Le Tapaa ma Taʻitaʻi Lotu

UA SILI atu nei i le 115 tausaga ua mavae, na tusia ai e se fomaʻi o John Cowan se tusi na faaulutalaina The Use of Tobacco vs. Purity, Chasitity and Sound Health. Ona o mea ua aʻoaʻoina e uiga i iʻuga mataʻutia o le tapaa i tausaga talu ai nei, ua matuā tatau ma talafeagai ai la lana suesuega i le tagofiaina o le tapaa e taʻitaʻi lotu mo so o se tasi o loo saili e auauna i le Atua i aso nei. I le mataupu e 4, lea o loo feagai ma amio e oo i ai ona o le faaaogāina o le tapaa, na faapea mai le Fomaʻi o Cowan:

“Afai e sese le tagofiaina o le tapaa i la le tino—e pei ona faaalia manino mai—e tatau foi la ona sese i itu tau amio; auā o le tulafono tau i le tino e faapea, ‘po o le ā lava le mea e faaleagaina ai le tino e faapena foi ona faaleagaina ai neura, ma sosolo atu i le faiʻai ma oo atu ai i le mafaufau.’ O le mafaufau o le tagata—ona manatu, ana tala, ana gaoioiga, e āfaina uma lava i le auala na te faaaogāina pe faataumaoia ai lona tagata faaletino. O le tapaa, i lona taʻuga saʻo lava ma faaupuga e fetaui tonu i ai, e matuā palapalā, ma—e lē popole i lamatiaga e aumaia ai—le auala e mafai ai ona amata pe atiina aʻe ai ni faalogona ma ni gaoioiga tau amio mamā, le amiotonu ma le faamasinotonu i le mafaufau. Afai e manatu ane se tasi i lenei mea e—faapea o Keriso, a o soifua o ia i Lona soifuaga i luga o le lalolagi—sa ia aʻoaʻoina ma talaʻiina le mamā, le amio mamā, le alofa ma le agalelei—ae sa ulaula, sogisogi ma lamuina tapaa. Pe ua lē o se solitulafono ea i le Atua lenei manatu? Ae, o nei taʻitaʻi lotu—a latou au lotu, ē failauga ma i latou e faamatalaina Ana tulafono ma ana aʻoaʻoga—ua faaoonaina uma o latou tino ma faaleagaina o latou ola i lenei vao oona ma le palapalā. Pe e mafai ea la e nei tagata ona tataʻia o latou olaga ia pei o le soifuaga o Keriso—o se olaga e maualuga, i tulaga tau amio? Ou te manatu, e leai.

“Seʻi manatu i se tagata e ʻai faaatuatuvale, e inu tele i uaina, pe ʻaitapaa, pe a faatatau i le paia o lona loto? O loo iai se mea e lē faalenatura, e matagā ma teena i na manatu. E pei lava ona faaleagaina manaoga o le tino ma lona lagonaina o manogi eseese, e faapena foi ona aafia ai le tagata i totonu ma amioga faalenatura. O le a lē mafai, ma e lē mafai foi, ona mau o le agaga mamā i se mea eleelea ma palapalā. E iai se fesootaiga faalenatura i mea faitino ma mea faaleagaga, ina ia mafai ai e uiga o le isi ona mātauina uiga o le isi. O se tagata poto i lotu ma o sē ua faapologaina i le tapaa . . . Atonu na te faailoaina mai e faapea pe a tuʻu lava i le tulaga o le mamā aʻiaʻi, ua ia mautinoa ai o le ulaina o le tapaa o se tū e faaleagaina ai, ma o se amioga e matuā sese tele; peitai atonu o se gaoioiga e sau mai i totonu, o se tulafono i lona tino, e tupu faafuaseʻi ma uunaia ai o ia e ni manaoga e lē faamalieina e faaauau ai pea lenei amioga ma e iʻu ina oo atu ai lenei tulafono, e tupu faafuaseʻi, ina malosi atu na i lo lona mafaufau lelei ma lona loto fuatiaifo ua tuufaatasia. Pe ua lē avea ai ea le tagofiaina o le tapaa, o le solia ai lea o se tasi o tulafono a le Atua, ua mauaʻa i la tatou faalapotopotoga? Ma ua lē avea ea la le solia o so o se tulafono a le Atua ma agasala? Ma afai foi e fai ma masani a le tagata ona ola i le solia o so o se tasi o tulafono a le Atua, pe ua lē faigofie ai ea la ma masani ona ia solia isi foi tulafono? I le manatu faaiʻu, e mafai faapefea e so o se tagata ona tu atu e pei o se faiaʻoga i amioga mamā, ae i lana lava amio, ua ia faaalia atu ai i ana aumea, lona lagolagoina o se olaga o loo faifai pea ona tetee i tulafono a lona lava olaga totino?”