Liaʻiina le Polusione—Mai le Loto ma le Mafaufau

SA LEʻI tuuina atu e Ieova i tagata se moomooga mo ni mea eleelea ma le lē pulea. O lo la nofoaga i le paneta sa fuafuaina ina ia avea o se parataiso mamā, maopoopo, ma ia matagofie. Sa leʻi fuafuaina e le Atua e avea o se faatafunaga matagā o otaota e lē fia matamata i ai se tasi.—Kenese 2:8, 9.

Ae peitai, ina ua mavae taimi na teena ai e tagata le taʻitaʻiga mai le Atua, sa amata loa ona latou fausia sa latou lava faiga o le lalolagi.  Ona o le lē faaaogāina o le atamai mai le Atua ma le leai o se poto masani, o lea na faamalosia ai e aʻoaʻoina mea i se tulaga faigata e ala i puapuaga ma mea sese. Ua faamautinoa mai e talafaasolopito masani le moni o le Tusi Paia faapea, e lē mafai e tagata ona pulea ma le manuia i latou lava; mo le faitau afe o tausaga na “pule ai le tasi tagata i le tasi, e leaga ai o ia lava.” (Failauga 8:9; Ieremia 10:23) O ituaiga uma o faafitauli o iai i aso nei o le polusione, o se iʻuga o le lē taulau o pulega a tagata.

Talia le Finagalo o le Atua

O tagata o loo faanaunau e faafiafia le Atua, o loo taumafai malosi ina ia ola e tusa ma tapulaa tau i le tumamā a Lē na Foafoaina o ia. O lea, na fesagaʻi ai Molimau a Ieova ma se faafitauli ina ua fuafuaina le faia o se tauaofiaga faavaomalo i Prague, i Sekosolovakia, i le taulotoaiga o le 1991. * E tusa ma le 75,000 tagata na auai i ai, o se aofia sa ono mafai ona ofi lelei uma i le malae o Strahov Stadium. Ae ua tusa ma le lima tausaga e lē o toe faaaogāina lea malae. Na matuā faaleagaina lea malae i le tau ma ua i se tulaga ua lē tatau ona toe faaaogāina. Na faaaluina e nisi o Molimau a Ieova e 1,500 le sili atu i le 65,000 itula i le toe faafouina ma le toe valiina o fale o le malae. E oo atu i le taimi o le tauaofiaga, ae ua uma ona faia e lenei au faamamā le malae taalo i se nofoaga ua aogā mo le tapuaiga i le Atua moni o Ieova.

O le ā o uunaia Molimau a Ieova ina ia faaesea ai i latou, ae o loo faaalia e le lalolagi lautele sina talisapaia itiiti mo le tumamā ma le maopoopo? Ona o le talisapaia o le fautuaga a le Tusi Paia faapea e ao i Kerisiano ona liaʻiina ese uiga leaga, e pei o le manatu faapito, le lē magafagafa, le matapeʻapeʻa, ma le lē alofa. Ua faapea mai le Tusi Paia: Ia “toeseina e outou le tagata tuai atoa ma ana amio.” A ia suia i le “tagata fou, o le ua faafouina i le poto, e faatatau ia foliga i le na faia o ia.” O se uiga e faatinoina i le naunau mo le tumamā, le maopoopo, ma le matagofie, e lē fiafia i ni faanaunauga faapolusione.—Kolose 3:9, 10; 2 Korinito 7:1; Filipi 4:8; Tito 2:14.

O le tagata fou, e manaomia ai Kerisiano ina ia manatu mamafa e uiga i le polusione, ia pulea po o le usiusitai ma amanaia tulafono ua faagaoioia e malo e tetee ai i le polusione. Ua fesoasoani lenei mea i Kerisiano ina ia alofia le uiga o le soona lafoai o otaota, manatu faapito, ma le uiga paiē e oo ai ina faufaulalaʻi le otaota. O le iai o le faaaloalo mo mea totino a isi, ua taofia ai le faaaogāina o tusitusiga lē faaaloalo e avea o se auala e faaali atu ai manatu ma faalogona, faapea ua na o se mea mālie, po o se isi ituaiga ese o tusiga ata. E manaomia ai ona tausia ia mamā aiga, taavale, lavalava, ma tino ia mamā.—Faatusatusa i le Iakopo 1:21.

E tusa ai ma tagata e lē mananao e oofu i lenei tagata fou, po o le a taʻuseseina ea le Atua ona o le faasāina o i latou mai le mauaina o le ola i lana Parataiso o loo sau? E matuā leai lava. So o se tasi lava o loo natia pea ni faanaunauga lilo i lona loto mo le faapolusioneina, o le a faamataʻuina ai le matagofie toe faafoisia o le parataiso i le Lalolagi paneta, ma faapogaia ai faanoanoaga ia i latou o ē o faanaunau ina ia tausia lona tulaga mamā. O le filifiliga a le Atua ‘e faafanoina i latou o ē ua fano ai le lalolagi’ e lē gata ina amiotonu ae alofa foi.—Faaaliga 11:18; 21:8.

Po o Faia ni Gaoioiga Mataalia?

Ae peitai, po o le uiga ea la o lenei mea e faapea e manaomia ona lagolagoina e Kerisiano gaoioiga e tetee ai i le polusione po o ni gaoioiga tau le faamamāina?

E manino lava e faaleagaina e le polusione le soifua malōlōina ma le saogalemu lautele. Ua matuā talafeagai ai lava ona manatu mamafa Ieova i na mataupu, e pei ona tatou iloa mai tulafono na ia tuuina atu ia Isaraelu. (Esoto 21:28-34; Teuteronome 22:8; 23:12-14) Ae e leʻi iai se taimi na ia talaʻi atu ai i isi  tagata ni mataupu e uiga i le saogalemu lautele; e leʻi taʻuina atu foi i Kerisiano o le uluai senituri ina ia faia faapena.

I aso nei, o mataupu tau i le siosiomaga ua faigofie lava ona avea ma mataupu faapolotiki. O le mea moni, ua faavaeina nisi vaega faapolotiki ae maise lava mo le fuafuaga ina ia foia faafitauli tau i le siosiomaga. O se Kerisiano na te faatagaina o ia lava e taaʻina i le auai i ni vaega o faiga faapolotiki, ua lē o toe solitu la o ia faasaga i faiga faapolotiki. Na faataatia e Iesu mo ona soʻo lenei mataupu silisili: “E le ni o le lalolagi i latou, faapei o aʻu foi, ou te le so le lalolagi aʻu.” O se Kerisiano na te lē amanaia lena mea manaomia, ua iai la o ia i se tulaga lamatia i le faia o sana vaega faatasi ma “alii o lenei lalolagi ua faaleaogaina.”—Ioane 17:16; 1 Korinito 2:6.

Sa leʻi taumafai Iesu e foia uma faafitauli lautele i ona aso; na te leʻi taʻuina atu foi i ona soʻo ina ia latou faia faapea. O lana poloaiga ia i latou sa ia faapea atu: “O lenei, ia outou o atu e fai [tagata o] nuu uma lava ma soo, ma papatiso atu ia te i latou . . . , ia outou aʻoaʻo atu ia te i latou ia tausi i mea uma ua ou fai atu ai ia te outou.” Na te leʻi poloaia i latou e uiga i ni aiaiga tau le siosiomaga.—Mataio 28:19, 20.

I le faamatalaina po o le ā e ao ona faamuamua i le olaga faa-Kerisiano, na fetalai ai Keriso: “A ia outou muai saili le malo o le Atua ma lana amiotonu.” (Mataio 6:33) Pe a oo ina faamalosia e Ieova e ala i lona Malo Faa-Mesia ana mataupu silisili amiotonu i le lalolagi aoao, o le a foia ai fafitauli tau le siosiomaga e faavavau ma o le a faamalilieina ai tagata uma lava.

O lea, e ao ai i Molimau a Ieova ona faia se tulaga paleni. I le manatu i le Roma 13:1-7, o se mea tatau lo latou usiusitai ma le iloa lelei o tulafono faalemalo ua poloaiina ai e faatatau i le siosiomaga. E faaopoopo atu i ai, o le alofa faaleatua i tuaoi ua uunaia ai i latou e faaalia le faaaloalo mo mea totino a isi—e tusa lava po o mea faitele po o mea totino—e ala i le lē faaleagaina ma e ala i le lē soona lafoaia ma le lē mafaufau o otaota. Ae e manino lava e leʻi faatonuina i latou ina ia taʻimua i ni gaoioiga a le lalolagi o le faamamāina. Latou te faamuamua ma le saʻo le talaʻiina o le feau o le Malo o le Atua, i le iloa faapea o le auala lenei e faia ai le lelei e sili ona tumau.

Se Faamamāaga Faaleagaga

Sa lapataia pea Isaraelu anamua e uiga i iʻuga pe afai latou te faapolusioneina le lalolagi e ala i le sasaaina o le toto, e ala i le talia o se ituaiga o olaga lē mamā, po o le faaalia o le lē faaaloalo mo mea paia. (Numera 35:33; Ieremia 3:1, 2; Malaki 1:7, 8) Ma le mautinoa lava, sa taʻuleagaina i latou mo lenei faapolusioneina faaleagaga, ae e leʻi taʻusalaina i latou mo so o se polusione faaletino. *

O le mea lea, o le polusione faaleagaga po o le lē mamā faaleagaga, o le mea lena e ao i se Kerisiano i aso nei ona taumafai muamua ia aloese ai. Na te faia lenei mea e ala i le ofuina o “le tagata fou,” lea e mafai ai ona liaʻiina faanaunauga lē mamā mai le loto ma le mafaufau. E sili atu i le fa miliona Molimau a Ieova o loo maua aogā mai lenei faamamāaga faaleagaga, i le taumafai e tusa ai ma o latou tulaga ia mamā mai taaʻiga faalotu ma amio, faapea foi ma le mataʻina i le mamā faaletino.—Efeso 4:22-24.

O le taimi lenei mo se tauiviga mo le faamamāina faaleagaga. O se tauiviga faaletino mo le faamamāina o le lalolagi aoao, o le a mulimuli mai i se taimi atofaina, ma o le a faasaoina ai lo tatou aiga mai le avea o se faatafuna, i le faia ia avea o se siosiomaga mamā e tatau ai, e saoloto mai le polusione.—Failauga 3:1.

[Faaopoopoga i lalo]