaina ma le talafeagai e Paulo uso talitonu e faapea: “Ia outou fasiotia o outou itu tino o i le lalolagi, . . . o le tuʻinanau leaga ma le matapeapea, (o le ifo i tupua lava lea).”—Kolose 3:5.
19 O i latou o ē saili ina ia tele tupe, e mananao tele i meaʻai ma meainu, po o le fia maua o le pule, ua avea na faanaunauga ma o latou tupua. E pei ona faasino mai e Paulo, o le tagata e matapeapea, e ifo i tupua foi o ia ma e lē fai le Malo o le Atua mona tofi. (1 Korinito 6:9, 10; Efeso 5:5) O lea, o tagata ua papatisoina o ē faia le ifo i tupua o ni tagata matapeapea, e mafai ona faateʻaeseina mai le faapotopotoga Kerisiano. Peitai, i le faatatauina o le Tusi Paia, atoa ma le tatalo faatauanau, e mafai ona tatou alofia ai le matapeapea. Fai mai le Faataoto 30:7-9: “O mea e lua ua ou ole atu ai ia te oe [Ieova le Atua]; aua e te faafiti mai ai ia te au, manū ou te lei oti; o mea faatauvaa ma upu pepelo, ia faamamao ia ia te au; aua e te tuu mai ia te au le mativa po o le mauoa; ia e fafaga mai ia te au i ni mea e ʻai e tatau ma aʻu; ina neʻi ou matuā maʻona, ona ou faafiti lea, ma ou faapea, O ai ea Ieova? ina neʻi ou mativa foi, ma ou gaoi, ma ou taʻufuaina le suafa o loʻu Atua.” E mafai ona fesoasoani ia i tatou se agaga faapena, ina ia leoleoina ai mai le ifo i tupua e pei o le matapeapea ma le tuʻinanau leaga.
Leoleoina mai le Faasilisilia o Oe Lava
20, 21. Ua faapefea ona leoleoina tagata o Ieova mai le faasilisilia o i latou lava?
20 Ua leoleoina foi tagata o Ieova mai le faasilisilia o i latou lava. O se mea masani i lenei lalolagi le faasilisilia o le tagata lava ia ma le mea ua ia loto i ai. O le naunau ina ia taʻutaʻua ma mo le viiga, ua mafua ai ona gaoioi le toatele i ala sese. Latou te mananao e fai o latou loto, ae e lē o le finagalo o le Atua. Peitai e lē mafai ona tatou maua se faiā ma le Atua pe afai tatou te māfuli e faasilisilia i tatou lava e ala i le saili e faia le mea tatou te loto i ai ma taumafai ia puleaina isi. (Faataoto 3:32; Mataio 20:20-28; 1 Peteru 5:2, 3) I le avea ma soʻo o Iesu, ua tatou lafoaia ai mea lilo taufaasese a le lalolagi.—2 Korinito 4:1, 2.
21 Na i lo le saili ia taʻutaʻua, ua faatatauina e tagata o le Atua le apoapoaiga a Paulo e faapea: “O lenei pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua.” (1 Korinito 10:31) I le avea ma auauna a Ieova, tatou te lē tausisi ai e faasilisilia o tatou lava ala, ae tatou te faia ma le olioli le finagalo o le Atua, ma taliaina taʻiala mai “le auauna faamaoni ma le mafaufau” ma felagolagomai atoatoa ma le faalapotopotoga a Ieova.—Mataio 24:45-47.
Ia Leoleoina Pea!
22, 23. I ā auala e mafai ai ona leoleoina pea i tatou mai ituaiga uma o ifoga i tupua?
22 I le avea ma tagata o Ieova, tatou te lē ifo ai i luma o ni tupua faitino. Ua leoleoina foi i tatou mai ituaiga taʻufaasese o ifoga i tupua. O le mea moni, e tatau ona faaauau pea ona tatou aloese mai ituaiga uma o ifoga i tupua. O le mea lena tatou te faatatauina ai le fautuaga a Ioane: “Ia leoleo outou ia te outou ia taumamao i tupua.”—1 Ioane 5:21.
23 Afai o oe o se tasi o auauna a Ieova, ia faaaogā pea lou loto fuatiaifo faale-Tusi Paia ma lou malosi faalemafaufau. (Eperu 5:14) Ona e lē pisipisia ai lea i le agaga o le ifo i tupua a lenei lalolagi, ae o le a pei oe o tagata faamaoni e toatolu mai Eperu, ma uluai Kerisiano faamaoni. O le a e tuutoina atu atoatoa oe ia Ieova, ma o le a ia fesoasoani foi ia te oe ina ia leoleoina pea mai i ituaiga uma o ifoga i tupua.
O ā Ou Manatu?
□ Ua aloese faapefea Molimau a Ieova mai ituaiga o ifoga i tupua na vaaia i le faaaliga ia Esekielu?
□ O le ā le “manu feai” o le Faaaliga 13:1, ma o le ā le tulaga ua tutū ai auauna a Ieova e faatatau i ai?
□ Aiseā e leoleoina ai mai le faasilisilia o tagata taʻutaʻua i faafiafiaga ma taaloga?
□ E mafai faapefea ona leoleoina i tatou mai le faasilisilia o i tatou lava?
□ Aiseā e ao ai ona leoleoina pea mai ituaiga uma o ifoga i tupua?
[Fesili mo le Suʻesuʻega]
[Ata i le itulau 26]
Pe e te iloa le auala ua faaataina ai le ifo i tupua a Kerisinetoma, i mea inosia na vaaia i le faaaliga ia Esekielu?
[Ē Ana le Ata]
O le ata (le ituagavale i luga) e mai le ata a Ralph Crane/Bardo Museum