Po o le a Aveina Aʻe Oe i le Lagi?

E TOATELE tagata ua talitonu faapea, o le a ō i latou i le lagi pe a latou feoti. Ae ua manatu nisi faapea, o le a faafuaseʻi ona aveina aʻe i latou i le lagi e le mea ua taʻua o le siitiaga. Po o le mea lena o loo e faatalitalia?

Na faapea mai se tasi tagata faievagelia Porotesano, o le siitiaga, “o le mou faafuaseʻi atu lea o le faitau miliona ma miliona o tagata e aunoa ma le matuā iloa po o fea na latou ō atu i ai!” O le faaupuga “siitiaga” e tusa ai ma le faamatalaga a le Evangelical Dictionary of Theology, e faasino lea i le “aufaatasia o le ekalesia ma Keriso i lona afio faalua mai.”

Ua lagona e nisi le lē fiafia i lea manatu faapea, o le a tuua uō ma aiga ina ia fetaiai ma Iesu Keriso. Ae e ui i lea, e toatele ua talitonu faapea e tatau ona faia le siitiaga. Pe o le a oo ea ona tupu le siitiaga? Afai o lea, o afea la?

Manatu Eseese e Uiga i le Siitiaga

Ua faaalia i le Tusi Paia faapea, a o leʻi amataina le Afe Tausaga o le Pulega na folafolaina mai a Keriso, o le a iai se vaitaimi e taʻua o le “puapuaga tele.” Na fetalai Iesu faapea: “O ia ona po e oo ai le puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli.” (Mataio 24:21; Faaaliga 20:6) Ua manatu nisi faapea e muamua le siitiaga a o leʻi oo i le puapuaga tele. A ua faatalitalia e isi le faia o le siitiaga i le vaitaimi o le puapuaga tele. A ua manatu foi nisi, o le a faia le siitiaga pe a mavae lena taimi o puapuaga lē mafaatusalia.

O le manatu i le siitiaga pe a mavae le puapuaga tele, sa taatele lava seia oo mai i le amataga o lona 19 o senituri. O lea, i Egelani i lena vaitaimi, na tuputupu aʻe ai se gaoioiga na faauluulu i se taʻitaʻi lotu o lē na uluai avea ma  taʻitaʻi lotu o le Lotu Aialani, na igoa ia John Nelson Darby. O ia ma isi tagata o le Lotu Egelani sa iai manatu faapena, sa oo ina lauiloa o le Auuso. Mai Plymouth, le nofoaga na faatūina ai lana lotu, na malaga atu ai Darby e talaʻi i Suisilani ma isi lava nofoaga i Europa. Sa ia faamautinoa atu faapea, o le toe afio mai o Keriso, o le a oo mai i ni tulaga se lua. O le a amata i se siitiaga faalilolilo, lea o le a aveina aʻe ai “tagata paia” a o leʻi oo mai se vaitaimi e fitu tausaga o le puapuaga e faatafunaina ai le lalolagi. Ona faaali tino mai lea o Keriso faatasi ma nei “tagata paia,” ona latou pule faatasi ai lea i le lalolagi mo le afe o tausaga.

Sa faamamafa e Darby le manaomia ona vavae ese mai i le lalolagi, ma o i latou na talia ona manatu, na mulimuli ane lauiloa o le Auuso Tuutoina (Exclusive Brethren). Na faauluulu ia B. W. Newton se tasi foi aʻoaʻoga e ese faapea e talitonu i le siitiaga, ae e lē o le siitiaga a o lumanai le puapuaga tele. O le siitiaga pe a mavae le puapuaga tele, e lagolagoina e Alexander Reese i le tausisi mai faapea “o aʻoaʻoga i se Siitiaga Faalilolilo o ni faafitauli i le faamoemoe i le Toe Afio Mai o Keriso.”

Ua talitonu i latou e lagolagoina le Siitiaga a o lumanai le puapuaga tele e faapea, o lenei feeseeseaiga o manatu ua lava lona mataʻutia, ua oo foi ina aafia ai “le tulaga masani o lo latou faamoemoega e tusa ai ma le afio mai o Keriso.” O isi ua faatuatua i se “aʻoaʻoga e uiga i se siitiaga faaituʻau,” i le talitonu faapea o i latou e sili ona faamaoni ia Keriso, o le a siitia muamua, a o i latou e sili ona faalelalolagi, o le a aveina aʻe mulimuli.

E tele vaega faievagelia o loo latou folafola atu se siitiaga ua lata tele mai o Kerisiano faamaoni. Ae peitai, ona o na manatu eseese, ua faapea mai ai se tamai tusi na lomia ma faasalalauina e le Lotu Penetekoso i Elim i Peretania: “E ui lava ina tatou talitonu i se faasologa umi o mea tutupu e fesootai atu ma le toe afio mai o le Alii o Iesu . . . , ae e iai foi le saolotoga e faatagaina ai le faamatalaina o valoaga e tusa ma talitonuga o le tagata lava ia. E toatele lava ua talia se tulaga e lē mautinoa, ua faatali ma le onosai e talatalaina mai e mea tutupu le polokalama faavaloaga.”

O le Afioga faagaeeina a le Atua, le Tusi Paia, o le tulaga lena e manaomia ona tatou fuaina ai le moni o talitonuga uma lava. (2 Timoteo 1:13; 3:16, 17) O lea la, o le ā o ia fai mai ai e uiga i le siitiaga?