Lipoti a Ē Faalauiloa le Malo

Sa Latou Suia o Latou Olaga

E LĒ taumate ua e vaaia i latou a latou talanoa atu i isi i magāala, e asiasi atu mai lea fale i lea fale, pe auai foi i sauniga faa-Kerisiano i o latou Maota o le Malo. O loo matou talanoa e uiga i talavou Molimau a Ieova, o ē ua onomea a latou teuga. Atonu e te faapea mai o i latou o ni Molimau ona sa aʻoaʻoina ai i latou e o latou mātua e faia faapea, ma o le tulaga lena e iai le toatele o i latou. Peitai, e iai nisi o nei talavou e matuā ese lava talaaga o o latou olaga, ma o i latou foi nei sa matuā lē tutusa olaga na latou muai ola ai, ma le olaga lea ua iai nei. O le mea moni, o i latou ua faaalia i le itulau o sosoo mai sa masani ona auaumea ma vaega o tagata sa latou faia i aso taitasi solitulafono ma le faaaogāseseina o vailaau faasāina. Na faapefea ona matuā suia atoatoa o latou olaga? Seʻi o tatou asia se aai i Nouē ma feiloai atu ai i nisi o talavou ua latou faia na suiga.

Le Faavae mo le Suiga

O le 19 ai lea o tausaga o Annette ina ua latou feiloai ma ni Molimau se toalua o ē sa talaʻi mai lea fale i lea fale. Ua ia manatua e faapea: “Sa masani lava ona faatonuina aʻu ina ia aua neʻi oʻu talanoa atu i Molimau a Ieova, peitai sa ou naunau lava e fia iloa, o lea na ou faatagaina ai i laua i totonu o le fale.” Na amata ona ia faaaogāina vailaau faasāina ae faatoʻā 11 ona  tausaga, ma sa aafia foi o ia i ni talepegā fale ma gaoigā taavale.

Sa logo mālie ia te ia le tala lelei o le Malo. Na sili ona faalaeiauina o ia i le faamoemoe o le toetu, auā na maliu lona tinā ae faatoʻā lima ona tausaga. O lea na ia talia ai se suesuega faale-Tusi Paia e fai fua, ma amata loa ona auai i sauniga i le Maota o le Malo. Na ia taʻu atu i lana uō tama ma isi tagata, mea na ia aʻoaʻoina. O le ā la latou tali mai? Sa latou matuā lē mananao i ai, ma upuvale ai ia Annette e faapea ua faavaleaina o ia. Peitai, o nisi o i latou na sa matuā sili ona tetee na mulimuli ane amata ona latou suesueina foi le Tusi Paia.

O se faataʻitaʻiga, o le taulealea talavou o Espen ua 20 ona tausaga. Na ia faalogo i le tala lelei o le Malo mai le uō tama a Annette, ma manao ai loa lava e faia sana suesuega faale-Tusi Paia. Peitai, o le taimi lea sa faatali ai o ia mo le tulia o lona faasalaga e fa masina i le falepuipui, ona sa aafia o ia i ni aumaiga faagaoi o vailaau faasāina, ma sa aafia foi i le tele o ni talepegā fale e pei o Annette. O lona mausa foi le ulaula tapaa, mariuana, ma isi vailaau faasāina. Ae o le ā na mafai ai e se tagata o lē sa aafia i na mea, ona manao ina ia amata ona ia suesueina le Tusi Paia? Na amata ona iloatino e Espen le lē aogā ma le leai o se faamoemoe o lona olaga. Ua ia faamatala mai: “Na ou tosina i folafolaga a le Tusi Paia e uiga i se lumanai o le a na aumaia ia te aʻu se faamoemoe i le olaga. Ona amata ai loa lea ona ou suesue ina ia ou iloa po o le upu moni lea na taʻuina mai ia te aʻu.”

Ua Mananao foi Isi e Suesue le Tusi Paia

O le taimi lava foi lea na faalogo ai se isi taulealea talavou i le tala lelei, o lē sa auai i le vaega lava lea, ma ia amata ai foi ona suesue ma auai i sauniga. Na sosoo ai ma le amataina o se suesuega ma le isi foi talavou o i latou lava nei, ma ia auai atu ai foi i sauniga. E leʻi umi, ae auai atu foi i ai se isi taulealea talavou i ana uō i le suesueina o le Tusi Paia ma agaʻigaʻi foi i luma faaleagaga. Na matuā ofo se isi talavou o lenei lava vaega i suiga aogā ua faia e ana uō, ma e leʻi umi lava, ae manao foi o ia ina ia suesue le Tusi Paia.

Na amata foi e Gilbert, o se talavou faimusika i le vaega lava lea, ona suesue le Tusi Paia. Na maliliu uma ona tuaā i le kanesa, o lea na faamafanafanaina ai o ia i le faamoemoe a le Tusi Paia i le toetu. (Ioane 5:28, 29) Sa ia faaaogāina foi mariuana ma ola i se olaga eleelea, ma o ona faanaunauga o le fia avea ma tagata taʻutaʻua i musika. Peitai ane, a o faagasolo taimi, sa lelei lona agaʻigaʻi i luma faaleagaga, ma e leʻi umi ae filifili loa e avea o ia ma se Molimau mo Ieova. O le iʻuga mulimuli lava, na amata e le uso laitiiti o Espen ona suesue le Tusi Paia ma auaufaatasi atu i Molimau.

E Suia Olaga Ona o le Upu Moni a le Tusi Paia

Sa matuā iloga suiga na oo i ai nei tagata talavou, o ē sa masani ona faatalalē i o latou lavalava, e lē teu leleia o latou ulu, ma sa aafia i vailaau faasāina, le gaoi, ma isi soligatulafono. Ua avea Annette o se tagata talaʻi lelei o le Malo ma sa auauna foi o se paeonia pe tusa ma se tausaga. Ua auauna faapaeonia lagolago Espen ma Gilbert, ma ua avea foi i laua o ni auauna o le faiva. Ua faaipoipo uma i laua i totonu lava o le faapotopotoga Kerisiano. O le isi toafā o ē sa muai iai i le vaega lenei, o loo avea foi ma ē maelega i le faalauiloaina o le Malo!

Ae faapefea le fa masina lea sa tatau ona tuliina e Espen i le falepuipui? Talu ai suiga o lona olaga, na suia ai lona faasalaga i le 80 itula e faigaluega ai mo le lelei lautele. Ona o le maliega mai leoleo ma isi tagata, na ia galue ai i nei itula i le Maota o le Malo o Molimau a Ieova i lena aai. Sa matuā fiafia i ai leoleo i lenei fuafuaga.

Ioe, e toatele isi tagata talavou i le lalolagi aoao e iai ni o latou talaaga o soligatulafono. Peitai o le upu moni o le Afioga a le Atua ua taliina ai a latou fesili tāua ma avatu ai se faamoemoe mautinoa mo le lumanai. Ua lē toe avea ai la i latou o ni tagata solitulafono po o ē faaaogā vailaau faasāina, ma ua latou lē toe faatalalē foi i o latou lavalava. Ona ua suia o latou olaga, ua tutusa lelei ai i latou ma tagata ua taʻua i luga—e talavou, e onomea i a latou teuga, ma o ni Molimau toʻaaga a Ieova. Latou te mananao e faailoa atu i isi vaifofo tumau a le Tusi Paia mo faafitauli ua iai i le toatele o tagata talavou i aso nei.—Tagai i le 1 Korinito 6:9-11.

[Ata i le itulau 8]

Ua talia e talavou Nouē le Upu moni