Mea e Manaomia Mai ia i Tatou Ona o le Gauai atu i Le Atua

“O le mea lea ia outou gauai ai i le Atua.”—IAKOPO 4:7.

1. O le ā se tala e uiga i le ituaiga o Atua o loo tatou tapuai atu i ai?

MAEU se Atua ofoofogia e iai Ieova! E lē mafaatusalia, e silisiliese, e leai sē la te tutusa, e tutasi o ia i le tele o vala! O ia o Lē Silisili ona Maualuga, o le Pule Aoao Faalevateatea, o lē e ana le pule moni uma. E mai le vavau o ia e oo i le faavavau, ma ona o lona mamalu tele ua lē mafai ai e se tagata ona vaai ia te ia ma ola pea. (Esoto 33:20; Roma 16:26) E lē gata mai lona malosi ma le atamai, e matuā lelei atoatoa i le faamasinotonu, ma o ia moni lava o le faatinoina o le alofa. O ia o Lē na Foafoaina i tatou, o lo tatou Faamasino, o lo tatou Faitulafono, ma o lo tatou Tupu. O mea lelei uma ma meaalofa uma e lelei atoatoa e mai ia te ia.—Salamo 100:3; Isaia 33:22; Iakopo 1:17.

2. O ā mea e aofia ai i le gauai atu i le Atua?

² Ona o na mea moni uma, ua lē mafai ai la ona fesiligia la tatou matafaioi o le gauai atu ia te ia. Ae o le ā ua aofia ai i lenei mea mo i tatou?  E tele ni mea. Talu ai e lē mafai ona tatou vaai tino ia Ieova le Atua, o le gauai atu la ia te ia, e aofia ai le utagiaina o le fagufagu mai a o tatou loto fuatiaifo ua uma ona aʻoaʻoina, le felagolagomai ma le faalapotopotoga faalelalolagi a le Atua, le aloaia o pule faalelalolagi, ma le faaaloalo i le mataupu silisili o le tulaga ulu i totonu o le liʻo o le aiga.

Le Tausia o se Loto Fuatiaifo Lelei

3. Ina ia tausia se loto fuatiaifo lelei, o ā ituaiga o faasāsāaga e tatau ona tatou usiusitai i ai?

³ Ina ia tausia se loto fuatiaifo lelei, e tatau ona tatou usiusitai i mea e lē mafai ona faamalosia—o lona uiga, i tulafono po o mataupu silisili e lē mafai ona faamalosia e tagata. Mo se faaaʻoaʻoga, o le poloaiga lona sefulu o Tulafono e Sefulu, e faatatau i le manaonao, sa lē mafai ona faamalosia e pule faaletagata. E ui i lea, ua faamaonia ai i lena, o Tulafono e Sefulu e mai le Atua, auā e leai se vaega faitulafono faaletagata latou te faia se tulafono e lē mafai ona faamalosia e ala i ni faasalaga pe afai e solia. I lena tulafono, na avatu ai e Ieova le Atua le avega tauave i tagata taitoatasi o Isaraelu, ina ia fai le tagata lava ia ma ona leoleo—pe afai na te fia maua se loto fuatiaifo lelei. (Esoto 20:17) I se uiga faapena, o galuega a le tino e taofia ai se tasi mai le ulu atu i le malo o le Atua, e aofia ai le “losilosi vale” ma le “mataua”—o ni gaoioiga e lē mafai ona faamalosia i ai ni faasalaga e faamasino faaletagata. (Kalatia 5:19-21) Ae ina ia tausia se loto fuatiaifo lelei, e manaomia ona tatou alofia na uiga.

4. Ina ia tausia se loto fuatiaifo lelei, o ā mataupu silisili o le Tusi Paia e tatau ona tatou ola ai?

⁴ Ioe, e tatau ona tatou ola e tusa ai ma mataupu silisili a le Tusi Paia. O na mataupu silisili e mafai ona ta aofaia i ni poloaiga se lua na faailoa atu e Iesu Keriso e tali ai le fesili, po o lē fea poloaiga e aupito sili o le tulafono faa-Mose. “E te alofa atu i le Alii [Ieova] lou Atua ma lou loto atoa, ma lou agaga atoa, ma lou manatu atoa. . . . E te alofa atu i lē lua te tuaoi, ia pei o oe lava ia te oe.” (Mataio 22:36-40) O loo faataʻitaʻia mai le mea ua aafia ai i le poloaiga lona lua o na tulafono, i fetalaiga a Iesu o loo faamauina i le Mataio 7:12: “O mea uma foi tou te loto i ai ia faia e tagata ia te outou, ia faapea lava ona outou faia ia te i latou; auā o le tulafono lea ma le au perofeta.”

5. E mafai faapefea ona tatou tausia se faiā lelei ma Ieova le Atua?

⁵ E tatau ona tatou faia le mea ua tatou iloa e saʻo ma ia aloese mai le faia o le mea ua tatou iloa e sese, e tusa lava pe iloa mai e isi pe leai. E ao foi ona faia faapea, e ui ina atonu e lē maua i tatou i le lē faia o le mea e ao ona tatou faia po o le faia o le mea e lē tatau ona faia. O lona uiga, ia tausia se faiā lelei ma lo tatou Tamā faalelagi, a o teu i o tatou mafaufau le lapataiga a le aposetolo o Paulo o loo faamatalaina i le Eperu 4:13: “E lē lilo foi se tasi mea na faia i ona luma, a ua taatia fua ma ua aliali mai o mea uma lava i lana silafaga, tatou te taʻu atu ia te ia a tatou amio.” O le tausisi e faia le mea saʻo, o le a fesoasoani lea ia i tatou ina ia tau e tetee atu ai i togafiti taufaaʻoleʻole a le Tiapolo, ia tetee i omiga mai le lalolagi, ma ia tauivi ai ma vaivaiga tuufaasolo i le manatu faapito.—Faatusatusa i le Efeso 6:11.

Le Gauai atu i le Faalapotopotoga a le Atua

6. O ā auala o fesootaiga sa faaaogā e Ieova i ona po o i latou i tua atu o Kerisiano?

⁶ Ua lē tuu maia atoatoa e Ieova le Atua ia i tatou le aiā tatou te filifili taitoatasi ai pe faapefea ona tatou faatatauina mataupu silisili o le Tusi Paia i o tatou olaga. Mai lava i le amataga o talafaasolopito o le tagata, ua faaaogā ai e le Atua ni tagata e fai ma auala o fesootaiga. O lea, na avea ai Atamu ma fofoga fetalai a le Atua. Na tuuina atu ia Atamu le poloaiga e uiga i le laau faasāina a o leʻi foafoaina Eva, o lea atonu sa faailoa atu ai e Atamu ia Eva le finagalo o le Atua mo ia. (Kenese 2:16-23) Sa avea Noa o se perofeta a le Atua i lona aiga, atoa ma le lalolagi i ona po a o leʻi lofia i le lolo. (Kenese 6:13; 2 Peteru 2:5) Na avea Aperaamo ma fofoga fetalai a le Atua i lona aiga. (Kenese 18:19) Sa avea Mose ma perofeta, ma na fai foi o ia ma auala o fesootaiga a le Atua ma le nuu o Isaraelu. (Esoto 3:15, 16; 19:3, 7) Ina ua  mavae o ia, seia oo mai ia Ioane le Papatiso, e toatele perofeta, o faitaulaga, ma tupu sa faaaogā e le Atua e faaoo mai ai lona finagalo i ona tagata.

7, 8. (a) O ai ua faaaogā e fai ma fofoga fetalai a le Atua, talu ona afio mai o le Mesia? (e) O le ā ua manaomia e le gauai atu i le Atua mai Molimau a Ieova i aso nei?

⁷ Ina ua afio mai le Mesia, o Iesu Keriso, sa faaaogā loa e le Atua o ia ma ona aposetolo, atoa ma ona soʻo o lena taimi e avea ma Ana fofoga fetalai. Mulimuli ane, sa avea soʻo faamaoni faauuina o Iesu Keriso o se “auauna faamaoni ma le mafaufau,” e faailoaina atu i tagata o Ieova, le auala e faatatauina ai mataupu silisili o le Tusi Paia i o latou olaga. O le gauai atu la i le Atua, o lona uiga, o le amanaia lea o le meafaigaluega sa faaaogāina e Ieova le Atua.—Mataio 24:45-47; Efeso 4:11-14.

⁸ Ua faaalia i mea moni faapea i aso nei, o loo auaumea faatasi ai Molimau a Ieova ma “le auauna faamaoni ma le mafaufau,” lea o loo avea ai le Vaega Pule o na Molimau e fai ma ona sui. Ma ua tofia e lena Vaega, ni ovasia i matātā eseese—e pei o toeaina ma ona sui femalagaai—ina ia faatonutonuina le galuega i o tatou atunuu. Ona o le gauai atu i le Atua, ua manaomia ai ona gauai atu Molimau tuuina atu taitoatasi i na ovasia e tusa ai ma le Eperu 13:17 e faapea: “Ia outou usiusitai i o outou taʻitaʻi ma outou gauai i ai; auā o loo leoleo i latou mo o outou agaga, latou te tala atu le tala i ai, ina ia faia ma le olioli, a e aua ma le tiga; auā e lē aoga lea ia te outou.”

Le Taliaina o Aʻoaʻiga

9. O le ā ua masani ona aofia ai i le gauai atu i le Atua?

⁹ O le gauai atu i le Atua, e masani lava ona aofia ai le taliaina o aʻoaʻiga mai ia i latou o loo avea ma ovasia. Afai e seāseā ona tatou aʻoaʻia i tatou lava i aʻoaʻiga tatau, atonu la e manaomia ona fautuaina ma aʻoaʻia i tatou e i latou ua iai le agavaa ma le pule e faia ai faapea, e pei o toeaina o la tatou faapotopotoga. O le taliaina o lena aʻoaʻiga, o se ala o le atamai.—Faataoto 12:15; 19:20.

10. O le ā le matafaioi a i latou o ē taulimaina aʻoaʻiga?

¹⁰ E mautinoa la, e tatau i toeaina o ē taulimaina aʻoaʻiga, ona avea i latou lava ma faaaʻoaʻoga lelei o le gauai atu i le Atua. E  faapefea? E tusa ai ma le Kalatia 6:1, e lē gata ina tatau ona lelei le auala latou te fautua atu ai, ae e ao foi ona avea i latou o ni faaaʻoaʻoga lelei: ‘Le au uso e, afai e uia e se tagata se ala sese ae na te leʻi muai iloa, o outou o ē ua iai agavaa faaleagaga, ia taumafai e faafoi mai lena tagata i le agaga o le agamalu, a o faaeteete foi outou taitoatasi, ina neʻi faaosoosoina foi outou.’ I nisi faaupuga, e tatau ona ōgatasi le fautuaga a se toeaina ma lana faaaʻoaʻoga. Ua tusa lena ma le apoapoaiga o loo aumaia i le 2 Timoteo 2:24, 25 ma le Tito 1:9. Ioe, o i latou o ē taulimaina aʻoaʻiga po o faasaʻoga, e tatau ona matuā faaeteete ia aua lava neʻi inainā. E ao ona latou faaalia pea le agamalu, le agalelei, ma ia taofi mau i mataupu silisili i le Afioga a le Atua. E ao ona avea i latou o ni ē e faalogologo e lē faaituʻau, e faafouina ai i latou o ē ua tigaina ma mafatia i avega.—Faatusatusa i le Mataio 11:28-30.

Gauai atu i Faipule Silisili

11. O le ā e manaomia e Kerisiano i a latou faiā ma pule faalelalolagi?

¹¹ O le gauai atu i le Atua, e manaomia ai foi ona tatou usiusitai i ē o iai pule faalelalolagi. Ua fautuaina i tatou i le Roma 13:1: “Ia usiusitai tagata uma i faipule silisili; auā e leai se pule pe a le mai le Atua; o pule uma lava o loo fai nei, ua faatuina e le Atua.” E aofia ai i isi mea, ua talosagaina i tatou e na upu, ina ia usiusitai i tulafono o le auala ma manatu mamafa i le totogia o lafoga ma telo, e pei ona faailoa mai e le aposetolo o Paulo i le Roma 13:7.

12. O le ā le uiga o le fai faatatau o lo tatou gauai atu ia Kaisara?

¹² E ui i lea, ua manino lelei, o na gauai uma ia Kaisara e tatau ona fai faatatau. E tatau ona teu pea i o tatou mafaufau le mataupu silisili na taʻua e Iesu Keriso, e pei ona faamauina i le Mataio 22:21: “O mea a Kaisara, ia outou avatu ia Kaisara; a o mea a le Atua ia avatu ia i le Atua.” Ua matauina i faamaumauga i le pito i lalo e uiga i le Roma 13:1 i le Oxford NIV [New International Version] Scofield Study Bible e faapea: “E lē o le uiga o lenei mea e faapea, e ao ona ia usiusitai i tulafono e lē tatau pe lē faa-Kerisiano. O lana tiute i na tulaga, o le usiusitai lea i le Atua na i lo o tagata (Galuega 5:29; faatusatusa i le Tani. 3:16-18; 6:10 faamatalaga i lalo).”

Le Gauai atu i le Atua i Totonu o le Liʻo Faaleaiga

13. O le gauai atu i le Atua i totonu o le liʻo faaleaiga, e manaomia ai le ā mai ona sui?

¹³ Ua avea le tane po o le tamā ma ulu i totonu o le liʻo faaleaiga. E manaomia e lenei mea ona utagia ai e avā le fautuaga ua aumaia i le Efeso 5:22, 23: “O outou fafine, ia outou usiusitai i a outou lava tane, faapei ona usiusitai i le Alii. Auā o le tane o le ulu ia o le avā, pei o Keriso foi o le ulu ia o le ekalesia.” * Ae mo le fanau, latou te lē faia a latou lava tulafono, peitai e tatau ona latou faaalia lo latou gauai atu faaleatua i o latou tamā ma tinā, e pei ona faamatala mai i le Efeso 6:1-3: “O outou le fanau, ia outou faalogo i o outou mātua i le Alii, auā o le mea tonu lava lea. Ia e ava i lou tamā ma lou tinā; o le uluai tulafono lea ua i ai le mea ua folafolaina; ina ia manuia ai oe, ma ia e nofo tuluʻi ai i luga o le laueleele.”

14. O le ā e manaomia e le gauai atu faaleatua mai ulu o aiga?

¹⁴ O le mea moni, o le a faafaigofie ona faaalia e avā ma fanau lena gauai atu i le Atua, pe afai e faaalia foi e tane po o tamā le gauai atu i le Atua. Latou te faia lenei mea e ala i le faatinoina o lo latou tulaga ulu e tusa ai ma mataupu silisili a le Tusi Paia, e pei o ia o loo maua i le Efeso 5:28, 29 ma le 6:4: “O loo faapea ona tatau ona alolofa o tane i a latou lava avā, faapei o latou lava tino; o lē alofa i lana lava avā, o loo alofa o ia ia te ia lava; auā e leai lava se tasi e ita i lona lava tino; a e peitai na te fafaga  ma tausi atu i ai, faapei o le Alii foi ona tausi i le ekalesia.” “O outou tamā foi, aua neʻi tou faaonoono atu i a outou fanau, a ia tausi atu i ai i aoaiga ma apoapoaiga a [Ieova].”

Fesoasoani i le Faaalia o le Gauai atu i le Atua

15. O le ā le fua o le agaga o le a fesoasoani ia i tatou e faaalia ai le gauai atu i le Atua?

¹⁵ O le ā o le a fesoasoani ia i tatou i le faaalia o le gauai atu i le Atua i nei vala eseese? Muamua, o le alofa lē manatu faapito—le alofa mo Ieova le Atua ma i latou ua ia tofia e leoleoina i tatou. Ua taʻu mai ia i tatou i le 1 Ioane 5:3: “O lenei lava le alofa i le Atua, ia tatou tausi i ana poloaiga; e le mamafa foi ana poloaiga.” Na faaalia foi e Iesu lena lava manatu e tasi i le Ioane 14:15 e faapea: “Afai tou te alofa mai ia te au, ia outou tausi mai i aʻu poloaiga.” O le mea moni, o le a fesoasoani ia i tatou le alofa—o le fua o le agaga e sili ona tāua—ina ia talisapaia ai mea uma lava ua faia e Ieova mo i tatou ma o le a fesoasoani foi lea ia i tatou ina ia faaalia ai le gauai atu i le Atua.—Kalatia 5:22.

16. E fesoasoani faapefea le mataʻu i le Atua i le faaalia o le gauai atu i le Atua?

¹⁶ O le manatu lona lua, o le mataʻu i le Atua. O le a fesoasoani ia i tatou le mataʻu neʻi tatou faia se mea e toasa ai Ieova le Atua, auā o lona uiga o “le ʻinoʻino lea i le leaga.” (Faataoto 8:13) Ma le mautinoa, o le mataʻu neʻi tatou faia se mea e toasa ai Ieova, o le a taofia ai i tatou mai le faagutugutulua ona o le mataʻu i tagata. O le a fesoasoani foi lea ia i tatou ina ia usiusitai ai i faatonuga a le Atua e tusa lava po o ā faafitauli e manaomia ona foia. E lē gata i lena, o le a taofia ai foi i tatou mai le lolo atu i tofotofoga po o vaivaiga e iʻu ai i amioga leaga. Ua faaalia i le Tusi Paia e faapea, o le mataʻu ia Ieova, na mafai ai ona sauni Aperaamo e ofoina atu lona atalii pele o Isaako e fai ma taulaga, ma o le mataʻu foi neʻi faia se mea e toasa ai Ieova sa mafai ai ona teena ma le manuia e Iosefa faatosinaga lē mamā a le avā a Potifara.—Kenese 22:12; 39:9.

17. O le ā le vaega e mafai ona faia e le faatuatua i lo tatou faaalia o le gauai atu i le Atua?

¹⁷ O le fesoasoani lona tolu, o le faatuatua lea ia Ieova le Atua. O le faatuatua o le a mafai ai ona tatou utagia le fautuaga o loo aumaia i le Faataoto 3:5, 6: “Ia e faatuatua ia Ieova ma lou  loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” E faapitoa lava ona fesoasoani le faatuatua ia i tatou pe a foliga mai ua tatou mafatia i ni faiga lē tonu pe lagona foi le faaesea o i tatou ona o lo tatou lanu po o le atunuu, po o ni feeseeseaiga foi i o tatou uiga. Atonu foi e manatu nisi faapea, ua sese le lē amanaiaina o i latou, ona ua lē fautuaina i latou e avea ma toeaina po o se auauna o le faiva. Afai tatou te faatuatua, o le a tatou faatalitali la ia Ieova na te faasaʻoina mataupu i lona lava taimi tatau. Ae i le taimi nei, atonu e manaomia ona tatou atiina aʻe le tūtūmau ma le onosai.—Auega 3:26.

18. O le ā le fesoasoani lona fa i lo tatou faaalia o le gauai atu i le Atua?

¹⁸ O le fesoasoani lona fa, o le loto maulalo. O se tagata e loto maulalo e lē faigata ona ia faaalia le gauai atu, ona ‘i le loto maulalo, na te manatu ai e sili isi uma i lo ia.’ O se tagata e loto maulalo, e naunau o ia e pulea ia lava o ‘sē e faatauvaa.’ (Filipi 2:2-4; Luka 9:48) A o le tagata e faamaualuga, e musu e gauai atu ma e faaamuamu i ai. Fai mai le muagagana e uiga i se tagata faapena, e lelei atu ia te ia le faaleagaina ona o le viiga na i lo o le faasaoina ona o se faitioga.

19. O le ā le faaaʻoaʻoga lelei o le loto maulalo na faaalia e le peresitene lona lua o le Sosaiete o le Olo Matamata?

¹⁹ O se faaaʻoaʻoga lelei o le loto maulalo ma le gauai atu i le Atua, sa faaalia lea i se tasi taimi e Joseph Rutherford, le peresitene lona lua o le Sosaiete o le Tusi Paia ma Savali o le Olo Matamata. Ina ua faasāina e Hitila le galuega a Molimau a Ieova i Siamani, ona tusi atu lea o uso i inā ia Rutherford e fesili atu i ai mo se mea e ao ona latou faia ona ua faasāina a latou sauniga ma la latou galuega talaʻi. Na ia faailoa atu lena mea i le aiga Peteli ma taʻutino atu i ai e faapea, na te leʻi iloa po o le ā o le a taʻu atu i uso i Siamani, ae maise lava ona o faasalaga ogoogo na aafia ai. Na ia faapea atu, afai e iai se tasi na te iloa se mea e ao ona taʻu atu i uso i Siamani, o le a ia fiafia e faalogo i ai. Maeu se agaga loto maulalo! *

Aogā Mai le Faaalia o le Gauai atu i le Atua

20. O ā faamanuiaga e iʻu i ai ona o le faaalia o le gauai atu i le Atua?

²⁰ Atonu e lelei ona fesili faapea, O ā ni aogā o le faaalia o le gauai atu i le Atua? O le mea moni e tele aogā. Tatou te alofia ai popolega ma le lē mautonu ua oo ia i latou o ē gaoioi ma le fia tutoatasi. Tatou te olioli ai i se faiā lelei ma Ieova le Atua. Ua tatou maua ai aumea e sili ona lelei ma o tatou uso Kerisiano. E lē gata i lena, i le puleaina o i tatou lava e tusa ai ma tulafono, o le a tatou alofia ai faalavelave e lē manaomia i le va o i tatou ma pule faalelalolagi. O le a tatou olioli ai foi i se olaga faaleaiga fiafia o ni tane ma ni avā, po o ni mātua ma ni fanau. E sili atu i lena, o le tausisi i le gauai atu i le Atua, o le a tatou gaoioi ai e tusa ma le fautuaga o loo aumaia i le Faataoto 27:11: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.”

[Faaopoopoga i lalo]

Fesili Autalu

□ O ai tagata sa faaaogā e le Atua e fai ma auala o fesootaiga, ma o le ā sa nofo aitalafu ai ana auauna ia i latou?

□ I ā faiā eseese e faatatau i ai le gauai atu i le Atua?

□ O ā uiga o le a fesoasoani ia i tatou ina ia faaalia le gauai atu i le Atua?

□ O ā faamanuiaga e iʻu i ai le gauai atu i le Atua?

[Fesili mo le Suʻesuʻega]

[Ata i le itulau 16]

Sa faaaogā e le Atua le faamaopoopoga i le malumalu o Ierusalema ina ia faaoo atu ai lona finagalo i ona tagata

[Ata i le itulau 18]

Itu e mafai ai ona tatou faaalia le gauai atu i le Atua